Ena Yaco na Ka Vinaka Nida Dau Kauai

O DAU kauai mo vunau ena gauna tawanamaki ena yalava ni nomu ivavakoso? Qo na ka era a cakava na tacida lotu vaKarisito mai Finland, ena siti o Turku, e kilai levu na siti qo na kena wavu. Nodra kauai na tacida mai kea a yaco kina eso na ka vinaka.

E dua na gauna sa oti, era raica na mataveitacini e Turku nira a yaco yani ekea e dua na ilawalawa tagane era cavutu mai na vanua vakaEsia. Era lako yani ekea mera lai vakaotia na ta ni dua na waqa levu ni saravanua, a ta tiko qo ena vanua ga e dau ta kina nodra waqa. A mani kila sara e dua na tacida na otela era vakaitikotiko kina na vulagi qo. A kila tale ga nira dau kau vakamataka ena dua na basi mai na taoni e tiko kina nodra otela ina wavu. Kena totolo ga a tukuna sara vei ira na mataveitacini ena ivavakoso vakavalagi e Turku.

Era qai siqema na qase ni ivavakoso ekea, ni nodra tiko e levu na vulagi mai na so tale na vanua, e rawa kina vei ira mera wasea na itukutuku ni Matanitu ni Kalou ena gauna tawanamaki, mani tuvanaki totolo kina me caka na vunau vei ira na turaga qo. Ena Sigatabu ni macawa ya, ena vitu na kaloko ena mataka, e tini na dautukutuku era lai sota volekata na ikelekele ni basi. A sega ni laurai e dua vei ira na dau cakacaka ya. Era vaqaqa sara na mataveitacini qo, ‘Keimami sa rui bera? Era sa biuti Turku?’ Ia vakalailai ga a basika sara ena tolo ni sala e dua vei ira, a vakaovarola tu. Oti ga basika tale mai e dua, mani levu ra veimuri mai. Sega ni dede era sa mai osodrigi na dau cakacaka qo volekata na ikelekele ni basi. Era sa tekivu sara na dautukutuku ena nodra vunau vei ira, e soli sara vei ira na ivola tabaki ena vosa vakavalagi. A kalougata dina ni taura e rauta ni dua na aua na nodra veivosaki rawa na mataveitacini kei ira ni bera nira vodo ena basi. Ena gauna sa biubiu kina na basi, e 126 na ivola, e 329 na mekesini era kauta na dau cakacaka qo!

Na vuavuaivinaka ni nodra cakacaka, a uqeti ira na mataveitacini mera tomana tale ena macawa tarava, ni qo e donuya na nona veisiko na ivakatawa ni tabacakacaka. Ena dua na siga ucauca ena veimama ni ono ena mataka lailai, a liutaka kina na sota ni cakacaka vakavunau na ivakatawa ni tabacakacaka, ra mani lako sara e 24 na dautukutuku ena ikelekele ni basi. Ia nodra lako qo, era sa kauta tale tiko ga kei ira eso na ivola ena vosa vakaTagalog nira kila ni so vei ira na vulagi qo era lako mai ena Yatu Filipaini. Ena mataka ya ena gauna sa biubiu kina na basi me gole ina wavu, era kauta vata kei ira na dau cakacaka qo e 7 na ivola, 69 na ivola lalai, qai 479 na mekesini. Raitayaloyalotaka mada na nodra marau na mataveitacini era a vakaitavi ena cakacaka qo!

Ni bera nira lesu ena nodra vanua na vulagi qo, era veisiko na mataveitacini ena otela era vakaitikotiko kina mera lai vakarabailevutaka nodra ivakamacala me baleta na itukutuku ni Matanitu ni Kalou. Eso vei ira na dau cakacaka qo era tukuna nira sa dau sotava eso na iVakadinadina ena so tale na yasa i vuravura. Era vakavinavinakataki ira na mataveitacini ena nodra vakaliuliu mera lai veivosaki yani kei ira ena nodra tiko e Finland.

O dau kauai ena so na ituvaki tawanamaki e dau basika ena yalava ni nomu ivavakoso? O dau vakaliuliu mo dau veivosaki vei ira e duidui na vanua era gole mai kina? Ke vaka kina, o rairai sa sotava tale ga na ituvaki vata ga era a marautaka na mataveitacini mai Turku.

[Mape/​iYaloyalo ena tabana e 32]

FINLAND

HELSINKI

Turku

[Credit Line]

STX Europe