Na Cava e Rui Levu Kina na Rarawa?

O IRA na iliuliu ni lotu era kaya nira kila na isau ni taro e toka ena yasana e mawi, era dau vakavuvulitaka ni itotogi ni Kalou na rarawa eda sotava. Kena ivakaraitaki, ni oti e vica na siga na kena yaco na uneune e Haiti, e tukuna e dua na italatala vei ira na lewe ni nona lotu ena vanua oya, ni uneune qori e vakavuna na Kalou. Ia eso e sega ni va qori na nodra rai. E tukuna e dua na parofesa ni lotu e Merika ni qo na ka era rairai nanuma e levu: “Na nona vakavuna na Kalou na leqa tubu koso, e sega ni yaga meda via kila. E dodonu ga me tiko vei keda na vakabauta.”

Vakacava, e “vakavuna” dina na Kalou na noda rarawa? Sega! E vakamatatataki qori ena iVolatabu. E sega ni inaki i Jiova me rarawa na kawatamata. Ia erau beca na imatai ni veiwatini na lawa ni Kalou, erau via lewa ga na ka vinaka kei na ka ca me rau cakava. Erau vakanadakuya na Kalou, rau qai sotava kina na ca ni nodrau vakatulewa. Eda sa vakila tu qo na kena ca. Ia e sega vakadua ni vakavuna na Kalou na noda rarawa. E tukuna na iVolatabu: “Ena gauna e vakatovolei kina e dua me kua ni kaya: ‘E vakatovolei au na Kalou.’ E sega ni rawa ni vakatovolei na Kalou ena ka ca, e sega tale ga ni vakatovolea e dua ena ka ca.” (Jemesa 1:​13) Eda na sotava kece na rarawa​—wili mada ga kina o ira e taleitaka na Kalou. Dikeva mada qo eso na ivakaraitaki:

● A tauvimate bibi na parofita o Ilaisa.​—2 Tui 13:14.

● E tukuna na yapositolo o Paula ni ‘waloloi tiko ga, karamaca tiko ga, e voleka ni luvaiwale, e tulevaki, e sega tale ga na nona vale.’​—1 Korinica 4:11.

● A tauvimate o Epafirotaito e dua lotu vaKarisito qai ‘lomaleqa.’​—Filipai 2:​25, 26.

E sega ni tukuni ena iVolatabu ni totogitaki ratou na turaga qori na Kalou ena vuku ni nodratou ivalavala ca. Ia e sega wale ga ni tukuna na iVolatabu o koya e vakavuna dina tiko na rarawa. E tukuna tale ga e tolu na ka e rawa ni vakavuna.

Na Noda Vakatulewa

“Na ka kece ga e kaburaka e dua ena tamusuka tale ga.” (Kalatia 6:7) Macala ga ni o koya e digia me vaka­tavako, draiva vakasausa, se vaka­sabusabu­taka na nona ilavo ena sotava na ca ni nona vakatulewa.

Eda na rairai rarawa tale ga ena vuku ni nodra vakatulewa cala eso nira dau nanumi ira ga. Io, e vakavuna ga na tamata na veivakalolomataki, mai na nodra veivakamatematei na Nazi ina nodra vakacacani na gone. Nira vakayagataka cala eso na galala ni nodra vakatulewa, era lai rarawa kina eso tale.

Ni Yaco na ka Tawanamaki

Ena imatai ni senitiuri S.K., a kasura vakasauri e dua na vale levu e Jerusalemi era mate kina e le 18. E tukuna o Jisu me baleti ira na vakaleqai: “Oni nanuma ni levu cake nodra ivalavala ca ni vakatauvatani kei ira kece e Jerusalemi? Sega sara ga!” (Luke 13:​4, 5, The New American Bible) E kila o Jisu ni sega ni totogitaki ira na Kalou. E kila na ka e vakamacalataka taumada na iVolatabu: ‘Eda dau sotava na gauna kei na veika tawanamaki.’ (Dauvunau 9:​11) Eda dau sotava e levu na leqa nida tu ena vanua kei na gauna cala se na nodra vakawelewele ga na tamata. Kena ivakaraitaki, e macala mai na so na itukutuku ni levu na leqa e yaco nira sega ni muria na lewenivanua na ivakasala qai sega ni vinaka na itaratara ni vale me rawa ni dei ke yaco na draki ca kei na uneune. Ena so na ituvaki qori, e vakavuna e levu na rarawa na leqa tawanamaki.

“Na Turaga ni Vuravura Qo”

E tukuna na iVolatabu: “E lewa tiko na Vunica na vuravura taucoko.” (Joni 12:31; 1 Joni 5:​19) Na “vunica” qori o Setani na Tevoro, e dua na ka bula vakayalo kaukaua e vakatokai me “iliuliu e lewa tu na cagi.” E uqeta o Setani “na rai era kilai kina na luve ni talaidredre.” (Efeso 2:2) E rui vakadomobula dina eso na basulawa, me vaka na veivakamatematei kei na nodra vakacacani na gone, e vakadinadinataki qori ni o Setani ga e veivakamuai tiko.

Vakacava, e kena ibalebale qori ni sega ni kauaitaka o Jiova na noda rarawa? E rawa ni vakaotia na noda rarawa?