Kua ni Vakanadakui Ira na Tacimu Vakayalo

“A VAKAWELEI keirau tu me tini na yabaki na ka vakabisinisi, keirau qai bau vutuniyau toka. Keirau susu ena dina, ia keirau sa yawaki Jiova keirau qai nanuma ni sa sega ni rawa me keirau qaravi koya tale,” erau kaya na veiwatini o Jarosław kei Beata.a

E nanuma lesu e dua tale na tacida o Marek: “Ni veisau na bula ena itikotiko kei na ka vakapolitiki e Poladi, e veitaravi na noqu vakacegui mai na cakacaka. Au rarawa sara ga. Au rere ni tauyavutaka ga e dua na noqu kabani niu sega ni kenadau ena ka vakabisinisi. Au mani via tauyavutaka e dua na noqu bisinisi niu nanuma ena yaga ena noqu qarava vinaka na veika vakayago me ratou bula kina na noqu vuvale, qai sega ni vakaleqai au vakayalo. Ni toso na gauna, au qai kila ni cala na noqu rai.”

Ni tubucake tiko ga nikua na isau ni iyaya, kei na kedra iwiliwili na sega ni cakacaka, era vakatulewa cala kina eso ena levu ni nodra lomaleqa. E levu na tacida era vakatulewataka kina mera vakabalavutaka na nodra gauna ni cakacaka se me vica na vanua ni nodra cakacaka, se ra tekivuna na nodra bisinisi ke mani sega mada ga vei ira na kena kila. Era nanuma ni na yaga ena vuvale na ilavo e rawa mai, qai sega ni vakaleqai kina na bula vakayalo. Ia na veika tawanamaki kei na veilecayaki ni bula vakailavo nikua e rawa ni vakaleqa na veika mada ga e lalawataki vinaka. Era coriti gona eso ena kocokoco ra qai laiva na tiko vinaka vakayago me ulabaleta na nodra qaravi Jiova.—Dauv. 9:11, 12.

Eso tale na tacida era ogataka vakasivia na ka ni bula ni veisiga, sa sega kina na nodra gauna ni vuli vakataki ira, lai soqoni, se vunau. Na nodra vakawalena na veika qori e vakaleqai ira vakayalo kei na nodra veiwekani kei Jiova. E dua tale na veiwekani bibi era rairai tagutuva—na kedra ivau kei ira era “vakabauta vata.” (Kala. 6:10) Eso era ciri tani sara vakamalua mai na mataveitacini e vuravura. Meda vakasamataka sara vakabibi na ka eda veivosakitaka qo.

Noda iTavi Vei Ira Eda Vakabauta Vata

Nida mataveitacini, e levu na gauna eda rawa ni dui vakaraitaka kina na loloma. (Roma 13:8) O sa na rairai raica ena ivavakoso o lewena eso na ‘dravudravua era tagi nira vinakata na veivuke.’ (Jope 29:12) Eso e sega na ka mera bula kina. A tokaruataka na yapositolo o Joni na ka eda rawa ni cakava ena gauna va qori. “Ke dua e tu vua na ka kece ni vuravura qo me bula kina qai raica na tacina ni leqa tu ia e sogota vua na katuba ni nona yalololoma, ena kaya vakacava ni lomana na Kalou?”—1 Joni 3:17.

De dua o sa veivakacegui se veivukei ena gauna e gadrevi kina. Ia na noda kauaitaki ira na tacida e sega ni yalani ga ena noda vukei ira vakayago. Eso era na vinakata mera vukei nira galili se yalolailai. Era rairai nanuma nira tawayaga, era tauvimate bibi, se takali e dua na wekadra voleka. E dua na sala eda rawa ni vakayaloqaqataki ira kina, oya meda dau vakarorogo da qai veitalanoa kei ira. Eda na rawa gona ni vukei ira ena nodra rarawa, me dei tale ga na nodra veiwekani kei Jiova. (1 Ces. 5:14) Qori e dau dei kina na noda veilomani vakamataveitacini.

E rawa nira vakarorogo vinaka sara na qase ni ivavakoso, ra veinanumi ra qai veivakasalataki ena iVolatabu. (Caka. 20:28) Nira cakava qori, era sa vakatotomuria kina na nona dau “kauaitaki” ira na tacina vakayalo na yapositolo o Paula.—1 Ces. 2:7, 8.

Ia ke lako sese e dua na lotu vaKarisito, ena qai qarava vinaka vakacava na nona itavi vei ira era vakabauta vata? O ira mada ga na ivakatawa era sega ni vakuai ena icori ni domodomoiyau. Ia vakacava ke rawai e dua na lotu vaKarisito ena icori qori?

Lomabibi ni Lomaocaocataki na Bula

Me vaka sa kilai levu tu, na noda dau saga vakaukaua me vakarautaki na ka me bula kina na vuvale e dau vakavu lomaocaoca qai rawa ni raici vakamamada kina na ivakavuvuli vaKarisito. (Maciu 13:22) A kaya o Marek sa tukuni oti mai: “Ni lusi na noqu bisinisi, au vakatulewataka meu vaqara e dua na cakacaka isau levu e vanuatani. Au lai vula tolu mada, oti qai tolu tale na vula. E va tiko qori na kena ivakarau, qai dau lekaleka ga na gauna ni noqu lako i vale. E lomabibi sara ga o watiqu e sega ni qaravi Jiova.”

E sega ni leqa ga na noqu bula vakavuvale. E tomana o Marek: “Au cakacaka vakabalavu ena todra ni siga, au qai dau veimaliwai vakalevu kei ira e ca na nodra itovo ra qai dau veivakalolomataki. Era vakataki ira sara ga na ilala dauvakatubuca. Au lomabibi, au qai sega ni cakava rawa e dua na ka ena kequ ituvaki. Au sega ni vakabauta niu rawa ni vukei ira eso tale niu sa sega mada ga ni qaravi au rawa.”

Me vakavure vakasama vei keda na ka vakaloloma a sotava o Marek ena vuku ni nona vakatulewa. Ke wali mada ga na leqa vakailavo ena nona toki e vanuatani e dua, ena sega beka ni vakavuna qori eso tale na leqa? Kena ivakaraitaki, ena tara vakacava na bula vakayalo ni vuvale kei na ka eratou vinakata? O na vakanadakuya kina na ivavakoso? Ena tarova na nomu vakayacora na nomu itavi dokai mo qaravi ira eda vakabauta vata?—1 Tim. 3:2-5.

O sa na rairai liaca ni sega ni gadrevi sara mo yawa mai vale mo qai kauaitaka vakasivia na cakacaka saumi. Raica mada qo na ka erau sotava o Jarosław kei Beata. E kaya o tagane: “Keirau se qai vakamau ga, qai vinaka na inaki keirau tekivuna kina na bisinisi ni hot-dog ena dua na vanua veiganiti. Keirau mani nanuma me keirau vakalevutaka na neirau bisinisi ni keirau rawa tubu kina vakalevu. Ia ni sa levu ga na gauna keirau vakayagataka ena bisinisi, keirau sa calata kina na soqoni. Oti ga vakalailai, au sa sega ni painia, au sa sega tale ga ni dua na dauveiqaravi ena ivavakoso. Dua na ka neirau marautaka na tubu keirau rawata, keirau mani dolava e dua na sitoa levu keitou qai caka bisinisi vata kei na dua e sega ni qaravi Jiova. Au lako sara e vanuatani meu lai sainitaka na konitaraki ena rawa kina e milioni vakacaca na dola. Au sega ni tu e vale ena levu na gauna, au sa sega tale ga ni veivolekati sara kei watiqu kei na luvequ yalewa. Ni toso na gauna, na toso vinaka ni bisinisi e vu ni neirau muduka na neirau qaravi Jiova. Ni keirau sa sega ni veimaliwai ena ivavakoso, keirau sa guilecavi ira kina na mataveitacini.”

Na cava eda vulica e keri? E rawa ni temaki na lotu vaKarisito me saga me dei na nona bula ena gauna qo, qori e rawa ni vakawelei koya—lai vakayalia sara na “nona isulu e sau,” na ka e kilai tani kina ni lotu vaKarisito. (Vkta. 16:15) Ena rawa sara ga ni tagutuva na noda veiwekani kei ira na tacida eda dau vukei ira tu e liu.

Vakalewa Vinaka na Kemu iTuvaki

Eda na rairai nanuma: ‘Ena sega ni yaco vei au oya.’ Ia meda vakasamataka vakabibi na veika e gadrevi dina ena noda bula. A vola o Paula: “Nida sega ni kauta mai vuravura e dua na ka, ena sega tale ga ni dua na ka eda kauta tani yani. O koya gona, ke sa tiko na ka meda kania, na isulu meda tokara, kei na vanua meda tiko kina, meda lomavakacegu.” (1 Tim. 6:7, 8) E macala ga ni duidui na ivakatagedegede ni bula e veivanua. Na ka ena rairai okati me lailai ga ena vanua se vakatorocaketaki tiko, ena rairai okati me levu sara ena vanua tale eso.

Se mani cava na ivakatagedegede ni bula ena vanua eda tiko kina, vakasamataka na ka e cavuta tarava o Paula: “O ira era qara na bula vutuniyau era na temaki, era na coriti, ena curumi ira tale ga e levu na gagadre ca e veivakaleqai, na ka kece qo ena vakavuna na nodra leqa kei na nodra rusa.” (1 Tim. 6:9) E dau vunitaki na dai me nakicataki kina e dua ni kena inaki me vakidacalataki koya. Na cava meda cakava meda kua ni coriti kina ena “gagadre ca e veivakaleqai”?

Nida kila na ka meda vakaliuca, eda na raica me vakalevutaki na gauna eda qaravi Jiova kina, wili kina na noda vuli vakataki keda. Na vuli e salavata kei na masu e yaga ena noda ‘vakarautaki vinaka, da qai tu vakarau’ meda veivuke.—2 Tim. 2:15; 3:17.

Oti e vica na yabaki, era vukei Jarosław ra qai vakayaloqaqataki koya na qase ni ivavakoso yalololoma. A uqeti koya qori me cakava na veiveisau e gadrevi. E kaya: “Dua na gauna keitou veitalanoa kina, eratou vakamacalataka na qase ni ivavakoso na ivakaraitaki vakaivolatabu me baleta na cauravou vutuniyau a via bula tawamudu, ia a sega ni rawa ni vakanadakuya na nona bula vutuniyau. Eratou moica vakamaqosa na ivakaraitaki oya meu liaca kina ke ganiti au tale ga na kena ivakamacala. E yaga sara ga vei au oya, niu kila kina na ka meu vakavinakataka!”—Vkai. 11:28; Mari. 10:17-22.

A vakalewa vinaka o Jarosław na kena ituvaki, qai vakatulewataka me muduka na nona saga na bisinisi lelevu. Ena loma ni rua na yabaki, ratou vakavinakataka vakavuvale na nodratou bula vakayalo. Sa dua tiko na qase ni ivavakoso ena gauna qo. E kaya o Jarosław: “Nira kauaitaka vakasivia na mataveitacini na nodra bisinisi me sa vakawaleni kina na bula vakayalo, au dau talanoataka na noqu ivakaraitaki meu vakaraitaka kina ni ka vakalialia na noda veitokani kei ira na sega ni qaravi Jiova. E sega ni rawarawa meda daudina da qai kua ni ciqoma eso na ka e dulaki mai meda temaki kina.”—2 Kor. 6:14.

O Marek tale ga a qai vuli ni sa sotava na leqa. Na nona lai cakacaka vinaka e vanuatani a vakavinakataka na nodratou bula vakailavo, ia a vakaleqa na nona veiwekani kei na Kalou vaka kina o ira na mataveitacini. A mani vakasamataka tale na ka e vakaliuca. “Na kequ ituvaki ena veiyabaki sa sivi a via vakataki Peruki ena gauna makawa, a ‘dauqara na ka lelevu me taukena.’ Au mani talaucaka na lomaqu vei Jiova, au tukuna vua na ka au lomaocaocataka, au sa qai vakila qo ni sa vinaka tale na noqu bula vakayalo.” (Jere. 45:1-5) Sa tadolova tiko ena gauna qo o Marek na “cakacaka vinaka” me dua na ivakatawa ena ivavakoso.—1 Tim. 3:1.

O Marek e vakasalataki ira na rairai nanuma tiko mera lai qara e dua na cakacaka isau levu cake e vanuatani: “Ni o yaco e vanuatani, e rawarawa sara mo rawai ena icori ni ituvaki ca ni bula qo. O sega ni veivosaki vinaka kei ira eso tale ni o sega ni kila vinaka na vosa ni vanua oya. O na kauta lesu mai vale na ilavo, ia o na mavoa vakayalo qai taura e dua na gauna balavu me mavo.”

Ena marau o Jiova ke da veiraurautaka na noda rai me baleta na cakacaka saumi kei na noda itavi vei ira na tacida. Eda rawa ni tukuna sara ga e dua na ivakaraitaki me uqeti ira eso tale mera vakatulewa vakavuku. E gadrevi mera tokoni ra qai lomani o ira na lomabibi, mera raica tale ga na nodra ivakaraitaki vinaka na mataveitacini. O ira na qase ni ivavakoso kei ira na matua vakayalo era rawa ni vukei ira na tacidra me donu tiko ga na nodra rai, mera kua ni lomaocaocataka vakasivia na ka ni bula e veisiga.—Iper. 13:7.

Meda kua mada ga ni vakanadakui ira eda vakabauta vata nida kauaitaka vakasivia na noda cakacaka saumi. (Fpai. 1:10) Ia meda saga meda “vutuniyau ena mata ni Kalou” nida vakaliuca ena noda bula na veika e vauca na Matanitu ni Kalou.—Luke 12:21.

[iVakamacala e ra]

[iYaloyalo ena tabana e 21]

E dau vakalatilati na nomu cakacaka saumi ena nomu tiko ena soqoni?

[iYaloyalo ena tabana e 23]

O vakamareqeta na sala kei na gauna o rawa ni vukei ira kina na tacimu vakayalo?