Sasaga ni Tamata me Bula Tawamudu

E SE makawa sara na nodra nuitaka voli mai na kawatamata mera bula tawamudu. Ia, na inuinui oqori e sega ni vakavatukana rawa​​—⁠ni sega ni dua e se kunea na sala me tarovi kina na mate. Dua na gauna wale tiko ga oqo, e vakabulabulataka tale na vakadidike vakavuniwai na inuinui ni kena rawa ni vakabalavutaki na bula ni tamata. Meda raica sara mada e so na vakadidike e sa caka tiko ena tabana vakasaenisi me baleta na tikina oqo.

Era vakadikeva tiko na kenadau na enzyme na telomerase ena kena sagai me vakabalavutaki na iwiliwili ni gauna e rawa ni vidavidai koya kina na sela oqo. Vakauasivi ni vakaiyalayala ga na iwiliwili ni gauna e rawa ni vidai koya kina. Era kila vinaka tale tu ga na saenitisi ni sela e sa makawa ena mate qai sosomitaki ena sela vou. E dau vakavoui vakavica vata na sela ni yago ena nona bula taucoko e dua. Ke rawa ni vakabalavutaki na iwiliwili ni gauna e vakavoui koya kina na sela, era nanuma na dauvakadidike ni “na rawa ni vakavoui tiko ga na sela ni yagoda ena dua na gauna balavu, se mani tawamudu sara.”

Na buli vou ni gacagaca ni tamata ena kena vakayagataki na iwalewale na therapeutic cloning e veibataki sara tiko vakalevu. E nanumi ni na rawati kina na gacagaca vou me vaka na yatevuso, ivi se uto, e rawa ni vakayagataki ena veisele. Ena taurivaki ga na sela ni yago i koya ena caka vua na veisele me buli kina na gacagaca vou e gadrevi.

Dua tale na iwalewale era vakayagataka na kenadau, oya na nanotechnology​—na vakadidike vuku vakaidinia me rawa ni buli kina na misini somidi sara. Era raica rawa na kenadau ni dua na gauna era na rairai taurivaka na misini somidi oqo na vuniwai mera vakacuruma ina salanidra me rawa ni lai vakamatea na sela e vakavuna na kenisa, se manumanu lalai ni mate ca. Dua tale na iwalewale na gene therapy, oqo na kena vakacurumi na gene ina sela ni yago i koya e tauvimate me rawa ni valuta se vakaotia na mate. Era vakabauta gona kina e so ni kevaka e taurivaki na nanotechnology kei na gene therapy, e rawa nida na bula tiko ga me tawamudu.

E so e tokona na cryonics, oya na kena vakabatabatataki tu vakawawa na yago ni tamata sa mate, ena kena nanumi ni toso na nodra vakadidike na vuku, sa na rawa vei ira na vuniwai mera kunea na iwali ni tauvimate, tarova na bula vaqase, ra qai vakabulai ira tale na sa mate mera bulabula vinaka vakayago. Na ivola na American Journal of Geriatric Psychiatry e vakatauvatana na iwalewale oqo “me vaka sara ga na nodra dau vakawainimatetaki na yagomate ena gauna makawa mai Ijipita.”

Na sasaga vagumatua e cakava voli na kawatamata me rawati kina na bula tawamudu, e vakaraitaka ni dredre dina vua na tamata me ciqoma na vakasama ni dua na siga ena mate. E rawa dina beka vua na kawatamata me bula tawamudu? Na cava e kaya na iVolatabu me baleta na tikina oqo? Ena saumi na veitaro oqori ena ulutaga e tarava.