Ra Kune na iYau Vakayalo e Guinea
SA VICA VATA na senitiuri na nodra bolea na dau butuvanua na ituvaki dredre e rawa nira tini mate kina, se mavoa vakaca sara ena nodra vaqara iyau kei na veika talei. E so vei ira era yaloqaqa sara, era bau yaco tale ga i Guinea ena ra kei Aferika, ia, era kunea kina e rua na iyau erau duidui sara, oya na iyau vakayago kei na iyau vakayalo. Na vanua o Guinea e vutuniyau ena iyaubula me vaka na daimani, koula, parasa, kei na bauxite (e rawati mai kina na aluminum), ra qai sivia na ciwanamilioni na lewenivanua.
Dina ni sega soti ni levu e kea na veimatalotu vakarisito, ia e bibi vei ira na sokalou ra qai talei tale ga na kena iyau vakayalo. Na iyau cava sara mada oqo? Oya o ira na dauveiqaravi yalodina i Jiova e vakamacalataki ena Akeai 2:7 mera “ka sa domoni e na veimatanitu kecega.”
iYau Vakayalo
Na vakekeli vakatitobu e lomaniqele ena kena vaqarai ni iyau vuni e gadrevi kina na sasaga. E vaka kina ena cakacaka vakavunau vakarisito, ena gadrevi tale ga na sasaga ena nodra qarai na iyau vakayalo. Ena itekitekivu ni veiyabaki ni 1950, a tauyavu kina na vunautaki ni Matanitu ni Kalou e Guinea, a vakayacori taumada ena lomanivanua, ia ena 1960 vakacaca sa qai tete yani i Conakry, na koroturaga. Ena gauna oqo sa rauta nira le 900 na iVakadinadina i Jiova ena 21 na ivavakoso kei na iwasewase lalai ena vanua taucoko o Guinea.
Era tokatu na daukaulotu e kea ena 1987, ra qai lai cakacaka voli ena dua wale ga na ivavakoso e Conakry. Ia ena gauna oqo, sa sivia nira le 20 na daukaulotu era tiko ena koroturaga vaka kina ena lomanivanua. Era gumatua na daukaulotu ena nodra tara cake na ivavakoso, ra qai tomani ira na mataveitacini e kea ena cakacaka vakavunau.
O Luc, e vakaitikotiko e Conakry, a taleitaka na vuli iVolatabu kei Albert, e dua na cauravou e vuniwai. A vaqara na ka dina o Albert ena veilotu dau qai vakatevoro tale ga. E dara voli na mama a solia vua e dua na daucurumi me vakadeitaka ni na sotava na kalougata. Ia, ena levu ni nona rarawataka ni sega ni bau kunea na lotu dina ena nona vaqaqara voli, a tini viritaka laivi kina na mama oya, qai masulaka: “Kemuni na Kalou, ke oni bula tiko, vakarawarawataka meu kilai kemuni meu qaravi kemuni rawa kina. Ke sega, au na lewa ga na noqu bula ena sala au vinakata.” Sega ni dede a gade o Albert vei ganena, qai rogoca sara ni vakatavulici vugona tiko ena iVolatabu e dua na iVakadinadina i Jiova. A tuvanaki sara me rau sa na vuli iVolatabu kei Luc.
E veimacawa, e marau o Luc me taubaletaka e sivia na tini taucoko na kilomita me lai caka vuli iVolatabu. E sega soti ni vuli vinaka o Luc, ia na nona vakabauta kei na nona kila vinaka na iVolatabu e tarai Albert sara ga, e dua a vuli ena univesiti. Dua na ka na marau nei Albert ni sa mai kila ni sega ni vakavuna na Kalou na noda rarawa na kawatamata. E inaki i Jiova me na muduka na rarawa kece qai vukica na vuravura oqo me parataisi. (Same 37:9-11) E tara na loma i Albert na ka dina ena iVolatabu, vaka kina na nona raica na nodra itovo vinaka na lewe ni ivavakoso.
Me vaka ga na kena vinakati me musuka vakamaqosa na kenadau na daimani se bera ni musu me rawa kina ni tatibi, a vinakati tale ga vei Albert me musuka laivi e levu na itovo ni vuravura me rawa ni salavata na nona bula kei na ivakatagedegede savasava ni Kalou. A muduka nona dau lakovi ira na daurairai, gunu vakasivia, kei na veimauilavo. Bau dredre toka vei Albert me biuta na vakatavako. Ia, na nona masu vagumatua vei Jiova a vukei koya me biuta kina. Ni oti e ono na vula, sa vakamautaki koya sara erau tiko vakatevoro. Sa mai tekivu vulica tale ga na iVolatabu o watina. Ena gauna oqo erau sa dauveiqaravi yalayala i Jiova.
O Martin, e dua tale na iyau vakayalo e vaka na daimani. A tekivu vuli iVolatabu e Guéckédou ni se qai yabaki 15. O rau na nona itubutubu erau lotu Katolika, rau dau qai cata me lako ena soqoni ni iVakadinadina i Jiova. Rau vakarusa na nona ivola vakaivolatabu, mokulaki koya rau qai cemuri koya tani. Ia, me vaka ga na sala e buli kina na daimani, oya na kena bikaci na carbon e lomaniqele ena dua na ka bibi, na tarabi gona ni veivakacacani e sotava o Martin e sa qai tubu ga kina na nona lomana na ka dina ena iVolatabu. Yaco na gauna me veisau na nodrau rai na nona itubutubu, mani suka tale o Martin i nodratou. Na cava e veisau kina na lomadrau? Erau raica ni duidui vakalevu na itovo i Martin mai na nodratou itovo na tacina kei na ganena, eratou talaidredre ratou dau qai vakayacora na itovo tawakilikili. Rau vakadinata gona ni yaga vei Martin na nona vakabauta vou, sa dau qai ciqomi ira na lewe ni ivavakoso i nodratou vale o tama i Martin. Vakavuqa me dau vakavinavinakataki ira na mataveitacini o tina i Martin ena veivuke kece era vakayacora vei luvena. A papitaiso o Martin ni sa yabaki 18, e muri a lai vuli ena Koronivuli ni Vuli ni Veiqaravi Vakaitalatala, ena gauna oqo sa painia lavotaki tiko.
iYau Vakayalo Mai Vanuatani
Na vanua o Guinea e dau volitaka vakalevu i vanuatani na kena iyaubula, ia, e so na kena iyau vakayalo era cavutu mai vanuatani. Levu era biu vanua mai na veiyasa i Aferika ena nodra vaqara na ka mera bula kina vakayago. So tale era drotaka mai na veivakalolomataki ni ivalu sa cabolo dede tu.
O Ernestine, e dua na marama ni Cameroon, a tokatu i Guinea ena 12 na yabaki sa oti. A vuli iVolatabu sara kei ira na iVakadinadina i Jiova qai vica vata na yabaki nona dau tiko ena soqoni, ia e sega ga ni papitaiso. E tonawanawa na wai ni matana ni raici ira na papitaiso ena dua na soqo ni tabacakacaka ni iVakadinadina i Jiova ena 2003. Na ka oqo e coka sara ga na lomana, a masulaka vei Jiova: “Au sa yabaki 51, qai se sega ni dua na ka vinaka au cakava vei kemuni. Au vinakata meu qaravi kemuni.” Ni oti oya e cakacakataka sara o Ernestine na ka e masulaka. E vakamacalataka sara vua erau tiko vakatevoro, ni rau na tomana ga na nodrau tiko kevaka erau vakamau. A vakadonuya na turaga oya me rau vakamau. A tagi ena marau o Ernestine ena gauna a papitaiso kina ena Noveba 2004.
Ena itekitekivu ni veiyabaki ni 1990, na matanitu o Guinea sa ciqomi ira tiko na vica vata na udolu na isenivalu mai Liberia kei Sierra Leone, okati kina e vica na drau na tamata i Jiova. Sega ni dede nodra yaco yani ena keba ni isenivalu era tuvanaka sara na mataveitacini tagane na soqoni, cakacaka vakavunau kei na tara ni dua na Kingdom Hall. E so era tiko ena keba ni isenivalu era yaco mera dauveiqaravi i Jiova. Dua vei ira oqori o Isaac. Ni papitaiso oti a rawa sara ga me lesu ina nona cakacaka makawa, oya ena dua na kabani levu i Liberia. Ia, e vakatulewataka me sa tiko ga ena keba ni isenivalu e Lainé me veiqaravi vakapainia tudei. E kaya o Isaac: “Oqo, au sa galala meu qaravi Jiova. Sa sega ni gadrevi meu lai kerea na nona veivakadonui na itaukei ni cakacaka meu rawa ni lako ena soqoni, soqo ni tabacakacaka, se na soqo ni tikina.” Ena Tiseba 2003, a vakayacori na soqo ni tikina ena keba ribayawa oqo ena vukudra na 150 na iVakadinadina era tiko maliwai ira na 30,000 na isenivalu. Ka ni marau nira a tiko kina e le 591, okati kina e 9 na didivara eratou vakamuria na porokaramu ena vosa vagalu. Eratou le 12 na papitaiso. Era vakavinavinaka vakalevu na mataveitacini ena sasaga ni kena vakarautaki ena vukudra na kana magiti vakayalo oya.
Ra Cakava e So na Veiveisau o Ira na “Ka sa Domoni”
Se mani cava e vakalatilati vei ira na dau vaqara koula kei na daimani, era na saga mera ulabaleta. O koya gona, e veivakauqeti na nodra sasaga na ka vou ena nodra valuta na ka kece e dau vakalatilati me rawa nira qaravi Jiova. Dikeva na ivakaraitaki nei Zainab.
Ni se yabaki 13, a vakasaurarataki o Zainab me bobula. A kau mai ena nona itikotiko, oya mai na dua tale na vanua ena ra kei Aferika, qai kau sara yani i Guinea. E rogoca na itukutuku ena iVolatabu ni sa yabaki 20, qai gu na lomana me muria na veika sa vulica.
Sega ni rawarawa nona lako ena soqoni vakarisito. Ia e taleitaka vakalevu o Zainab na soqoni qai sega ni via calata. (Iperiu 10:24, 25) Ena vunitaka e tautuba na nona ivola me rawarawa ga nona taura ni lako ena soqoni. Vica vata na gauna e mokulaki vakaca sara o Zainab vei kena itaukei ena nona dau lako ena soqoni vaka oqo.
Dua na gauna e muri sa veisau na ituvaki, qai sereki o Zainab. Sega ni bera nona sa tekivu lakova tale na soqoni kece, a vukei koya me toso vinaka vakayalo. A vakuakua ena dua na cakacaka isau levu, baleta ni na sega kina ni tiko ena soqoni me rogoca na veivakavulici vakarisito. A curu ena Koronivuli ni Vuli Vunau, yaco sara me dua na dautukutuku bera ni papitaiso, e muri a qai vakaraitaka nona yalayala vei Jiova ena nona papitaiso. Oti ga oya, a tekivu me painia veivuke. Ni oti tale e ono na vula a vakalewe fomu me veiqaravi vakapainia tudei.
E kaya e dua na tataleitaki ni oti nona tiko ena vica na soqoni: “Niu tiko ena soqoni au sega ni vakila niu dravudravua.” Me vaka ni levu era taleitaka ga na iyau vakayago e Guinea, ia o ira na lomani Jiova era saga mera qara na iyau vakayalo. Io, nikua o ira na “ka sa domoni e na veimatanitu kecega” era sa goleva na sokalou savasava i Jiova!
[Kato ena tabana e 8]
GUINEA-2005
Kedra iwiliwili na iVakadinadina: 883
Vuli iVolatabu: 1,710
Kedra iwiliwili na tiko ena iVakananumi: 3,255
[Mape ena tabana e 8]
(Raica tale na ivola)
GUINEA
Conakry
SIERRA LEONE
LIBERIA
[iYaloyalo ena tabana e 9]
Albert kei Luc
[iYaloyalo ena tabana e 9]
Na Kingdom Hall e Conakry
[iYaloyalo ena tabana e 10]
Martin
[iYaloyalo ena tabana e 10]
Ernestine
[iYaloyalo ena tabana e 10]
Zainab
[iTaba ni Credit Line ena tabana e 8]
USAID