Na Vidio e Tara na Lomadra na iTabagone

ERA uqeti e levu sara na itabagone mera dikeva tale mada vakavinaka na nodra itovo nira sarava oti na vidio Young People Ask​—How Can I Make Real Friends?a E laurai ena vidio na kena vakamacalataki na ivakavuvuli yaga vakaivolatabu, na nodra vakamacala e so na itabagone, qai veiuqeti sara tale ga na kena dramataki na italanoa ena iVolatabu me baleti Taina. (Vakatekivu, wase 34) E koto oqo e ra na ivakamacala e vakau mai Mexico me baleta na kena veivakauqeti na vidio.

E kaya o Martha: “E tara dina na lomaqu na vidio. Vaka sara ga e vakarautaki me baleti au. Dau noqu nanuma ni sa talavo ga mera kila na qasenivuli kei ira na noqu icaba e koronivuli niu iVakadinadina i Jiova. Ia, au sega ni bau vunau vei ira meu vakadinadinataka. Au vakavinavinakataki Jiova gona ena veika kece e vakarautaka mai, vakalevu na ka e tara sara ga na lomada, me vaka na vidio oqo.”

E kaya o Juan Carlos: “E vakavure vakasama na vidio. Niu se cauravou gone ga au a cakava e so na ka e sega ni dodonu, au vakila rawa gona na ituvaki e matanataki ena drama. Ena vica na yabaki sa oti, a rua tu na ivakarau ni noqu bula, ia au kidava ni sega ni dua na ka vinaka ena kauta mai. Niu sarava tale oqo na vidio, sa qai dei ga na lomaqu meu saga meu yalodina vei Jiova.”

E vakatusa o Sulem: “Au tagi sara ga niu sarava na vidio. A sa mudu tu na noqu dau wilika na iVolatabu, sa sega tale ga niu dau masu wasoma vei Jiova. Ia, niu rogoca na nodra vakamacala tiko na itabagone ena vidio, e uqeti au meu tekivu vulica tale na iVolatabu, meu masu tale vei Jiova.”

E levu sara na ka ni bolebole era sotava na itabagone nikua, dau qai cakayaco vakalevu ena nodra bula o ira era digia me nodra itokani. (Same 26:4; Vosa Vakaibalebale 13:20) Sa vukei ira tiko gona na itabagone na vidio oqo, Young People Ask​—How Can I Make Real Friends? mera vakatulewataka vinaka se o cei me nodra itokani.

[iVakamacala e ra]