Tukutuku Mai na Daukacivaka na Matanitu

“E sa Veitaraicake Dina!”

O DOROTA, e dua na italatala vakatabakidua ni iVakadinadina i Jiova mai Poladi, a salavata kei luvena tagane yabaki 14 ina valeniwai ni koronivuli. Ni sa vakadikevi tiko o gonetagane, a tarogi Dorota sara na vuniwai, o Janina,a ena veika e dau cakava e vale na luvena.

“Keitou lewe ono kece, e dau vakarautaka na keitou ivakayakavi ke sega niu cakava rawa,” e sauma o Dorota. “E dau samaka tale ga na vale qai dau veivuke ena kena vakavinakataki na veika e vale. E dau taleitaka na wilivola qai gone vinaka.”

“Sa dua dina na ka vinaka,” e kaya o Janina. “Sa 12 na yabaki na noqu cakacaka tiko e ke, au se sega vakadua ni bau rogoca e dua na ka vaka oqori.”

Ni raica rawa o Dorota na sala me vunau kina, a vakamacalataka: “E levu na itubutubu edaidai sa ra sega ni dau vakavulici luvedra vakavinaka. Oya na vuna era dau beci ira kina vakataki ira na gone.”

“O kila vakacava?” e taroga tale o Janina. “E vuqa na itubutubu era sega sara tu ga ni kila na veika oqo.”

“E tu ena iVolatabu na itukutuku vakamareqeti vaka oqo,” sauma o Dorota. “Kena ivakaraitaki, e kaya na Vakarua 6:​6-9, na nodra vakavulici na gone e tekivu sara ga ena noda vakavulici keda mada e liu. E sega li ni dodonu meda vakavulica na lomada kei na noda vakasama na itovo eda vinakata mera muria tale ga na luveda?”

“Sa dua dina na ka veivakurabuitaki oqo,” e kaya o Janina. “Sa veivakurabuitaki dina!” Oti oya sa qai tarogi Dorota se sala cava e vukei koya kina na iVolatabu me susugi iratou vinaka kina na luvena kei na nona vakavulici iratou tale ga.

“Keitou dau vulica vata na iVolatabu ena veimacawa,” e vakamacalataka o Dorota. “Keitou vakayagataka na ivola Questions Young People Ask​—Answers That Work.”b Sa qai tomana ena nona vakamacalataka na ivola kei na so na ulutaga e koto kina.

“E sa veitaraicake dina!” e tukuna tale yani o Janina. “Au rawa beka ni raica na ivola oya?”

Oti tale e dua na aua, sa kauta mai o Dorota na ivola.

“O lotu cava?” taroga o Janina, ena gauna e vakaraica tiko kina na ivola.

“Au dua na iVakadinadina i Jiova.”

Tomana nona taro o Janina: “Cava nomuni rai na iVakadinadina i Jiova me baleti ira na lotu tale e so?”

“Me vaka ga na noqu dokai kemuni,” e sauma o Dorota, qai kuria: “Keimami diva tale ga mera mai kila na dina ni iVolatabu.”

“Au vakila sara ga na lomavakacegu,” e vakadinata o Janina.

Ni rau sa vakarau lesu tale, sa qai uqeti Janina o Dorota me dau wilika na iVolatabu. “Ena vakainaki kina nomu bula qai vukea tale ga nomu cakacaka.”

“O sa uqeti au sara ga meu cakava vaka kina,” e kaya o Janina.

Nona qaseqase kei na nona yalodei o Dorota e soli ivakadinadina kina ni veisiko vei vuniwai.​—1 Pita 3:​15.

[iVakamacala e ra]