Taro na Dauwiliwili

Ni talai ratou na 12 na yapositolo o Jisu Karisito me ratou lai vunau, a tukuna beka me ratou kauta na ititoko ratou qai vakaivava?

Eso era kaya ni veisaqasaqa na ka e tukuni ena tolu na Kosipeli e volatukutukutaki kina na nona talai ratou na nona tisaipeli o Jisu. Ia ni raici vata na ivolatukutuku qori, eda na kila na kena ivakamacala dina. Kena imatai, me vakatauvatani mada na ka erau vola o Marika kei Luke. E tukuna o Marika: E “[Jisu] vakaroti iratou me ratou kua ni kauta e dua na ka, na nodratou ititoko ga, me kua na madrai, na taga ni kakana, se me ratou tagana na ilavo kopa, ia me ratou vakaivava ga ratou kua ni tokara e rua na isulu e loma.” (Mari. 6:​7-9) A vola o Luke: “Dou kua ni kauta e dua na ka, me kua na ititoko, na taga ni kakana, na madrai, na ilavo siliva, se rua na isulu e loma.” (Luke 9:​1-3) Eda raica e keri na ka e nanumi ni veisaqasaqa. A vola o Marika me ratou kauta na yapositolo na ititoko ratou qai vakaivava, ia e tukuni ena ivolatukutuku i Luke me ratou kua sara ga ni kauta e dua na ka, kua mada ga na ititoko. E sega tale ga ni tukuna e dua na ka me baleta na ivava o Luke me vaka e cakava o Marika.

Meda rawa ni kila na ka e via vakabibitaka o Jisu, raica mada na ka eratou tautauvata kina na tolu na Kosipeli. Ena rua na ivolatukutuku mai cake kei na Maciu 10:​5-​10, e tukuni kina me ratou kua ni tokara se kauta e “rua na isulu e loma.” Kena irairai ni ratou sa tokara rawa tiko e dua na isulu e loma, me ratou kua gona ni kauta tale e dua. Eratou sa vakaivava tale tu ga. A vakabibitaka o Marika me ratou “vakaivava,” qori na ivava eratou sa dara rawa tu. Vakacava na ititoko? E tukuni ena Jewish Encyclopedia: “E rairai kena ivakarau ga vei ira na Iperiu ena gauna makawa mera dau kauta e dua na ititoko.” (Vkte. 32:10) A tukuna o Marika “me ratou kua ni kauta e dua na ka” na yapositolo vakavo ga na ititoko eratou sa taura rawa tu ena gauna a vakaroti ratou kina o Jisu ena ka me kau kei na ka me kua. Eratou vakabibitaka gona na vola na Kosipeli ni veivakasalataki o Jisu me kua ni vakaberai na ilakolako ena kena lai qarai eso tale na ka me kau.

A vakabibitaka tale qori o Maciu, a rogoca sara ga na nona veivakaroti o Jisu qai volatukutukutaka na nona kaya o Jisu: “Dou kua ni tawana na koula se siliva se kopa ena nomudou taga ni ilavo, se kauta na taga ni kakana, se rua na isulu e loma, ivava, se ititoko; ni na soli na kena kakana na tamata daucakacaka.” (Maciu 10:​9, 10) Vakacava na ivava eratou sa dara tu kei na ititoko eratou sa taura tu? A tukuna o Jisu me ratou kua ni tawana na veika qori, a sega ni tukuna me ratou kolotaka laivi na kena sa tiko rawa vei ratou. Na cava a vakarota kina qori? “Ni na soli na kena kakana na tamata daucakacaka.” Qori sara ga na ka e via vakabibitaka o Jisu, qai salavata qori kei na nona ivakasala ena nona iVunau ena Ulunivanua me ratou kua ni lomaocaocataka na ka me ratou kania, gunuva, se tokara.​—Maciu 6:​25-​32.

Ena rairai nanumi ena imatai ni gauna ni veisaqasaqa na ka eratou volatukutukutaka na vola na Kosipeli, ia e tautauvata na ka eratou vakamacalataka tiko. Na ka sara ga sa tu vei ratou na yapositolo me ratou kauta, me ratou kua ni vakawelei ena tawani ni so tale na ka. Na cava na vuna? Baleta o Jiova ena vakarautaka na ka eratou vinakata.

Ena New World Translation, a cavuta o Solomoni ena Dauvunau 2:8 “na marama, o ira na marama.” O cei o ira na marama qori?

E sega ni vakadeitaki e vakaibalebaletaki cei dina, ia e rawa ni tukuni ga nira yalewa rogo a sotava o Solomoni ena nona vale vakatui.

A tukuna o Solomoni ena Dauvunau wase 2 e levu na ka a rawata, wili kina na vale a tara. A tomana: “Au a kumuna vata talega vei au na siliva kei na koula, kei nai vakacavacava maivei ira na tui, kei na veiqali: Au a rawata eso na noqu tagane dausere kei na noqu yalewa dausere, kei na ka era daumarautaka na luve ni tamata, ia na ka domo vinaka, ka vuqa na kenai valavala [“na marama, o ira na marama,” NW].”​—Dauv. 2:8.

E levu na daunivakamacala ni iVolatabu era nanuma ni o ira na “marama” a cavuti ira o Solomoni e vakaibalebaletaki ira na watina era yalewa vulagi kei na watina lalai a vakawatitaki ira ena dua na gauna e muri, o ira na yalewa qori era qai vagolei koya ena sokalou lasu. (1 Tui 11:​1-4) Ia e veicalati na ivakamacala qori. Ena gauna a volavola kina o Solomoni, sa kilai ira rawa tu “na marama, o ira na marama” a cavuta ena nona ivola. A se vakadonui koya tale ga ena gauna qori o Jiova, ni a uqeti koya me vola e vica na ivola ena iVolatabu. E veicalati sara qori kei na veiyabaki e muri, sa drau vakacaca kina na yalewa vulagi era watina ra qai tiko na watina lalai, sa vakanadakuya tale ga na sokalou dina.

A tukuna o Solomoni ena Dauvunau ni “kunea na vosa vinaka: ia na ka sa volai sa ka dodonu, io sa vosa dina.” (Dauv. 12:10) E kila gona na ka e vakaibalebaletaki ena vosa “watina,” “ranadi,” kei na “watina lalai” baleta ni dau vakayagataka sara ga ena ivola uqeti vakalou a vola. (Vkai. 5:​18; 12:4; 18:22; Dauv. 9:9; Sere 6:​8, 9) Ia na vosa kilai levu qori e sega ni vakayagataki ena Dauvunau 2:8.

Ena iVolatabu, e laurai duadua ga ena matavosa “na marama, o ira na marama” e dua na vosa vakaIperiu e sega ni vakayagataki vakalevu. Era kaya eso na vuku ni sega ni macala na kena ibalebale dina. E levu na dauvakadewa ni iVolatabu era vakaibalebaletaka na matavosa ena Dauvunau 2:8 vei ira na marama, e vakamacalataki e liu me le dua, oti sa qai vakayagataki na vosa e dusia e levu na marama se na kedra totoka. Na vakasama qori e laurai ena matavosa “na marama, o ira na marama.”

Na levu ni nona rogo o Solomoni, a gadivi koya sara ga kina na ranadi ni matanitu vutuniyau o Sipa ni rogoca na kena italanoa, qai qoroqoro ena ka e raica. (1 Tui 10:​1, 2) Qori e rawa ni dua na ibalebale ni matavosa “na marama, o ira na marama” a cavuta o Solomoni. A rairai vakaibalebaletaki ira tiko na yalewa totoka a sotava ena nona itikotiko ena vica vata na yabaki a se vakadonui koya tu kina na Kalou.