Meda Kilai Koya na Kalou ena Sala Cava?
So Era Vakatitiqataka ni Kalou e Vinakata Meda Kilai Koya. Ia, Kevaka e Vinakata Dina Meda Kilai Koya, na Sala Cava e Vakatakilai Koya Kina?
E DONU vinaka na ka a kaya o John Calvin, e dua a liutaka na kena tauyavutaki na lotu Tawase ena ika16 ni senitiuri. Oya ni sega ni rawa vei ira na kawatamata mera kilai koya na Kalou, vakavo ga ke vakatakilai koya na Kalou ina kawatamata. So gona era sa lai veinanuyaka kina, ni rairai e sega ni vinakata dina na Kalou mera kilai koya na tamata. Ia, ke vinakata dina me kilai, na sala cava e sa vakatakilai koya tiko kina?
O Jiova, o “koya ka Buli” keda, e tiko na inaki ni veika kece e cakava. Me vaka ni “Kalou Kaukauwa duadua,” e rawa sara tale ga vua me vakayacora na nona inaki. (Dauvunau 12:1; Lako Yani 6:3) Eda vakadeitaka ni vinakata dina na Kalou me vakatakila na nona inaki vua na kawatamata, ni nona yalo tabu ga a uqeta na parofita o Emosi me vola: “Ena sega ni vakayacora e dua na ka na Turaga ko Jiova, ena vakaraitaka mada ga na nona vosa vuni vei ira na nonai talatala na parofita.” Dikeva ni tukuni e ke ni Kalou e vakatakila wale ga na nona inaki vei ira na nona tamata, nira lomani koya dina. E sega li ni dodonu ga me vaka oya? O dau vakatakila vei cei na nomu veika vuni? O na tukuna beka vua e dua ga sa rawa, se o na tukuna vua e dua drau veitokani voleka sara?—Emosi 3:7; Aisea 40:13, 25, 26.
O ira na tamata yalomalumalumu era qoroya na nona vuku kei na nona kilaka na Kalou, e dodonu ga mera cakava vaka kina. Ia, e sega ni rauta meda qoroya wale ga ke da vinakata me yaga yadua vei keda na vuku kei na kilaka e vakatakila vei keda na Kalou. Na iVolatabu e vakabibitaka ni kevaka eda vinakata meda kila na nona nanuma na Kalou, ena gadrevi me tiko vei keda na yalomalumalumu: ‘Mo vunia na noqu vunau me nomu. Mo vakatudaligamu ina vuku. Vagolea na lomamu ina yalomatua. Tagica na lomavuku, qai tabalaka na domomu mo kilaka. Qara me vaka o sa qara na siliva.’—Vosa Vakaibalebale 2:1-4.
Na tamata yalomalumalumu ena rawa ni kila na Kalou ke sasagataka me cakava na veika e tukuni ena tikinivolatabu oqori. Ni Vosa Vakaibalebale vata ga oqori e tomana: “Sa solia na vuku ko Jiova; sa lako mai na gusuna na kila ka kei na yalomatua.” Io, o ira era vakasaqara tiko na ka dina ena rawa nira kila “nai valavala dodonu, kei na lewa, kei na cakacaka dodonu; io, na sala vinaka kecega.”—Vosa Vakaibalebale 2:6-9.
Vakasaqarai na Ka Dina
E kaya na ivola na Encyclopedia of Religion: “Dua na ka e kilai tani kina na tamata, oya ni gadreva me vakaduiduitaka rawa na veika dina mai na veika lasu, na kaukaua mai na malumalumu, na veika dodonu mai na veika e veivakacalai, na savasava mai na tawasavasava, veika e matata mai na veika e buawa, vaka kina na nona rawa ni vakaduiduitaka e dua na ituvaki e sega ni tukuni kina vakadodonu na ka me cakava.” Me rawa nira vakaceguya na gagadre oqo, era vakasaqara voli mai kina na ka dina ena dua na gauna balavu. Vei ira yadua era vagoleya na nodra vakasaqaqara vei Jiova, o koya e vakatoka na daunisame me ‘Kalou ni dina,’ era vakila nira sa kunea na ka dina.—Same 31:5.
Na yaca i Jiova e kena ibalebale, “O Koya e Vakavuna me Yaco.” (Vakatekivu 2:4, ivakamacala e ra ni NW) Na ibalebale sara mada ga ni yaca ni Kalou e vakavotuya ni o koya e bulia na ka kece ga, e tiko tale ga na nona inaki. Macala gona, na kilai kei na vakayagataki ni yaca i Jiova e ivakatakilakila sara ga ni lotu dina. Kila vakamatata tu o Jisu na tikina oqori. E laurai ena gauna a masu kina vua na Kalou me baleti ratou na nona imuri, a kaya: “Ka’u sa vakatakila vei ira na yacamuni, ia ka’u na vakatakila tiko: me tu vei ira na loloma ko ni a lomani au kina, me’u tiko talega kei ira.”—Joni 17:26.
O Josefa, e dua na cauravou ni Iperiu makawa, a nuitaka na nodrau veitokani kei na Kalou. Ni tukuni vua me vakatakila na ibalebale ni tadra, a kaya ena nuidei: “Sa sega beka ni rawa vua na Kalou me vakaibalebaletaka na ka?”—Vakatekivu 40:8; 41:15, 16.
Vica tale na senitiuri e tarava, a tadra o Tui Nepukanesa e Papiloni, ra qai sega ni vakatakila rawa na nona tamata vuku na kena ibalebale. A mani kaya na parofita o Taniela vua na tui: “Sa dua na Kalou mai lomalagi sa vakaraitaka na ka vuni, ka sa vakatakila rawa vei kemuni na tui ko Nepukanesa na ka ena yaco e na gauna maimuri.”—Taniela 2:28.
Na nodrau ivakaraitaki o Josefa kei Taniela e dusia ni vuku kei na kilaka e taka mai vua na Kalou, e dau vakatakilai wale ga vei ira era qarava na Kalou o Jiova. Io, me rawa ni vakadonui keda o Jiova ena gadrevi meda biuta tani na noda ivakarau ni rai makawa. Era a cakava tale ga oqori na Jiu ena imatai ni senitiuri era a tavuki mera lotu Vakarisito. Me vaka nira a susu mera doka qai talairawarawa ina lawa e vakatura na ivakarau ni veika vakaJiu, e gadrevi gona na gauna mera ciqoma ni o Jisu na Mesaia. A lako mai o koya me vakayacora na Lawa i Mosese, “nai vakatakarakara ni veika vinaka me na muri mai.” (Iperiu 10:1; Maciu 5:17; Luke 24:44, 45) Sa mai kena isosomi “na vunau [“lawa,” NW] i Karisito,” e uasivi cake sara mai na Lawa i Mosese.—Kalatia 6:2; Roma 13:10; Jemesa 2:8.
Eda sucu kece mai ina vuravura e sega ni veiriti kei na Kalou. Ni sa dewavi keda gona na nodrau ivalavala ca na vuda, nida sucu mai eda veimecaki kei na Kalou, da qai lekata na kilaka dodonu me baleta na nona inaki. Sa vakavuna tale ga kina me tiko vei keda na loma e veivakaisini. (Jeremaia 17:9; Efeso 2:12; 4:18; Kolosa 1:21) Me rawa nida veitokani kei na Kalou, ena dodonu meda veisautaka na ivakarau ni noda vakasama me salavata kei na ivakarau ni vakasama ni Kalou. Ia, oqori ena ka ni bolebole toka.
Vakauasivi, kevaka eda a tuberi mai ena ivalavala kei na ivakavuvuli ni lotu lasu nida se gone. Ia, e ka vakavuku beka ke da muria tiko ga na sala cala? Sega! E ka vakayalomatua vua e dua me veisautaka na ivakarau ni nona vakasama me rawa ni vakadonui koya kina na Kalou.
Kila na iDewadewa ni Nona Veivakavulici na Kalou
E vei na vanua o rawa ni vukei kina mo kila na ka dina ena iVolatabu, mo qai bulataka? Ena matanitu makawa o Isireli, na Kalou a lesia e so na nona tamata yalodina qai nuitaki me liutaki ira. Na iLiuliu ni ivavakoso ni lotu Vakarisito ena gauna oqo, o Karisito, e dusimaki ira tale tiko ga era vinakata dina tu mera kila na ka dina. E cakava tiko oqori ena nona vakayagataki ira na nona imuri yalodina qai nuitaki mera veidusimaki, ra taqomaki ira tale ga era dau vakasaqara na ka dina. (Maciu 24:45-47, VV; Kolosa 1:18) E rawa vakacava vua e dua me kila na idewadewa ni nona veivakavulici na Kalou?
O ira na imuri dina i Jisu Karisito era saga mera vakatotomuria na itovo vata ga a vakaraitaka o koya ena nona bula voli e vuravura. Rawarawa sara nira kilai tani na nona imuri ena vuravura sa qai tubu ga na kena ivakarau ca, ena nodra vakaraitaka na itovo vakasakiti vakayalo. (Raica na kato ena tabana e 6.) E laurai beka na veitovo oqori ena lotu o lewena, se na kena era lewena o ira oni tiko veitikivi? Ena yaga dina ke o dikeva na tikina oqo ni o vakayagataka na iVolatabu.
Oni sureti gona na dauwiliwili mo ni cakava vaka kina ena nomuni vulica na iVolatabu. Yabaki sa oti, e rauta nira le 6,000,000 vakacaca ena 235 na vanua era sa vuli iVolatabu tiko kei ira na iVakadinadina i Jiova. Ena sega ni mudu na noda saga meda rawata na vuku kei na kilaka me baleta na Kalou, ia, e veivakacegui, qai marautaki. Vakacava mo saga mo rawata na vuku kei na kilaka me baleta na Kalou? Oqori na sasaga o na sega vakadua ni veivutunitaka. Io, e rawa nida kilai koya na Kalou!
[Kato ena tabana e 6]
O IRA ERA CAKACAKA VATA KEI NA KALOU . . .
era tawaveitovaki ena veika vakapolitiki.—Aisea 2:4.
era vuataka na vua vinaka ena nodra cakava na loma ni Kalou.—Maciu 7:13-23.
era veilomani dina.—Joni 13:35; 1 Joni 4:20.
era duavata ena ka era kaya.—Maika 2:12.
era sega ni vakatotomuria na nodra rai cala kei na nodra itovo ca na tamata ni vuravura oqo.—Joni 17:16.
era vunautaka na ka dina ra qai vakayaco tisaipeli.—Maciu 24:14; 28:19, 20, VV.
era soqoni vakawasoma mera veivakayaloqaqataki.—Iperiu 10:25, VV.
era duavata e veiyasa i vuravura ena nodra vakalagilagia na Kalou.—Vakatakila 7:9, 10.
[iYaloyalo ena tabana e 7]
E rawa vei keda yadua, vakavuvale, se vakaivavakoso meda kilai koya na Kalou