E Yaga na Dau Dina
NA LASU a se tekivu sara ena were o Iteni. Ena levu na itikotiko kei na itovo vakavanua e dau vakamareqeti kina na dau dina, ia e beci qai sega ni taleitaki na lasu kei na veivakaisini. Bau ka dokai ni dua e kilai ni tamata dau dina. Ena yasana adua, e laurai ni bibi na lasu me rawa kina na bula ena ivakarau ni bula ena gauna oqo. Cava nomu rai ena tikina oqori? E yaga beka na dau dina? Na cava na nomu ivakatagedegede mo vakatulewataka kina na ivalavala e dodonu kei na kena e sega ni dodonu?
Me rawa nida vakamarautaka na Kalou, e dodonu meda dau dina ena noda vosa kei na ivakarau ni noda bula. E vunauci ira na nona itokani lotu Vakarisito na yapositolo o Paula: “Me vosa dina na tamata yadua vua na kai nona.” (Efeso 4:25) A vola tale ga: “Keitou sa vinakata me keitou vakayacora tiko ga na ka dodonu e na veigauna kece ga.” (Iperiu 13:18, VV) Sega ni inaki ni noda dau dina meda vakalagilagi kina. Eda dau dina baleta nida dokai koya na noda Dauveibuli, da qai vinakata meda vakamarautaki koya.
Kua ni Dauveivakaisini
Ena levu na vanua, era sega ni dau vakasavuya vakadodonu na tamata na kedra itukutuku me rawa nira rawaka kina ena nodra bula. Era tabaka e so na itukutuku lasu ena ivola, sitivikiti, kei na pepa ni ivakatakilakila mera curuvanua kina vakailawaki, se mera rawata e dua na cakacaka se e dua na itutu era sega ni vakaivola kina. E so na itubutubu era lasutaka na ivolanisucu i luvedra me rawa ni toso tale kina na nodra vuli.
Ia, meda vakamarautaka na Kalou, eda na sega ni veivakaisini. E kaya na iVolatabu ni o Jiova e “Kalou daudina,” qai namaka mera dau dina o ira era volekati koya. (Same 31:5) Kevaka meda veivolekati tiko ga kei Jiova, eda na sega ni vakatotomuri ira na “tamata lasulasu,” o ira na “dauveivakaisini.”—Same 26:4.
E matau tale ga mera dau lasu na tamata nira kila nira na vakadodonutaki ena cakacala. Ena loma sara mada ga ni ivavakoso lotu Vakarisito, ena rawa ni temaki e dua me cakava oqori. Me kena ivakaraitaki, ena dua na ivavakoso, e tusanaka e dua na cauravou vei ratou na qase ni ivavakoso ni a cakacala. Ia, a sega ni tusanaka ni a butako, dina ga ni a tu na kena ivakadinadina. A qai kilai e muri nona butako mani vakasivoi kina mai na ivavakoso. Sega li ni ka vakavuku me a tukutuku ga vakadodonu, qai rawa ni vukei me vakavinakataka nona veiwekani kei Jiova? Na kena dina e kaya na iVolatabu: “Mo kakua ni beca ni sa cudruvi iko ko Jiova, Se yalowai ni sa vunauci iko ko koya: O koya sa lomana ko Jiova, sa cudruva ko koya.”—Iperiu 12:5, 6.
Ena so na gauna, ena rairai saga me vunitaka na nona leqa se na ka ca a cakava ena gauna e liu na tacida tagane e via sauva tiko e so na itavi ena ivavakoso. Me kena ivakaraitaki, ni vakalewena na fomu ni kerekere ina dua na taba ni veiqaravi lavotaki, de dua ena sega ni sauma vakadodonu na taro me baleta na nona bulabula vinaka kei na nona itovo, e nanuma ni na sega ni vakadonui kevaka e tukuna na ka dina. Ena rairai kaya, ‘Au a sega sara ni lasu,’ ia a tukutuku beka vakadodonu qai dina na nona vosa? Vakasamataka mada na tikina e vakabibitaki ena Vosa Vakaibalebale 3:32: “Sa ka vakasisila vei Jiova na yalovakatani: a sa tiko ga kei ira na yalododonu na nona vosa vuni.”
Taumada, na dau dina e kena ibalebale na noda dina sara ga o keda. Vakavuqa meda vakabauta ga na ka eda vinakata, mai na noda vakabauta na ka e dodonu se na ka e dina. Dau rawarawa ga meda beitaka tale e dua ena cala eda cakava! Me kena ivakaraitaki, a beitaki ira na tani o Tui Saula nira vakavuna nona talaidredre. Mani sega kina ni vakadonui koya o Jiova me tui. (1 Samuela 15:20-23) Duidui sara o Tui Tevita, a masuti Jiova: “Au a vakatusa vei kemuni na noqu caka cala, ia ka’u sa sega ni vunia na noqui valavala ca; au a kaya, ka’u na vakatusa vei Jiova na noqui valavala ca: ia ko ni sa qai kauta tani na kena ca ni noqui valavala ca.”—Same 32:5.
Vakaicocovitaki na Dau Dina
Na nomu dau dina se sega, ena cakayaco ena sala era raici iko kina na tani. Kevaka era kila ni o lasutaki ira vakadua mada ga, era sa na sega ni nuitaki iko, ena dredre mera nuitaki iko tale. Ia, ena yasana adua, kevaka o dau dina qai vosa vakadodonu, o na kilai mo tamata yalodina, o rawa ni nuitaki. Era kilai na iVakadinadina i Jiova nira vaka kina. Dikeva mada e so na ivakaraitaki.
E dua na dairekita ni kabani e siqema ni levu nona tamata cakacaka era dabuitaka tiko na kabani, a qai kerei ira na ovisa mera vaqaqa. Nona kila ni a vesu tale ga e dua na nona tamata cakacaka e iVakadinadina i Jiova, a gole sara vei ira na ovisa mera sereki koya. Na vuna? Baleta e kila na dairekita ni dau dina ena nona cakacaka na iVakadinadina oya. Era vakacegui na vo ni tamata cakacaka vakavo ga o koya na iVakadinadina. Era marau na nona itokani iVakadinadina nira kila ni nona itovo vinaka e vakalagilagi kina na yaca i Jiova.
E dau kauaitaki na itovo vinaka. Ena dua na itikotiko mai Aferika, a gadrevi me vakavinakataki na ikawakawa a butakoci e so na kena kau. Era mani kumuni ilavo na vakaitikotiko e kea mera volia e so na kauvaro, ia o cei beka e nuitaki me maroroya na ilavo? Era duavata kece ni dodonu me maroroya e dua na iVakadinadina i Jiova.
Ena gauna e yaco kina ena dua na vanua mai Aferika na nodra tikoyavavala na lewenivanua kei na veilecayaki ni veika vakapolitiki, a lesi sara e dua na iVakadinadina a cakacaka tiko ena dua na kabani e kea, me vaka ni a rawa ni vakaleqai na nona bula. E tuvanaka na kabani me cakacaka qai saumi koya tiko me vica na vula ena dua tani tale na vanua me yacova ni sa malumu sobu na ituvaki. Na vuna? Baleta ena dua na gauna e liu, a sega ni duavata kei ira era saga tiko mera butakoca na kabani. Eratou kila na veiliutaki ni o koya e tamata dau dina. Ia vakacava ke ratou kila ni sega ni dau dina, eratou na vukei koya beka?
E kaya na Vosa Vakaibalebale 20:7: “Sa muria na nona yalodina na yalododonu.” Na tamata dau dina e tamata yalodina. Ena sega ni lawaki se lasutaki nona itokani. O sega li ni vinakata mera cakava vaka oya vei iko? Na dau dina e tiki bibi ni noda sokalou. E ivakaraitaki ni noda lomana na Kalou kei ira na wekada. Na noda dau dina e vakaraitaka nida muria na ivakavuvuli a tukuna o Jisu: “Na ka vakaaduaga dou sa vinakata me ra kitaka vei kemudou na tamata, dou kitaka vaka talega kina vei ira.”—Maciu 7:12; 22:36-39.
So na gauna ena duidui na ka eda sotava ena noda dau dina tu ga, ia e bibi cake sara na kena rawati na lewaeloma savasava mai na dredre eda sotava kina. Ni toso na gauna ena qai vakavotui na yaga ni dau dina kei na yalododonu. Na noda veiwekani vinaka gona kei Jiova e sega ni vakatauvatani rawa kei na dua tale na ka. Na cava mo vakacaraka kina na veiwekani vinaka oqori ena nomu lasu me kua nira beci iko kina na tamata, se mo rawaka kina? Se mani ituvaki dredre cava eda sotava, eda rawa ni nuitaka na veivosa i koya na daunisame: “Sa kalougata na tamata sa dauvakararavi vei Jiova, ka sa gole tani maivei ira na yalolevu, maivei ira talega era lesu tani ki na daulasu.”—Same 40:4.
[iYaloyalo ena tabana e 18]
O ira na lotu Vakarisito dina era sega ni volia se vakayagataka na itukutuku lasu