Sa Cecere Cake o Jiova Mai na Yaloda

“SA REKITAKI ira ko Jiova era sa rerevaki koya,” e vola na daunisame. Io, e reki dina na Dauveibuli ni raici ira nona tamata nira saga mera muria dei nona ivakatagedegede dodonu. E vakalougatataki ira nona tamata yalodina na Kalou, vakauqeti ira, qai vakacegui ira ena gauna era rarawa kina. E kila nira sega ni vinaka vakaoti na tamata era sokaloutaki koya, e sega gona ni namaka vakasivia vei ira na ka.​—Same 147:11.

De na sega ni dredre meda vakadinata ni o Jiova e lomani ira kece nona tamata. Ia e so e tarai ira vakabibi nodra malumalumu nira lai nanuma kina ni na dredre sara me lomani ira o Jiova. “Au sa rui tamata ca, sa na sega tu ga ni lomani au o Jiova,” era na kaya. Sa macala ni so na gauna ena dau votu vei keda na rai cala. Ia e so vei keda, voleka ni gauna kece ga meda na veimulomulo tiko kei na nanuma ni sega ni dua na keda yaga.

Lomabibi

Ena gauna vakaivolatabu, e vica na tamata yalodina era lomabibi vakalevu. E cata na bula o Jope qai nanuma ni sa sega ni kauaitaki koya na Kalou. Ena dua na gauna ni se bera ni vakasucumi Samuela o Ana, dua na ka nona rarawataka ni yava tu qai tagi kina vakalevu. O Tevita a “vakalairoro vakalevu,” kei Epafirotaito e rarawa na yalona ni kila ni mositi ira sara ga na tacina vakayalo nodra rogoca na itukutuku ni nona tauvimate.​—Same 38:6; 1 Samuela 1:​7, 10; Jope 29:​2, 4, 5; Filipai 2:​25, 26.

Vakacava o ira na lotu Vakarisito nikua? De dua ena tarovi ira na tauvimate, nodra sa qase mai, se so tale na leqa era sotava mera sega ni cakava rawa kina nodra veiqaravi tabu ena kena levu era vinakata. De ra na nanuma kina nira sa cala vei Jiova, vei ira tale ga nodra itokani vakabauta. De dua era na beitaki ira tiko ga ena vuku ni nodra cala makawa, era sega ni vakabauta ni sa vosoti ira dina o Jiova. E so tale e yavavala vakalevu na vuvale era susu mai kina ra qai nanuma ni sa sega tu ga ni ganita mera lomani. E yaco vakacava oqo?

E so era tubu cake ena vuvale e sega ni kune kina na loloma, na yalokocokoco ga kei na lomanuiqawaqawa, qai rogo vakalevu kina na vosa gaga. De ra sega vakadua ni vakila na veituberi ni tama e dau loloma me lomani ira dina, e dau tu vakarau me tauca na vosa ni veivakacaucautaki kei na veivakayaloqaqataki, e raibaleta nodra malumalumu lalai, qai bau tu vakarau tale ga me vosota sara na nodra cala bibi. Ena vuku ni nona yalovinaka, e nuidei kina na vuvale. Nira sega vakadua ni vakila na loloma vakatama vaka oqo e vuravura, ena dredre mera liaca ni tiko e dua na Tamadra vakalomalagi e lomani ira dina.

Me kena ivakaraitaki, e vola o Fereti: “Au vakila vakalevu ena noqu bula vagone kei na noqu bula vakaitabagone na ca ni nona sega ni lomani au o tamaqu.a A sega vakadua ni bau vakacaucautaki au, keirau sega sara ga ni veivolekati. Au dau rerevaki koya.” O koya gona, me yacova mai nikua, e dina ni sa yabaki 50 vakacaca o Fereti, e se dau beci koya ga ena so na gauna. Ia o Makereta, e kaya: “Rau sega ni dau veikauaitaki na noqu itubutubu, rau sega tale ga ni dau yalololoma. Niu sa tekivu vulica gona na iVolatabu, e dredre vei au meu taura rawa ni tiko na tama e dau loloma.”

Na mataqali vakanananu vaka oya, se mani cava e vakavuna, e rawa ni kena ibalebale ni noda sokalou e sega so ni vu mai na noda lomani koya na Kalou, vakalevu ga, baleta nida lomaleqataka voli e dua na ka, se na noda ririko. Se mani vakacava na levu ni ka vinaka eda cakava, eda se sega tiko ga ni lomavakacegu. Ena levu ni noda via vakamarautaki Jiova kei ira na tacida vakayalo, sa da na lai ora wale tiko ena noda nanuma ni dodonu me levu cake na ka meda rawata. Ia nida sega ni yacova na ka eda nanuma, eda na tini beci keda kina, da qai yalolailai vakalevu.

Na cava me caka? De dua ena vinaka meda tei vakasamataka tale na levu ni nona yalovinaka o Jiova. E dua e sega ni lecava na ivalavala oqo ni Kalou na yapositolo o Joni.

“Sa Cecere Cake na Kalou Mai na Yaloda”

Ena icavacava ni imatai ni senitiuri S.K., e vola o Joni vei ira na tacina vakayalo: “Eda na kila gona e na ka oqo ni da sa dina tiko ka da na vakataudeitaka na yaloda e na mata ni Kalou e na gauna kece ga sa vakacalai keda kina na yaloda, ni sa cecere cake na Kalou mai na yaloda, ka sa kila na ka kece ga ko koya.” Na cava e vola kina o Joni na vosa oqo?​—1 Joni 3:​19, 20, VV.

E kila vinaka tu o Joni ni tamata i Jiova e rawa ni vakacalai koya ga vakataki koya e lomana. De dua sa yacovi Joni sara ga na ka oqo. E dau yalototolo ni se cauravou, e vunauci koya kina o Jisu Karisito ena so na gauna ni sa rui kaukaua nona vosa se ivalavala vei ira na tani. Ni a vakayacani Joni mada ga kei Jemesa na tacina o Jisu ena yaca “Poanaji, a kenai balebale, A luve ni kurukuru.”​—Marika 3:​17; Luke 9:​49-​56.

Ena 60 na yabaki e tarava, e vaka me malumu mai na ivalavala i Joni, e sa lotu Vakarisito yalomatua, e dau loloma qai dau yalovosovoso. Ena gauna e qai vola kina na imatai ni nona ivola uqeti vakalou, me vaka ni o koya na iotioti ni yapositolo me se bula tiko, sa kila o koya ni o Jiova e sega ni nona ivalavala me qaqai ira nona tamata ena nodra cala lalai kece ga. Na kena veibasai ga, ni o koya e Tama dau veikauaitaki, lomasavu, yalovinaka, qai dau yalololoma, e lomani ira vakabibi na tamata era lomani koya ra qai sokaloutaki koya vakaidina. E vola o Joni: “Sa loloma na Kalou.”​—1 Joni 4:8.

Rekitaka o Jiova na Ka Eda Cakava Ena Vukuna

E dau veinanumi na Kalou ni kila o koya na malumalumu kei na ca eda sucukaya mai. “Ni sa kila ko koya na nodai bulibuli; sa nanuma ga ni da sa kuvu-ni-soso,” e vola o Tevita. Sega ni lecava o Jiova ni rawa ni vakayacoka vakalevu ena noda bula na ivalavala ni noda susugi. Ni o koya e kilai keda cake vakavinaka mai vei keda.​—Same 103:14.

E kila ni levu vei keda eda via vakavinakataki keda cake, ia e dredre meda valuta noda malumalumu. Na keda ituvaki e rawa ni vakatauvatani kei na kena e tu kina na yapositolo o Paula ni a vola: “Na ka vinaka ka’u sa vinakata, au sa sega ni kitaka; ia na ka ca ka’u sa sega ni vinakata, au sa kitaka ga.” O keda kece eda sotava tiko na bula dredre oqo. Oqori na vuna e vaka meda dau vakacalai keda tiko ga kina ena so na gauna.​—Roma 7:​19.

Ia kua vakadua ni guilecava oqo: E bibi cake sara na ivalavala e raici keda kina o Jiova, sega ni noda rai ga. Ni raica mai na noda sasaga meda vakamarautaki koya, e sega ni lomavakacegu wale ga kina, ia e reki sara ga vakalevu. (Vosa Vakaibalebale 27:11) Ena noda rai, de sega soti ni levu na ka eda rawata, ia ni raica o Jiova na noda yalogu kei na inaki eda sasagataka kina na ka eda rawata, dua na ka nona marautaka. E sega ni raica wale ga na ka eda rawata; e kila na ka eda vinakata dina meda cakava; e taura rawa na ka eda gadreva. E kila vinaka o Jiova na ka e tiko e lomada.​—Jeremaia 12:3; 17:10.

Me kena ivakaraitaki, e levu na iVakadinadina i Jiova era tamata mamadua, ra sega ni rawata na vosa, ra dau vinakata mera tu ga vakamalua. E dau ka ni bolebole kina vei ira mera vunautaka na itukutuku vinaka e veivale. Ia ni lomadra mera qarava na Kalou, mera vukei ira tale ga na tamata, era vulica kina o ira na tamata mamadua vaka oya mera torovi ira na tamata mera veivosakitaka kei ira na iVolatabu. De ra nanuma ni lailai sara na ka era rawata, qai vakavuna nodra lomararawa. De na votu mai lomadra na vakanananu ni sega ni yaga na nodra cakacaka vakaitalatala. Ia o Jiova e rekitaka dina na nodra sasaga levu ena vuku ni nodra sokalou. Kena ikuri, era sega tale ga ni kila se ni naica se vanua cava ena qai kadre kina na sore ni ka dina era sa kaburaka, me tubu, qai vakavuana sara.​—Dauvunau 11:6; Marika 12:​41-​44; 2 Korinica 8:​12.

E so tale na iVakadinadina era tautauvimate se ra sa qase mai. Nodra lakova wasoma na soqoni ena Kingdom Hall e lako vata toka na mosi kei na oca. Nira rogoca na vakamacalataki ni cakacaka vakavunau mai na buturara, era na vakasamataka sara na ka era dau rawata e liu kei na ka era se vinakata tiko ga mera cakava, ia sa mai vakamalumalumutaki ira na ituvaki ni nodra bula. De dua ena ca na lomadra nira sa sega ni muria rawa na ivakasala me vaka era dau cakava e liu. Ia e talei ga vei Jiova nodra yalodina kei na nodra vosota. Kevaka era dina tiko ga, ena sega sara ni guilecavi na nodra yalodina ena veigauna sa oti.​—Same 18:25; 37:28.

“Vakataudeitaka na Yaloda”

Rairai sa qai taura vakavinaka o Joni na levu ni nona yalovinaka na Kalou ni sa qase sara. Nanuma ni a vola: “Sa cecere cake na Kalou mai na yaloda, ka sa kila na ka kece ga.” A uqeti keda tale ga o Joni meda “vakataudeitaka na yaloda.” Na cava beka e vakaibalebaletaka?

Me vaka e kaya na Vine’s Expository Dictionary of Old and New Testament Words, na vosa vakirisi e vakadewataki me “vakataudeitaka” e kena ibalebale “mo rawa ena vosa se mo cikeva, mo vakamasuta.” Kena ibalebale ga oqo ni noda vakataudeitaka na yaloda ena vakatau vakalevu ena noda rawa na yaloda me vakabauta ni o Jiova e lomani keda dina. Ena sala cava?

O Fereti, sa cavuti oti mai, e sivia na 25 na yabaki nona veiqaravi voli vaqase ena dua na ivavakoso ni iVakadinadina i Jiova e kunea ni nona dau vuli vakataki koya e vakataudeitaka na lomana me ciqoma ni lomani koya dina o Jiova. “Au dau vulica e veigauna, au vulica tale ga vakavinaka na iVolatabu kei na noda ivola. E vukei au qo meu kua kina ni lesuva tiko ga na ka sa oti, ia me makare tiko ga na noqu raica na veigauna uasivi sa tu mai liu. E dau bikai au vakalevu ena so na gauna niu nanuma noqu malumalumu sa oti, au lai nanuma kina ni na sega ni lomani au vakadua na Kalou. Ia au raica ni vinaka vei au meu dau vuli vakawasoma, ni vakaukauataka na lomaqu, e dei cake kina noqu vakabauta, qai vukei au meu mamarau tiko ga.”

E dina ni na sega ni veisautaka sara na ituvaki eda tu kina noda wili iVolatabu kei na noda vakasamataka na ka eda wilika. Ia ena rawa ga ni veisautaka na ivalavala ni noda raici keda. Nida tugana i lomada na Vosa ni Kalou, ena rawarawa kina meda lai vakasama vakataki koya. Ena noda dau vuli tale ga, ena qai matata cake ga kina vei keda na levu ni nona yalovinaka na Kalou. Sa na rawarawa vei keda meda ciqoma ni sega ni beitaki keda o Jiova ena vuku ni veika eda sotava nida se gone, se beitaki keda ena vuku ni malumalumu ni yagoda. E kila na levu ni icolacola eda colata tu, se ra icolacola ni yaloda se yagoda, e sega ni bale vakatabakidua vei keda oya, oqori na vuna e dau nanumi keda kina vakayalololoma.

Vakacava o Makereta, sa cavuti oti mai? Ni sa kilai Jiova, e mai yaga tale ga vakalevu vua nona vulica na iVolatabu. Me vakataki Fereti ga, e vinakati vei Makereta me veisautaka nona rai me baleta na tama. Na masu e qai vakataudeitaka vei Makereta na ka e vulica. “Ni se qai tekivu, au raici Jiova mada me vaka e dua noqu itokani dredre, niu a kila na vinaka ni vakaitokani sega soti na vinaka ni vakatamani dau loloma. Lakolako, au vulica meu sovaraka vei Jiova na lomaqu, noqu lomalomarua, lomaocaoca kei na leqa. Au vosa wasoma vua ena masu, ena gauna vata oya au vakasotara vata na ka vou kece au vulica me baleti koya, vaka beka e vica na tikitikinisulu era biubiu vata qai votu na iyaloyalo. Toso na gauna, toso vata kei na noqu volekati Jiova, ia me yacova nikua, e sega ni dredre vei au meu qai wiliki koya me Tamaqu dau loloma,” e kaya o Makereta.

Galala Mai na Lomaocaoca Kece Ga

Na balavu ga ni gauna ena cici tiko kina na ivakarau ni veika ca oqo, sa na bau dredre me nuitaka e dua me kunea na bula e sega kina na lomaocaoca. Kena ibalebale oqo, mera kila tiko e so na lotu Vakarisito ni na tiko na gauna era na baci lomaocaoca se nuiqawaqawa kina, ena vakamosia na yalodra. Ia meda nuidei ga ni o Jiova e sega ni lecava ni vinaka tiko na inaki ni lomada kei na noda cakacaka vakaukaua ena vukuna. Ena sega sara ni guilecava na ka eda cakava me ivakaraitaki ni noda lomana na yacana.​—Iperiu 6:​10.

Ena vuravura vou sa roro tiko mai ena veiliutaki kina na Matanitu Vakamesaia, era na vakila na tamata yalodina kece ga na galala levu mai na veika bibi e dau bikai ira tu ena ivakarau ni veika i Setani. Sa na wacava na noda bula vakacegu! Eda na qai raica votu ga kina na levu ni nona yalovinaka o Jiova. Me yacova na gauna oya, meda kila tiko ni “cecere cake na Kalou mai na yaloda, ka sa kila na ka kece ga.”​—1 Joni 3:​20, VV.

[iVakamacala e ra]

[Tikina bibi ena tabana e 30]

Sega ni veivakasaurarataki na lewa i Jiova, e levu nona yalovinaka, e Tama dau loloma

[iYaloyalo ena tabana e 31]

Ni vulici na Vosa ni Kalou, e yaga oqori meda vakasama tale ga vakataki koya