Digovi Vuravura

Rauta ni 17 na pasede na gonevuli e Brazil era yabaki 10 ina 13 era dau vakasaurarataki se dau vakasaurarataki ira eso tale.—O ESTADO DE SÃO PAULO, BRAZIL.

E laurai vei ira na gone yabaki 12 lako sobu na tubu ni dra, levu na uro ena sala ni dra, bukete vatu, qai leqa nodra yate. Na cava e vakavuna? Sega ni vakaukauayago, kakana sega ni solia na bula, kei na levulevu sivia.—ABC, SIPENI.

Na qaravi ni dua na gone e sucu ena 2008 me yacova ni sa yabaki 18, ena vakayagataka kina e dua na vuvale rawati ratou rauta e $221,190 ($291,570 ena gauna e tubu kina na isau ni yaya). Qori na ivakatautauvata vakacaca e vakarautaka na matanitu. —UNITED STATES DEPARTMENT OF AGRICULTURE, U.S.A.

Era sa Sega ni Qito na iTubutubu kei Luvedra

E macala mai na dua na vakadidike ga qo ni rauta ni dua na ikalima na itubutubu e Peritania era sa guilecava “na sala mera qito kina kei luvedra.” Era vakadinadinataka e rauta ni dua na ikatolu na itubutubu e kea ni vakavucesa mera qito kei luvedra, eso tale era tukuna nira rui osooso se sega sara ga ni kila na ka mera cakava. Ena macala ni vakadidike qori, e tukuna na Parofesa Tanya Byron, e dua na vuniwai ni vakasama: “E tiko e va na ka bibi era rawa nira cakava na itubutubu me marautaka kina o gone na qito: vuli, veivakauqeti, veimaliwai kei na veivosaki.” Mai na tolu na itubutubu, e dua ga ena vinakata me qito kei luvena ena komipiuta, ia e levu ga na gone era taleitaka mera qito duadua ga. E levu ga na gone yabaki 5 ina 15 era taleitaka mera qito i tuba kei na nodra itubutubu, va tale ga kina na qito me vaka na vidividi, chess kei na so tale.

Talanoa Vei Ira na Gone

Eso na tama era raica ni veivuke na Internet baleta ni sega na gauna mera talanoa kina vei ira na luvedra ni bera nira moce. E vakamacalataka na Daily Telegraph mai Serene: “Na misini vovou e katona na domoi tama ni wilika tiko e dua na italanoa, e biuta vata kei na ivakatagi kei na so tale na rorogo, qai vakauta ena e-mail vei luvena.” Ia era lomalomaruataka qori na kenadau. E tukuna o Dr.  Richard Fletcher e liutaka tiko na porokaramu me baleta na vuvale mai na Newcastle University e Ositerelia: “Nira wilika na itubutubu na italanoa vei ira na luvedra, era na qai veivolekati ga kina.” Qori e okati kina nodrau veimaliwai o tama kei luvena, nona mokoti ira, kei na nodra veidredrevaki. E tukuna o Fletcher ni yaga vakalevu na nona dabe sara ga o itubutubu me wilika kei luvena na italanoa, sega so na e-mail.