E Veisautaka na Bula na iVolatabu

A RAWA vakacava me vakainaki nona bula e dua na goneyalewa e dauvakalolomataki ni se gone? Na cava e uqeta e dua e voravora qai dausaqata na matanitu me italatala ni lotu e guta na veiyaloni? Wilika mada na kedrau italanoa.

“Dua na ka noqu vinakata meu lomani, meu kauaitaki tale ga.”​—INNA LEZHNINA

SUCU: 1981

VANUA: RUSIA

KA E KILAI KINA: VAKALOLOMATAKI NI SE GONE

NOQU BULA E LIU: Au sucu didivara, rau didivara tale ga na noqu itubutubu. Au marautaka na noqu bula ena imatai ni ono na yabaki. Oti rau veisere na noqu itubutubu. Au se gone ena gauna qori, ia au kila vinaka na ibalebale ni veisere qai vakararawataki au sara ga. Erau tiko ga e Troitsk o tamaqu kei ganequ qase, a kauti au o tinaqu ni toki i Chelyabinsk. E vakawati tale o tinaqu qai daugunu o tamaqu vakacabecabe, e dau mokulaki keirau vakaveitinani.

A luvu o ganequ qase ena 1993. Keitou kidacalataka sara ga vakavuvale. Qori a vakavuna me gunu kina o tinaqu rau qai dau vakalolomataki au kei tamaqu vakacabecabe. Au mani vaqara na bula e vinaka cake. Dua na ka noqu vinakata meu lomani, meu kauaitaki tale ga. Au lai lewena e vica na lotu meu kunea kina na vakacegu, ia au sega ga ni kunea rawa.

VEISAUTAKI AU NA IVOLATABU: Niu yabaki 13, e dau talanoa vei au mai na iVolatabu e dua na noqu itokani iVakadinadina i Jiova keirau vuli vata. Au marautaka na noqu vulica na italanoa kei Noa vaka kina o Jope, erau qarava tiko ga na Kalou ni rau sotava na dredre. Sega ni dede au vulica na iVolatabu kei ira na iVakadinadina, au dau lako tale ga ena nodra soqoni.

Au mai kila na totoka ni ka dina ena iVolatabu ena gauna au vulica kina. E tarai au sara ga na noqu vulica ni tiko na yaca ni Kalou. (Same 83:18) E veivakadrukai tale ga na dina ni ka e parofisaitaka na iVolatabu me baleta na veika ena yaco ena “iotioti ni veisiga.” (2 Timoci 3:1-5) Dua tale ga na ka noqu marau niu vulica na inuinui ni veivakaturi. Vakasamataka mada​—au na sotavi ganequ tale!​—Joni 5:28, 29.

Ia e levu era sega ni marautaka na veika vovou au sa vulica. Erau cati ira na iVakadinadina i Jiova o tinaqu kei tamaqu vakacabecabe. Rau vakasaurarataki au tale ga meu muduka noqu vuli iVolatabu. Ia au taleitaka na veika au vulica au mani vakadeitaka meu tomana tiko ga na noqu vuli.

A sega ni rawarawa na noqu vosota na nodratou veivakacacani e vale. Dua tale na ituvaki mosimosi au sotava na nona luvu o ganequ gone e dau tomani au ena nodra soqoni na iVakadinadina i Jiova. Ia era sega ni vakanadakui au na iVakadinadina. Au vakila nira lomani au ra kauaitaki au tale ga, qori na ka au dau vinakata tu. Au kila ni qo sara ga na lotu dina. Ena 1996 au papitaiso meu dua na iVakadinadina i Jiova.

KENA YAGA: Sa ono na yabaki na neirau vakawati kei Dmitry, e turaga yalovinaka. Keirau veiqaravi tiko ena valenivolavola ni tabana ni iVakadinadina i Jiova e St. Petersburg. Toso na gauna sa veisau na nodrau rai na noqu itubutubu me baleta na ka au vakabauta.

Au marau dina niu kilai Jiova! E vakainaki sara ga na noqu bula niu qaravi koya.

“E levu na ka au via kila.”​—RAUDEL RODRÍGUEZ RODRÍGUEZ

SUCU: 1959

VANUA: CUBA

KA E KILAI KINA: DAU SAQATA NA MATANITU

NOQU BULA E LIU: Au sucu e Havana mai Cuba, e dravudravua na yasayasa keitou vakaitikotiko kina qai dau caka e gaunisala na veibuturaki. Niu tubu cake tiko au taleitaka na judo kei na so tale na mataqali veibo.

Erau uqeti au na noqu itubutubu meu lako ena univesiti niu dau qacoya na vuli. Niu vuli tiko, au nanuma ni na vinakati me veisautaki na ivakarau ni veiliutaki vakapolitiki ena noqu vanua. Au mani saqata na matanitu. Keirau buturaka e dua na ovisa kei na noqu itokani ni keirau via butakoca na nona dakai. A mavoa kina vakaca na uluna. Keirau bala i valeniveivesu kei na noqu itokani, qai keirau itotogi me keirau lauvana mate. Au se yabaki 20 ga ena gauna qori, ia sa voleka tale niu mate!

Niu tu duadua e valeniveivesu au dau vakatovotovotaka na ka meu cakava niu sa na tu e matadra na ovisa era na vanai au. Au sega ni via vakaraitaka niu rere. Ia e levu na ka au via kila. Au vakasamataka: ‘Na cava e levu kina na ca e vuravura? Ena va tu ga qo na bula?’

VEISAUTAKI AU NA IVOLATABU: Sa veisau na keirau itotogi me sa na 30 ga na yabaki e valeniveivesu. Qori na gauna au sotavi ira kina na iVakadinadina i Jiova era vesu tu ena vuku ni nodra vakabauta. Au drukataka na nodra yaloqaqa na iVakadinadina kei na nodra veiyaloni. E cala nodra vesu, ia era sega ni cudru se lomaca.

Era vakavulica na iVakadinadina ni tiko na inaki ni Kalou me baleta na kawatamata. Era vakaraitaka vei au ena iVolatabu ni na veisautaka na vuravura na Kalou me parataisi, ena sega kina na basulawa kei na veika ca. Era vakavulica nira na bula e vuravura na tamata vinaka, e rawa nira na bula tawamudu e vuravura ena ituvaki e vinaka vakaoti.​—Same 37:29.

Au taleitaka na veika au vulica, ia au raica ni na dredre meu vakataki ira na iVakadinadina i Jiova. Au nanuma ni na dredre meu tawaveitovaki se meu kua ni sauma na ca e caka vei au. Au mani vakatulewataka meu wilika ga vakataki au na iVolatabu. Niu wilika oti, au raica ni o ira ga na iVakadinadina i Jiova era vakataki ira na lotu vaKarisito taumada.

Niu vulica na iVolatabu, au kila ni vinakati meu na vakayacora eso na veisau lelevu ena noqu bula. Me kena ivakaraitaki, ena vinakati meu kua ni vosavosa ca ni sa matau vei au qori. Meu biuta na vakatavako, qai muduka na noqu veitovaki ena veika vakapolitiki. A sega ni rawarawa meu vakayacora na veisau qori, ia au rawa ga ni veisau ena veivuke i Jiova.

E dredre duadua meu lewa vinaka na noqu cudru. Au se masulaka tiko ga meu lewai au vinaka. E vukei au vakalevu na tikinivolatabu me vaka na Vosa Vakaibalebale 16:32, e tukuna: “Sa vinaka cake ko koya sa berabera ni cudru ka ca na tamata qaqa; ko koya talega sa lewa na yalona vei koya sa kaba e dua na koro.”

Ena 1991 au papitaiso ena dua na taqe ni wai e valeniveivesu meu iVakadinadina i Jiova. Ena yabaki tarava, keimami sereki eso na kaivesu me keimami lako i Sipeni. Niu yaco i Sipeni, au lako sara ena nodra soqoni na iVakadinadina i Jiova. Era kidavaki au vaka ga keimami sa veikilai tu ena dua na gauna balavu, era vukei au sara ena noqu bula vou e Sipeni.

KENA YAGA: Au sa marautaka tu qo na noqu qarava na Kalou ratou qai tomani au o watiqu kei na luvei keirau yalewa ruarua. E ka dokai dina niu vakayagataka na noqu gauna meu vukei ira eso tale mera vulica na iVolatabu. Au nanuma lesu ena so na gauna na cauravou a voleka ni mate, au qai vakavinavinakataka na levu ni ka au sa rawata. Au se bula tiko ga qo, sa tiko tale ga na noqu inuinui. Au vakanamata ina Parataisi yalataki, qo na gauna ena vakilai kina na lewadodonu, ena “sega tale [ga] na mate.”​—Vakatakila 21:3, 4.

[Tikina bibi ena tabana e 19]

“E tarai au sara ga na noqu vulica ni tiko na yaca ni Kalou”

[iYaloyalo ena tabana e 20]

Keirau marautaka vakaveiwatini na neirau dau solia na nodra ivola na galu kei na didivara