Na Cava Meda Dusimaki Kina ena Yalo Tabu ni Kalou?

“Ni sai kemuni na noqu Kalou: Sa yalololoma na Yalomuni; me tuberi au.”—SAME 143:10.

1. E rawa vakacava ni veidusimaki na kaukaua vuni?

O SA bau vakayagataka na kabasi me dusimaki iko ina vanua o via gole kina? E sega ni vereverea sara na kabasi, ni dua tiko ga na ligana makeneta qai dusi tu ena noca. Na liga ni kabasi ena muria na idre kaukaua e vaka na makeneta e tiko e vuravura, e rawa ga qori baleta ni tiko e dua na kaukaua vuni e vakatokai na magnetism. O ira na dausiko vanua kei ira na dauveilakoyaki ena vica na senitiuri sa oti, era dau vakayagataka na kabasi me dusimaka na nodra ilakolako e vanua, vaka kina e wai.

2, 3. (a) Na igu kaukaua cava a vakayagataka o Jiova ena vica vata na bilioni na yabaki sa oti? (b) Na cava meda vakabauta kina ni rawa tale ga ni dusimaki keda nikua na yalo tabu?

² E tiko e dua tale na kaukaua vuni e rawa ni dusimaki keda sara vakavinaka. Na cava oya? Qori e vakamacalataki ena imatai ni wase ni Vakatekivu. E vakamacalataki kina na ka e cakava o Jiova ena vica vata na bilioni na yabaki sa oti, e tukuni kina: “Enai vakatekivu sa bulia na lomalagi kei vuravura na Kalou.” Ena nona cakava qori, e vakayagataka kina e dua na kaukaua vuni. E tomana na iVolatabu: “A sa yavavala na Yalo ni Kalou e dela ni wai.” (Vkte. 1:1, 2) Qori sara ga na yalo tabu—na igu kaukaua e vakayagataki ena bulibuli. Eda vakavinavinakataki Jiova ni a vakayagataka na yalona tabu me buli keda kina, me vakayacori tale ga kina na nona cakacaka kece.—Jope 33:4; Same 104:30.

³ Nida dua na ka bula, vakacava eda vakabauta ni rawa ni dusimaki keda tale ga na yalo tabu? O Jisu mada ga na Luve ni Kalou, e vinakata meda vakabauta qori, ni a tukuna vei ratou na nona tisaipeli: ‘Na yalo tabu ena qai vakatakila vei kemudou na ka dina kece.’ (Joni 16:13) Eda na kila vinaka vakacava na yalo tabu? Na cava me dusimaki keda kina?

Na Cava na Yalo Tabu?

4, 5. (a) Na cava era nanuma o ira na vakabauta na letoluvakalou me baleta na yalo tabu? (b) O na vakamacalataka vakacava na yalo tabu?

⁴ Nida gole ena cakacaka vakavunau eda na rairai sotava eso e cala na nodra rai me baleta na yalo tabu. O ira na dau vakabauta na letoluvakalou era nanuma ni yalo tabu e tautauvata ga kei na Kalou na Tamada. (1 Kor. 8:6) Ia na ivakavuvuli ni letoluvakalou e veibasai sara ga kei na ka e tukuna na iVolatabu.

⁵ Ia na cava ga na yalo tabu? Ena ivakamacala e ra ni Vakatekivu 1:2 ena New World Translation of the Holy Scriptures—With References: “Na vosa vakaIperiu na ruʹach e dau vakadewataki me ‘yalo,’ e vakadewataki tale ga me ‘cagi’ kei na so tale na vosa me dusia na igu tawarairai.” (Vakatauvatana na ivakamacala e ra ni Vakatekivu 3:8; 8:1 New World Translation of the Holy Scriptures—With References) E dau vakilai na kaukaua ni cagi, ia e sega ni laurai, e va tale ga kina na yalo tabu, e sega nida raica, ia e vakilai ga na ka e cakava. Na yalo tabu na igu tawarairai ni Kalou—e vakayagataki vei ira na tamata se na veika tale eso me vakayacori kina na loma ni Kalou. Vakacava, e dredre me vakabauti ni vakavuna na Kalou Cecere na kaukaua ni yalo tabu? Sega!—Wilika Aisea 40:12, 13.

6. Na cava a kerea vei Jiova o Tevita?

⁶ Vakacava, ena vakayagataka o Jiova na yalona tabu me dusimaki keda? A yalataka o Jiova vua na daunisame o Tevita: “Au na vakavulici iko ka vakatakila vei iko na sala mo lako kina.” (Same 32:8) Vakacava, a vinakata dina qori o Tevita? Io, ni a kerei Jiova: “Ni vakavulici au me’u cakava na nomuni lewa; ni sai kemuni na noqu Kalou: Sa yalololoma na Yalomuni; me tuberi au ko koya e na vanua dodonu.” (Same 143:10) E bibi tale ga meda kerea na yalo tabu, da qai vakalaiva me dusimaki keda. Baleta na cava? Meda veivosakitaka mada qo e va na vuna.

Me Dusimaki Keda ga na Yalo Tabu

7, 8. (a) Na cava e vinakati kina me dusimaki keda na yalo ni Kalou? (b) Na cava meda kua kina ni dusimaki keda ga ena vuravura ca qo?

⁷ Na imatai ni vuna e vinakati kina me dusimaki keda na yalo tabu, baleta nida na sega tu ga ni dusimaki keda rawa. Na noda “dusimaki” e kena ibalebale na noda “tuberi se na kena vakatakilai na sala meda muria.” Ia e sega ni buli keda o Jiova meda dusimaki keda ga. Eda sega tale ga ni uasivi. Koya gona, ke da via dusimaki keda ga, ena cala tu ga na ka eda cakava. E vola kina na parofita o Jeremaia: “Kemuni Jiova, au sa kila, ni sa sega ni vu mai vua na tamata na nona sala: sa sega ni vu mai vua na tamata sa lako tu me lewa na nonai lakolako.” (Jere. 10:23) Na cava na vuna e tukuna kina qori o Jeremaia? Ni a rogoca na nona tukuna o Jiova na vuna eda sega ni dusimaki keda rawa kina. E tukuna o Jiova: “Sa ka dauveivakaisini duaduaga na yalo ni tamata, ka sa dredre ni vinaka: ko cei me kila rawa?”—Jere. 17:9; Maciu 15:19.

⁸ Kaya mada ke o se qai lakova vakadua e dua na veikauloa. Ena ka vakalialia dina ke o sega ni vakayagataka na kabasi me dusimaki iko se o sega ni lako kei na dua e kila vinaka na vanua qori. Ke o sega ni kila na ka mo cakava mo bula ena loma ni veikauloa, se o sega ni kila na sala vinaka duadua mo lakova, ena rawa ni vakaleqa sara ga na nomu bula. E va tale ga qori ke o nanuma mo lewai iko ga ena vuravura ca qo, o qai sega ni vakalaiva me dusimaki iko na Kalou ena sala e dodonu mo muria, ni na rawa ni vakaleqa sara ga na nomu bula. Na sala duadua ga eda na lako sivia kina na ituvaki qo, oya meda kerei Jiova me vaka ga a cakava o Tevita: “Vakataudeitaka na noqu lako tiko e na nomuni sala, me kakua ni yavala nai lakolako ni yavaqu.” (Same 17:5; 23:3) Na cava meda cakava me dusimaki keda kina na yalo tabu?

9. Me vaka e laurai ena tabana e 17, na sala cava ena dusimaki keda kina na yalo ni Kalou?

⁹ Ke da yalomalumalumu da qai yalorawarawa me dusimaki keda o Jiova, ena vakalaiva na yalona tabu me dusimaki keda. Ia ena vukei keda vakacava na yalo tabu? E vakamacalataka o Jisu vei ratou na nona tisaipeli: “Na dauveivuke, na yalo tabu, o koya ena tala mai o Tamaqu ena yacaqu, ena qai vakavulica vei kemudou na ka kece, ena vakalesuya tale ga ina nomudou vakasama na ka kece au tukuna vei kemudou.” (Joni 14:26) Nida masu da qai vulica wasoma na Vosa ni Kalou, wili kina na ka kece a vakavulica o Karisito, ena vukei keda na yalo tabu meda vakatitobutaka noda kilaka vakayalo me rawa nida cakava vakavinaka kina na loma i Jiova. (1 Kor. 2:10) Nida sotava eso na ituvaki dredre, ena dusimaki keda na yalo tabu ena ka meda cakava. Ena vakalesuya mai ena noda vakasama na ivakavuvuli vakaivolatabu eda sa vulica, kei na sala meda bulataka kina na ivakavuvuli qori me dusimaka na ikalawa eda na vakarau cakava.

Dusimaki Jisu na Yalo Tabu

10, 11. Na cava a vinakata dina o Jisu? Na cava a qai yaco?

¹⁰ E dua tale na vuna e vinakati kina me dusimaki keda na yalo tabu, oya ni vakayagataka sara ga o Jiova me dusimaki Luvena kina. Ni bera ni gole mai vuravura o Jisu, a kila vinaka na parofisai qo: “Ka na tiko ga vua na Yalo i Jiova, na Yalo ni vuku kei na lewa dina, na Yalo ni vakavuvuli kei na kaukauwa, na Yalo ni daukila ka kei na rerevaki Jiova.” (Aisea 11:2) Vakasamataka mada na nona vinakata dina o Jisu me dusimaki koya na yalo tabu ena gauna a bula voli kina e vuravura!

¹¹ A yaco dina na ka a tukuna o Jiova. E volatukutukutaka na Kosipeli na ka a yaco ni oti ga na nona papitaiso o Jisu: “Ni sobuti Jisu na yalo tabu, e biuta na Joritani, qai kauti koya voli na yalo tabu ena vanua talasiga.” (Luke 4:1) Ena nona tiko ena vanua talasiga o Jisu, a lolo, a masu qai vakasama vakatitobu, de dua a vakasalataki koya o Jiova qai vakarautaki koya ena ka ena sotava. Na yalo tabu e dusimaka sara ga na vakasama i Jisu, na lomana kei na nona vakatulewa. Qo a rawa kina me kila na ka me cakava ena ituvaki kece ena sotava, e qai cakava sara ga na ka e vinakata o Tamana.

12. Na cava meda kerea kina na veidusimaki ni yalo ni Kalou?

¹² A vakila o Jisu na yaga ni yalo tabu ena nona bula, e uqeti ratou kina na nona tisaipeli ni bibi me ratou kerea na yalo tabu, me ratou vakalaiva tale ga me dusimaki ratou. (Wilika Luke 11: 9-13.) Na cava meda kerea kina na veidusimaki ni yalo tabu? Baleta ni na vakavouya na noda vakasama me salavata kei na rai i Karisito. (Roma 12:2; 1 Kor. 2:16) Nida vakalaiva me dusimaki keda na yalo ni Kalou, eda na vakatotomuria na ivakarau ni rai i Karisito kei nona ivakaraitaki.—1 Pita 2:21.

Veivakamuai na Yalo ni Vuravura

13. Na cava na yalo ni vuravura, ena uqeti keda ena cava?

¹³ Na ikatolu ni vuna e vinakati kina me dusimaki keda na yalo tabu, oya ni rawa ni vakamuai keda na yalo ni vuravura. Na yalo qo e lewai ira tu e levu nikua. E kaukaua na yalo ni vuravura, e rawa ni veivakamuai meda cakava na ka e sega ni veidusimaki kina na yalo tabu. Ena sega ni uqeti keda na yalo ni vuravura meda muria na rai i Karisito, ena uqeti keda ga meda vakaraitaka na ivakarau ni rai kei na ivalavala e kilai kina na iliuliu ni vuravura o Setani. (Wilika Efeso 2:1-3; Taito 3:3.) Ke dua e rawai ena yalo ni vuravura, qai vakayacora na itovo vakayago, ena sotava na ca ni nona vakatulewa. Ena sega ni rawata tale ga na Matanitu ni Kalou.—Kala. 5:19-21.

14, 15. Eda na vorata vakacava na yalo ni vuravura?

¹⁴ E vukei keda o Jiova meda vorata na yalo ni vuravura. E tukuna na yapositolo o Paula: “Au uqeti kemuni moni vakaukauataki tiko ga ena nona cecere na Turaga kei na nona qaqa . . . moni kua kina ni yavalati ena siga ca.” (Efeso 6:10, 13) E vakaukauataki keda o Jiova ena nona vakayagataka na yalona tabu meda vorata kina na sasaga i Setani. (Vkta. 12:9) E kaukaua na yalo ni vuravura, eda sega ni galala rawa kina. Ia eda rawa ga ni vorata ena vuku ni yalo tabu, baleta ni kaukaua sara qai rawa ni vukei keda!

¹⁵ E tukuna na yapositolo o Pita me baleti ira na lotu vaKarisito era biuta na sokalou dina ena imatai ni senitiuri: “Era biuta na sala dodonu nira vakacalai.” (2 Pita 2:15) Eda kalougata dina ni “sega ni soli vei keda na yalo ni vuravura, na yalo ga ni Kalou”! (1 Kor. 2:12) Eda na vorata na yalo ni vuravura ca i Setani nida dusimaki ena yalo tabu, da qai vakayagataka vakavinaka na isolisoli kece e vakarautaka o Jiova meda muria tiko ga kina na sala dodonu.—Kala. 5:16.

Na Yalo Tabu e Vuataka na iTovo Vinaka

16. Na itovo cava soti eda rawa ni vuataka nida dusimaki ena yalo tabu?

¹⁶ Na ikava ni vuna e vinakati kina me dusimaki keda na yalo ni Kalou, oya nida na vuataka na itovo vinaka. (Wilika Kalatia 5:22, 23.) Eda vinakata kece meda dau loloma, meda marau da qai vakacegu. Eda vinakata meda dau vosota vakadede, yalololoma da qai yalovinaka vakalevu. Eda vinakata tale ga me kaukaua noda vakabauta, meda dau yalomalua da qai lewai keda vinaka. Nida dusimaki ena yalo ni Kalou, eda na vuataka na itovo vinaka kece qori. Na itovo qori ena vukei keda, ena vukei ira tale ga na lewe ni noda vuvale kei na ivavakoso. Koya gona, eda na sasaga tiko ga meda bucina na itovo e umani ena vua ni yalo tabu, baleta ni sega ni yalani na levu ni itovo eda rawa ni vuataka.

17. E rawa vakacava nida bucina na itovo e umani ena vua ni yalo tabu?

¹⁷ E ka vakayalomatua meda dau dikeva na noda ivosavosa kei na noda ivalavala meda vakadeitaka kina ni sa dusimaki keda tiko na yalo tabu da qai vuataka tiko na kena itovo. (2 Kor. 13:5; Kala. 5:25) Ke da raica ni vinakati meda bucina eso na itovo e umani ena vua ni yalo tabu, eda na vakalaiva me dusimaki keda na yalo tabu meda vuataka kina na itovo qori. Eda na cakava qori ena noda vulica ena iVolatabu kei na ivola ni isoqosoqo na itovo yadua e umani ena vua ni yalo tabu. Eda na vakasamataka tale ga na sala eda na bulataka kina na itovo qori, da qai saga sara meda vakaitovotaka.a Na noda vakasamataka na ka e cakava na yalo tabu ena vukuda kei ira na tacida, eda na kila na vuna e bibi kina me dusimaki keda na yalo ni Kalou.

Yalorawarawa me Dusimaki Iko na Yalo ni Kalou

18. Na cava eda vulica vei Jisu ni dusimaki koya na yalo tabu?

¹⁸ O Jisu e “matai daucakacaka” ni Kalou ena buli ni lomalagi kei na vuravura. E kila vinaka o Jisu ni tiko na kaukaua vuni e vuravura e vakatokai na magnetism, nira dau vakayagataka e levu nikua mera kila kina na vanua mera lakova. (Vkai. 8:30; Joni 1:3) Ia ena nona tiko e vuravura, e sega ni tukuni ena iVolatabu ni vukei Jisu na kaukaua vuni qori me kila kina na vanua me lakova. E tukuna ga na iVolatabu, ni a dusimaki koya na igu kaukaua ni Kalou, na yalo tabu. A vinakata dina o Jisu me dusimaki koya na yalo ni Kalou. Na gauna kece e dusimaki koya kina na yalo tabu, e yalorawarawa ni muria. (Mari. 1:12, 13; Luke 4:14) Vakacava, o dau cakava tale ga qori?

19. Na cava mo cakava me dusimaki iko kina na yalo tabu?

¹⁹ Nikua, na yalo tabu e dusimaki ira ga na yalorawarawa. Na cava mo cakava me dusimaki iko kina vakavinaka na yalo tabu? Masuti Jiova wasoma, kerei koya tale ga me vukei iko mo muria na kena veidusimaki. (Wilika Efeso 3:14-16.) Mo qara ivakasala ena vosa volai ni Kalou na iVolatabu—ni uqeta na yalo tabu na kena volai. (2 Tim. 3:16, 17) Muria sara na ivakasala yaga e tu kina, qai laiva me dusimaki iko na yalo tabu. Ni o cakava qori, o sa vakaraitaka tiko ni o nuitaka na sala vinaka duadua e vakarautaka o Jiova mo dusimaki kina ena vuravura ca qo.

[iVakamacala e ra]

O se Nanuma Tiko?

• E dusimaki keda vakacava na yalo tabu?

• Tukuna e va na vuna e vinakati kina me dusimaki keda na yalo tabu?

• Na cava mo cakava me dusimaki iko kina na yalo tabu?

[iYaloyalo ena tabana e 15]

Na yalo ni Kalou a dusimaki Jisu e vuravura

[iYaloyalo ena tabana e 17]

E veidusimaki na yalo tabu ni uqeta na noda vakasama kei na lomada