Cava na Matanitu ni Kalou?

NA CAVA sara mada na usutu ni vunau i Jisu? Kaya o koya ni Matanitu ni Kalou. (Luke 4:​43) Era vakadinadinataka na rogoci koya nona dau cavuta na Matanitu oqori. Era veilecayaki beka? Ra taroga se cava na Matanitu ni Kalou? Sega ni bau cavuti ena Kosipeli na taro vaka oqori. E kilai levu beka vei ira na ivakavuvuli me baleta na Matanitu ni Kalou?

Na iVolatabu makawa era doka na Jiu e vakamatatataka na Matanitu oya kei na veika ena vakayacora. Me vakataki ira na Jiu, eda rawa ni vulica tale ga e levu sara na ka me baleta na Matanitu ena noda vakayagataka na iVolatabu. Meda dikeva mada e vitu na ka dina eda vulica kina. Na imatai ni tolu era sa kila rawa tu na Jiu ena gauna i Jisu vaka kina ni bera oya. Tolu tale a vakatakila o Karisito se ratou nona yapositolo ena imatai ni senitiuri. Na kena iotioti e vakamatatataki ena noda gauna.

1. Dua dina na matanitu, ena tu me tawamudu. E vakaraitaki ena imatai ni parofisai ena iVolatabu, ni Kalou ena tala mai e dua na ivakabula ena vukudra na yalodina. Na ivakabula e vakatokai na “kawa” ena vakaotia na leqa kece a vu mai na nodratou talaidredre o Atama, Ivi, kei Setani. (Vakatekivu 3:​15) Dua na gauna emuri a tukuni vei Tevita na tui yalodina, na ka talei me baleta na “kawa” oqo se Mesaia na Tui ni Matanitu ni Kalou. Ni vakatauvatani kei na matanitu tale e so, na Matanitu oqo e duatani baleta ena tu me tawamudu.​—2 Samuela 7:​12-14.

2. Ena muduka na matanitu kece vakatamata. A raivotutaka na parofita o Taniela na veitaravi ni matanitu qaqa kei vuravura ena veigauna sa sivi me yacova mai noda gauna. Dikeva na itinitini vakasakiti ni raivotu oya: “E na nodra gauna na tui ko ya ena qai vakatura na Kalou ni lomalagi e dua na matanitu, ena sega sara ni vakarusai rawa: ia na matanitu ko ya ena sega ni biu tu me nodra na tamata tani, ia ena vurumemeataka ga ka vakaotia na veimatanitu oqori, ka na tu ga ka sega ni mudu.” Koya gona, na matanitu kece ni vuravura oqo​—nodra ivalu, veiliutaki vakasaurara, kei na veivakaisini​—ena muduki vakadua. E tukuni ena parofisai i Taniela, ni sega ni dede sa na lewa na vuravura taucoko na Matanitu ni Kalou. (Taniela 2:​44, 45) Oqo duadua ga na Matanitu e vo me na veiliutaki.a

3. Ena vakaotia na ivalu, tauvimate, via kana, kei na mate. E vakatakilai ena parofisai vakaivolatabu na ka ena vakayacora e vuravura na Matanitu ni Kalou. Ena vakayacora na ka e sega ni rawata na isoqosoqo vakatamata ena gauna sa sivi vaka kina ena gauna se bera mai. Vakasamataka mada na kena vakarusai na iyaragi kece ni ivalu! “Sa vakaotia nai valu mai nai yalayala kei vuravura.” (Same 46:9) Sega na vuniwai, valenibula, se na veimataqali mate. “Na lewe ni koro ena sega ni kaya, Ka’u sa tauvi mate.” (Aisea 33:24) Na dausiga, lailai ni kakana, kanavakaca se waloloi sa na oti. “Ena sa tu e vuravura e na dela ni veiulu-ni-vanua na sila e qumi rawarawa.” (Same 72:16) Sa na sega na veibulu, somate, ibulubulu, valeniwawa, se na rarawa e salavata mai. Na keda meca o mate sa na muduki vakadua. Na Kalou “ena vakaotia sara na mate . . . ia na Turaga ko Jiova ena tavoya na wai ni mata mai na matadra na tamata kecega.”​—Aisea 25:8.

4. Na kena Tui e digitaka na Kalou. E sega ni buli koya ga na Mesaia me tui se mera digitaki koya na tamata ivalavala ca, ia e digitaki koya sara ga na Kalou o Jiova. Na icavuti Mesaia kei na Karisito e vakatakila ni digitaki koya sara ga na Kalou, na vosa ruarua oqori e kedrau ibalebale “O Koya na Lumuti.” O Jiova e digitaki koya na Tui lumuti oqo ina dua na itavi lavotaki. E kaya na Kalou me baleti koya: “Raici koya na noqui talatala, ka’u sa tokona; ko koya ka’u a digitaka, ka’u sa vinakati koya talega e na vu ni lomaqu; au a solia vua na Yaloqu; ena vakayacora ko koya na lewa dodonu ki na veimatanitu.” (Aisea 42:1; Maciu 12:​17, 18) O cei e kila vinaka na mataqali Tui e ganiti keda ni vakatauvatani kei koya na Dauveibuli?

5. Vakaraitaka e matanalevu ni ganiti koya me Tui ni Matanitu ni Kalou. E vakadinadinataki ni Mesaia yalataki o Jisu na kai Nasareci. A sucu ena iyatukawa e digitaka na Kalou. (Vakatekivu 22:18; 1 Veigauna 17:11; Maciu 1:1) Vakayacora e levu na parofisai a tukuni tu ena vica na drau na yabaki e liu me baleta na Mesaia. Vakatakilai mai lomalagi ni o koya na Mesaia. Yaco vakacava oya? A vosa sara ga mai lomalagi na Kalou ena nona vakatakila ni o Jisu e Luvena, era kaya na agilosi ni Mesaia yalataki​—kei na nona cakamana era raica e drau se udolu vakacaca, e vakavotuya na kaukaua ni Kalou.b A vakaraitaka wasoma o Jisu ena ka e cakava se mataqali Tui vakacava. Sega wale ga ni tu vua na kaukaua ia e vinakata sara ga me veivuke. (Maciu 8:​1-3) E dau veinanumi, yalololoma, yaloqaqa qai yalomalumalumu. Na itukutuku ni nona bula e vuravura o Jisu e volai ena iVolatabu meda wilika.

6. Le 144,000 era veiliutaki kei Karisito. Kaya o Jisu ni so tale, okati kina o ira nona yapositolo era na veiliutaki kei koya mai lomalagi. E vakatoka na ilawalawa oqori me “qele-ni-sipi lailai.” (Luke 12:32) Emuri sa qai tukuni vua na yapositolo o Joni ni kedra iwiliwili e 144,000, era na veiliutaki vakatui, veiqaravi tale ga vakabete kei Karisito mai lomalagi.​—Vakatakila 5:9, 10; 14:​1, 3.

7. Sa veiliutaki tiko mai lomalagi na Matanitu ni Kalou, vakarau me lewa na vuravura. E vinaka meda kila na iotioti ni ka dina vakatubuqoroqoro. Levu sara na ivakadinadina e tukuni ena iVolatabu ni sa soli vei Jisu na lewa vakatui mai lomalagi. Sa veiliutaki tiko ena gauna oqo, sega ni dede sa na lewa mai na kawatamata e vuravura, me vakayacora na parofisai kece era sa cavuti oti. Eda kila vakacava ni sa veiliutaki tiko ena gauna oqo na Matanitu ni Kalou? Ena tekivu lewa na vuravura e naica?

[iVakamacala e ra]