Na Ka Era Tukuna na iTubutubu

Ke se bera ni vuli ena paraimari o luvemu, de dua o sotava tiko eso na ituvaki dredre. Kena ivakaraitaki, cava o na cakava ke dau yalokaukaua? O rawa ni vakavulici luvemu vakacava me vakaduiduitaka na ka e donu kei na ka e cala, me veiraurau tale ga na nomu veivakadodonutaki? Raica mada eso na ka era dau cakava na itubutubu.

YALOKAUKAUA

“Ni sa yabaki rua e dua na gone, ena vinakata me soli vua na ka ga e gadreva. Qori na ka e dau cakava o luvei keirau tagane. Ke sega ni muri na lomana ena kolotaka na ka ga e raica. Me vaka ni imatai ni luvei keirau, e vou sara ga vei keirau na ituvaki qo. Era tukuna eso ni qori e dau kena ivakarau ga, ia keirau sega ni lomavakacegu kina.”—Susan, Kenya.

“Ni yabaki rua o luvei keirau yalewa, e dau davo ena fuloa, kaikaila, tagi, qai dau teketeke . . . E vakaninivaki dina! E sega ni yaga mada ga na vosa ena gauna va oya. Keirau sa qai dau kauti koya ina nona rumu, keirau tukuna vakamalua vua ni rawa ni qai lesu mai ke sa oti na nona yalokaukaua, sa na qai vakamacalataki vua na nona leqa. Ni sa ruru na nona yalokaukaua, ena gole e dua vei keirau ena nona rumu qai tukuna vua ni sega ni vinaka na nona itovo. E yaga sara na iwalewale qo, ni dua na gauna keirau rogoca ni masu tiko vua na Kalou me vosoti koya. Ni toso na gauna sa sega so ni dau yalokaukaua, e sa tinia tale ga.”—Yolanda, Sipeni.

“Era na dau vakatovolea na gone mera raica se na yaco sara e vei na muri ni lomadra. Ia ena veilecayaki tale o gone ke vakalaivi me cakava e dua na ka a vakatabui vua e liu. Keirau raica vakaveiwatini me keirau dei tiko ga ena lawa keirau biuta, eratou qai vulica na gone ni nodratou dau kaikaila ena sega ni muri kina na lomadratou.”—Neil, Peritania.

VEIVAKAVULICI

“Ke se bera ni yabaki lima e dua na gone, ena dredre me kilai ke rogoca tiko na ka e tukuni. Ena vinakati me dau tokaruataki na ka. Mo cakava tiko qo vakavicavata, mo matanataka tale ga, me dei tale ga na rorogo ni domomu.”—Serge, Varanise.

“E dua ga na vanua eratou susu kina o ratou na va na luvei keirau, ia ratou duidui vakalevu. Ena tagi e dua ena nona kila ni sa vakacudrui keirau; e dua tale na luvei keirau yalewa ena vakatovolea me raica ke rawa ni muri na lomana. Eso na gauna keirau sa na mata cudrucudru ga se cudruvi ratou, ia eso tale na gauna eratou sa totogitaki sara ga.”—Nathan, Kenada.

“E bibi meda dei tiko ga ena noda lewa. Ia ena gauna vata qori me kua ni kaukaua tale. Eso na gauna ke veivutuni dina o gone e vinaka meda yalorawarawa da qai vakamamadataka na itotogi.”—Matthieu, Varanise.

“Au dau saga me kua ni levu na lawa au biuta, ia na kena e sa tiko au na vakamatatataka ni na sega ni veisau. E kila tiko o luvequ tagane yabaki tolu na ka ena caka vua ke talaidredre, qo e vukei koya me dau qarauna na nona itovo. Eso na gauna niu sa oca au dau raibaleta eso na ka ca e cakava, ia niu vinakata meu dei tiko ga ena lawa e vale, au na saga meu cakava e dua na ka ke cakava e dua na ka ca. E bibi meda dei ena lawa eda sa vakatura!” —Natalie, Kenada.

MO DEI ENA NOMU LEWA

“Era dau kila vinaka na gonelalai na gauna kece era sega ni dau dei kina na itubutubu ena lawa e vuvale.”—Milton, Bolivia.

“Eso na gauna, e dau duidui na taro e taroga o noqu cauravou me baleta e dua tiko ga na ka, me raica kina ke veisau na noqu isaunitaro. Ke duidui na ka au tukuna, duidui tale ga na ka e tukuna o watiqu, ena raica o gone ni sega ni dei na lawa, ena vakayagataka qori me yaco kina na lomana.”—Ángel, Sipeni.

“Ena so na gauna ni maravu tu na bula, au na sega ni kauaitaka na ka ca e cakava o luvequ, ia ena gauna au cudru tu kina au dau totogitaki koya sara vakaca. Qori sa qai yalokaukaua ga kina o luvequ.”—Gyeong-ok, Korea.

“Me kila tiko o gone ke dua na cala e cakava nikua, e se cala tu ga qori.”—Antonio, Brazil.

“Ke ra sega ni dei na itubutubu ena lawa e vakaturi ena vuvale, era na nanuma na gone ni veilecayaki na nodrau vakatulewa, oya ni vakatau tu ga ena kedrau ituvaki. Ia ke ra dei ena nodra ivakavuvuli na itubutubu, era na kila na gone ni na cala tu ga na cala kece era cakava. Qori e dua na sala era taqomaki ira kina na luvedra na itubutubu, vakaraitaka tale ga na nodra loloma.”—Gilmar, Brazil.

“E rawa nira vakayagataka vinaka na gone eso na ituvaki era kila nira na sega ni vakatulewa vinaka kina na itubutubu ra qai vakalaiva vei ira na gone mera cakava ga na ka era vinakata—me vaka na gauna era tiko kina eso tale. Keu sega ni vakadonuya na ka e vinakata o luvequ, qai cikevi au tiko ga, au na vakamatatataka vua ni na sega ni veisau na noqu lewa.”—Chang-seok, Korea.

“Me rau dau duavata ena vakatulewa na itubutubu. Ke duidui na neirau vakatulewa, keirau na veivosakitaka lo. E rawa nira kila na gone na gauna era sega ni duavata kina na itubutubu, era na vakayagataka na gauna qori me yaco kina na lomadra.”—Jesús, Sipeni.

“Ke kila e dua na gone ni rau dau duavata na itubutubu ena ka erau vakatulewataka, kila tale ga ni rau na sega ni vakamalumalumu, qo itataqomaki vua. Ena kila o koya na ka ena caka vua ke mani talairawarawa se sega.” —Damaris, Jamani.

“Keirau dei vakaveiwatini ena ka keirau vakatulewataka, qori e okati kina na neirau cakava na ka keirau dau yalataka vei luvei keirau yalewa. Ena kila kina o koya ni rawa ni nuitaka na ka keirau yalataka vua.”—Hendrick, Jamani.

“Ke dau veiveisautaka o noqu boso na ka meu cakava ena noqu cakacaka, au na cudru sara ga. Era va tale ga qori na gone. Era na lomavakacegu nira kila ni sega ni dau veiveisau na lawa e vale. Mera kila tale ga na ka ena caka vei ira nira talaidredre, ena sega ni veisau tale ga qori.”—Glenn, Kenada.

[Tikina bibi ena tabana e 8]

“Me Io na nomuni Io, me Sega na nomuni Sega.”—Jemesa 5:12

[Kato/​iYaloyalo ena tabana e 9]

ITUKUTUKU NI VUVALE

Bukete Sega ni Namaki—Veiveisau e Caka

Talanoataka o Tom kei Yoonhee Han

Tom: E se qai ono ga na vula na neirau vakawati, e qai bukete na watiqu o Yoonhee. Au sega ni vakaraitaka niu taqaya, me kua kina ni lomaleqa o Yoonhee. Ia e lomaqu, au veilecayaki sara ga.

Yoonhee: Au rarawa sara ga—au qai rere! Noqu cakacaka ga na tagi, au raica ni se sega ni ganiti au meu dua na tina.

Tom: Au raica ni se sega ni ganiti au meu dua na tama! Keirau nanuma ga ni keirau sotava duadua ga na ituvaki qo, ia ni oti na neirau veitalanoa kei na so na itubutubu keirau qai kila kina ni levu tale ga era sotava. E vukei keirau tale ga na nodra tukuna eso na itubutubu ni ka marautaki mo dua na tama se tina. Ni toso na gauna au sa sega ni rere se veilecayaki tale, ia au sa nanamaki sara tu ga.

Yoonhee: Ni sa sucu o Amanda, e levu tale na ituvaki keirau sotava. Levu na gauna e tagi tu ga, e vica tale ga na macawa noqu sega ni moce. Au sega ni dau via kana, au dau wawale tale ga. Au sega ni vinakata meu dau veimaliwai vakalevu, ia au qai liaca ni sega ni vinaka meu tu taudua ga e vale. Au sa qai veimaliwai kei ira na vo tale ni tina vou, meu veitalanoa kina kei ira e tautauvata na neimami ituvaki, qo e vukei au tale ga meu kila niu sega ni sotava duadua tiko na ituvaki qori.

Tom: Au saga me keitou dei ena neitou ituvatuva vakavuvale. Kena ivakaraitaki, me vaka ni keirau iVakadinadina i Jiova, keirau saga me keirau lako wasoma ena cakacaka vakavunau, me keirau kua tale ga ni calata na soqoni vaKarisito. Na susugi tale ga ni gone e vakayagataki kina e levu na ilavo, qori ni basika eso na ituvaki tawanamaki. Keirau vinakata me keirau kua ni vakayagataka vakasivia na neirau ilavo, me keirau kua kina ni dinau, qo ena vakavu lomaocaoca tale.

Yoonhee: Au nanuma ni na sega ni yaga meu lako ina cakacaka vakavunau ni na vakasosa na luvequ. Ia era dau taleitaka e levu mera raica na gone. Noqu kila qori e uqeti au meu lako wasoma ena cakacaka vakavunau, meu raica tale ga na yasana vinaka me baleti luvequ.

Tom: E tukuna na iVolatabu ni o ira na gone era ‘isolisoli ni Kalou’ ra qai ‘isau ni ka vinaka.’ (Same 127:3) Au raica kina nira isolisoli talei na gone. Ni soli vei keda e dua na ka, ena vakatau sara ga vei keda na ka eda na cakava kina: O rawa ni maroroya vinaka, se o rawa ni vakasabusabutaka. Au vulica ni bibi me vakamareqeti na gauna e tubu tiko kina e dua na gone, au vinakata gona meu kilai luvequ yalewa vinaka mai na gauna e sucu kina yacova ni sa lai qase, baleta ni na sega ni lesu tale mai na gauna qo.

Yoonhee: Eso na gauna e dau yaco eso na ka tawanamaki ena noda bula, ena sega kina e dua na kena leqa ke da sega ni namaka meda vakaluveni. E sa yabaki ono qo o Amanda, au sega ni kila au na bula vakacava ke yali o koya.

[iYaloyalo]

O Tom, o Yoonhee kei na luvedrau o Amanda