Taro na Dauwiliwili

Na cava e tukuna kina na Iperiu 2:14 (NW), ni “rawa ni vakavuna na mate” o Setani?

Vakalekaleka sara, a vakaibalebaletaka o Paula, ni rawa vei Setani me vakavuna na nona mate e dua, mai na nona cakava sara ga o koya, se nona vakayagataka e dua vei ira na nona liganicakacaka. Sa rauta bagi me vakatokai Setani o Jisu me “dauveivakamatei mai nai vakatekivu.”​—Joni 8:​44.

Ia, e rawa ni vu ni lomatarotaro na sala e vakadewataki kina na Iperiu 2:14 ena so na ivakadewa ni iVolatabu, nira kaya ni o Setani e “lewa na mate” se tu vua na “kaukaua me veivakamatei.” (iVolatabu Vakaviti; Revised Standard; New International Version; Jerusalem Bible) Na ivakadewa vaka oqo e rawa ni vakavuna na vakasama, ni tu ena liga i Setani na kaukaua me vakamatea kina e dua rawa ga e lewa me vakamatea. Ia e sega ni vaka kina. Ke tu vei Setani na kaukaua oqo, e sega ni vakabekataki ni rairai sa na vakawabokotaki ira makawa na tamata i Jiova mai na dela i vuravura.​—Vakatekivu 3:​15.

Ena so na ivakadewa ni iVolatabu, na vosa vakirisi na “kraʹtos tou tha·naʹtou” e vakadewataki, “kaukaua me veivakamatei,” se me vaka e vakadewataki ena New World Translation, “rawa ni vakavuna na mate.” Na vosa na tou tha·naʹtou e rawa ni cavuti me “mate.” Ia na kraʹtos e kena ibalebale na “kaukaua, igu, se qaqa.” Kaya gona kina na ivolavosa na Theological Dictionary of the New Testament ni kena vakasama, “oya na kena taukeni na kaukaua se igu, e sega ni kena vakayagataki.” Kena ibalebale, ni sega ni kaya tiko o Paula ena Iperiu 2:​14, ni vakatau vakatabakidua vei Setani na mate. Ia e dusia tiko ga ni rawa, se tu vei Setani na kaukaua me vakavuna na mate.

E ‘vakavuna rawa’ vakacava o Setani “na mate”? Ena ivola i Jope, eda wilika kina e dua na veivakamatei e duatani sara a cakava o Setani. Tukuna na kena itukutuku ni o Setani a ‘vakavuna na nodratou mate’ na luve i Jope ni vakaliwava na cagi kaukaua. Ia, dikeva ni rawa ga ni vakayacora oqori ni a vakatara vua na Kalou, na vuna ni a vauci tiko kina na kena vakadinadinataki e dua na ile ni bolebole. (Jope 1:​12, 18, 19) Io, a sega ni rawa ni vakamatei Jope o Setani, ni sega ni vakatarai me cakava oya. (Jope 2:6) E vakaraitaka oqo, ni so na gauna, a vakavuna rawa o Setani na nodra mate na tamata yalodina, ia e sega ni dodonu meda rere, ni sega ni rawa me na muduka na noda bula ena gauna ga e lomana kina.

E vakavuna tale ga o Setani e so mera mate ena nona vakayagataki ira na tamata me nona liganicakacaka. Levu gona kina na lotu Vakarisito era mate ena vuku ni nodra vakabauta. E so era mate ena ligadra na ilawalawa dauvakacaca cudrucudru, se na nodra vakarota vakatawadodonu e so na iliuliu vakamatanitu se turaganilewa lawakica mera totogimate.​—Vakatakila 2:​13.

Ena so tale ga na gauna, e vakayagataka o Setani na malumalumu vakatamata me vakavuna na mate. Oya e dua na ka a yaco ena nodra gauna na Isireli. A vosa vei ira na kai Moapi na parofita o Pelami mera lai bacani ira na Isireli, mani vakavuna “na nodrai valavala ca [na Isireli] vei Jiova.” (Tiko Voli Mai na Lekutu 31:16) Ra mani mate kina e sivia e 23,000. (Tiko Voli mai na Lekutu 25:9; 1 Korinica 10:8) Nikua, e so tale ga era rawai ena “[i]lawaki” i Setani, ra vecei kina ina veidauci se ina so tale na ivalavala tawavakalou. (Efeso 6:​11) Dina nira sega ni mate ena gauna vata ga era cala kina, ia e rawa nira vakuai ena bula tawamudu. Rawa gona ni tukuni, ni vakavuna o Setani na nodra mate.

O koya gona, eda kila ni rawa ni vakavuna o Setani na noda leqa, ia e sega ni dodonu meda rerevaki koya. Ena nona tukuna o Paula ni rawa ni vakavuna o Setani na mate, me kua ni guilecavi ni a tomana nona vosa ena nona kaya ni mate i Karisito e “vakamalumalumutaki [Setani] . . . me sereki ira talega era vaka na bobula e na nodra bula voli taucoko ni ra sa rerevaka na mate.” (Iperiu 2:​14, 15) Io, a sauma o Jisu na ivoli, sa sereki ira gona kina na kawatamata vakabauta mai na bobula ina ivalavala ca kei na mate.​—2 Timoci 1:​10.

E vakavure vakasama nida vakananuma ni rawa ni vakavuna na mate o Setani, ia eda lomanuidei ni rawa vei Jiova me veisautaka me vinaka na ca cava ga e via cakava o Setani kei ira na nona liganicakacaka. Ni vakadeitaka vei keda o Jiova, ni sa vakaturi oti o Jisu, sa na “vaqeavutaka [dina ga] na cakacaka ni tevoro.” (1 Joni 3:8) Ena kaukaua gona i Jiova, ena vakaturi ira kina na mate o Jisu, me sa na qai tinia vakadua na mate. (Joni 5:​28, 29) Yaco na gauna, ena vakavotuya o Jisu ni vakaiyalayala ga na kaukaua i Setani, ni na sogolati koya ena ibulubulu e sega ni vakabotona. Oti oya, sa na qai vakarusai tawamudu o Setani.​—Vakatakila 20:​1-​10.