Digovi Vuravura

Na tabana e dau vakadidike e veiyasa i vuravura me baleta na kenisa, e sa veisautaka na kena ivakamacala me baleta na misini era dau vakayagataka eso me braun kina na kuli ni yagodra. A se tukuni e liu ni “rawa ni vakavu kenisa,” ia qo sa tukuni sara ga “ni na vakavuna na kenisa.” ​—THE LANCET ONCOLOGY, IGILADI.

Ena veiya 10 na yalewa era bukete e Argentina, e le 9 vei ira qori era sega ni vinakata mera bukete.​—CLARÍN, ARGENTINA.

“Era kune tiko vakawasoma na ka bula vovou. Era tukuna na kenadau era vulica na veika bula ni rauta e 50 na kena mataqali era laurai ena dua na siga. Ena yabaki 2006 wale ga, era tukuna na kenadau ni kune kina e voleka ni 17,000 na kau kei na manumanu vovou​—qori e rauta e 1 na pasede ni 1.8 na milioni na ka bula era sa vakayacani tu.”​—TIME, MERIKA.

E iTataqomaki na Dakai?

Ke mani yaco e dua na ituvaki leqataki, ena rawa ni itataqomaki vua e dua na nona dakai? E laurai ena dua na vakadidike e caka ena Univesiti na Pennsylvania School of Medicine e Merika, ni sega ni veitaqomaki na dakai ena levu na gauna. Era raica na dauvakadidike ni “o koya e vakadakai e voleka ni vakalimataki na nona rawa ni lauvana ni vakatauvatani kei koya e sega ni vakadakai,” qori e sega ni wili kina na nodra vakayagataka na dakai na ovisa, na nona vanai koya ga e dua, kei na kena e sega ni nakiti. E laurai ena vakadidike qori ni itataqomaki vei ira eso na nodra dakai, ia e sega ni yaco qori ena levu na gauna. A qai tukuni ena macala ni vakadidike ni “gadrevi me vakasamataki qai veivosakitaki tale mada vakavinaka na nodra via vakayagataka eso na dakai me itataqomaki nira sotava na ituvaki e leqataki kina na nodra bula.”

Monk Era Vakalipstik

E tukuna e dua na tabana ni itukutuku mai Bangkok ni o ira na monk vou mai Thailand “era vakarogorogocataka na vakabauta vakaBuda” nira dau vakalipstik, e mokota sivia na yagodra na nodra isulurabe, “e sasakurekure na dibidra nira taubale ra qai vaka beki ni yalewa.” Ni leqataki na nodra itovo na monk vou era vakasalewalewa, era nanuma kina na vakailesilesi ni lotu mera vakavulici na monk vou ena itovo kilikili. E tukuna e dua na nodra italatala levu na lotu Buda ni sega ni tabu na nodra veimoceri vakamataqali vata na monk, baleta ke vakatabui “era na vakacegui e dua na iwiliwili levu ni monk.”

Nodra Sitimanivanua na Yalewa

Era dau vakasagai ira na marama mai Idia na tagane ena vica vata na yabaki era vodo voli kina ena sitimanivanua e dau osodrigi. Era dau karaci, yamoci, laukini, se wadravi. Ni levu cake tiko ga na kena kudruvaki qori, a lewa kina na matanitu ena so na gauna mera sa kua sara ga ni vodo vata kei ira na yalewa na tagane, e kaya e dua na niusiveva mai Calcutta na Telegraph. Ena va gona na siti lelevu e Idia​—New Delhi, Mumbai, Chennai, kei Calcutta​—sa tiko kina e vica na sitimanivanua e vakatokai me “Ladies’ Specials” ra qai vodo ga kina na yalewa. E tukuni nira marautaka vakalevu qori na pasidia.