Vakadamurimuria Nodra Vakabauta

A Tutaka na Sokalou Savasava

E VAKARAICI ira sobu tu na ilala levu ra cabeta tiko yani na ulunivanua o  Kameli, o Ilaija. Ni kida na mataka, e laurai votu na tatara ni dravudravua kei na leqa ni kakana vei ira na lewenivanua. E vakaleqai ira sara ga na tolu veimama na yabaki ni lauqa.

Ra maliwai ira na cabe tiko yani oqo na le 450 na parofita qaciqacia i Peali, o ira oqo era cati Ilaija na parofita i Jiova. Sa vakamatei ira oti e levu na dauveiqaravi i Jiova o Ranadi Jesepeli, ia o Ilaija se saqata tiko ga na sokalou vei Peali. Era lomatarotarotaka na bete se na vakacava na dede ni nona dei tiko ena sokalou savasava. De ra nanuma ni sega ni rawa ni qaqa o Ilaija, ni le dua ga ra qai levu na ito ni bete. (1 Tui 18:​3, 19, 20) E veitomani tale tu ga o Tui Eapi ena ilakolako oqo, e vodo toka ena nona qiqi vakaturaga, sega tale ga ni taleitaki Ilaija.

Ni tutaka duadua voli o Ilaija na sokalou savasava, ena vakatubuqoroqoro dina na veika e vakarau yaco oqo. Ena veivakadrukai dina nodrau vakarau vakasota oqo na vinaka kei na ca, ni se sega ni bau yaco vakadua e liu. Cava na rai i Ilaija ni sa cadra na siga me yaco kina oqori? Ni ‘vakataki keda ga o Ilaija’ e vakila tale ga na rere. (Jemesa 5:​17) Me qai sega vaka cava ni rere: O koya duadua ga e tutaka na sokalou savasava, ena yasana kadua, ra sa wavoliti koya tu e dua na ilala tawavakabauta, nodra tui vukitani, kei ira na bete dauvakadavedra era tokona kece na sokalou vei Peali.​—1 Tui 18:22.

Ra mai sotava tu vakacava na leqa levu oqo na Isireli? Ena yaga vakacava vei keda nikua? Uqeti keda na iVolatabu meda dikeva vinaka nodra ivakarau ni bula na dausokalou yalodina qai “vakadamurimuria na nodra vakabauta.” (Iperiu 13:7) Dikeva mada na ivakaraitaki i Ilaija.

Kena iTinitini

Voleka ni nona bula kece o Ilaija, sega ni cakava rawa e dua na ka ena kena vakanadakui qai buturaki sobu na ka vinaka duadua e bau yaco ena nona vanua kei ira na lewena. Dua na gauna balavu era veilecayaki voli kina na Isireli, mera digitaka na lotu dina se lotu lasu, mera sokaloutaki Jiova se qarava nodra kalou lasu na veimatanitu tale e so. Sa qai cacamatua sara ena gauna i Ilaija.

O Tui Eapi, a vakawatitaki Jesepeli, na luve i tui Saitoni. Nona inaki na marama oqo me vakatetea e Isireli na sokalou vei Peali qai vakawabokotaka na sokalou vei Jiova. A rawai o Eapi ena veivakamuai nei watina, tara kina na valenisoro kei na icabocabonisoro vei Peali qai liutaka sara ga na qaravi kalou lasu. E vakacudrui Jiova vakalevu sara na veika a cakava o Eapi.​—1 Tui 16:​30-​33.a

Cava sa rui vakasisila kina na sokalou vei Peali? Baleta ni vecei Isireli, ra qai vakanadakuya kina na Kalou dina e levu. Na lotu oqo e kilai tale ga ena ivalavala vakasisila kei na so tale na veika vakadomobula e caka kina. E vakadonuya na nodra tiko e valenisoro na tagane kei na yalewa ca, vakayacori ni ivalavala vakasisila, kei na nodra cabori vakaisoro na gone. A talai Ilaija o Jiova me vakasavuitukutuku vei Eapi, ni na tara na vanua e dua na lauqa me yacova ni tukuna na parofita ni Kalou na gauna ena oti kina. (1 Tui 17:1) Oti e vica vata na yabaki, sa qai gole tale o Ilaija vei Eapi, lai tukuna vua me soqoni ira vata na lewenivanua kei ira na parofita i Peali ina ulunivanua o Kameli.

Cava na kena yaga vei keda nikua? De ra nanuma e so ni tawayaga vei keda na itukutuku me baleta na sokalou vei Peali, ni sa sega ena gauna oqo na valenisoro kei na icabocabonisoro e sokaloutaki kina. Ia, sega ni italanoa makawa ga oqori, e vakaibalebale tale ga vei keda. (Roma 15:4) Na vosa “Peali” e kena ibalebale “itaukei” se “turaga.” E vinakata o Jiova mera digitaki koya na Isireli me nodra “peali” se watidra. (Aisea 54:5) O duavata ni sa sega ni qaravi nikua na Kalou Cecere, sa tiko e so tale na turaga era qaravi? Io, o ira na vakaliuca na qarai ni ilavo, cakacaka, ka ni veivakamarautaki, marautaki ni veiyacovi, se nodra qaravi na kalou tale e so qai sega ni vakaliuci Jiova, sa ra vakaraitaka sara tiko ga se o cei e nodra turaga. (Maciu 6:​24; Roma 6:​16) Rawa gona ni tukuni, ni se vakabulabulataki tiko ga nikua e so na ka e semati ina sokalou vei Peali. Na kena vakadinadinataki ena gauna i Ilaija se o cei e Kalou dina, Jiova se Peali, ena uqeti keda meda vakatulewataka vakayalomatua se o cei meda qarava.

“Lomalomarua”​—Sala Cava?

E laurai vinaka mai na Ulunivanua tadravi cagi o Kameli na vanua o Isireli​—mai na buca kei Kisoni ena ruku ni ulunivanua, na Wasawasa Levu e toka voleka e kea, yaco sara ina veiulunivanua kei Lepanoni ena vualiku.b Ni cadra na siga, e laurai votu na vakaloloma ni ituvaki ni vanua. Sa yali na qele bulabula a solia o Jiova vei ira na Isireli, sa kaukaua na qele ena vuku ni todra ni siga kei na nodra lakosese na Isireli! E torovi ira na lewenivanua era sa soqoni vata tu o Ilaija qai kaya: “E bogi vica mada kemuni na lomalomarua tiko kina? kevaka sa Kalou ko Jiova, mo ni muri koya: ia kevaka ko Peali, mo ni muri koya.”​—1 Tui 18:21.

Cava na ibalebale ni “lomalomarua” a cavuta o Ilaija? E dodonu mera digitaka na Isireli, mera sokalou vei Jiova se Peali. Era nanuma mera cakava ruarua​—vakamarautaki Peali ena nodra ivalavala vakasisila, ra qai kerea tale ga na veivuke i Jiova. De ra nanuma ni na vakalougatataka o Peali na nodra iteitei kei na nodra manumanu, o “Jiova ni lewe vuqa” ena taqomaki ira ena ivalu. (1 Samuela 17:45) Ia, ra guilecava e dua na ka era lecava tale tu ga e levu nikua​—o Jiova e sega ni vinakata me sokaloutaki tale e dua, ia me caka vakatabakidua ga vua. Sega ni vakadonuya me bosoki vata na nona sokaloutaki kei na ivalavala ni sokalou tale e so. E okata oqori me vakasisila qai vebeci!​—Lako Yani 20:5.

Ra “lomalomarua” na Isireli me vakataki koya e via muria e rua na sala ena dua ga na gauna. E laurai tale ga oqori nikua, sa tiki tu ni nodra bula e levu na veika era vakatokai me “peali,” sa vakanadakui na qaravi Kalou! Me uqeti keda mada ga na ivakasala i Ilaija me baleta na lomalomarua, meda vakadeuca tale kina na veika eda vakaliuca kei na noda sokalou.

Me Macala Mada se O Cei na Kalou Dina

E rawarawa sara na vakatutu i Ilaija me baleta na kena vakadinadinataki se o cei e Kalou dina. Mera cakava na nodra icabocabonisoro na bete i Peali qai biuta kina na nodra isoro; mera qai masuta na nodra kalou me waqaca na kena buka. Ena cakava tale ga oqori o Ilaija. A qai tukuna o Ilaija: “Ia na kalou sa vosa mai e na buka waqa, me Kalou ga ko koya.” Sa matata vinaka tu vei Ilaija se o cei na Kalou dina. Nona tukuna mera cabora e liu na nodra isoro na parofita i Peali, e vakaraitaka ni qaqaco vinaka tu na nona vakabauta. E vakarawarawataka vei ira na nona meca na veika mera cakava, tukuna mera digia e liu na bulumakau me nodra isoro qai masuti Peali sara.c​—1 Tui 18:​24, 25.

Sa sega na cakamana nikua. Ia, o Jiova e sega ni veisau. Se rawa tiko ga nida nuitaki koya me vakataki Ilaija. Kena ivakaraitaki, nira sega ni duavata e so kei na ka e kaya na iVolatabu, laiva mera talaucaka na nodra nanuma se rai. Me vakataki Ilaija, da laiva vua na Kalou dina me vakatulewa kina. Kua nida nuitaki keda ga, da nuitaka ga nona Vosa uqeti na Kalou, ni yaga ‘me veivakadodonutaki.’​—2 Timoci 3:​16.

Ra vakarautaka na nodra isoro na parofita i Peali qai masuti koya sara: “I Peali, mo rogoci keimami mai.” Ra tukuna tiko oqori me vica na miniti, lai vica vata sara na aua. E kaya na iVolatabu, “a sa sega na domo e rorogo, se dua e vosa mai.” Tekivu vakalialiai ira o Ilaija ena nona tukuna, de sega ni rogoci ira o Peali ni sa rui osooso, de tiko e valelailai, se moce tiko qai vinakati me vakayadrati. Baci tukuna tale vei ira o Ilaija: “Dou kaci vakadomoilevu.” Sa vakadeitaka tu o Ilaija ni sega ni dina na sokalou vei Peali, e vinakata ga mera vakadinadinataka sara ga e matadra na Isireli.​—1 Tui 18:​26, 27.

Sa vaka era lialia na bete i Peali, “ra sa kaci vakadomoilevu, ka tavalaki ira e nai seleiwau kei nai sele, me vaka na nodrai valavala, a sa dave mai na nodra dra.” E dreve kece ga na nodra sasaga! “A sa sega na domo e rorogo, se dua e vosa mai, se dua e rogoca.” (1 Tui 18:​28, 29) Sega ni dua dina na kalou o Peali, oqori e ivadi ga i Setani me vakamuai ira tani na Isireli mai na nodra qaravi Jiova. Me vaka ga e liu, ena rarawa qai vakamadualaki tale ga ena gauna oqo o koya e sega ni digitaki Jiova me nona turaga.​—Same 25:3; 115:​4-8.

Cava e Macala

Sa vakavakarau sara o Ilaija me cabora na nona isoro. Taumada, a vakavinakataka e dua na icabocabonisoro vei Jiova era talaraka sobu na meca ni sokalou savasava. A vakayagataka e 12 na vatu, rairai me vakadeitaki kina vei ira na 10 na yavusa e Isireli, nira se vauci tiko ga ena Lawa a soli vei ira kece na 12 na yavusa. E vakarautaka na nona isoro qai sova kina na wai, rairai kau mai na Wasawasa Levu e toka voleka e kea. Na ikeli mada ga a keli yavolita na icabocabonisoro sa sinai tale ga ena wai. Sa da dikeva oti mai ni a vakarawarawataka o Ilaija vei ira na parofita i Peali na veika mera cakava, ia e laurai nona nuitaka dei na Kalou e qarava ena nona vakadredretaka na veika e cakava, dina nira nanuma kina na vakararai tu ni na guce tale ga. ​—1 Tui 18:​30-​35.

Ni vakarautaka oti na veika kece, sa qai masu o Ilaija. Na matata kei na rawarawa ni nona qaqanimasu, e vakaraitaka sara ga na veika e vakaliuca. Koya e bibi duadua, e vinakata me kilai ni o Jiova e “Kalou e Isireli,” sega ni o Peali. iKarua, e via vakaraitaka ni o koya e dua ga na dauveiqaravi i Jiova; na veivakacaucautaki kei na veivakalagilagi me vagolei ga vei Jiova. Kena ilutua, e vakaraitaka ni se kauaitaki ira tiko ga na Isireli o Ilaija, e vinakata me “saumaka tale na yalodra” o Jiova. (1 Tui 18:​36, 37) Mani vakacava na levu ni veika rarawa era vakavuna ena nodra tawayalodina, se lomani ira tiko ga o Ilaija. Rawa beka nida vakaraitaka tale ga ena noda masu nida kauaitaka na yaca i Jiova, eda yalomalumalumu qai yalololoma vei ira era gadreva na veivuke?

Ni vakarau masu o Ilaija, de ra veinanuyaka na duri tu e kea ke na vakataki Peali o Jiova. Na veika a yaco ni oti na masu i Ilaija e veisautaka sara ga na nodra rai. Tukuna na kena ivolatukutuku: “Sa qai lutu sobu mai na buka waqa i Jiova, ka kania nai soro kama, kei na buka, kei na vatu, kei na kuvu-ni-qele, ka dramica na wai e na keli.” (1 Tui 18:38) Vakatubuqoroqoro dina! Cava era cakava?

Era kacivaka kece: “Sa Kalou ga ko Jiova; Sa Kalou ga ko Jiova.” (1 Tui 18:39) Ra sa vakadinadinataka o cei e Kalou dina, ia e sega ga ni laurai vei ira na vakabauta. Sega ni ivakaraitaki vakasakiti ni vakabauta ke vakadinati ga ni Kalou dina o Jiova ni raici na lutu ni buka waqa mai lomalagi. Kerei ira gona o Ilaija mera vakaraitaka nodra vakabauta ena nodra muria na Lawa i Jiova, mera vakamatei kece na parofita vakailasu kei na dauqaravi matakau. (Vakarua 13:​5-9) Ra meca i Jiova na bete i Peali nira nakita nodra saqata na nona inaki. Dodonu beka mera lomani? Sega ni ivakaraitaki ni loloma na nodra vakamai bulabula na gone e sega na nodra cala mera isoro vei Peali. (Vosa Vakaibalebale 21:13; Jeremaia 19:5) Sega ni veiganiti mera lomani, vakarota kina o Ilaija mera vakawabokotaki kece.​—1 Tui 18:40.

Ra vakalewa e so na dauveivakadiloi nikua na veika a yaco ena Ulunivanua o Kameli. So ra leqataka de vakayagataki me yavu ni kena vakadonui na ivalavala voravora e vakacacani kina na lotu. Ka ni rarawa, ni levu nikua era vakaraitaka ena sala voravora nodra lomakatakata ena lotu. Sega ni vaka oya o Ilaija, a vakatauca tiko ga na lewadodonu i Jiova. Ra kila na lotu Vakarisito dina nira na sega ni vakataki Ilaija mera vakamatei ira na daucaka ca. Na ivakatagedegede a kotora o Jisu me baleti ira kece nona tisaipeli, e vakavotui ena nona tukuna vei Pita: “Daramaka tale na nomui seleiwau ki na kena taga: ni ra na mate e nai seleiwau ko ira kece era taura nai seleiwau.” (Maciu 26:52) O Jiova ena vakayagataki Luvena me vakatauca na nona lewadodonu ena gauna mai muri.

Bibi me laurai vua na lotu Vakarisito dina na vakabauta. (Joni 3:​16) Rawa nida vakadamurimuri ira na dausokalou yalodina me vakataki Ilaija. A sokaloutaki Jiova vakatabakidua qai uqeti ira na kena vo mera cakava tale ga vaka kina. A doudou ni vakavotuya na lotu lasu a vakayagataka o Setani mera vakanadakui Jiova kina na Isireli. Sega ni vakau nona se nuitaka na ka e kila, nuitaki Jiova ga me vakatulewa ena ka e yaco. Io, a tutaka dina o Ilaija na sokalou savasava. Meda vakadamurimuria mada ga na nona vakabauta!

[iVakamacala e ra]

[Tikina bibi ena tabana e 20]

Ena sotavi na leqa ke sega ni qaravi o Jiova

[iYaloyalo ena tabana e 21]

“Sa Kalou ga ko Jiova”