Noqu Yalayala Bibi

AU A cavuta e dua na yalayala bibi. Au marama ni Sipeni, au tina tale ga, ia meu vakamacalataka mada na veika e vakavuna noqu yalayala qori.

Sega ni dua na bula vakacegu se veiyaloni e kune vei rau na noqu itubutubu. Dua na vuna oya na nona laucoqa mate na ganequ ni se qai yabaki va. Dau ca tale ga na ivakarau i tamaqu, sega kina ni marautaka na bula vakawati o tinaqu. Dina ni vaka tu ya na dredre ni bula, e saga ga o tinaqu me keirau vakavulici ena itovo vinaka kei na ganequ qase.

Yaco na gauna me keirau dui vakamau. Sega ni dede sa tauvi kenisa o tinaqu, tini leqa sara kina. Ia ni bera ni takali a biuta tu mai e dua na isolisoli talei vei keirau.

A vakamacalataka vua e dua rau veikilai na inuinui totoka ni veivakaturi ena iVolatabu, taleitaka kina o tinaqu me vulica na iVolatabu. Na itukutuku sara ga qori e vu ni nona vakacegu, e vakainaki nona bula, qai marau ena gauna sa vakarau takali kina.

Na neirau raica votu na yaga ni itukutuku ni iVolatabu ena bula i tinaqu, keirau vulica tale ga kina vakaveiganeni na Vosa ni Kalou. Au papitaiso ni vo toka ga e dua na vula me sucu na ikarua ni luvequ, e yalewa totoka, qai vakayacani me o Lucía.

Bibi dina vei au na siga ni noqu papitaiso. Dua na vuna oya niu sa soli au vei Jiova, au yalataka na noqu bula vua meu na qaravi koya me tawamudu. Dua tale na vuna oya niu na tuberi luvequtagane kei na luvequyalewa ena ivakavuvuli vakaivolatabu.

Ia sega ni dede sa vuki na marau qori me rarawa. Ni se qai yabaki va o Lucía, a vutu kaukaua na ketena. Ni laurai oti vakavica e valenibula, e vakamacalataka na radiologist, e dua na vuniwai, ni dua na ka e vuce toka ena yasa ni nona liva, e vaka no na levu ni moli. Kaya o vuniwai ni tauvi Lucía tiko na neuroblastoma, na mataqali kenisa ni mona e rawa ni vakaleqai koya. Tekivu sara ga kina nona vosota voli na kenisa o Lucía me yabaki vitu, okati kina nona dau curu suka e valenibula me siga vica.

Yalo ni Vakuai Koya

Ena gauna dredre qori e dau vakauqeti au tu ga o Lucía ena nona mokoti au kei na nona dau reguci au. Era qoroya na dau veiqaravi e valenibula na ivalavala ni nona vosota na mate e tauvi koya tiko. Dau tu vakarau ni vukei ira na nasi ena veikauyaki ni kakana me vaka na yogurt, wainimoli, kei na so tale na ka vei ira na gone era davo volekati koya tiko e valenibula. Ra bau solia sara mada ga vua na nasi e dua na kote vulavula kei na dua na ivakatakilakila e volai toka kina “ivukevuke ni nasi.”

“E mositi au sara ga na ivakarau i Lucía,” e kaya e dua na daucakacaka e valenibula. “E dau yavavala, e qoroi na ka e cakava, taleitaka tale ga na droini. Dau vakamacala matata lakovata kei na nona matanataka, e gone yalomatua tale ga.”

E dei ga qai kaukaua o Lucía ena vuku ni Vosa ni Kalou. (Iper. 4:​12) E vakadeitaka o koya ni na “sega tale na ciba, se na rarawa, se na tagi, ka na sega tale na vutugu” ena vuravura vou e yalataka tu na Kalou. (Vkta. 21:4) Dau veikauaitaki, e tu vakarau tale ga me tukuna na itukutuku vinaka ena iVolatabu ena gauna kece e veitalanoa kina kei na dua. Dina ni lutu tiko ga na ivakarau ni nona bula, ia e dei vinaka tu ga o Lucía qai mamarau baleta ni kila na inuinui ni veivakaturi. (Aisea 25:8) E vaka tu ga oya na nona rai me yacova sara ga na siga e leqa kina.

Oya sara ga na siga au cavuta kina na noqu yalayala bibi. Ena siga ya sa sega mada ga ni dolava rawa na matana o Lucía. Keirau yadua kei tamana na ligana. “Kua ni leqa, au na sega ni biuti iko,” au vakasolokakanataka vua. “Cegu ga vakamalua. Ni o yadra mai o sa na bula vinaka. Sa na oti vakadua na mosi o dau vakila, daru na tiko vata ga.”

Au yalataka vua ni keirau na veisotari tale, bibi gona meu na dina kina. Ia ena sega toka ni rawarawa na noqu waraka na siga ya. Au kila tale ga ni kevaka au dau vosota, au nuitaki Jiova qai yalodina tiko ga, keirau na sota tale ni sa vakaturi.

Nona iVakaraitaki o Lucía

E sega ni iVakadinadina i Jiova o watiqu, ia e tarai koya sara ga vakalevu na yalodei i Lucía kei na nodra veitokoni na mataveitacini ena ivavakoso. Na siga e leqa kina o Lucía, e kaya o watiqu ni vinakata me vakasamataka tale mada vakabibi e so na ka. Oti ga e vica na macawa, sa lai kerei dua na qase ena ivavakoso me rau vuli iVolatabu. Sega ni dede sa dau tiko ena soqoni kece. Ena veiuqeti i Jiova e biuta na vakatavako, na ka a sega sara ga ni cakava rawa e liu.

Se sega ni yali sara noqu lolositaka na takali i Lucía, ia au vakavinavinaka vei Jiova ni a ivakaraitaki vinaka o luvequ. E vakacegui keirau vakaveiwatini na inuinui totoka ni veivakaturi, keirau dau raitayaloyalotaka tu na gauna keirau sa na raici koya tale kina​—na totoka ni yaloka ni matana mokimokiti, kei na nona dau waribariba ena marau.

E tarai ira tale ga e so era tiko ena neitou itikotiko na nona leqa o Lucía. Dua na marama tina e kauai sara vakalevu. Ena dua na mataka ni Vakarauwai ni tau toka na uca, a gade mai neitou na marama qo, a vuli o luvenatagane ena koronivuli vata ga a vuli kina o Lucía. Dua tale ga na luvenatagane yabaki 11 a leqa ena mate vata ga a tauvi luvequ. Na gauna e rogoca kina na ka a yacovi Lucía, e vaqara na neitou vale qai mai veisiko. E via kila seu sa vosota tiko vakacava na noqu lolositaka na takali nei Lucía, vakatura tale ga me keirau tauyavutaka e dua na isoqosoqo mera vakacegui kina na tina e vakaleqai na luvedra ena mate va qori.

Au vakamacalataka ni vakacegui au dina e dua na yalayala ena iVolatabu e uasivia sara na sasaga ni veivakacegui era dau cakava na tamata. E marau niu sa wilika vua na vosa i Jisu ena Joni 5:​28, 29. E taleitaka sara me vuli iVolatabu, sega ni dede sa vakila na “vakacegu ni Kalou, sa uasivia na ke kecega e kilai rawa.” (Fpai. 4:7) Levu na gauna ni vuli iVolatabu, keirau dau cegu mada me keirau raitayaloyalotaka na neirau sa na sota kei na dui luve i keirau ni rau sa na vakaturi.

E guiguilecavi dredre na ivakaraitaki ni nona bula o Lucía, dina ni mai muduki koso. Keitou sa mai duavata vakavuvale ena sokaloutaki Jiova ena vuku ni nona vakabauta, e vakaukauataki au tale ga meu dei tiko ga ena noqu vakabauta. Sega ni vakabekataki ni o keda kece e sa takali na wekada lomani era na rairai vakaturi, eda nuitaka tale ga nida na rawa ni sota tale.

[iYaloyalo ena tabana e 20]

Nona droini ni Parataisi o Lucía