Rawa Vua me Veivakabulai

‘RAICA! Ena buli e dua na tui me ia na lewadodonu.’ Na vosa ni yalayala veiuqeti vaka oqo baleta na nona veiliutaki o Jisu ena Matanitu ni Kalou e usutu ni iVolatabu. Dua tale na vosa ni yalayala e kaya: “[E]na vakabula ko koya na dravudravua ni sa tagi; kei koya sa vakararawataki ka sa sega e dua me vukei koya. Ena lomana ko koya na tamata malumalumu ka dravudravua, ka vakabula na yalodra na dravudravua. . . . Ena ka talei talega e matana na kedra dra.”​—Aisea 32:1; Same 72:12-14.

Rawa beka ni dua e cakitaka nira gadreva dina na tamata e veiyasa i vuravura na veiliutaki dodonu vaka oya? E uqeti ira na nona imuri o Jisu mera nanuma tiko ni sa voleka na Matanitu ni Kalou. E vakavulici ira mera masuta, “Me yaco mai na nomuni matanitu, me caka na lomamuni e vuravura, me vaka sa caka tiko mai lomalagi.”​—Maciu 6:9, 10, VV.

iVakadinadina ni sa Voleka na Matanitu ni Kalou

Eda kila vakacava na gauna ena yaco mai kina na Matanitu ni Kalou me na sauma na masu oya? O ira na imuri i Jisu ena gauna e liu era taroga: “Cava na kena i vakatakilakila ni nomuni lako mai (“tiko,” NW) [vakatui ena Matanitu ni Kalou], kei na i vakataotioti kei vuravura?” Sa qai sauma o Jisu: “[E]ra na veisaqasaqa na veivanua, . . . ka na yaco na dausiga kei na uneune e na veivanua e vuqa, ia, na veika kece ga oqori sa qai i tekivu ga ni veika rarawa.” E kaya tale: “Ena kena sa tubu vakalevu na i valavala tawa dodonu, sa na batabata kina na nodra loloma e lewe vuqa.”​—Maciu 24:3-12, VV.

E kaya e dua tale na parofisai ena iVolatabu ni na “yaco eso na gauna ni veivakararawataki e na veisiga maimuri [“ena iotioti ni veisiga ena yaco mai na gauna cacamatua, lewalewai dredre,” NW]: ni ra na daulomani ira walega na tamata, era na dauvinakata nai lavo, era na daubole, era na viavialevu, era na dauvosavakacaca, era na talaidredre kivei ira na nodra qase, era na sega ni vakavinavinaka, era na sega ni yalosavasava, era na caca veiwekani, era na dauyalayala ka lasu tale, era na dauveibeitaki vakailasu, era na sega ni daurawa na yalodra, era na daucudrucudru, era na daucati ira na tamata vinaka, era na dauveisoliyaki me mate, era na qaqa sodrosodro, era na yalolevu, era na lomana vakalevu na marau a ra na lomani koya na Kalou vakalailai; sa nodra ga na lotu vakarairai, ka sega vei ira na kena dina.”​—2 Timoci 3:1-5.

Rairai o na duavata kei na ivakamacala ni “iotioti ni veisiga” ni veitaudonui vinaka kei na noda gauna. Vuqa na ivakadinadina e dusia ni sa kena gauna oqo me yaco kina na parofisai: “Ena qai vakatura na Kalou ni lomalagi e dua na matanitu, ena sega sara ni vakarusai rawa: ia na matanitu ko ya ena sega ni biu tu me nodra na tamata tani, ia ena vurumemeataka ga ka vakaotia na veimatanitu oqori, ka na tu ga ka sega ni mudu.”​—Taniela 2:44.

Nona veiliutaki ena Matanitu ni Kalou na “Tui ni Sautu” ena kauta laivi kece na veika ena vakacacana nodra veimaliwai vinaka o ira na bulata yani na kena vakarusai na ituvaki ca kei vuravura oqo. (Aisea 9:6) E yalataka na parofisai ena iVolatabu: “Ko vuravura sa lako tani yani, kei na kena gagadre talega; ia ko koya sa cakava na ka sa vinakata na Kalou, sa tu dei ga ka sega ni mudu.” (1 Joni 2:17) Ni rusa na ituvaki ca kei vuravura oqo, era na rekitaka o ira na cakava na inaki ni Kalou na ka era vakayalia na kawatamata ni rau talaidredre vua na Kalou na noda itubutubu taumada o Atama kei Ivi.

Voleka na Veivakabulai

“E na vuravura vou,” e vakamacalataka o Jisu, “sa [na] tiko na Luve ni Tamata e na nona i tikotiko lagilagi.” (Maciu 19:28, VV) Na cava “na vuravura vou” oqo? E dua tale na ivakadewa e kaya “na vakavoui ni ka kece.” (New International Version) E dua na ivakamacala vaka oqo ena iVolatabu e vakatoka “na gauna sa bera mai.” (Luke 18:30, VV) Ena gauna oya sa na vakayagataka o Jisu na kaukaua e solia vua na Kalou me Tui ni Sautu ena nona vakalougatataki ira na cakacakataka nodra vakabauta na nona isoro ni veivoli mera bula tawa mudu.​—Joni 5:21.

Ena vuravura vou ni Kalou, era na marautaka na tamata na bula a vakarautaka taumada na Kalou vei Atama kei Ivi ena gauna a vakatikori rau kina ena Parataisi e vuravura. A vakaroti rau na Kalou me rau vakaluveni, io, me rau “vakatawai vuravura, ka vakamalumalumutaka.” E nodrau ilesilesi me rau vakatetea na nodrau Parataisi ena were o Iteni me roboti vuravura! (Vakatekivu 1:28) E vaka kina ena vuravura vou, era na tawana o ira na bula ni sa cava na ituvaki ca kei vuravura, na luvedra, kei ira na sa mate ra qai vakaturi. Sa nodra itavi mera vakatetea na vuravura me parataisi, me vaka ga a nakita taumada na Kalou.

Dikeva mada e so na ka ni veivakalougatataki e tukuna na iVolatabu era na marautaka o ira na tamata yalododonu ena vuravura vou.​—2 Pita 3:13.

De na dredre me vakabauti na vosa ni yalayala e vakaraitaki toka ena tabana oqo, era na yaco dina “e na gauna sa bera mai.” E vakamacalataka o Jisu na veika e gadrevi vei ira na tamata mera marautaka na ka ni veivakalougatataki oqori ena nona masu vua na Kalou ni kaya: “Sai koya oqo na bula tawa mudu, me ra kilai kemuni na Kalou dina duaduaga, kei Jisu Karisito ko koya ko ni a tala mai.” (Joni 17:3) Mo dua mada ga vei ira na vakasaqara na kilaka e rawati kina na bula oqo.

[Tikina bibi ena tabana e 7]

“Ena vakatokai na yacana . . . na Tui ni Sautu. Ena sega ni oti na kena tubu na nona lewa kei na sautu.”​—Aisea 9:6, 7

[Kato/iYaloyalo ena tabana e 8]

Era Vakavale Ra Qai Cakacaka na Tamata Kece

“A ra na tara vale, ka tiko kina . . . Era na sega ni tea, ka kania na tamata tani.”​—Aisea 65:21, 22.

Sautu ena Kakana na Tamata Kece

“Ena qai vuataka na vuana ko vuravura.” “Ena sa tu e vuravura e na dela ni veiulu-ni-vanua na sila e qumi rawarawa ga.”​—Same 67:6; 72:16.

Ra Vakila Tale ga na Manumanu na Veilomani e Vuravura Raraba

“Ena tiko vata na wolifa kei na lami, ka na davo vata na lepate kei na luve ni me, . . . ia ena tuberi iratou e dua na gone lailai.”​—Aisea 11:6.

Oti na iValu, Sautu Tawamudu

“Ena sega ni lavei seleiwau e dua na matanitu ki na dua na matanitu, a ra na sega ni vulica tale nai valu.” “Ena sega ni oti na kena tubu na nona lewa kei na sautu.”​—Aisea 2:4; 9:7.

Ra Vakaturi na Wekada sa Mate

“Sa lako mai na gauna era na rogoca kina na domona [i Jisu] ko ira kecega e nai bulubulu, a ra na lako maikina.”​—Joni 5:28, 29.

Sega Tale na Tauvimate se Mate

“Na lewe ni koro ena sega ni kaya, Ka’u sa tauvi mate.” “Sa na sega tale na mate . . . Ni ra sa takali tani na veika makawa.”​—Aisea 33:24; Vakatakila 21:3, 4, VV.