Nodra Kerekere na Lewe i Vuravura

VAKASAMATAKA mada nodra kerea e dua vata ga na ka, e sivia na rua na bilioni na lewe i vuravura. Era kerea vua na iliuliu ni lomalagi kei vuravura me vakayacora na nodra kerekere, ia e vica wale sara era kila vinaka na ka era kerea. Dina beka oya? E vaka kina, e yaco e veisiga. Cava sara mada era kerea tiko? Me yaco mai na Matanitu ni Kalou!

Vakaraitaka e dua na itukutuku ni rauta e 37,000 na lotu era kaya nira lotu Vakarisito, era vakabauta ni nodra iLiuliu o Jisu Karisito. Na kedra iwiliwili na lewenilotu oqori e sivia na rua na bilioni. Levu vei ira era cavuta wasoma na Masu ni Turaga. O kila na masu oqo? Nona vakavulica o Jisu vei ratou nona imuri, e tekivutaka vaka oqo: “Tama i keimami mai lomalagi, me vakarokorokotaki na yacamuni, me yaco mai na nomuni matanitu, me caka na lomamuni e vuravura, me vaka sa caka tiko mai lomalagi.”​—Maciu 6:​9, 10, VV.

Sa vica vata na drau na yabaki nodra cavuta tiko na dausokalou na masu oqori e valenilotu. Ra cavuqaqataka yadudua se vakavuvale, ena gauna vinaka kei na gauna ca. E vu sara ga mai lomadra ra qai lomakatakata nira cavuta na masu oqo. Levu tale era cavuqaqataka ia era sega ni vakasamataka na kena ibalebale. Sega ni o ira ga era kaya nira lotu Vakarisito era nuitaka ra qai masuta me yaco mai na Matanitu ni Kalou.

Nodra Kerekere na Sega ni Lotu Vakarisito

Kilai levu ena vakabauta vakaJiu na masu e vakatokai na Kaddish. Na masu oqo e sega ni vakamacalataki kina na mate se na rarawa, e dau cavuti ena gauna ni lolosi. E kerei ena masu: “Me tauyavutaka mada ga [na Kalou] na nona Matanitu ena nomu gauna . . .  me vakatotolotaka.”a Dua tale na masu ena valenisoro ena gauna makawa e baleta na inuinui ni nona Matanitu na Mesaia e cadra mai na iyatukawa i Tevita.

So tale na vakabauta era sega ni lotu Vakarisito era taleitaka na vakasama me baleta na Matanitu ni Kalou. A tabaki ena Times of India, na ka a kaya e dua na iliuliu ni lotu kilai e Idia ena ika19 ni senitiuri ni via vakaduavatataka na ivakavuvuli ni lotu Idu, Musilimi kei na lotu Vakarisito: “Ena kilai ga na matanitu dina ni Kalou kevaka me rau duavata na ceva kei na tokalau.” A vola tale ga ina dua na niusipepa na qasenivuli liu ena dua na koliji ni musilimi e Strathfield, Ositerelia: “Me vakataki ira na vo ni Musilimi, au vakabauta [ni] na lako tale mai o Jisu me tauyavutaka na Matanitu dina ni Kalou.”

Sega ni vakabekataki ni bilioni era nuitaka ra qai kerea me yaco mai na Matanitu ni Kalou. Ia vakasamataka mada na ka dina oqo.

Rairai oni sa kila ni ivola oqo e tabaka na iVakadinadina i Jiova. Keimami dau lako tale ga e veivale ena nomuni yasayasa ena kena veivosakitaki na iVolatabu. E vakayacori tiko na cakacaka oqo ena 236 na vanua e vuravura, ena sivia na 400 na vosa. Na usutu ni neimami vunau na Matanitu ni Kalou. Oni na raica ni yaca taucoko ni ivola oqo Na Vale ni Vakatawa Kacivaka na Matanitu i Jiova. Levu era tarogi se ra dau masuta na Matanitu oqo, era kaya ni vaka kina. Ia nira tarogi se cava na Matanitu oya, levu era kaya, “Au sega ni kila.” Se na kena isau e sega ni matata ra qai lomalomarua.

Cava era kerea kina e levu na Matanitu ni Kalou, ia era sega mada ga ni vakamacalataka rawa? Baleta beka ni sa rui vereverea qai sega ni matata na kena ivakavuvuli? Sega. E vakamacalataki sara ga vakavinaka ena iVolatabu, rawa kina moni kila na inuinui dina ena gauna dredre oqo. Eda na wilika ena ulutaga tarava na kena vakamacalataki vakaivolatabu na inuinui oya, vaka kina na isau ni masu me baleta na Matanitu ni Kalou a vakavuvulitaka o Jisu.

[iVakamacala e ra]