Ni Curu Takoso na Kalou​—Cava Meda Namaka?

ENA ikawalu ni senitiuri B.S.K., e tauvi Tui Esekaia, e yabaki 39, e dua na mate levu qai tukuni vua ni sa na rawai koya. Nona rarawataka na itukutuku oya e masuta sara ga kina na Kalou me vakabulai koya. E sauma o Jiova ena gusu ni nona parofita: “Au sa rogoca na nomu masu, au sa raica na wai ni matamu: raica, ka’u na kuria na nomu gauna mo bula yabaki tinikalima tale.”​—Aisea 38:​1-5.

Na cava e curu takoso kina na Kalou ena gauna oya? Ena vuku ni a yalataka vua na turaga yalododonu o Tui Tevita ena vica vata na senitiuri yani e liu: “Na nomu mataqali, kei na nomu matanitu, ena vakataudeitaki e matamu, ka sega ni oti: ena vakataudeitaki ka tawa mudu na nomui tikotiko vakaturaga.” A vakatakila tale ga na Kalou ni na sucu mai na Mesaia ena iyatukawa i Tevita. (2 Samuela 7:​16; Same 89:​20, 26-​29; Aisea 11:1) Ia sa mai tauvimate o Esekaia, e se sega tu mada ga na luvena tagane. E rivarivabitaki ni vaka me sa na tagutuvi e kea na iyatukawa i Tevita. Na nona yavala gona na Kalou ena vuku ni ituvaki kei Esekaia, e vakabula na iyatukawa ena basika kina na Mesaia.

Me vakayacori na nona vosa ni yalayala, a curu takoso ena nodra bula na nona tamata o Jiova ena vica vata na gauna ni se bera na gauna vakarisito. A kaya o Mosese ni sa vakabulai mai na matanitu o Isireli ena veivakabobulataki e Ijipita: “Sa ka ga ni sa lomani kemuni ko Jiova, ka ni sa vakabauta tiko na vosa sa bubului kina ko koya vei ira na nomuni qase, sa kauti kemuni tani kina ko Jiova e na liga kaukauwa.”​—Vakarua 7:8.

E vaka tale ga oya na nona dau curu takoso na Kalou ena imatai ni senitiuri, me rawa kina ni tomani na kena vakayacori na nona inaki. Kena ivakaraitaki, a raica e dua na raivotu e dua na Jiu na yacana o Saula ena gaunisala i Tamasiko, me rawa ni muduka kina na nona dau vakacacani ira tiko na tisaipeli i Karisito. A veisau me o Paula na yapositolo, qai colata e dua na itavi bibi ni vakatetea na itukutuku vinaka ena veimatanitu.​—Cakacaka 9:​1-​16; Roma 11:13.

E sa Kena iVakarau Beka ga me Dau Curu Takoso na Kalou?

E dau curu takoso beka na Kalou ena veigauna, se ena so ga na gauna? E vakaraitaka vakamatata na iVolatabu ni sega ni dau curu takoso na Kalou ena veigauna kece ga. E dina ni a vakabulai iratou na lewe tolu na Iperiu mai na lovo bukawaqa vaka kina na parofita o Taniela mai na qara ni laione, ia a sega ni yavala me vakabulai ira na vo ni parofita nira vakamatei. (2 Veigauna 24:​20, 21; Taniela 3:​21-​27; 6:16-22; Iperiu 11:37) A vakabulai vakacakamana o Pita ena valeniveivesu a vesuki koya tu kina o Eroti Akariva I. Ia, na tui vata ga oqori a vakarota nona vakamatei na yapositolo o Jemesa, qai sega ni a curu takoso na Kalou me tarova. (Cakacaka 12:​1-​11) E dina ni a solia na Kalou na kaukaua vei iratou na yapositolo me ratou vakabulai ira kina na tauvimate se vakaturi ira sara mada ga na mate, ia a sega ga ni kauta laivi na ‘votonikau a lauta tiko na lewe’ i Paula, qai rairai vakavuna tiko nona tautauvimate.​—2 Korinica 12:​7-9; Cakacaka 9:​32-​41; 1 Korinica 12:28.

A sega tale ga ni curu takoso na Kalou me tarova na nona vakacacani ira na tisaipeli i Karisito na empara ni Roma o Niro. Era vakararawataki na lotu Vakarisito, ra vakamai bulabula, ra qai kolotaki vei ira na manumanu kila. Ia, era sega ni kidroataka na veivakacacani oqori na lotu Vakarisito taumada, qai sega tale ga ni vakamalumalumutaka na nodra vakabauta ni tiko dina na Kalou. Ni a sa vakasalataki ira oti nona tisaipeli o Jisu nira na veilewaitaki, mera tu vakarau gona nira na sotava na rarawa ra qai mate tale ga ena vuku ni nodra vakabauta.​—Maciu 10:​17-​22.

Me vaka ga a cakava e liu na Kalou, e rawa tale ga ni vakabulai ira nona tamata ena gauna oqo mai na ituvaki rerevaki, mera kua gona ni vakalewai o ira era vakabauta nira taqomaki vaka oqo. Dina ni sega ni rawa ni vakadeitaki se a curu takoso se sega na Kalou ena nodra taqomaki. E vica vata na tamata yalodina ni Kalou era a vakamavoataki ena kena kama na valenibuli wainimate mai na korolevu o Toulouse, e vica vata tale ga na udolu na lotu Vakarisito yalodina era mate ena keba ni veivakararawataki ni Nazi kei na keba vakominisi e so, se ena so tale na leqa vakacalaka qai sega ni curu takoso na Kalou me veitaqomaki. Na cava mada e sega ni curu takoso kina na Kalou ena veigauna kece ena vukudra e vakadonui ira?​—Taniela 3:​17, 18.

“Gauna kei na Veika e Tawanamaki”

E rawa nira sotava kece na leqa na tamata, qai sega ni vakatau tiko mai na nodra yalodina vua na Kalou. Na kama a yaco mai Toulouse, erau a dro bula kina na veiwatini o Alain kei Liliane, era mate e 30 qai vica vata na drau era mavoa, ia e sega ni nodra cala oqori. Ena vuravura raraba li, nira dau butakoci e vica vata na udolu na tamata, era coqa vakacalaka, se ra leqa ena ivalu, ena sega ni rawa ni beitaki kina na Kalou. E vakananuma vei keda na iVolatabu ni “dau yacovi keda kece na gauna kei na veika e tawanamaki.”​—Dauvunau 9:​11, NW.

Kena ikuri nira dau tauvimate, era qase, ra qai mate tale ga na tamata. O ira mada ga era vakabauta ni a vakabulai ira vakacakamana na Kalou se vakabulai ira mai na dua na tauvimate, era na mate ga. Na kena vakaoti na tauvimate kei na mate vaka kina na ‘tavoi tani ni wainimata’ mai na matadra na tamata, ena qai yaco ena dua na gauna e muri.​—Vakatakila 21:​1-4.

Ia, me yaco na veika oqori ena gadrevi e dua na ka e uasivia qai rabailevu cake mai na nona dau curu takoso ga vakavudua na Kalou. E kaya na iVolatabu me baleta e dua na gauna e vakatokai ‘na siga uasivi i Jiova.’ (Sefanaia 1:​14) Ena nona yavala levu oqo, ena vakaotia kina vakadua na Kalou na ca. Ena soli na galala vua na kawatamata me rawa ni bula tawamudu kina ena ituvaki e uasivi, ni sa na ‘sega ni nanumi na ka e liu, ena sega ni curu tale e lomadra.’ (Aisea 65:17) Era na vakaturi na tamata mate, mera sa na qai sereki vakadua kina mai na rarawa levu duadua ni kawatamata. (Joni 5:​28, 29) Ena wali na leqa taucoko ni kawatamata ena nona loloma tawayalani na Kalou vaka kina nona yalovinaka.

E Curu Takoso Vakacava na Kalou Edaidai?

E sega ni kena ibalebale ni vakaweleweletaki keda na Kalou nida sotava tiko na veika rarawa. Nikua, sa dolava tu na Kalou ina matatamata kece, se mani vakacava na ivakatagedegede ni noda bula, na sala meda kilai koya kina da qai veivolekati kei koya. (1 Timoci 2:​3, 4) E vakamacalataka na veika oya o Jisu ena veivosa oqo: “E sega ni lako rawa mai vei au e dua na tamata, kevaka sa sega ni vakayarayarataki koya ko Tamaqu.” (Joni 6:​44) E vakayarayarataki ira mai na tamata yalododonu na Kalou ena itukutuku ni nona Matanitu era kacivaka voli e vuravura raraba na nona tamata yalodina.

Me kena ikuri, oya ni na uqeti ira sara ga era gadreva mera vakavulici na Kalou. Ena yalona tabu, ena ‘dolava na lomadra’ mera kila nona inaki vaka kina na nodra cakava na veika e vinakata vei ira na Kalou. (Cakacaka 16:​14, VV) Nona vakarautaka gona na sala meda kilai koya kina, nona Vosa, vaka kina na nona inaki, e vakadinadinataka sara ga na Kalou ni kauaitaki keda vakayalololoma.​—Joni 17:3.

Kena ilutua, ni dau vukei ira nona tamata edaidai na Kalou ena sega ni vakabulai ira vakacakamana ia ena solia ga vei ira na yalo tabu kei na “kaukauwa mana levu” mera vosota kina na ituvaki cava ga era na rairai sotava. (2 Korinica 4:7) E vola na yapositolo o Paula: “Au sa rawata na ka kece ga ena vuku i [Jiova na Kalou] sa vakaukauataki au.”​—Filipai 4:​13, NW.

E dodonu gona meda vakavinavinakataka na Kalou ena veisiga yadua ni noda bula kei na inuinui ni bula tawamudu ena vuravura e dulaka tu vei keda, meda sa na qai galala kina mai na rarawa kece. “A cava me’u cakava vei Jiova e na vuku ni nona cakacaka loloma kecega vei au?” a taroga na daunisame. “Au na taura na bilo ni bula, ka masuta na yaca i Jiova.” (Same 116:​12, 13) Ni wiliki wasoma na ivoladraudrau oqo ena vukei iko mo kila na ka sa cakava oti o Jiova, na ka e cakava tiko, kei na ka ena qai cakava, me rawa ni vakamarautaki iko edaidai kei na inuinui dei ena gauna mai muri.​—1 Timoci 4:8.

[Tikina bibi ena tabana e 6]

‘Ena sega ni nanumi na ka e liu, ena sega ni curu tale e lomadra.’​—Aisea 65:17

[iYaloyalo ena tabana e 5]

Ena gauna mada ga vakaivolatabu a sega ni tarova o Jiova na nona vakaviriki o Sakaraia . . .

vaka kina nona vakamatei ira na sega ni cala o Eroti

[iYaloyalo ena tabana e 7]

Sa voleka sara na gauna me oti kina vakadua na rarawa; era na bula tale na sa mate tu