Nuitaki Jiova na Kalou Dina

O sa bau dagava na lomalagi ena bogi qai raica e vica vata na drau na kalokalo? Era lai tu vakacava e kea?

ENA vakanomodi ni bogi, e vaka mera vosa vei Tui Tevita na kalokalo qai uqeti koya me vola: “Sa tukuna na lagilagi ni Kalou ko lomalagi; ka sa vakatakila na cakacaka ni ligana na maliwa levu.” (Same 19:1) Io, na Dauveibuli e dodonu me ‘ia vua na vakarokoroko kei na veidokadokai, kei na kaukaua,’ sega ni veika e bulia.​—Vakatakila 4:​11; Roma 1:​25.

“Ko koya sa tara na ka kecega sa Kalou,” e kaya na iVolatabu. (Iperiu 3:4) Na Kalou dina, na ‘yacana o Jiova, sa cecere duadua ga e vuravura taucoko.’ (Same 83:18) E sega ni ka lasuwale. O Jisu e tukuni Tamana vakalomalagi o Jiova: “Sa dina ko koya sa talai au mai.”​—Joni 7:​28.

Jiova​—E Dauvakayacora Nona iNaki

E cavuti vaka7,000 na yaca talei ni Kalou, o Jiova, ena iVolatabu Vakaiperiu mada ga. Na yaca oya e vakaraitaka ni bula dina. Na ibalebale ni yaca ni Kalou “O Koya e Vakavuna me Yaco.” E vakatakilai koya na Kalou o Jiova me Dauvakayacora nona inaki. Ni taroga na Kalou o Mosese me tukuna na yacana, e sereka vaka oqo o Jiova na kena ibalebale: “Au lewai au ga vakai au.” (Lako Yani 3:​14, NW) E kaya na ivakadewa i Rotherham: “Au na yaco ga meu vaka au vinakata.” E dau vaka oqo na itovo i Jiova me rawa ni vakayacora kina nona inaki kei na nona vosa ni yalayala. Oqori na vuna e levu kina na kena icavuti me vaka na Dauveibuli, Tama, Turaga Sau, iVakatawa, Jiova ni lewevuqa, Daurogo masu, Turaganilewa, Dauniveivakavulici Levu, kei na iVakabula.​—Dauveilewai 11:27; Same 23:1; 65:2; 73:28; 89:26; Aisea 8:​13; 30:20; 40:28; 41:14.

Na Kalou dina ga e rawa ni vakatokai ena yaca Jiova, nira sega ni vakadeitaka na tamata ni na vakayacori na ka era nakita. (Jemesa 4:​13, 14) E rawa ni kaya duadua ga o Jiova: “Ka me vaka sa tau sobu na uca, kei na uca vulavula mai lomalagi, ka sa sega ni lesu tale yani kina, ia sa vakasuasuataka mada ga na qele, ka vakabulabulataka ka me kubu, me vuataka kina na sila vua sa kaburaka, kei na madrai vua sa kania: ena vaka talega kina na noqu vosa ka’u sa vosataka yani; ena sega ni lesu tale wale vei au, ena vakayacora mada ga na ka ka’u sa vinakata, ka daucaka yaco e na ka ka’u a tala kina.”​—Aisea 55:​10, 11.

E cakava vakamaqosa o Jiova nona inaki ni veika mada ga ena rairai sega ni ka dina vei ira na tamata ena ka dina vua. Ni ratou sa mate makawa o Eparama, Aisake, kei Jekope, e cavuti iratou o Jisu qai kaya: “Ni sa sega ni nodra Kalou na mate ko koya [o Jiova], a nodra ga era sa bula tiko; ni ra sa bula kecega vei koya.” (Luke 20:​37, 38) Ratou sa mate na tolu na peteriaki, ia na inaki ni Kalou me vakaturi iratou se kaukaua vinaka tu ga ni vaka ga eratou se bula tiko. E rawarawa vei Jiova me vakabulai iratou tale na tolu nona dauveiqaravi yalodina me vaka ga nona bulia na imatai ni tamata mai na kuvunisoso.​—Vakatekivu 2:7.

Na yapositolo o Paula e tukuna tale e dua na ivakaraitaki ni Kalou ni dau cakava na ka e nakita. Ena iVolatabu, e vakatokai o Eparama me “tamadra na veivanua e vuqa.” (Roma 4:​16, 17) Ni se bera ni vakaluveni o Eparama, a veisautaka na yacana o Jiova me o Eparaama, e kena ibalebale “Tama ni Lewevuqa.” A vakayacora dina vakacakamana o Jiova na ibalebale ni yacana ni vakabula tale nodrau kaukaua ni vakatubukawa na qase o Eparama kei Sera na watina sa kena marama.​—Iperiu 11:​11, 12.

Ena kaukaua kei na lewa e tu vua, e rawa kina vei Jisu Karisito me tukuna na ka e dina ena rai e uasivia na rai ni tamata. Dina ni sa mate o Lasarusa na nona itokani voleka, e kaya o Jisu vei ira nona tisaipeli: “Sa moce na wekada ko Lasarusa; ia ka’u sa lako me’u vakayadrati koya.” (Joni 11:11) Na cava e kaya kina o Jisu ni moce no na tamata sa mate?

Ni yaco o Jisu i Pecani na koro i Lasarusa, e lako sara ina ibulubulu qai vakarota me kau laivi na vatu e sogo tu kina. Ni masu oti vakadomoilevu, e vakarota sara: “Lasarusa, lako mai.” Ni coba matua toka na matadra na vakararai ena ibulubulu, “ko koya ka mate sa lako mai, ka viviraki tu na ligana kei na yavana e nai sole ni mate: ka viviraki na uluna e na dua nai tavoi.” Sa qai kaya o Jisu: “Dou sereki koya, ka laiva me lako.” (Joni 11:​43, 44) E vakaturi Lasarusa o Jisu​—ni vakabula na turaga sa oti e va na siga nona mate! E sega ni vakaibalebaletaka cala o Jisu ni kaya ni moce tiko nona itokani. Mai na rai i Jiova kei Jisu, e vaka ga e moce tiko o Lasarusa sa mate. Io, o Jisu kei na Tamana vakalomalagi erau cakava na ka e dina.

Rawa ni Vakavatukanataka o Jiova Noda iNuinui

Dua na duidui levu e kunei vei ira na matakau dauveivakacalai kei na Kalou dina! O ira era sokaloutaka na matakau era kaya ni tu vei ira na matakau oqo na kaukaua levu. Se vakacava nodra dokai, e sega ga ni solia na kaukaua mana vei ira na matakau oqo. Ena yasana adua, o Jiova na Kalou e rawa ni kaya nira bula tiko nona dauveiqaravi sa ra mate makawa ni rawa vua me vakabulai ira tale. O “Jiova ga na Kalou dina,” qai sega ni veidabuitaki ira nona tamata.​—Jeremaia 10:10.

E veivakacegui dina meda kila ena nona gauna lokuci o Jiova, era na vakaturi o ira na mate e se nanumi ira tiko mera bula tale! (Cakacaka 24:15) Io, na veivakaturi e okati kina na vakalesui tale mai ni nona itovo e dua. Na nanumi ni nodra itovo na sa mate kei na nodra vakaturi e sega ni dredre vua na Dauveibuli, e tawavakaiyalayala nona vuku kei na nona kaukaua. (Jope 12:13; Aisea 40:26) Ni levu nona loloma o Jiova, ena vakabulai ira tale na mate mera bula ena vuravura parataisi vata kei na itovo vata ga a tu vei ira ni bera nira mate.​—1 Joni 4:8.

Ni sa vakarau rusa na vuravura i Setani, sa qai dei ga na gauna se bera mai vei ira era nuitaka na Kalou. (Vosa Vakaibalebale 2:​21, 22; Taniela 2:​44; 1 Joni 5:​19) E vakadeitaka vei keda na daunisame: “Malua mada vakalailai, ena qai takali na tamata ca; . . . ia ko ira na yalomalumalumu era na taukena na vanua; ka na daumarau tiko e na veivakacegui vakaidina.” (Same 37:​10, 11) Na basulawa kei na itovo kaukaua sa na itovo ni gauna makawa. Ena qaqa na lewadodonu, qai vakaoti vakadua na dredre ni bula vakailavo. (Same 37:6; 72:​12, 13; Aisea 65:​21-​23) Sa na oti vakadua na veivakaduiduitaki. (Cakacaka 10:​34, 35) Sa na oti tale ga na ivalu kei na iyaragi ni ivalu. (Same 46:9) Ena gauna oya “na lewe ni koro ena sega ni kaya, ka’u sa tauvi mate.” (Aisea 33:24) Tamata kece era na marautaka na bula vinaka. (Vakatakila 21:​3, 4) Sa na vakarau yaco dina na vuravura me parataisi. Sa nakita me vaka kina o Jiova!

Io, sa vakarau vakayacori kece na inuinui e yavutaki ena iVolatabu. Na cava meda vakacalai kina ena veika e sokaloutaki tu ena vuravura oqo ni rawa ga nida nuitaki Jiova? E lomana me “bula na tamata kecega, ka mai kila sara nai vakavuvuli dina.” (1 Timoci 2:​3, 4) Mai na noda solia noda gauna kei na iyau ena veika lasuwale ni ituvaki oqo kei na kena veikalou, me tubu mada ga noda kila na Kalou dina da qai nuitaki koya ena lomada kece.​—Vosa Vakaibalebale 3:​1-6; Joni 17:3.

[iYaloyalo ena tabana e 6]

Ena nodrau rai o Jiova kei Jisu, a moce wale toka ga o Lasarusa

[iYaloyalo ena tabana e 7]

Ena yaco dina na vuravura me parataisi