Oni sa Tu Vakarau Moni Vakamacalataka Nomuni Vakabauta?
ONI sa bau sotava e dua na ituvaki mo ni vakamacalataka kina nomuni vakabauta? Wilika mada na ka a yacovi Susana, e dua na dautukutuku goneyalewa yabaki 16, mai Paraguay. A vakamacalataki ena dua na nona kalasi e koronivuli nira sega ni dau vakayagataka na “Veiyalayalati Makawa,” ra sega ni vakabauti Jisu Karisito, se o Meri na iVakadinadina i Jiova. Era tukuna tale ga e so ni o ira na iVakadinadina era dau yalodredre ra qai bolea mera mate nira sega ni vakadonuya na veiqaravi vakavuniwai. Na cava oni na cakava ke oni sotava na ituvaki qori?
A masuti Jiova o Susana qai laveliga sara. Ni voleka ni tini na kalasi ya mani kerea sara vei qasenivuli ke rawa ni vakamacalataka nona vakabauta baleta ni dua vei ira na iVakadinadina i Jiova. A mani vakadonuya sara o qasenivuli. Tekivu vakarautaka sara o Susana nona ivakamacala ena loma ni rua na macawa, a vakayagataka na ivola na Jehovah’s Witnesses—Who Are They? What Do They Believe?
Yaco sara mai na siga me vakamacala kina vei ira nona kalasi. Taumada a vakamacalataka na vuna eda vakatokai kina meda iVakadinadina i Jiova. E vakamacalataka tale ga noda inuinui baleta na veigauna se bera mai, kei na vuna eda sega ni vakayagataka kina na dra. Mani taroga sara ke dua e via taro. Ra laveta sara na ligadra e levu na gone. A qoroqoro ga o qasenivuli ni sauma kece tiko vakaivolatabu o Susana na nodra taro.
Kaya e dua na gonevuli, “niu a curu ena Kingdom Hall ena dua na gauna, au sega ga ni bau raica e dua na ivakatakarakara” A via kila na qasenivuli na vuna e sega kina na ivakatakarakara. Wilika sara o Susana na Same 115:4-8 kei na Lako Yani 20:4. Kurabui dina na qasenivuli, mani kaya: “Cava e sinai tu kina ena neimami valenilotu na ivakatakarakara, ni vakacala sara tu ga na iVolatabu?”
Toso tiko ga na saumi ni taro me 40 na miniti. Ni tarogi ira nona kalasi o Susana ke ra via sarava na vidio No Blood—Medicine Meets the Challenge, era vakadonuya kece. Mani tuvanaka tale na qasenivuli me saravi na vidio ena siga tarava. Nira sarava oti na vidio, sa qai vakamacalataka o Susana e so tale na veiqaravi vakavuniwai e sega ni vakayagataki kina na dra, ra vakadonuya na iVakadinadina i Jiova. Ni rogoca ya na qasenivuli, e kaya: “Au sega ni kila ni tu tale e so na isosomi ni veiqaravi e sega ni vakayagataki kina na dra, qai yaga sara vakalevu. E dau caka beka ga na veiqaravi va qori vei ira na iVakadinadina i Jiova?” Ni qai rogoca nida rawa ni vakayagataka kece, e kaya na qasenivuli, “Dua tale na gauna era na gole yani i vale na iVakadinadina i Jiova, au sa na veitalanoa sara ga kei ira.”
A dodonu me 20 na miniti na ivakamacala a vakarautaka o Susana, ia a qai tolu na aua na kena dede. Ni oti e dua na macawa, era vakamacalataka e so na gonevuli na veika era dui vakabauta. Ena itinitini ni nodra vakamacala, levu sara na taro, ia ra sega ni vakamacalataka rawa nodra vakabauta. Mani tarogi ira na qasenivuli, “Cava oni sega ni vakamacalataka rawa kina nomuni vakabauta me vakataki koya na gone iVakadinadina i Jiova?”
Era qai sauma: “Keimami sega ga ni dau vulica na iVolatabu me vakataki ira.”
Mani kaya na qasenivuli vei Susana: “Oni dau vulica dina na iVolatabu ni qai saga mo ni bulataka sara ga. Mo ni vakavinavinakataki kina.”
A rawa ni galu tu ga o Susana. Ia a tu vakarau me vakamacala, e vakatotomuria sara tiko ga kina na ivakaraitaki vinaka ni goneyalewa ni Isireli era a kauta vakavesu na kai Siria. Eda sega ni kila na yacana, ia a lai bobula i Neamani, na jenerali ni Siria. A tauvi Neamani tu e dua na mate vakaloloma ni kuliniyago. A doudou na goneyalewa ni Isireli ni tukuna vua na nona marama: “Ke sa tiko mada na noqu turaga vei koya na parofita mai Samaria! ena qai vakabulai koya ko koya mai na nona vukavuka.” Kila na goneyalewa qo ni dodonu ga me vunautaka na veika me baleta na Kalou dina. Ena vuku ni nona vunau qori a tini qaravi Jiova kina o Neamani, na nona turaga.—2 Tui 5:3, 17.
E vaka kina o Susana, ni sega ni tu vakasuka me vunautaka na veika baleti Jiova kei ira na nona tamata. E tu vakarau me vakamacalataka nona vakabauta ni vosavakacacataki, a talairawarawa o Susana ina ivakaro ena iVolatabu: “Mo ni vakarokorokotaki Karisito ga e yalomuni me nomuni Turaga. Mo ni dau vakarau tu e na veigauna kece ga mo ni vakamacalataka vua na tamata yadua e via kila na i nuinui sa tu vei kemuni.” (1 Pita 3:15, VV) Oni tu vakarau mo ni vakamacalataka nomuni vakabauta ke oni tarogi kina?
[iYaloyalo ena tabana e 17]
Oni na rawa ni vakamacalataka nomuni vakabauta ena iyaragi qo