O Nuitaka na Kalou Dina?
Sa biubiu na ilakolako e tuvanaka na American Museum of Natural History me lai raica na vanua e kainaki ni a kunea na dauvakadidike o Robert E. Peary ena vitu na yabaki yani e liu, ena 1906.
MAI Cape Colgate ena vuaicake sara kei Noca Amerika, e raica kina o Peary na ka e rairai vaka na dela ni ulunivanua cecere vulavula ni dua na vanua yawa. E vakatoka me Crocker Land, me veiyacani kei na dua e dau tokoni koya vakailavo. Dua na ka nodra marau na lewe ni ilakolako oqo nira sa raica na veidelana, buca, kei na ulunivanua e solegi tu ena ucacevata! Ia eratou qai kila e muri ni ratou raica wale tiko ga na kabukabu ni vanua na Arctic. Na ka vata ga oqo e vakacalai Peary. Eratou vakalusia kina na nodratou gauna, igu, kaukaua, kei na iyau me ratou vakadikeva na ka e sega ni dina.
Nikua, levu era solia nodra bula kei na nodra gauna vei ira na kalou era nanuma ni ka dina. Ena nodra gauna na yapositolo i Jisu, era sokaloutaka na kalou me vakataki Eremesi kei Seusi. (Cakacaka 14:11, 12, VV) Nikua, e vica vata na milioni na kalou era sokaloutaka na lotu Shinto, Idu, kei na so tale na lotu e vuravura. Me vaka e kaya na iVolatabu, era “lewe vuqa na kalou, ka lewe vuqa talega na turaga.” (1 Korinica 8:5, 6) Era dina kece na veikalou oqo?
Kalou Era ‘Sega ni Veivakabulai Rawa’
Dikeva mada me kena ivakaraitaki, na vakayagataki ni matakau kei na ivakatakarakara ena sokalou. O ira era nuitaka se ra masu nira vakayagataka, e vaka mera ivakabula na matakau e tu vei ira na kaukaua levu e rawa ni vakaicovitaki ira na tamata se vueti ira mai na leqa. E rawa nira veivakabulai dina? Ena ka oqo, e lagata na daunisame: “A nodra matakau na veimatanitu na siliva kei na koula, na cakacaka ni liga ni tamata. Era sa vakagusuna, ka ra sa sega ni vosa rawa; era sa vakamatana, ka ra sa sega ni rai rawa; era sa vakadaligana, ka ra sa sega ni rogo rawa; ka sa sega nai cegu e na gusudra.” Era ‘sega ni veivakabulai rawa.’—Same 135:15-17; Aisea 45:20.
E dina, o ira era bulia na matakau era nanuma ni bula qai kaukaua. O ira era sokaloutaka na matakau era nuitaka. E kaya na parofita o Aisea: “Era sa tauca [na matakau] ki domodra, era sa colata voli; era sa viritura e na kenai tutu, a sa tu ga.” E kuria: “Ena sega ni lako tani mai na kenai tutu: io, e dua sa na kaci vua, ka sa sega ni rogo mai; se vakabulai koya mai na nona rarawa.” (Aisea 46:7) Na kena dina ni na mate tu ga na matakau ke mani kaukaua vakacava nodra vakabauta o ira era nuitaka. Na matakau kei na ivakatakarakara vaka oqo era “kalou tawayaga.”—Apakuki 2:18, NW.
E laurai vakalevu nikua nodra vakatotomuri, dokai, se taleitaki na dauveivakamarautaki, dauqito rogo, veika vakapolitiki, kei na so na iliuliu ni lotu. Kena ikuri, e kalou tale ga na ilavo vei ira e levu. Ena tikina kece oqo, e nanumi ni tu vei ira oqori na itovo kei na ivakarau era sega dina ni taukena. Era sega ni rawa ni solia na ka era nuitaka o ira era vakabauti ira. Me kena ivakaraitaki, na iyau ena rairai walia e levu na leqa, ia e dauveivakaisini. (Marika 4:19) E taroga e dua na dauvakatataro: “Eda na vakamacalataka vakacava na ka era gadreva vakalevu na tamata era vakabauta ni na vakaotia na leqa kece, ia e sega ni kauta mai na marau qai vakavuna na lomaleqa?” Io, na qarai ni iyau ena rairai vakuai koya kina e dua mai na ka e yaga, me vaka na bula vinaka, na vuvale mamarau, na veitokani voleka, se na veiwekani talei kei na Dauveibuli. E ‘ka lasuwale’ kece na ka e qara!—Jona 2:8.
‘Sa Sega e Dua e Vosa Mai’
E ka vakalialia meda vakatoka me dina na ka e lasu. Era vulica na ka oqo ena sala mosimosi o ira era sokaloutaka na kalou o Peali ena gauna i Ilaija na parofita. Era vakabauta dei ni tu vei Peali na kaukaua me tala mai na bukawaqa mai lomalagi me kania na isoro manumanu. “A ra sa qai masu ki na yaca i Peali e na mataka, ka sigalevutaka, a ra sa kaya, I Peali, mo rogoci keimami mai.” E vakadaligana o Peali me rogoca kei na gusuna me vosa rawa? E kuria na kena itukutuku: “A sa sega na domo e rorogo, se dua e vosa mai.” ‘A sa sega e . . dua e rogoca.’ (1 Tui 18:26, 29) A sega ni dua na ka dina o Peali, me bula, se yavala.
E bibi dina meda kila da qai sokaloutaka na Kalou dina! Ia o cei o koya? Ena yaga vakacava vei keda, ke da nuitaki koya?
[iYaloyalo ena tabana e 3]
E vakaraica na vunilagi o Egingwah na itokani i Peary me raica na vanua mamaca
Robert E. Peary
[Credit Line]
Egingwah: From the book The North Pole: Its Discovery in 1909 Under the Auspices of the Peary Arctic Club, 1910; Robert E. Peary: NOAA
[iYaloyalo ena tabana e 4]
Levu era vakacalai ena veika e sokaloutaki e vuravura