Taro na Dauwiliwili

Na nona kania o Tevita kei ira na nona tamata na madrai tabu, e vakaraitaka beka ni rawa ni voroki na Lawa ni Kalou qai sega ni tau na itotogi ke sotavi na ituvaki dredre?​​—1 Samuela 21:​1-6.

Me vaka e tukuni ena Vunau ni Soro 24:​5-9, na madrai tabu sa sega ni vakayagataki ena Siga ni Vakacecegu e dau maroroi me kedra na bete. Na vuna era vakayagataka kina na bete baleta na madrai oqo e madrai tabu, e dau soli ga vei ira era qarava na cakacaka ni Kalou. Ena cala ke soli vei ira na tamata cakacaka tale e so se laukana ena nodra via kania ga. Ia, a sega ni cala na bete o Eiimeleki ni solia na madrai tabu vei Tevita kei ira na nona tamata.

A rairai vakayacora tiko o Tevita e dua na itavi bibi a lesi koya kina o Tui Saula. A via kana o Tevita kei na nona tamata. E vakadeitaka tale ga o Eiimeleki nira sega ni dukadukali. E dina ni cala vakalawa na nodra kania na madrai tabu, ia na ka era cakava oya e salavata vinaka kei na inaki e dau vakayagataki kina na madrai dauraici. Oya na vuna a sega kina ni muria na lawa o Eiimeleki mani vakatara me laukana na madrai tabu. O Jisu sara mada ga a vakayagataka na veika e yaco oqo me vakaraitaka kina na cala ni nodra vakatabuya vakasivia na Farisi na lawa ni Siga ni Vakacecegu.​​—Maciu 12:​1-8.

Ia, na ka e yaco oqo e sega ni kena ibalebale ni rawa ni voroki na lawa ni Kalou ni sotavi na ituvaki dredre. Kena ivakaraitaki, a basika e dua na ituvaki dredre ena gauna era vala tiko kina na Isireli kei ira na kai Filisitia. A kaya o Tui Saula: “Me cudruvi na tamata sa na kania e dua na kakana, ka me yakavi mada, me’u cudruvi ira mada na noqu meca.” E kaya na iVolatabu: “A ra sa yaviti ira na kai Filisitia e na siga ko ya.” Mani tarai ira na sotia na malumalumu kei na viakana, ra mani ‘vakamatea e so na manumanu ra qai kania vata kei na dra.’ (1 Samuela 14:​24, 31-33) Era cala ena mata i Jiova nira voroka na lawa e vakatabuya na dra. Na veika era cakava e sega ni salasalavata kei na inaki duadua ga e tuvanaka na Kalou me vakayagataki kina na dra, oya me ‘sorovaki’ kina na ivalavala ca. (Vunau ni Soro 17:​10-​12; Vakatekivu 9:​3, 4) A qai lomani ira o Jiova ni ciqoma na isoro a vakacabori sara ga ena vukudra.​​—1 Samuela 14:​34, 35.

Io, o Jiova e namaka meda muria na nona lawa ena veigauna kece ga. E kaya na yapositolo o Joni: “Ni sai koya oqo na loloma vua na Kalou, me da muria na nona vunau.”​​—1 Joni 5:3.

[iYaloyalo ena tabana e 30]

Ena Siga ni Vakacecegu kece e dau biu na madrai tabu vou ena valeniveitavaki