Parofisai 5. Vakarusai Vuravura Tiko
“[Na Kalou ena] vakawabokotaki ira . . . na vakarusai vuravura tiko.”—VAKATAKILA 11:18.
● O Mr. Pirri mai Kpor, Nigeria e dau caka waini mai na dua na mataqali vuniniu. Na vakaitamera ni tasova ni waiwai ena Niger Delta e vakaleqa sara ga na nona cakacaka. E kaya: “Era mate na ika, vakaleqai na kuliniyago, vagagai tale ga na uciwai. Na ka sara ga meu bula kina sa vakaleqai.”
KA E YACO DINA. Era kaya eso na kenadau ni 6.5 na milioni na tani ni benu e dau laurai e waitui e veiyabaki. E rauta ni 50 na pasede ni benu oya na palasitika, e dau veiciriyaki tu me drau vakacaca na yabaki sa qai kakaseresere. E sega wale ga ni vakacacana tiko na vuravura na tamata, e kurabuitaki tale ga na lailai ni iyaubula e vuravura ena levu ni kena vakayagataki. E laurai ena vakadidike ni na taura e voleka ni dua veimama na yabaki me sosomitaki kina na iyaubula eda vakayagataka ena dua na yabaki. Na niusiveva mai Ositerelia na Sydney Morning Herald e kaya: “Ke tubu tiko ga na iwiliwili ni lewenivanua qai sega ni veisau na ivakarau ni kena vakayagataki na iyaubula, ena vinakati me vakaruataki na levu ni iyaubula e vuravura ena yabaki 2035.”
KA ERA TUKUNA E LEVU. Eda vuku da qai rawa ni vakasamataka na iwali vinaka ni noda leqa. Eda rawa ni walia na leqa e yaco tu nikua me kua ni rusa kina na vuravura.
E DINA OYA? Se mani yadudua se vakailawalawa, e levu era vakaraitaka na nodra kauai ena vakaleqai ni veika bula era tu wavoliti keda. Ia e se benuci tiko ga na vuravura ena kena ivakatagedegede sara e cake.
CAVA MADA O NANUMA? Me vaka ga e yalataka na Kalou, ena vinakati beka me cakava e dua na ka me kua ni vakarusai kina na vuravura?
E vakamacalataki ena iVolatabu na lima na parofisai sa veivosakitaki oti mai, e parofisaitaki tale ga kina eso na ka vinaka ena yaco ena iotioti ni veisiga. Meda raica mada ena ikaono ni parofisai e dua na kena ivakaraitaki.
[Tikina bibi ena tabana e 8]
“E vaka ga au tu e liu ena dua na yasa ni parataisi au qai tokitaki ena isovasova ni benu gaga.”—ERIN TAMBER, E VAKAITIKOTIKO ENA GULF COAST E MERIKA, ME BALETA NA LEQA NI TASOVA NI WAIWAI ENA TOBA KEI MEXICO ENA 2010.
[Kato ena tabana e 8]
Me Beitaki na Kalou?
Me beitaki na Kalou ena leqa e yaco tu nikua baleta ga ni a parofisaitaki ena iVolatabu? E vakavuna na Kalou na noda rarawa? Ena saumi vinaka na taro qori ena wase 11 ni ivola Na Cava Sara Mada e Kaya na iVolatabu? tabaka na iVakadinadina i Jiova.
[iTaba ni Credit Line ena tabana e 8]
U.S. Coast Guard photo