Na Nona Vakadidike e Dua na Loya me Baleti Ira na iVakadinadina i Jiova

O LES CIVIN e dua na loya qai dairekita ni dua na kabani ni loya mai Sauca Aferika, e tukuna: “E lailai sara na ka au kila me baleti ira na iVakadinadina i Jiova.” Na cava a via vaqaqa kina na nodra vakabauta na iVakadinadina? Na cava e tukuna ni sa qai kila na nodra vakabauta? Qo na ka e qai tukuna ena Awake!

Na lotu cava o susugi mai kina?

Au susugi ena lotu Jiu, ia ena itekitekivu ni 1970 au a vakawatitaki Carol e lotu Jaji. E sega ni dau kauaitaka na lotu, e sega tale ga ni yaga ena neirau bula ena gauna oya na lotu. Ia ni yabaki walu o Andrew na luvei keirau tagane, a mani nanuma o Carol me keirau tuberi koya ena dua na ivakarau ni sokalou. A qai tukuna vei au e dua na rapai ke veisau o Carol me Jiu, e sa rawa ni Jiu tale ga o Andrew qai caka vua ena gauna e yabaki 13 kina na Bar Mitzvah (na soqo vakaJiu ni sa yacova e dua na yabaki ni bula e sa yalomatua kina). Keirau mani lako e veimacawa ena vuli e dau caka e valenisoro me baleti ira era veisau mera Jiu.

O sotavi ira vakacava na iVakadinadina i Jiova?

Nira gole mai na iVakadinadina e vale, au dau vakalekalekataka ga na veivosaki niu tukuna: “Au Jiu, au sega tale ga ni vakabauta na Veiyalayalati Vou.” Ia e qai tukuna vei au o Carol ni dua tiko na nona itokani iVakadinadina e kila vinaka na iVolatabu. A vakatututaka o Carol me keirau vulica mada vakalailai na iVolatabu. Au mani vakadonuya vakavoraki meu vulica na iVolatabu kei ira na iVakadinadina.

O raica vakacava na nomu vuli iVolatabu?

Au sa bau viavialevu dina. Ena gauna au lako tiko kina ena vuli me baleti ira era veisau mera Jiu, au sa qai kila vinaka kina na noqu vakabauta vakaJiu, au raica tale ga kina niu kawa digitaki. Au nanuma kina: ‘Na cava era na vakavulica vei au o ira qo?’ Ena imatai ni gauna au veitalanoa kina kei na iVakadinadina a gole mai vale, au tukuna vua: “Au Jiu ena gauna au sucu mai kina. Au sa kunea na noqu lotu, au na Jiu tiko ga me yacova na noqu mate. Ena sega ni veisautaki au e dua na ka o tukuna.” A doka na iVakadinadina oya na noqu nanuma. Koya gona, ena veibogi ni Vakaraubuka kei na Moniti, keirau dau lako ena nodra vuli o ira era veisau mera Jiu, ena veimataka ni Sigatabu (keu makutu) keirau dau vuli kina kei ira na iVakadinadina. Ia ni vakatauvatani kei na vuli e dau caka ena valenisoro, na vuli kei ira na iVakadinadina e sega ni saumi.

Au vakayagataka ga na noqu iVolatabu vakaJiu niu nanuma nira dau vakayagataka ga na iVakadinadina na ivakadewa e veiganiti kei na ka era nanuma. Ia au kidroa ni veisemati na rua na iVolatabu qo. E sa qai uqeti au ga meu cakava e dua na ka me vakaraitaka vei ira na iVakadinadina nira sega ni kila na ka era dau vakamacalataka.

Ni oti e vica na neirau vuli kei na rapai, a tukuna vei au o Carol ni sega ni kila vinaka na iVolatabu na rapai. A vakaraitaka vei au ni na sega ni lako tale ena vuli oya, ena sega tale ga ni cakitaka ni o Jisu ga na Karisito. Ena levu ni noqu rarawa, au nanuma sara ga kina me keirau sa sere. Ia ni sa seavu na noqu rarawataka na ka a tukuna o Carol, au mani nanuma meu cakava e dua tale na ka​—au na vakayagataka na noqu kilaka vakalawa meu vakadinadinataka kina vei Carol nira cala na iVakadinadina.

A lako vinaka na ka o saga qori?

E dua na rapai a solia vei au e dua na ivola me vakalasui kina na parofisai me baleta na Mesaia. E 18 na vula na neirau vulica tiko kei Carol na ivola oya, ena gauna vata qori keirau vuli tiko kei ira na iVakadinadina e veimacawa. Ia ena gauna keirau vakadikeva yadudua tiko kina na parofisai ena ivola a solia na rapai, au sa qai lomatarotaro ga vakalevu. Na parofisai kece ena iVolatabu me baleta na Mesaia e dusia tiko ga e dua​—Jisu Karisito, e veibasai sara qori mai na ka e tukuni ena ivola ni rapai. Ia sa qai vakadeitaki kece qori ena gauna keirau vulica kina na parofisai ena Taniela 9:24-27, e parofisaitaki kina ni na basika na Mesaia ena 29 S.K.a E vakayagataka na iVakadinadina na iVolatabu vakaIperiu e tiko na kena ivakadewa vakavalagi ena ruku ni vosa yadua. Au vakaraica na vosa e vakayagataki kina, au cakacakataka ga vakataki au na kena tuvai na gauna, au kaya sara: “OKEI, na parofisai qo e dusia na yabaki 29 S.K. Ia me vakacava kina?”

E tukuna sara na iVakadinadina “Oya na yabaki a papitaiso kina o Jisu.”

Au kidacala sara ga! Au qoroya tale ga na kena donu vinaka na parofisai kece vakaivolatabu qai veisemati vinaka.

Na cava na nodra nanuma o ira na nomu itokani ni sa veisau na nomu rai?

Eso era kauai vakalevu, ra qai tukuna mera veikilaitaki keirau vakaveiwatini vei ira eso era rawa ni vakaraitaka ni keirau sa vesumonataki tiko. Ia na ka keirau sa vakabauta qo e yavutaki ena neirau vakadidike vakavinaka kei na matata ga ni ivakamacala​—e veibasai sara qori ina vesumona.

Na cava o qai vakatulewataka kina mo dua na iVakadinadina?

Keirau lakova e liu vakaveiwatini na soqoni ena Kingdom Hall, sa dua tiko na iVakadinadina ena gauna oya o watiqu.b Au qoroya nira duikaikai na iVakadinadina, ia era veikauaitaki ra qai veilomani. Au se sega mada ga ni raica qo ena noqu lotu. Ni oti e rauta ni tolu na yabaki, au sa papitaiso tale ga.

Na cava o nanuma ni o sa vakatulewataka mo dua na iVakadinadina?

E ka talei dina meu tukuna: “Au dua na iVakadinadina i Jiova.” Ia niu raica lesu na noqu saqata na dina, au nanuma kina ni sega ni ganiti au na iyau vakayalo e sa solia vei au qo o Jiova. Au na sega vakadua ni veivutunitaka na vakatulewa au sa cakava.

O vakalougatataki vakacava?

E levu sara na veika vinaka au sotava. Ia dua mada ga, au vakamareqeta na noqu veiqaravi tiko qo vaka qase ni ivavakoso se ivakatawa vakayalo, au veivakavulici tale tiko ga ena noqu ivavakoso. Au dau veivuke tale ga ena valenivolavola ni tabana ni iVakadinadina i Jiova e Sauca Aferika ena nodratou tabana ni ka vakalawa. Ia na veivakalougatataki levu duadua oya na noqu mai kilai Jiova kei na Luvena, na noqu kila tale ga na gauna bibi eda bula tiko kina qo kei na veika vakadomobula sa yaco tu e vuravura.

[iVakamacala e ra]

[Tikina bibi ena tabana e 27]

Au . . . qoroya na kena donu vinaka na parofisai vakaivolatabu qai veisemati vinaka