E Vuavuaivinaka na Cakacaka Lavotaki e Bulgaria

“E levu sara na ka me tamusuki, ia era lewe lailai ga na tamata cakacaka. O koya gona, dou kerea na Turaga ni tatamusuki me tala mai eso tale na tamata cakacaka ina nona tatamusuki.”​—MACIU 9:​37, 38.

E VEIGANITI dina na vosa qori i Jisu ena ituvaki kei Bulgaria, e dua na vanua totoka ena Balkan ena tokalau ni ceva kei Urope! E gadrevi vakalevu dina na tamata cakacaka mera kacivaka na itukutuku vinaka vei ira na sivia na le vitu na milioni era vakaitikotiko e kea. E rauta ni 1,700 na dautukutuku e Bulgaria, ia e dredre mera kovuta kece na nodra yalava. Mani vakadonuya na iLawalawa Dauvakatulewa, mera sureti o ira na kila na vosa vakaBulgaria era iVakadinadina mai na so tale na yasayasa vakaUrope mera mai vakaitavi ena cakacaka lavotaki qo ena 2009. A tuvanaki na cakacaka qo me vitu na macawa ena vulaikatakata, ni oti ga na Soqo ni Tikina mai Sofia, e kena usutu, “Yadra Tiko!” ena 14-16, Okosita, 2009.

Vakatubuqoroqoro na Ciqomi ni Veisureti

Era vaqaqa na mataveitacini ena valenivolavola ni tabana e Sofia se ra na lewe vica mada mai Varanise, Jamani, Kirisi, Itali, Poladi kei Sipeni era na ciqoma na veisureti. Ke ra na via gole e Bulgaria ena vinakati mera na sauma ga na nodra ivodovodo, ra qai taura na nodra gade mera lai vunau kina. E marautaki dina ni tubu tiko ga e veimacawa na iwiliwili era kerea mera lako mai, lai yacova sara na le 292! Nira sa rui lewe levu, e rawa nira lesi kina o ira na via mai veivuke qo ina tolu na siti e Bulgaria oya: o Kazanlak, Sandanski, kei Silistra. Era veisureti na ivakatawa ni tabacakacaka vei ira na painia e Bulgaria kei na dautukutuku mera veitokoni tale ga ena cakacaka qo. Yaco sara mera le 382 na via mai veivuke qo mera lai gumatuataka na vunau ena yalava e sega ni vunautaki kina vakawasoma na itukutuku vinaka.

Era a vakarautaka mada e liu na mataveitacini ena ivavakoso voleka na icili. Era redetaka eso na rumunimoce ra qai veivosakitaka eso na otela sau lailai ga. Era cakacaka vakaukaua na mataveitacini ena vanua qo ena nodra qaravi o ira na via mai veivuke qo, ra qai raica tale ga na veika era gadreva. Ena tolu kece na siti qo, era redetaki na vanua me caka kina na soqoni. A tuvanaki mera vakaitavi ena soqoni vakaivavakoso na mataveitacini era vulagi yani. E talei dina nira soqoni vata e 50 na dautukutuku mera vakacaucautaki Jiova, ena vanua e sega kina e dua na iVakadinadina.

E veivakadrukai na nodra gumatua ena cakacaka qo o ira na lako mai na veivanua tale eso. Ena vulaikatakata e dau rawa ni yacova se sivia na 40 na dikiri celcius na ivakarau ni katakata e Bulgaria. A sega ni dua na ka e tarova na nodra gugumatua na mataveitacini qo. Ena imatai ga ni tolu na macawa, a soli kina e dua na ivakadinadina vinaka ena siti o Silistra, e toka ena batiniuciwai o Danube era tiko kina e le 50,000. Era tosoya tale na nodra sasaga na mataveitacini ena so na koro voleka, era yaco sara mada ga e Tutrakan, e rauta ni 55 na kilomita ena ra kei Silistra. Dau kena ivakarau mera tekivu vunau ena 9:30  ena mataka. Ni oti na vakasigalevu, era na toso tale me yacova na 7:00 ena yakavi se sivia na gauna oya. Na kena talei na nodra gumatua ena cakacaka o ira na mai veivuke qo e Kazanlak kei Sandanski, e vakavuna kina mera vunau tale ena veikoro kei na veisiti voleka.

Na Cava e Rawati?

E dua na ivakadinadina levu a vakayacori rawa ena loma ni vitu na macawa sa qai sivi ga qo. Me vaka ga na kena tukuni ena nodratou gauna na yapositolo, era na rawa ni kaya na tiko ena siti qo, ‘Ni sa vakasinaita na neimami siti na nomuni ivakavuvuli.’ (Caka. 5:28) O ira na iVakadinadina era a vakaitavi, era solia rawa e rauta ni 50,000 na mekesini ra qai tauyavutaka e 482 na vuli iVolatabu. E marautaki ni a tauyavu e dua na ivavakoso e Silistra ena 1 Seviteba, 2009, kei na iwasewase lailai e Kazanlak kei Sandanski. E veivakauqeti ni laurai na nodra toso vinaka vakayalo o ira na se qai rogoca vakadua na itukutuku vinaka ena gauna e caka tiko kina na cakacaka qo.

Ena imatai ni macawa ni cakacaka, e dua na tacida yalewa painia lavotaki mai Sipeni e vosa vakaBulgaria a vunau vua e dua na marama e Silistra o Karina, a volitaki niusiveva tiko ena salatu. A tataleitaki o Karina qai gole mai ina dua na soqoni. Mani vakadonuya sara me vuli iVolatabu. Me vaka ni sega ni vakabauta na Kalou o watina, a kerea me lai vuli ena dua ga na rara ni gade. Erau dau tiko tale ga ena vuli o rau na luvena yalewa. A taleitaka sara vakalevu o Daniela na luvena qase na dina ena iVolatabu. A wilika tasevu ena dua ga na macawa na ivola Kaya na iVolatabu, sega ni bera na nona muria na ka e tukuna na iVolatabu me baleta na vakatabui ni vakayagataki ni matakau ena sokalou. A tekivu tukuna tale ga vei ira na nona itokani na ka dina. Ni oti ga e tolu na macawa na nona tikora na imatai ni soqoni vakaivavakoso, a tukuna sara vua na tacida e vakavulici koya tiko: “Vaka sara ga au dua vei kemuni. Na cava meu cakava meu vunau tale ga?” E toso vinaka tiko ga o Daniela, o tinana kei tacina.

Mai Kazanlak, a taubale ina nona icili ni oti na vunau o Orlin, e dua na tacida e turaga ni Bulgaria a gole mai Itali. A vunau sara vei rau e rua na cauravou erau dabe tiko ena dua na rara ni gade. A laiva toka vei rau na ivola Kaya na iVolatabu qai tuvanaka na veisikovi lesu ena siga tarava. Mani tekivu na vuli iVolatabu kei Svetomir ena veisiko oya, lai tomani tale ena siga tarava. E vuli vakawalu o Svetomir ena loma ni ciwa na siga. E kaya o Svetomir: “Ni vo toka ga e rua na siga ni bera niu mai sotavi iko, au a masu vua na Kalou me vukei au meu kilai koya. Au mani bubuluitaka ke na vukei au, au na yalataka vua na noqu bula.” Ni sa lesu i Itali o Orlin, ra qai tomana na mataveitacini ena vanua oya na nona vuli o Svetomir, qai bulataka sara tiko ga na ka dina.

Era Vakalougatataki na Vakuai Ira

Na cava e nodra rai o ira na lomasoli mera taura na nodra gade, ra qai sauma ga na nodra ilakolako mera gole ina dua tale na vanua mera lai vunautaka na itukutuku vinaka? E vola e dua na qase e veiqaravi tiko mai Sipeni: “Na cakacaka qo e vakavolekataki ira na mataveitacini era vosa vakaBulgaria era tiko e Sipeni. E yaga sara vakalevu vei ira na vakaitavi kina.” Erau vola e dua na veiwatini mai Itali: “Qo na vula totoka duadua ena neirau bula!” Erau tomana: “Na cakacaka qo e veisautaki keirau sara ga! Sa veisau na neirau rai.” Erau vakasamataka vakabibi na veiwatini qo ni rawa me rau toki vakadua e Bulgaria, na vanua e gadrevi kina vakalevu na veiqaravi. O Carina e dua na goneyalewa painia tudei mai Sipeni a veitokoni ena cakacaka mai Silistra. Ni oti ga oya, a biuta na nona cakacaka mai Sipeni qai toki e Bulgaria me lai veitokoni ena ivavakoso vou ena siti oya. A veirauti vinaka na ilavo a maroroya tu me lai tiko e Bulgaria me dua na yabaki. E kaya kina o Carina ena vakatulewa e cakava: “Au marau sara ga vakalevu ni vakatara o Jiova meu mai veiqaravi e Bulgaria, au nuitaka niu na rawa ni dede i ke. Sa lima na noqu vuli iVolatabu, e tolu vei ratou qo sa dau soqoni tiko.”

E dua na tacida yalewa ni Itali a via gole tale ga ena cakacaka qo, ia a qai tekivu cakacaka ga, a se sega kina ni dua na nona siga ni gade. Sega ni vakayalolailaitaki koya qori, a kerea ga me gade me dua na vula qai sega ni saumi, e tu vakarau tale tu ga me kere vakacegu mai na nona cakacaka ke sega ni vakadonui na nona kerekere. E kurabuitaka ni tukuna vua o nona boso: “Sa vinaka, mo cakava ga e dua na ka: Mo vakauta mai e dua na postcard mai Bulgaria.” E kila sara ga na tacida yalewa qo ni rogoca nona masu o Jiova.

O Stanislava e dua na tacida goneyalewa e tiko e Varna ena dua na siti e Bulgaria qai cakacaka sau vinaka, a taura na nona gade me lai vakaitavi ena cakacaka e Silistra. Ni raica na nodra mamarau e levu na painia era lako vakayawa mera mai vunautaka na itukutuku vinaka ena nona vanua, a tonawanawa sara ga na matana. A vakasamataka sara vakabibi na ka e cakava tiko, qori na nona vaqara cakacaka vinaka. Ni oti e rua na macawa ni lesu i vale, a biuta na nona cakacaka me painia tudei. Ena gauna qo e marau sara vakalevu ni nanumi koya a Buli koya ni se gone.​—Dauv. 12:1.

E ka ni veivakalougatataki na qaravi Jiova ena yalodina. E sega ni dua tale na ka e vinaka cake mai na nomu solia na nomu gauna kei na nomu kaukaua ena cakacaka bibi ni veivakavulici kei na vunautaki ni itukutuku vinaka. E tiko beka eso na sala o rawa ni vakarabailevutaka na nomu vakaitavi ena cakacaka vakaitalatala e rawati kina na bula? Ena rairai tiko eso na yalava ena nomu vanua e gadrevi kina vakalevu na veiqaravi. O rawa ni toki ina so na vanua va qori? De o na rawa ni vulica e dua tale na vosa mo vukei ira ena nomu vanua era karamaca tu vakayalo. Na veisau cava ga o rawa ni cakava mo vakalevutaka na nomu vakaitavi ena cakacaka vakaitalatala, o rawa ni vakadeitaka ni na vakalougatataki iko vakalevu o Jiova.​—Vkai. 10:22.

[Kato/​iYaloyalo ena tabana e 32]

Na Siga Guiguilecavi Dredre

Levu vei ira na gole mai na so tale na vanua vakaUrope mera mai veitokoni ena cakacaka lavotaki e Bulgaria, era a lalawataka mera tiko ena Soqo ni Tikina e Sofia e kena usutu “Yadra Tiko!” Era vakayaloqaqataki na mataveitacini ena vanua oya nira sota kei ira na vulagi mai na duidui vanua. Era marau na le 2,039 era tiko kina ena gauna e sevutaka kina o Brother Geoffrey Jackson, e lewe ni iLawalawa Dauvakatulewa na ivakadewa taucoko ni New World Translation of the Holy Scriptures ena vosa vakaBulgaria! Era vakaraitaka na tiko ena siga Vakaraubuka na nodra vakavinavinaka ena dede ni nodra vakasausau. Levu e tonawanawa na matadra ena levu ni nodra marau. Na ivakadewa dodonu qo, qai rawarawa na vosa e vakayagataki kina, ena vukei ira na yalomalumalumu e Bulgaria mera kilai Jiova.

[Mape ena tabana e 31]

BULGARIA

SOFIA

Sandanski

Silistra

Kazanlak

[iYaloyalo ena tabana e 31]

E dua na cakacaka vakaitamera a vakayacori rawa ena loma ni vitu na macawa