Tuberi Luvemu ni Bera ni iTabagone

“Era na vakila na gone se bera ni yabaki lima nira taqomaki e vale, e rawarawa tale ga nira vakavulici ena itovo vinaka. Ia na gauna era sa tekivu vuli kina, ena levu sara na ka era na raica, era na rogoca tale ga e levu na ivosavosa.”—Valter, Itali.

NIRA tubu tiko na gone, era na kila eso na ka e dau yalani tu vei ira. Baleta nira sa veimaliwai vakalevu kei na so tale—o ira na dau qito vata, nodra icaba e koronivuli kei na so tale na wekadra. Me vaka ga e tukuna o Valter, ena rogoci iko tu ga o luvemu ni se gonedramidrami, ia ni sa tubu tiko me itabagone, e levu era na vakamua na nona bula. Qori na vuna e bibi kina mo vakavulici luvemu nira se gone mera talairawarawa qai vakaitovo. E bibi tale ga mo vakavulici koya ena ka e dodonu kei na ka e cala.

Na itovo kece qori e sega ni dau rawati totolo se tu tu ga sa rawati. De dua ena vinakati “mo veivunauci, mo veivakadodonutaki, mo veivakauqeti, me salavata kei na nomu vosota vakadede kei na nomu veivakavulici maqosa.” (2 Timoci 4:2) Era vakaroti na itubutubu e Isireli me baleta na lawa ni Kalou: “Mo ni gumatua ni vakavulica vei ira na luvemuni, ka dauvosataka ni kemuni sa tiko e na nomuni vale, ni kemuni sa lako voli talega e na sala, ka ni kemuni sa koto sobu, ni kemuni sa duri cake talega.” (Vakarua 6:6, 7) Na tikinivolatabu qori e vakaraitaka sara ga ni bibi me wasoma na nomu veivakavulici.

E levu sara na ka e dau vakadredretaka nodra tuberi na gone. Meda raica mada qo e vica.

Gauna me Vakarorogo Kina

E tukuna na iVolatabu ni tiko na ‘gauna meda vosa kina,’ kei na gauna meda vakarorogo kina. (Dauvunau 3:7) O na vakavulici luvemu vakacava me dau rogoci iko ni o vosa, me rogoci ira tale ga na so? Dua oya mo ivakaraitaki sara ga. Vakacava o dau vakarorogo nira vosa eso, wili kina o luvemu?

E macala ga ni na vakatovolei nomu yalovosovoso ena gauna o via vosa kina vei luvemu baleta ni dau rawarawa na nodra vakawelei. Era duidui na gone, mo vakaraica vakamalua qai vakatulewataka na sala vinaka duadua mo veivosaki kina kei luvemu. Raica mada na ivakaraitaki i David e dua na tama e Peritania, e kaya: “Au dau kerei luvequ yalewa me tukuna mai ena nona vosa ga na ka au se qai tukuna vua. Ni toso na gauna, sa qai dau vakarorogo.”

Ni vakasalataki ratou tiko na nona tisaipeli o Jisu, e tukuna: “Moni dau rogoca vinaka na ka.” (Luke 8:18) Ke vinakati mera cakava qori na uabula, sa qai bibi sara mera cakava tale ga qori na gone!

“Veivosoti Tale ga Vakarawarawa”

E tukuna na iVolatabu: “Moni dau yalorawarawa, ni dau veivosoti tale ga vakarawarawa ke dua e cudruvaka e dua na ka vua e dua tale.” (Kolosa 3:13) E rawa nira vakavulici na gone mera dau veivosoti. Ena sala cava?

Eda sa veivosakitaka mai na iwalewale ni vakarorogo vinaka, ni bibi mo ivakaraitaki sara ga. Mera raica tale ga na gone ni o dau vosoti ira tale eso. A tovolea sara ga o Marina, e dua na tina mai Rusia me cakava qori. “Keirau dau saga me keirau ivakaraitaki vinaka vei rau na gone ena neirau dauveivosoti, vakamalumalumu, me keirau kua tale ga ni cudru.” E tomana: “Niu cala, au dau kere veivosoti vei rau na gone. Au vinakata me rau cakava tale ga qori vei ira tale eso.”

Na nodra rawa ni walia eso na duidui kei na nodra dau veivosoti ena yaga sara nira sa uabula. Vakavulici luvemu ena gauna qo me dau veinanumi, me tu vakarau tale ga ni sotava na ca ni ka e cakava. Ni o cakava qori, o sa solia tiko e dua na isolisoli talei ena yaga vakalevu vua ni sa uabula.

“Dau Vakavinavinaka”

Nikua e ‘vakilai vakalevu na ka dredre,’ e levu era “dau lomani ira ga.” (2 Timoci 3:1, 2) Nira se lalai na gone, e gauna vinaka qori mera vakavulici mera dau vakavinavinaka. E vola na yapositolo o Paula: “Ni dau vakavinavinaka.”—Kolosa 3:15.

Era se rawa ga ni vakavulici na gone mera dau itovo vinaka ra qai veinanumi, dina ga nira se lalai. Ena sala cava? E tukuna o Dr.  Kyle Pruett ena mekesini na Parents: “Na sala vinaka duadua mo na vakavulici luvemu kina me dau vakavinavinaka, oya mo vakaraitaka sara ga ni o dau vakavinavinakataki ratou e vale.” E tomana: “Qori ena nomu dau vakavinavinakataka nodra veivuke se na nodra itovo vinaka . . . E ka ni sasaga toka qori.”

A tovolea me cakava qori o Richard e dua na tama mai Peritania, e tukuna: “Keirau dau vakavinavinakataka vakaveiwatini na nodra caka vinaka vei keirau eso, me vakataki ira na qasenivuli se o ira na tubuda kei na tukada. Ni keitou sureti ena dua na vuvale, keitou dau vola e dua na ivola ni vakavinavinaka, ratou dau saini tale ga kina na gone se ratou droini kina.” Nira dau yalovinaka ra qai vakavinavinaka na gone, ena vukei ira mera dau veimaliwai vinaka nira sa uabula.

“Kakua ni Tarova na Kuita”

Nira tubu tiko na gone, e bibi mera kila nira na sotava na isau ni ka era cakava. Dina nira se gone, e tiko tale eso e dodonu mera vakarorogo kina, sega ni o rau ga na itubutubu me vakataki ira na qasenivuli kei ira na veiliutaki ena vanua era vakaitikotiko kina. O rawa tale ga ni vakavulici luvemu me kila ni ka kece ga e kaburaka ena tamusuka tale ga. (Kalatia 6:7) Ena sala cava?

E tukuna na iVolatabu: “Mo kakua ni tarova na kuita.” (Vosa Vakaibalebale 23:13.) Ke o sa vakamatatataka vua ni na sotava na isau ni cala e cakava, kua ni tusuka ni kanakuitataki koya. E tukuna o Norma e dua na tina e Argentina: “E bibi dina mo dei ena ka o tukuna. Ke sega, ena cakava ga o gone na ka e vinakata.”

Me vakadeitaka sara ga o itubutubu ni kila tiko o gone ni na totogitaki ke talaidredre, qo ena sega ni veiba ena gauna e cala kina. Ena sega ni cakava na ka ca na gone ke kila tiko na lawa kei na ka ena sotava ke beca na lawa qori. Me kila tale ga ni na sotava ga na isau ni ka e cakava.

Me yaga na veivakavulici, e bibi mera vakadodonutaki vakamalua na gone. E tukuna na iVolatabu: “Me kau tani vei kemuni na yaloca, na cudrucudru, na yalokatakata, na karakara, na vosavakacaca.” (Efeso 4:31) Me kua vakadua ni caka na veivakadodonutaki ena sala ca se me vakatanitaki—se mani tau na kuita se vosataki.

Ia vakacava ke vakacudrui iko sara ga o luvemu, o na rawa ni tauri iko vakamalua? E tukuna o Peter e dua na tama mai Niusiladi: “E sega ni ka rawarawa, ia e dodonu mera kila na gone ni nodra vakadodonutaki e isau ni nodra ivalavala, sega ni vakaraitaka qori nira guce na itubutubu.”

E dau saga o Peter kei watina me rau vukei rau na luvedrau me rau raica na yaga ni veivakadodonutaki nira sa lai uabula. E tukuna: “Ena gauna mada ga erau saqata kina eso na ka, keirau dau vosa vei rau me baleta na ivakarau ni bula e dodonu me rau muria, sega ni valavala erau se qai cakava oya.”

“Me Kilai na Nomuni Yalorawarawa”

Ena nona vakadodonutaki ira nona dauveiqaravi na Kalou, e tukuna kina: “Ka’u na vakanakuitataki iko vakavinaka ga.” (Jeremaia 46:28) O na raica ni yaga sara vakalevu ke caka na veivakadodonutaki me ganita na cala e caka. E vola o Paula vei ira na lotu vaKarisito: “Me kilai na nomuni yalorawarawa.”—Filipai 4:5.

E okati ena yalorawarawa na nomu dau veivakadodonutaki ena sala me kua kina ni yalolailai na luvemu. E tukuna o Santi e dua na tama mai Itali: “Au sega ni dau vakayalolailaitaki rau na luvequ. Ia au dau saga meu kila na vu ni leqa, qai vakadodonutaki rau kina. Au sega ni dau vakadodonutaki rau na luvequ e matanalevu, ke rawa merau vakadodonutaki yadua ga. Au sega tale ga ni dau veiwalitaka na nodrau malumalumu.”

O Richard, e sa cavuti oti mai, e vakadinadinataka tale ga na yaga ni yalorawarawa. E tukuna: “Mo kua ni soqona na cala e cakava ena gauna sa oti kei na cala e caka tarava me totogitaki kina vakalevu. Ni o sa veivakadodonutaki, e vinaka mo kua ni kauta cake tiko mai na leqa oya se mo tukuna tiko ga vua na nona cala.”

E gadrevi dina na sasaga kei na vosota, ia ena rawati kina na veivakalougatataki. Qori na ka e vakila o Yelena e dua na tina mai Rusia, e tukuna: “Au cakacaka ga vagauna me levu kina na gauna au vakayagataka vei luvequ tagane. E ka ni sasaga dina baleta niu sega ni rawata kina e levu na ilavo, ia e yaga vakalevu niu raica ni marau kina na luvequ, kei na neirau sa veivolekati ga vakalevu.”

[iYaloyalo ena tabana e 11]

E rawa nira dauveinanumi na gone

[iYaloyalo ena tabana e 12]

Vakadodonutaki luvemu ena sala me kua ni yalolailai kina