Tatamusuki Tiko ga ena Reki!

“Sa levu dina tu na ka me tamusuki; ia, era sa lewe lailai ga na tamata cakacaka. O koya gona, mo dou masuti koya kina na i Taukei ni were, me talai ira yani na tamata cakacaka me ra la’ki tatamusuki e na nona were.”—MACIU 9:​37, 38, VV.

1. Na cava eda sega ni soro kina ni cakava na loma ni Kalou?

SE DA papitaiso wale tiko ga oqo meda tamata i Jiova se da papitaiso ena vica vata na yabaki sa oti, e vaka ga e yaco enanoa oya nida vakasamataka lesu. Sa mai usutu ni noda bula nida sa yalayala na vakacaucautaki Jiova. Ni rui ka rekitaki vei keda na noda qaravi koya, eda volia kina na gauna meda vukea e so tale mera rogoca ra qai ciqoma sara na itukutuku ni Matanitu ni Kalou. (Efeso 5:​15, 16) Me yacova mai nikua, eda vakila ni vaka me toso totolo na gauna nida ‘vakaogai keda ena cakacaka ni Turaga.’ (1 Korinica 15:​58, VV) Eda sotava beka na leqa, ia eda sega ni soro baleta ni ka marautaki vei keda na cakava na loma i Jiova.​—Niemaia 8:​10.

2. Na cava e vu ni noda rekitaka na tatamusuki vakaivakatakarakara?

² Eda vakaitavi tiko na lotu Vakarisito ena dua na tatamusuki vakaivakatakarakara. Na nodra vakasoqoni na tamata mera rawata na bula tawamudu a vakatauvatana o Jisu Karisito ina tatamusuki. (Joni 4:​35-​38) Ena yaga meda raica lesu na nodra dau rekitaka na tatamusuki na lotu Vakarisito taumada nida vakaitavi tale tiko ga ena tatamusuki vaka oya. Oti, eda na qai railesuva e tolu na tikina e vu ni noda rekitaka na tatamusuki edaidai. (1) na noda itukutuku veivakauqeti, (2) na vuavuaivinaka ni noda vakasaqaqara, (3) na noda dau veivakacegui nida tatamusuki voli.

Talai Yani Meda Tatamusuki

3. Na cava era reki kina na imuri taumada i Jisu?

³ Dua na veisau levu e tara nodra bula na dau tatamusuki taumada​—vakabibi o iratou na 11 na yapositolo yalodina i Jisu​—ena yabaki 33 S.K., ena siga era lai sota kina kei Jisu, ni sa vakaturi oti, ena dua na ulunivanua e Kalili! (Maciu 28:16) Kena irairai nira tiko ena siga oya e “lima na drau ka vakacaca” na mataveitacini. (1 Korinica 15:6) E voqa tu ga e daligadra na ilesilesi i Jisu vei ira. A kaya: “Dou lako yani ka qisi ira me ra noqu tisaipeli na lewe ni veivanua kece ga, ka papitaisotaki ira e na yaca ni Tamamudou kei na Luvena kei na Yalo Tabu; vakavulici ira me ra muria na veika kece ga au sa vakarota tu vei kemudou.” (Maciu 28:​19, 20, VV) Era a vakacacani vakaca, ia era rekitaka ga na tatamusuki nira raica ni sa cadracadra ena veivanua na nodra ivavakoso na imuri i Karisito. Yaco na gauna me ‘sa vunautaki kina vei ira na tamata kece ga sa tiko e ruku i lomalagi na itukutuku vinaka.’​—Kolosa 1:​23; Cakacaka 1:8; 16:5.

4. Era talai yani na tisaipeli i Karisito ena ituvaki cava soti?

⁴ Ni se qai tekivu toka ga na cakacaka vakaitalatala i Jisu mai Kalili, a kacivi iratou na 12 na yapositolo qai talai iratou yani me ratou lai vunautaka: “Sa voleka mai na matanitu vakalomalagi.” (Maciu 10:​1-7) O Jisu mada ga a lako yani “e na veikoro kecega kei na veikoro lalai [kei Kalili], ka vakatavuvuli e na nodra veivale ni lotu, ka vunautaka nai tukutuku-vinaka ni matanitu, ka vakabula kecega na mate kei na malumalumu kecega.” E lomani ira na tamata era soqo yani vua o Jisu “ni ra sa malumalumu, ka biu wale tu, me vaka na sipi sa sega na nodrai vakatawa.” (Maciu 9:​35, 36) Ni tarai koya vakabibi na tikina oqo, sa qai tukuna vei ira na nona tisaipeli: “Sa levu dina tu na ka me tamusuki; ia era sa lewe lailai ga na tamata cakacaka. O koya gona, mo dou masuti koya kina na i Taukei ni were [na Kalou o Jiova], me talai ira yani na tamata cakacaka me ra la’ki tatamusuki e na nona were.” (Maciu 9:​37, 38, VV) Ni sa vo e ono wale ga na vula me vakacavara kina o Jisu na nona cakacaka vakaitalatala e vuravura, a tokaruataka e Jutia ni vinakati vakalevu na dau tatamusuki. (Luke 10:2) Ena gauna ruarua oya, e talai ira yani na nona imuri mera lai tatamusuki.​—Maciu 10:5; Luke 10:3.

Noda iTukutuku Veivakauqeti

5. Na itukutuku vakacava eda kacivaka?

⁵ O keda na tamata i Jiova nikua eda rekitaka na veisureti meda lai tatamusuki. Dua na vuna levu eda reki kina oya nida lai vakarogoya vei ira na lomabibi kei na yalolailai na itukutuku e veivakauqeti. E noda itavi dokai, me vakataki ira ga na tisaipeli i Jisu ena imatai ni senitiuri, meda kacivaka na itukutuku vinaka​—na itukutuku e veivakauqeti dina​—vei ira na “malumalumu, ka biu wale tu, me vaka na sipi sa sega na nodrai vakatawa”!

6. Na cava na nodratou cakacaka na yapositolo ena imatai ni senitiuri?

⁶ Ena lomaloma ni imatai ni senitiuri, a ogaoga voli kina na yapositolo o Paula ena vunautaki ni itukutuku vinaka. Sega ni vakatitiqataki ni yaga na nona tatamusuki ni a vola vei ira na lotu Vakarisito mai Korinica ena rauta na 55 S.K.: “Ka’u sa vakatakila vei kemudou, na veiwekani, nai tukutuku-vinaka ka’u a vunautaka vei kemudou, o koya dou a vakabauta talega, dou sa tu dei talega kina.” (1 Korinica 15:1) Era dau tatamusuki gugumatua na yapositolo kei ira na vo tale ni lotu Vakarisito taumada. E sega ni tukuni ena iVolatabu se le vica vei iratou na yapositolo eratou a bula ena veivakarusai levu a tarai Jerusalemi ena 70 S.K., ia eda kila ni oti e 25 na yabaki, a se vunau tiko ga na yapositolo o Joni.​—Vakatakila 1:9.

7, 8. Na itukutuku veivakauqeti cava era sa qai gu vakalevu ga ni kacivaka nikua na tamata i Jiova?

⁷ Oti oya, sa ra qai vakacolasau ena vica vata na senitiuri na italatala ni lotu ni Veivanua Vakarisito, “na tamata ni valavala ca.” (2 Cesalonaika 2:3) Ia ni sa voleka ni cava na ika19 ni senitiuri, sa ra kacivaka yani na itukutuku veivakauqeti me baleta na Matanitu ni Kalou o ira e lomadra mera suka tale ina ivakarau ni lotu Vakarisito taumada. Na ulutaga mada ga ni ivoladraudrau oqo, mai na imatai sara ni kena itabataba (Julai 1879), e lewena toka na vosa “Kacivaka ni sa Tiko o Karisito,” “Kacivaka na Matanitu i Karisito” se “Kacivaka na Matanitu i Jiova.”

⁸ A tauyavu na Matanitu vakalomalagi ni Kalou ena 1914 qai soli vei Jisu Karisito na kena lewa, ia oqo eda sa qai gu vakalevu ga ni kacivaka na kena itukutuku veivakauqeti. Baleta na cava? Baleta ni dua vei ira na ka vinaka ena kauta mai na Matanitu ni Kalou, oya na veivakarusai sa voleka sara oqo ena yacova na ivakarau ni veika ca nikua. (Taniela 2:​44) Sa bau itukutuku veivakauqeti dina, se vakaevei? Qai sega li nida rekitaka meda kacivaka na Matanitu ni Kalou ni se bera na ‘veivakararawataki levu’?​—Maciu 24:21; Marika 13:10.

Vuavuaivinaka Noda Vakasaqaqara

9. Na cava na ivakasala i Jisu vei ira na nona tisaipeli, ia na cava era cakava na tamata nira rogoca na itukutuku ni Matanitu ni Kalou?

⁹ Dua tale na ka e vu ni noda rekitaka na tatamusuki oya ni vuavuaivinaka na noda qarai ira na qai yaco mera tisaipeli ra qai mai tomani keda ena tatamusuki. Ena yabaki 31-​32 S.K., a vakasalataki ira vaka oqo na nona tisaipeli o Jisu: “Ia na koro kei na koro lailai vakaaduaga dou na curu kina, taroga [se, “vakasaqara,”NW] se ko cei sa yaga kina; ka laki tiko kaya ka yacova na nomudou lako tani.” (Maciu 10:11) Sega ni tamata kece era tamata yaga baleta ni so era na sega ni ciqoma na itukutuku ni Matanitu ni Kalou. Ia, era vunautaka ga ena yalo gu na itukutuku vinaka na tisaipeli i Jisu ena vanua kece ga era tiko kina na tamata.

10. Dau qarai ira vakacava na tamata yaga o Paula?

¹⁰ Sa qai toso cake na igu ni vakasaqaqara me baleti ira na tamata yaga ni sa mate qai vakaturi oti o Jisu. Dau vakamacala o Paula vei ira na Jiu ena nodra valenilotu kei na nodra vanua ni veivoli mai Aceni. Ni sa vunau ena vanua cecere nei Arisi ena koro vakirisi oya, “a sa kabiti koya eso na tamata, a ra sa vakabauta; e dua vei ira ko Taionisio mai na mataveilewai mai na vanua-cecere nei Arisi, kei na yalewa sa vakatokai ko Tamarisi, koi rau kei ira tale eso.” Na vanua kece ga e gole kina o Paula, e sega ni tu vakasuka me vunau “e na matana levu kei na veivale.”​—Cakacaka 17:​17, 34; 20:​20, VV.

11. Dau vakayacori vakacava na cakacaka vakaitalatala ena vica vata na yabaki sa oti?

¹¹ Ni vo toka ga e vicasagavulu na yabaki me cava na ika19 ni senitiuri, era yavala ena doudou na lotu Vakarisito lumuti mera qarai ira na tamata yaga. E kaya kina na Zion’s Watch Tower ena kena itabataba ni Julai/Okosita 1881, ena ulutaga “Lumuti Meda Vunau”: “Na vunautaki ni itukutuku vinaka. . . vei ira ‘na yalomalumalumu’ e sega ni cegu​—oqo vei ira na via rogoca kei ira na rogoca rawa, me tarai cake ena kedra maliwa na yago i Karisito, o ira na itaukei ni Matanitu vata kei koya.” E nodra cakacaka na dau tatamusuki ni Kalou mera soli ivola vei ira na tamata nira suka mai na nodra lotu, qai lewenivola oya na itukutuku vakaivolatabu e volai me uqeta na lomadra na tamata yaga. A dikevi lesu vakavinaka na iwalewale ni vunau vaka oqo, ra mani uqeti na dau tatamusuki ena Watch Tower, 15 Me, 1903, mera soli ivola “e veivale, ena mataka ni Sigatabu.”

12. E mai vuavuaivinaka cake vakacava na noda cakacaka vakavunau? Vakamacalataka na kena ivakaraitaki.

¹² Eda sa vakalevutaka na noda cakacaka vakaitalatala ena veiyabaki wale tiko ga oqo ena noda vosa vei ira na tamata, sega wale ga ena nodra vale, ia ena veivanua tale e so. E laurai na kena vuavuaivinaka ena veivanua sa dau vaka mera yali mai na nodra vale na tamata ena gauna eda dau veisiko yani kina, baleta beka nira lai cakacaka tu se ra lako vagade. Rau raica e dua na iVakadinadina kei na nona itokani mai Igiladi nira biubiu e veisiga na vulagi ena basi nira sa gade oti ena baravi, rau mani doudou sara me rau vodo ena basi me rau soli Vale ni Vakatawa kei na Yadra! vei ira na pasidia. Rau solia rawa kina e 229 na lavelave ena dua ga na vula. Oqo na ka erau kaya: “Sa sega tale ni keirau nuiqawaqawataka na vosa vei ira na gade mai baravi, se vunau ena vanua ni veivoli, se vanua vakacava tale, baleta ni keirau kila ni tokoni keirau tiko o Jiova.” E dua e solia vei rau na yacana me dau kau yani vua na ilavelave vovou kece, e dua e vulica sara na iVolatabu, rau vakaitavi ruarua tale ga ena cakacaka vakapainia veivuke.

13. Na veiveisau cava e vinakati ena so na vanua me baleta na noda cakacaka vakaitalatala?

¹³ So na gauna ena vinakati meda vakalewa vinaka na noda cakacaka vakaitalatala ena so na vanua eda qarai ira voli kina na tamata yaga. Sa kena ivakarau vei ira e levu na iVakadinadina mera vunau e veivale ena mataka ni Sigatabu, ia era sa liaca ni sega soti ni vuavuaivinaka oqo ena so na vanua ni levu era se dau moce tu. Era mani veisautaka kina na nodra ituvatuva e levu na iVakadinadina, kena irairai nira dau vakasaqaqara ena yakavi ni oti na nodra soqoni. E laurai ni vuavuaivinaka na iwalewale ni vaqaqara oqo. E tubu ena 2.3 na pasede na levu ni dautukutuku ni Matanitu ni Kalou e veiyasa i vuravura ena yabaki sa oti. Na ka oqo e rokovi kina o koya na iTaukei ni were, e vakavureki tale ga vei keda.

Dau Veivakacegui ena Tatamusuki

14. Na cava e noda ivalavala nida kacivaka na noda itukutuku? Baleta?

¹⁴ Dua tale na vuna eda reki kina oya ni dau noda ivalavala meda veivakacegui nida tatamusuki. A kaya o Jisu, “Ni dou sa curu ki na vale, dou kidavaka: ia kevaka sa yaga na vale ko ya, me yaco kina na nomudou veivakacegui.” (Maciu 10:​12, 13) Na veivakabulataki ena vosa vakaiperiu kei na vosa vakirisi e volai kina na iVolatabu e tiko ruarua kina na vakasama oqo, ‘Nuitaki ni na vinaka na nomu bula.’ Na vakanananu vinaka oqo e lewa na ivakarau ni yaloda nida torovi ira yani na lewenivanua meda vunautaka vei ira na itukutuku vinaka. Eda nuitaka tu nira na cakava e dua na ka ena itukutuku ni Matanitu era rogoca. O ira na cakava kina e dua na ka, sa rawa nira vakanamata mera na veivinakati kei na Kalou ena nodra veivutunitaka na nodra ivalavala ca, saumaki, ra qai cakava na lomana. Na itinitini vinaka ni veivinakati kei na Kalou na bula tawamudu.​—Joni 17:3; Cakacaka 3:​19; 13:​38, 48; 2 Korinica 5:​18-​20.

15. Nida sotava e so era sega ni taleitaka na noda cakacaka vakavunau, na cava meda cakava me dei tiko ga kina na noda vakacegu?

¹⁵ Vakaevei ke ra sega ni taleitaki keda na itaukeinivale, sa na qai vakacava na noda vakacegu? E kaya o Jisu: “Kevaka sa sega ni yaga [na vale oya], me suka tale vei kemudou na nomudou veivakacegui.” (Maciu 10:13) Ena veika e vola o Luke me baleta na nodra talai na le 70 na tisaipeli, e okata kina o koya na vosa i Jisu e vaka: “Kevaka sa tiko kina na tamata sa yaga me vakacegui, ena toka vei koya na nomudou veivakacegui; ia kevaka e sega, ena lesu tale vei kemudou.” (Luke 10:6) Nida vunautaka na itukutuku vinaka, meda tauca oqori ena vosa ni veivakacegui da qai matamamarau. Ke sega ni kauai o itaukeinivale, e vosakudrukudru, se vosataki keda vakaca, sa na “lesu tale” mai vei keda na noda itukutuku veivakacegui. Se mani cava e yaco, ena sega ni yali na noda vakacegu, e dua na vua ni yalo tabu i Jiova.​—Kalatia 5:​22, 23.

iSausau Totoka Vei Ira na Dau Tatamusuki

16, 17. (a) Na cava me noda isausau nida veisikovi lesu? (b) Meda vukei ira vakacava na dau vakataroga e so na ka mai na iVolatabu?

¹⁶ Nida dau tatamusuki, eda marau nida bau vakaitavi tu ena nodra vakumuni mai na tamata mera rawata na bula tawamudu. Dua na ka tale ga na noda reki ni rogoci keda o koya eda vunau vua, e vinakata me vuli, mani laurai sara kina ni “tamata sa yaga me vakacegui”! De dua e levu na ka e via taroga mai na iVolatabu ia ena sega ni rawa nida sauma kece ena dua na gauna eda sikovi koya kina. Ni na sega ni veiganiti meda lai tiko vakadede ena nona vale ena imatai ni noda sikovi koya, na cava gona me caka? Meda saga meda cakava na ka a vakaturi rauta na 60 na yabaki sa oti.

¹⁷ “Mera tu vakarau na iVakadinadina i Jiova kece mera veivakavulici vakamaqosa ena iVolatabu.” E volai oqo ena ikatolu ni ivola ena tolu na ivoladusidusi eratou tabaki veitaravi mai na 1937 ina 1941, vakatokai na Model Study (iVakarau Maqosa ni Vuli). E kaya tale: “O ira kece na dautukutuku [ni Matanitu] mera gumatua ena sala kece ga e rawa mera vukei ira kina na tamata inaki vinaka era taleitaka na itukutuku ni Matanitu ni Kalou. Mera lesuvi o ira vaka oqo, saumi nodra vakatataro . . . , tekivutaki sara kei ira na vuli ena kena ivalavala maqosa . . . ena kena totolo duadua e rawati.” Io, na noda isausau nida veisikovi lesu oya meda vuli iVolatabu kei na dua, da qai saga me wasoma na vuli.a Ke da kauaitaki koya da nanumi koya dina e tataleitaki, eda na vakavakarau vinaka me laulau kina na noda veivakavulici.

18. Eda na vukei ira vakacava na ka vou mera mai tisaipeli i Jisu Karisito?

¹⁸ Sa tu na ivola yaga e rua Na Ka Mo Kila Mo Bula Tawamudu Kina kei Na Cava e Loma ni Kalou Vei Keda? meda veivakavulici kina ena iVolatabu da qai vukei ira kina na ka vou mera tisaipeli. Nida vakatotomuri koya na Qasenivuli Levu, o Jisu Karisito, de dua era na vuli mai kina o ira na vuli iVolatabu tiko nira raica nida tamata mamarau dau veivakacegui, eda dau dina da qai rokova na ivakatagedegede kei na idusidusi e vakarautaka o Jiova. Nida sa vukei ira tiko na ka vou ena noda sauma na nodra vakatataro, meda tovolea meda tuberi ira mera tu vakarau tale ga ni sauma na taro ga e tarogi vei ira. (2 Timoci 2:​1, 2; 1 Pita 2:​21) Ena tatamusuki vakaivakatakarakara eda vakaitavi tiko kina oqo, eda reki dina nida raica ni rauta ni 4,766,631 era vuli iVolatabu ena veiyasa i vuravura ena yabaki vakacakacaka sa sivi. Sa qai kuria ga na noda reki na noda kila ni dua o keda eda bau vakaitavi tale ga ena tatamusuki ni veivakavulici ena iVolatabu.

Rekitaka Tiko ga na Tatamusuki

19. Na cava a rekitaki kina na tatamusuki donuya na gauna a cakacaka vakaitalatala voli kina o Jisu, kei na veigauna ni oti toka ga oya?

¹⁹ Levu sara na vuna vinaka a rekitaki kina na tatamusuki donuya na gauna a cakacaka vakaitalatala voli kina o Jisu, kei na veigauna ni oti toka ga oya. Le levu era ciqoma na itukutuku vinaka. Bau vakilai dina na reki ena Penitiko 33 S.K. nira ciqoma kina na veivakadreti i Pita e rauta ni 3,000, mani sobuti ira na yalo tabu i Jiova, ra lewe sara kina ni matanitu ni Kalou, na Isireli vakayalo. Io, a tubu tiko ga na kedra iwiliwili qai rekitaki vakalevu ni “sa vakaikuritaka [o Jiova] kivei ira nai soqosoqo lewe ni lotu, e na veisiga, na tamata era sa vakabulai tiko.”​—Cakacaka 2:​37-​41, 46, 47; Kalatia 6:​16; 1 Pita 2:9.

20. Na cava eda rekitaka vakalevu ena noda tatamusuki?

²⁰ A laurai ena gauna oya na dina ni parofisai i Aisea: “[I Jiova] ko ni sa vakalewevuqataka na matanitu, ko ni sa vakaikuritaka na nodra marau; era sa marau e matamuni me vaka na marau ni sa cava na yabaki, ka vaka na nodra marau era sa vota nai toki ni valu.” (Aisea 9:3) Eda sa raica tu oqo ni ‘sa vakalewevuqataki na nodra matanitu’ na lumuti, ia nida raica tale ni tubu tiko ga e veiyabaki na kedra iwiliwili na dau tatamusuki tale e so, sa qai kuria ga na noda reki oqori.​—Same 4:7; Sakaraia 8:​23; Joni 10:16.

21. Na cava eda na veivosakitaka ena ulutaga e tarava?

²¹ Levu sara na vuna vinaka meda rekitaka tiko ga kina na noda tatamusuki. Eda rekitaka dina na noda tatamusuki baleta nida kacivaka voli na itukutuku e veivakauqeti, da vakasaqarai ira na tamata yaga, qai noda ivalavala meda dau veivakacegui. Ia se levu ga era cati keda kina. A sotava oqori na yapositolo o Joni. A lai vesu tu ena yanuyanu o Patimo “e na vuku ni vosa ni Kalou, kei nai tukutuku i Jisu.” (Vakatakila 1:9) Eda na reki tiko ga vakacava nida sotava na veivakacacani kei na veitusaqati? Eda na vosota rawa vakacava nodra sa yalodredre oqo e levu eda vunau vei ira? Eda na raica ena ulutaga e tarava na idusidusi vakaivolatabu me saumi kina na taro oqo.

[iVakamacala e ra]

O na Sauma Vakacava?

• Na cava na tatamusuki vakaivakatakarakara?

• Na itukutuku vakacava eda vakarogoya tiko?

• Na cava e vuavuaivinaka kina na noda vakasaqarai ira na tamata mera tisaipeli?

• Eda na veivakacegui tiko ga vakacava nida tatamusuki?

• Na cava eda rekitaka tiko ga kina na tatamusuki?

[iYaloyalo ena tabana e 12, 13]

Cakacaka vakavunau ena imatai kei na ika20 ni senitiuri

[iYaloyalo ena tabana e 13]

Me vakataki Paula ga, era saga na dau tatamusuki nikua mera vosa vei ira na tamata ena vanua kece ga

[iYaloyalo ena tabana e 13]

Kacivaka na itukutuku vinaka ena matamamarau