‘E Rairai Vaka na Vatu na Satiusa’

A RAIVOTUTAKA na yapositolo o Joni e dua na itikotiko vakaturaga mai lomalagi. O koya e dabe tiko ena itikotiko vakaturaga oqori e “vaka na vatu jasipa” na kena irairai. E vaka tale ga na irairai ni “satiusa.” (Vakatakila 4:​2, 3) Erau mataqali vatu vakacava oqo?

Erau vatu iloilo makare, e sega gona ni vatu e taliva toka ga na delana. Ena gauna makawa, na vosa vakirisi e vakadewataki me “jasipa” e sega wale ga ni dusia na vatu e duidui tu na kedra roka ra qai makumakualiliva, e okati tale ga kina na vatutalei e makare se iloilo. Na “vatu jasipa” gona e cavuti tiko ena Vakatakila 4:​3, “e sega sara ga ni tautauvata kei na vatu jasipa isau rawarawa ena gauna oqo,” e kaya o A. T. Robertson ena ivola, Word Pictures in the New Testament. Kena ikuri, a qai vakamacalataka e muri o Joni ena ivola na Vakatakila na koro vakalomalagi o Jerusalemi, ena nona kaya: “Ia na kena rarama e vaka na vatu dredre sara, e vaka na vatu jasipa, e vakaraitayaloyalo me vaka na karisitala.” (Vakatakila 21:​10, 11) Io, na vatu e vakamacalataka oqo o Joni e vaka na karisitala, e rawa ni curu basikata na rarama.

O koya e dabe tiko ena itikotiko vakaturaga ena raivotu i Joni, e dusi koya e lagilagi qai cecere duadua sara e vuravura kei lomalagi, na Kalou o Jiova. E vakatauvatani na nona savasava me makaresese, e uasivi vakaoti qai tawavakamelei rawa. Me salavata kei na tikina oqori a vola na yapositolo o Joni: “Ni sa rarama na Kalou, a sa sega sara vei koya na butobuto.” (1 Joni 1:5) E uqeti ira kina nona itokani vakabauta o Joni mera ‘vakasavasavataki ira, me vaka ni savasava o Jiova.’​​—1 Joni 3:3.

Na cava meda cakava meda savasava kina ena mata i Jiova? E bibi dina noda vakabauta na isoro i Jisu Karisito ni rawa ni vosoti kina na noda ivalavala ca. E dodonu tale ga meda tomana tiko ga na noda muria “nai valavala ni rarama” ena noda vulica wasoma na iVolatabu kei na noda bulataka na kena ivakavuvuli.​​—1 Joni 1:7.