Nuitaki Jiova ni sa Voleka na iCavacava

“Dou vakararavi vei Jiova ka sega ni mudu.”—AISEA 26:4.

1. Era duidui vakacava o ira na qaravi Jiova kei ira era sega ni qaravi koya?

EDA bula tu ena dua na vuravura era sega kina ni kila e milioni vakacaca o cei se na cava mera nuitaka, de vuna qori na nodra vakararawataki se dabuitaki ena levu na gauna. Era duidui sara o ira na qaravi Jiova! Nira dusimaki ena vuku vakalou, era kila ni sega ni vinaka mera nuitaka na vuravura qo se na kena “turaga.” (Same 146:3) Ia era nuitaki Jiova ena nodra bula ena gauna qo kei na gauna se bera mai, nira kila ni lomani ira o Jiova, ena dina tu ga ena nona vosa.—Roma 3:4; 8:38, 39.

2. Na cava a tukuna o Josua me baleta na kena nuitaki na ka e tukuna na Kalou?

² E vakadinadinataka o Josua ni nuitaki na ka e tukuna na Kalou. Ni voleka ni cava na nona bula, a tukuna vei ira na Isireli: “Dou sa kila e na lomamuni taucoko kei na yalomuni taucoko, ni sa sega ni lutu e dua na ka e na ka vinaka kecega sa vosataka e na vukumuni ko Jiova na nomuni Kalou; sa yaco kecega vei kemuni.”—Josua 23:14.

3. Na cava e kilai me baleta na Kalou ena ibalebale ni yacana?

³ E dau dina ena nona yalayala o Jiova ni lomani ira era qaravi koya, ia e bibi sara ni vauci kina na yacana. (Lako 3:14; 1 Sam. 12:22) E kaya me baleta na yaca ni Kalou na ivakamacala taumada ni Emphasized Bible, a vola o J. B. Rotherham: “E okati ena ibalebale ni [yaca ni Kalou] e dua na yalayala totoka; e dau yalorawarawa ni veisau na ituvaki, ni basika na leqa, se gadrevi me caka e dua na ka . . . [Na yaca ni Kalou] e okati kina na nona yalayala, . . . e vakatakila na ka dina me baleti koya, eda rawa tale ga ni nanumi koya kina. Na Kalou ena dina tu ga ena ibalebale ni yacana; ena sega vakadua ni lasu.”

4. (a) Na cava eda uqeti meda cakava ena Aisea 26:4? (b) Na cava eda na veivosakitaka ena ulutaga qo?

⁴ E vinaka mo taroga: ‘Au kilai Jiova vinaka meu nuitaki koya kina vakatabakidua? Au nuitaka dei na veigauna se bera mai niu kila ni lewa na ka kece na Kalou?’ E tukuna na Aisea 26:4: “Dou vakararavi vei Jiova ka sega ni mudu, ni sa uluvatu e sega ni oti rawa na Turaga ko Jiova.” E sa sega ni cakamana ena vukuda ena gauna qo na Kalou me vaka e dau cakava ena so na ituvaki ena gauna vakaivolatabu. Ia e rawa ni ‘tawamudu’ na noda nuitaki koya ni “uluvatu e sega ni oti rawa.” E vukei ira vakacava na nona tamata yalodina nikua na Kalou e nuitaki? Meda raica mada e tolu na sala: E vakaukauataki keda nida qara nona veivuke meda vorata na veitemaki, e tokoni keda nida sega ni kauaitaki se da tusaqati, qai vakaukauataki keda nida lomaocaocataka e levu na ka. Nida veivosakitaka na ituvaki qori, vakasamataka na sala mo vakaukauataka kina na nomu nuitaki Jiova.

Nuitaka na Kalou ni o Temaki mo Caka Ca

5. Ena gauna cava ena via dredre kina meda nuitaka na Kalou?

⁵ E macala ga nida nuitaka na yalayala i Jiova me baleta na parataisi kei na veivakaturi—eda diva kece tu qori. Ia ena via dredre meda nuitaki Jiova ni gadrevi meda vakatulewataka meda muria na nona ivakatagedegede savasava, meda vakadeitaka tale ga e lomada ni dodonu ga qai vakavu marau vakalevu na noda muria na nona sala kei na nona ivakatagedegede. A vola kina o Tui Solomoni na ivakasala qo: “Mo vakararavi vei Jiova e na vu ni yalomu: Ka mo kakua ni vakararavi ki na nomu yalomatua: Mo vakarogotaka vua na nomu sala kecega, ia ena vakadodonutaka na nomui lakolako ko koya.” (Vkai. 3:5, 6) Raica ni cavuti e keri na noda “sala” kei na noda ‘ilakolako.’ Io, meda nuitaka na Kalou ena ivakarau ni noda bula kece—sega ni noda inuinui ga. Eda na nuitaka vakacava na Kalou nida temaki?

6. Eda na vakadeitaka vakacava meda cata na vakanananu ca?

⁶ E tekivu ena noda vakasama na noda vakanadakuya na veika ca. (Wilika Roma 8:5; Efeso 2:3.) O na vakadeitaka gona vakacava mo cata na vakanananu ca? Raica mada e lima na sala qo: 1. Qara na veivuke ni Kalou ena masu. (Maciu 6:9, 13) 2. Vakananuma vakatitobu na nodra ivakaraitaki o ira na tukuni ena iVolatabu nira sega ni rogoci Jiova kei ira na rogoci koya, qai vakasamataka na ka a yaco vei ira.a (1 Kor. 10:8-11) 3. Vakasamataka na curuoso ni nomu vakasama kei na rarawa o na vakila vaka kina o ira na wekamu voleka ke o valavala ca. 4. Vakasamataka na nona rarawa na Kalou ni valavala ca bibi e dua na nona dauveiqaravi. (Wilika Same 78:40, 41.) 5. Raitayaloyalotaka na marau i Jiova ni raica na nona saqata na ka ca qai cakava na ka e dodonu e dua e qaravi koya ena yalodina, se mani e matanalevu se ni tiko taudua. (Same 15:1, 2; Vkai. 27:11) O rawa tale ga ni vakaraitaka ni o nuitaki Jiova.

Nuitaka na Kalou ni o Sega ni Kauaitaki se Tusaqati

7. A vakatovolei vakacava o Jeremaia, na cava a vakila ena so na gauna?

⁷ E dredre sara na yalava era veiqaravi tu kina e levu na tacida. A veiqaravi tu na parofita o Jeremaia ena ituvaki va qori—donuya na gauna dredre ena matanitu o Juta. A vakatovolei e veisiga na nona vakabauti Jiova ni dau talairawarawa me vunautaka na itukutuku ni veilewai ni Kalou. Kuria qori, a tukuna ena dua na gauna na nona vunivola yalodina o Peruki ni sa oca. (Jere. 45:2, 3) A yalolailai beka o Jeremaia? A rarawa ena so na gauna, a tukuna: “Me ca na siga ka’u a sucu kina . . . A cava ka’u sa lako mai kina mai na kete me’u kunea na oca kei na rarawa, me oti ga kina na noqu siga e na madua?”—Jere. 20:14, 15, 18.

8, 9. Me salavata kei na Jeremaia 17:7, 8 kei na Same 1:1-3, na cava meda cakava meda rawa ni vua tiko ga?

⁸ Ia a sega ni soro o Jeremaia, a nuitaki Jiova tiko ga. A raica kina na parofita yalodina qo na kena vakayacori na vosa i Jiova ena Jeremaia 17:7, 8: “Sa kalougata na tamata sa vakararavi vei Jiova, ka sa nuitaki Jiova ga: ni na vaka na kau sa tei e na bati ni wai, ia sa vakateteva na wakana ki na bati ni uciwai, ena sega ni kila ni sa yaco mai na katakata, a drauna talega ena drokadroka tu; ia e na yabaki ni dausiga ena sega ni nuiqawaqawa kina, ena sega talega ni mudu ni vuavuai.”

⁹ Me vaka ga e dua na vunikau bulabula e “tei e na bati ni wai” se dua na were ena vanua e tovakiwai, a ‘sega vakadua ni mudu na nona vua’ o Jeremaia. A sega ni rawai ena nodra veivakamuai na dauveivakalialiai dau caka ca era tu wavoliti koya. Ia a kabita tiko ga na ivurevure ni ‘wai’ ni bula qai rogoca na ka kece a tukuna vua o Jiova. (Wilika Same 1:1-3; Jere. 20:9) E ivakaraitaki vinaka dina vei keda o Jeremaia, vakabibi vei ira era qarava tiko na Kalou ena yalava dredre! Ke o sotava tiko na ituvaki qori, nuitaki Jiova tiko ga vakatabakidua, ena vukei iko mo vosota ni o “tukuna raraba na yacana.”—Iper. 13:15.

10. Na cava soti eda vakalougatataki kina, na cava meda taroga?

¹⁰ E vakarautaka vei keda o Jiova e levu na ivukevuke meda vosota rawa kina na leqa ena iotioti ni veisiga qo. E okati kina na nona vakarautaka na iVolatabu taucoko, e vakadewataki donu qai levu tiko ga na vosa e caka kina qori. E vakarautaka tale ga e levu na kakana vakayalo ena kena gauna donu ni vakayagataka na dauveiqaravi yalodina e vuku. E nona isolisoli tale ga na noda veitokani kei na ilawalawa levu eda vakabauta vata, eda dau veimaliwai ena soqoni kei na soqo tale eso. O dau vakayagataka vinaka na isolisoli kece qori? O ira kece era cakava qori ‘era na sere ni marau na lomadra.’ Ia o ira era sega ni vakarorogo vua na Kalou era na ‘tagi ni rarawa na lomadra, era na qoqolou ni ramusu na yalodra.’—Aisea 65:13, 14.

Nuitaka na Kalou ni o Lomaocaoca

11, 12. Ni laurai na leqa e yaco tu e vuravura, na ka vukutaki cava meda cakava?

¹¹ Me vaka ga e sa parofisaitaki tu mai, eda na sotava tiko ga e levu na leqa. (Maciu 24:6-8; Vkta. 12:12) Ni dau yaco na waluvu, e levu era dau ciciva ga na vanua cere se ra kaba ena delavuvu ni vale—me vanua cere ga. Nikua tale ga ni levu tiko ga na leqa e vuravura, e milioni era lai vakaruru ena kabani se baqe e dau soli dinau, isoqosoqo vakapolitiki se vakalotu, veika vakasaenisi kei na iyaya vovou ni gauna qo. Na ka kece qori era na sega ni dei. (Jere. 17:5, 6) Ena dei ga na nodra ivakaruru o ira na qaravi Jiova—na “uluvatu e sega ni oti rawa.” (Aisea 26:4) A tukuna na daunisame: “[O Jiova] duaduaga na noqu uluvatu, kei na noqui vakabula: Na noqui drodro cecere.” (Wilika Same 62:6-9.) E rawa vakacava nida nuitaka na noda uluvatu?

¹² Eda kabiti Jiova nida muria na nona Vosa, e levu na gauna e dau veisaqasaqa qori kei na vuku vakatamata. (Same 73:23, 24) Me kena ivakaraitaki, era dau tukuna o ira na vakamuai ena vuku vakatamata: ‘Na bula ga qo, marautaka sara vakalevu.’ ‘Saga e dua na nomu cakacaka vinaka.’ ‘Me levu na nomu ilavo.’ ‘Volivoli vakalevu.’ ‘Gade; marautaka na ka e vuravura.’ Ia na vuku vakalou e salavata kei na ivakasala: “O ira tale ga na vakayagataka na vuravura mera vakataki ira na sega ni vakayagataka vakavinaka; ni sa veisau tiko o vuravura.” (1 Kor. 7:31) O Jisu tale ga e uqeti keda meda dau vakaliuca na veika e vauca na Matanitu ni Kalou, eda na kumuna kina na “iyau mai lomalagi” ena yaga tawamudu.—Maciu 6:19, 20.

13. Na cava meda taroga nida vakasamataka na ka e tukuni ena 1 Joni 2:15-17?

¹³ E laurai beka ena nomu rai me baleta na “vuravura” kei ‘na ka e tu kina’ ni o nuitaka vakatabakidua na Kalou? (1 Joni 2:15-17) Ni vakasamataki kei na ka e tu e vuravura, e talei qai bibi cake vei keda na iyau vakayalo kei na noda vakarabailevutaka na noda qaravi Jiova? (Fpai. 3:8) O saga tiko ga me “vinaka na matamu”? (Maciu 6:22) E macala ga ni sega ni vinakata na Kalou mo wele se o tawanuitaki, vakabibi ke o qarava tiko e dua na vuvale. (1 Tim. 5:8) Ia e vinakata na Kalou mera nuitaki koya vakatabakidua na nona dauveiqaravi—mera kua ni nuitaka na vuravura i Setani e sa takali tiko qo.—Iper. 13:5.

14-16. Eso era saga me ‘vinaka tiko ga na matadra’ ra qai vakaliuca tiko ga na veika e vauca na Matanitu ni Kalou, e yaga vakacava qori vei ira?

¹⁴ Raica mada na nodrau ivakaraitaki o Richard kei Ruth, e tolu na luvedrau. E tukuna o Richard: “Au kila niu rawa ni cakava e levu tale na ka ena noqu qaravi Jiova. Au rawaka vinaka vakayago, ia au vakila niu solia tiko ga vua na Kalou na ivovo ni ka. Niu masulaka oti qai vakasamataka vinaka, keirau duavata kei Ruth meu kerei noqu boso me vakalailaitaki na gauna ni noqu cakacaka me sa va ga na siga ena dua na macawa, ia e leqa tiko mada ga vakailavo na matanitu. A vakadonui na noqu kerekere, au muria sara na ituvatuva vou ni noqu cakacaka ni oti ga e dua na vula.” E yaga vakacava qori vei Richard?

¹⁵ E kaya: “Ni raici vata na kequ isau e liu, qo e sa lailai ena 20 na pasede, ia e vakaikuritaki ena dua na yabaki e 50 na siga meu tiko kina kei ratou na noqu vuvale, meu vakavulici ratou tale ga na luvequ. E sa vakaruataki na levu ni gauna au vakayagataka ena cakacaka vakavunau, vakatolutaki na iwiliwili ni noqu vuli iVolatabu, au qarava vinaka tale ga na noqu itavi ena ivavakoso. Ni levu na gauna au rawa ni vukei ratou kina na gone, sa rawa ni painia veivuke ena so na gauna o Ruth. Au vakadeitaka meu muria tiko ga na ituvatuva qo ena kena dede ga e rawa.”

¹⁶ O Roy kei Petina, e dua na luvedrau yalewa e se tiko e vale, erau vakalailaitaka na nodrau gauna ni cakacaka saumi me rau cakacaka vakaitalatala vakatabakidua. E tukuna o Roy: “Au cakacaka me tolu na siga ena dua na macawa, o Petina e rua na siga. Keirau toki tale ga mai na dua vale ina dua na rumu lailai ni rawarawa cake na kena samaki. Keirau a painia tu ni bera ni sucu na luvei keirau tagane kei na yalewa, qai sega ni yali vei keirau na yalo ni painia. Ni rau sa ka lelevu na gone, keirau cakacaka tale vakatabakidua. Na neirau vakalougatataki e sega ni vakatauvatani rawa ena ilavo.”

Me Taqomaka na Lomamu “na Vakacegu ni Kalou”

17. E vakacegui iko vakacava na iVolatabu ni o raica na veilecayaki ni bula ena gauna qo?

¹⁷ Eda sega ni kila na ka ena yaco nimataka nida dau sotava kece ‘na ka tawanamaki.’ (Dauv. 9:11) Ia me kua ni vakaleqa na noda lomavakacegu ena gauna qo na noda lomaocaocataka na veika nimataka me vaka era vakila tu e levu e sega ni dei na nodra veiwekani kei Jiova. (Maciu 6:34) E vola na yapositolo o Paula: “Moni kua ni lomaocaocataka e dua na ka, ia na ka kece me vakaraitaki vua na Kalou ena masu kei na kerekere salavata kei na vakavinavinaka; ena qai taqomaka na lomamuni kei na nomuni vakasama na vakacegu ni Kalou e uasivia na vakasama kece.”—Fpai. 4:6, 7.

18, 19. Na sala cava e vakacegui keda kina na Kalou? Vakamacalataka.

¹⁸ E levu na tacida era vakila na lomavakacegu kei na veivakacegui i Jiova nira sotava na leqa. E tukuna e dua na tacida yalewa: “E dau saga tiko ga na dauveisele me vakarerei au meu tauri dra. ‘O sa lialia, cava o sega ni via tauri dra kina?’ qori na imatai ni ka a tukuna vei au. Au masuti Jiova lo ena gauna oya kei na so tale na gauna, au dau qai vakila na nona veivakacegui. Au kaukaua sara ga me vaka na vatu. Au malumalumu ni lailai na noqu dra, ia au rawa ni vakamacalataka na yavu vakaivolatabu ni noqu vakatulewa.”

¹⁹ Ena so na gauna ena tokoni keda na Kalou ena nona veivakacegui e dua na tacida vakayalo se na kakana vakayalo ena kena gauna donu. O sa na rairai rogoca ni tukuna e dua na tacida: “E ganiti au sara ga na ulutaga qo. E volai sara ga me baleti au!” Io, se mani cava na keda ituvaki se na ka eda vinakata, ena lomani keda o Jiova ke da nuitaki koya, nida nona “sipi” da qai vakatokayacataki vua.—Same 100:3; Joni 10:16; Caka. 15:14, 17.

20. Ni vakarusai na vuravura i Setani, na cava era na tiko vinaka ra qai vakacegu kina na dauveiqaravi i Jiova?

²⁰ Ena “siga ni cudru i Jiova” sa roro voleka sara qo, na ka kece e vakanuinui tu kina na vuravura i Setani ena vakarusai. Ena sega ni veivakabulai na koula, siliva kei na so tale na iyau talei. (Sefa. 1:18; Vkai. 11:4) Ena noda ivakaruru ga na “uluvatu e sega ni oti rawa.” (Aisea 26:4) Meda vakaraitaka gona ena gauna qo na noda nuitaki Jiova vakatabakidua nida muria na nona sala dodonu, nida kacivaka na itukutuku ni nona Matanitu ke da sega mada ga ni kauaitaki se tusaqati, nida talaucaka tale ga vua na noda lomaocaoca kece. Nida cakava qori, eda na “tiko vinaka, ka na vakacegu ka sega ni rerevaka e dua na ka ca.”—Vkai. 1:33.

[iVakamacala e ra]

O Rawa ni Vakamacalataka?

O rawa ni nuitaka vakacava na Kalou

• ni o temaki mo caka ca?

• ni o sega ni kauaitaki se tusaqati?

• ni o lomaocaoca?

[iYaloyalo ena tabana e 13]

Eda na marau nida dei ena ivakatagedegede ni Kalou

[iYaloyalo ena tabana e 15]

‘O Jiova na uluvatu e sega ni oti rawa’