Sala mo Kua Kina ni Volivoli Vakasivia

E levu na ka e dau vakavuna meda volivoli kina vakasivia. Kena ivakaraitaki, nodra dau veisiwati na dauveivoli, na gagadre ni lomada, kei na ivakarau ni noda bula. Qo e ono na sala ena vukei keda meda kua kina ni volivoli vakasivia.

Kua ni volivoli vakaveitalia. Vakacava o dau taleitaka na volivoli, vakabibi ni lutusobu na isau ni iyaya? Ke dina qori, o na rawa ni rawai mo volivoli vakaveitalia. Ia mo kua ni rawai, e bibi mo vakasamataka vinaka na ka o via volia, na kena yaga, kei na kena maroroi. Vakasamataka tale ga eso na ka o volia ena dua na gauna sa oti o qai veivutunitaka e muri. E bibi gona mo vakasamataka vakavinaka na ka o via volia ni bera ni o volivoli.
Kua ni volivoli me seavu kina nomu rarawa. Na volivoli ena vakaseavutaka ga vakalekaleka nomu rarawa. Ia ni o rarawa ena dua tale na gauna, o sa na qai volivoli ga vakalevu mo rawa ni marau kina. Kua gona ni volivoli me seavu kina na nomu rarawa, e vinaka mo talaucaka na lomamu vua e dua na itokani nuitaki se cakava tale eso na ka me vaka na vakaukaua yago.
Kua ni gade wale tu ga ena sitoa lelevu ni volivoli. E levu nikua era dau via sarasara wale tu ga ena sitoa lelevu ni volivoli. Na veika era raica ena rawa ni uqeti ira sara ga mera volivoli. E rawa ni yaco tale ga qori ke ra vaqaqara wale tu ga ena internet. E ka vakayalomatua gona mo gole ga ena vanua ni volivoli ke o vinakata mo volia dina e dua na ka, qai tovolea mo dei kina.
Digitaka vinaka na nomu ilala. Na ivakarau ni nodra bula kei na ka era dau veitalanoataka na nomu ilala ena rawa ni vakamuai iko. Ke o raica ni o sa vakayagataka tiko vakasivia na ilavo mo tautauvata kina kei ira na nomu ilala, e vinaka mo vakailala ga kei ira era sega ni domodomoiyau, se o ira era dau vakayagataki ilavo vakayalomatua.
Vakayagataka vakayalomatua na kad ni dinau. E rawarawa na volivoli ena kad ni dinau, ia e rawa ni vakavu leqa ke sega ni qarauni. Saga mo sauma kece na ilavo o vakayagataka ena dua na vula. Kila vinaka na tubu e lavaki ena nomu kad ni dinau kei na isau ni nomu dau vakayagataka e veivula, qai dikeva eso tale na kad e sau rawarawa. Qarauna eso na kad saulevu e vakarautaki kina eso na veivuke, ia o sega ni gadreva dina. E vinaka cake mo maroroi ilavo mai na nomu volivoli vakadinau.
Kila nomu itukutuku vakailavo. O na sega ni vakayagataki ilavo vakasivia ke o dikeva wasoma na nomu itukutuku vakailavo. Cakava e dua na ituvatuva ni vakayagataki ilavo e veivula ni o raica na levu ni ilavo o rawata kei na levu ni ilavo o dau vakayagataka. Saga mo kila se vica na ilavo o sa vakayagataka qai veidutaitaka kei na ituvatuva o sa vakarautaka. Taroga e dua nomu itokani nuitaki me vukei iko ena veika vakailavo o sega ni kila.

Vakavulici Luvemu me Kua ni Volivoli Vakasivia

Era dau taketetaki ira vakalevu na gone na dauveivoli. Nikua era sa qai volivoli ga vakasivia ra qai vakayagataki ilavo vakalialia na itabagone. E veiyabaki era dau vakayagataka na itabagone mai Merika e vica vata na bilioni na dola.

Ia e tukuna e dua na dauvakadidike o Juliet Schor, ni o ira na gone era dau volivoli vakasivia, era na lomabibi, nuiqawaqawa, ra qai sega ni veimaliwai vinaka kei na nodra itubutubu. O na taqomaki luvemu vakacava? Dikeva mada qo na ka era cakava eso na itubutubu.

VEIVAKAVULICI: “E sega ni rawarawa mera taqomaki na gone mai na itukutuku ni veivoli ni sa tu vakarawarawa nikua. Keirau vakamacalataka gona vei rau na luvei keirau yalewa ni tiko na nodra inaki na dau kacivaka na ivoli. Era vinakata ga na ilavo. Era sega ni kauaitaka na ka eda gadreva dina.”—James kei Jessica.

KUA NI RAWAI: “Era na cike tiko ga na gone me voli na ka era vinakata, ia kua vakadua ni vakamalumalumu. Toso na gauna era na kila ni vakaiyalayala ga na ka ena voli vei ira. Ni se gone o luvei keirau yalewa, keirau dau veivosakitaka vakaveiwatini na sala me keirau veiraurautaka kina na ka e voli vua.”—Scott kei Kelli.

QARAUNA NA KA O RAICA: “E sega ni neitou ivakarau ni bula na sara tivi. Keitou dau cakava eso tale na ka me sosomitaka na gauna qori. Keitou dau veivuke ena vakasaqa, keitou kanavata, o ratou tale ga na luvei keirau tagane eratou dau taleitaka na wilivola.”—John kei Jenniffer.