Veiliumuritaki, iVakatakilakila ni iOtioti ni Veisiga!

“Na neitou yalodina, yalododonu, kei na neitou sega ni beitaki rawa ena dua na ka.”​—1 CES. 2:10.

O NA SAUMA VAKACAVA:

Na cava eda vulica mai na nodratou liumuri o Tilaila, Apisalomi, kei Jutasa Isikarioti?

Eda na vakatotomuria vakacava nodrau yalodina o Jonacani kei Pita?

Na cava meda cakava meda yalodina kina vei watida kei na Kalou?

1-3. (a) Na cava e dua na ivakatakilakila ni iotioti ni veisiga kei na cava e okati kina? (b) Na tolu na taro cava eda na sauma?

NA CAVA eratou tautauvata kina o Tilaila, Apisalomi, kei Jutasa Isikarioti? Eratou a sega ni yalodina. O Tilaila a sega ni yalodina vua na turaga a domoni koya, na Dauveilewai o Samisoni. O Apisalomi a sega ni yalodina vua na tamana o Tui Tevita, o Jutasa a sega ni yalodina vua na nona Qasenivuli o Karisito Jisu. Na ka eratou cakava e veivakaleqai qai vakararawataki ira eso tale! Ia na cava meda kauai kina?

² E tukuna e dua na dauvolaivola ni veiliumuritaki e dua na noda malumalumu levu na kawatamata. E sega ni dodonu me kidacalataki qori. Ni parofisaitaka tiko o Jisu na ivakatakilakila ni “ivakataotioti ni veika vakavuravura” e tukuna ni “levu . . . era na veibukiveretaki.” (Maciu 24:3, 10) “Na liumuri” oya “nomu dabuitaka e dua ni o sega ni yalodina.” Qo e vakadeitaka sara ga nida sa bula tu ena “iotioti ni veisiga,” ni kaya o Paula era na “sega ni yalodina, . . . era na dau veinakicataki” na tamata. (2 Tim. 3:1, 2, 4) Era dau saga na dauvolaivola kei ira na dau caka iyaloyalo me ka ni lasa na veiliumuritaki. Ia e sega ni lasa, e vakavuna ga na rarawa. Qori na ivakatakilakila ni iotioti ni veisiga!

³ Na cava eda rawa ni vulica ena iVolatabu me baleti ira na sega ni yalodina ena veigauna sa oti? Na cava e rawa nida vulica vei ira era yalodina vei ira nodra itokani? O cei e dodonu meda yalodina kina? Meda raica mada.

IVAKARAITAKI ENA GAUNA MAKAWA MEDA VULI KINA

4. A liumuritaki Samisoni vakacava o Tilaila, cava e rui torosobu kina qori?

⁴ Na imatai ni ivakaraitaki meda vulica oya na liumuri i Tilaila na yalewa a domona na Dauveilewai o Samisoni. E vinakata o Samisoni me liutaka na nodra valuti na kai Filisitia. Nira raica ni sega ni domoni Samisoni dina o Tilaila, eratou mani vaqumi koya e lima na turaga ni Filisitia me qara mai na vu ni kaukaua nei Samisoni me rawa nira vakamatei koya. A vakadonuya o Tilaila na ka eratou yalataka vua, ia a sega ga ni kila na vu ni kaukaua nei Samisoni, dina ni a saga vakatolu. E qai “vakasosataki koya e na veisiga kece ga ko koya e na nona vosa.” Kena itinitini ni “voleka ni ciba kina ko koya.” Mani tukuna o Samisoni ni se sega vakadua ni koti na drauniuluna, ena yali gona nona kaukaua ke koti.a Ni kila qori o Tilaila, e mani kotivi koya ni se mocelutu sara tu ga, qai soli koya yani vei ira na kena meca. (Dvei. 16:4, 5, 15-21) Sa bau dua dina na ivakarau torosobu! Ena vuku wale ga ni kocokoco i Tilaila a liumuritaka kina na nona daulomani.

5. (a) E vakaraitaka vakacava o Apisalomi ni sega ni yalodina vei Tevita, ia na cava sa qai kilai me baleti koya? (b) E tarai Tevita vakacava nona liumuritaki koya o Eitofeli?

⁵ E dua tale na ivakaraitaki ni liumuri o Apisalomi. E via veiliutaki qai saga me kovea na veiliutaki vakatui i Tevita na tamana. A ‘rawa na yalodra na Isireli’ ena yalayala lasu qai veivakaisini nona loloma. E dau mokoti ira, e reguci ira me vaka ga e kauaitaki ira dina. (2 Sam. 15:2-6) O Apisalomi e vesumonataki Eitofeli na itokani nuitaki i Tevita me vakaitavi tale ga ena vuaviri oya. (2 Sam. 15:31) E vakamacalataka toka o Tevita ena Same 3 ina Same 55 ni vakararawataki koya na tawayalodina qori. (Same 3:1-8; wilika Same 55:12-14.) E vakaraitaka o Apisalomi ni sega ni doka na veiliutaki cecere i Jiova ena nona via vuaviritaka na Tui a lesia na Kalou. (1 Vei. 28:5) A tini botoilevu na nona sasaga qai veiliutaki tiko ga o Tevita, na lumuti i Jiova.

6. E liumuritaki Jisu vakacava o Jutasa, ia e sa dau vakayagataki ina cava na yacana?

⁶ Ia vakasamataka mada nona liumuritaki Karisito o Jutasa Isikarioti. E kaya o Jisu vei ratou na 12 nona yapositolo ena iotioti ni Lakosivia: “Au tukuna vakadodonu vei kemudou, e dua vei kemudou ena soli au yani.” (Maciu 26:21) Ena lomaloma ni bogi e tukuna o Jisu vei Pita, Jemesa kei Joni ena were o Kecisemani: “Raica. Sa voleka mai o koya ena soli au yani.” Oti ga vakalailai sa basika sara o Jutasa kei ira era bukiveretaki koya, “e mani lako vakadodonu vei Jisu qai kaya: ‘Ni bula Rapai!’ E reguci koya sara.” (Maciu 26:46-50; Luke 22:47, 52) O Jutasa e liumuritaka na “tamata yalododonu” o Jisu, qai soli koya vei ira na meca i Karisito. Na cava na isau ni nona cakava qo o Jutasa? E tolusagavulu wale ga na tikinisiliva! (Maciu 27:3-5) Me tekivu mai na gauna oya sa dau vakayagataki na yaca Jutasa vua e dau liumuri, vakauasivi ke itokani.b

7. Na cava eda vulica vei (a) Apisalomi kei Jutasa (b) Tilaila?

⁷ Na cava eda vulica rawa mai na vica na ivakaraitaki qori? E vakaloloma dina na kedrau itinitini o Apisalomi kei Jutasa ni rau liumuritaka na lumuti i Jiova. (2 Sam. 18:9, 14-17; Caka. 1:18-20) Ia na yaca i Tilaila eda vakasamataka kina na veivakaisini kei na dodomo e veilali. (Same 119:158) E bibi me kua ni kadre e lomada na yalo ni via vakaitutu kei na kocokoco, ni rawa ni vakaleqa noda veiwekani kei Jiova! Na ivakaraitaki qori ena rawa ni vukei keda meda kua ni tawayalodina.

VAKATOTOMURI IRA ERA DAUYALODINA

8, 9. (a) Cava e yalataka kina vei Tevita o Jonacani ni na yalodina vua? (b) Eda na vakatotomuri Jonacani vakacava?

⁸ E vakamacalataki ena iVolatabu e levu na tamata yalodina. Meda dikeva mada e rua na ivakaraitaki da qai raica se cava eda rawa ni vulica kina. Eda na liu vei Jonacani na ulumatua i Tui Saula, a yalodina vei Tevita. Kena irairai ni sa na nona na madigi me veiliutaki e Isireli, ia e qai seva ni sa digitaki Tevita oti tu o Jiova me na veiliutaki. E doka na vakatulewa i Jiova o Jonacani qai sega ni vuvutaki Tevita me vaka e kena meca. Sa “kabita na yalo i Tevita na yalo” i Jonacani qai yalataka tale ga ni na yalodina vua. Ena nona veidokai e solia mada ga vei Tevita na nona isulu, iseleiwau, dakaititi kei na ivau ni tolona. (1 Sam. 18:1-4) E solia nona vinaka o Jonacani me ‘vakaukauataki Tevita’ dina ni ririkotaki kina nona bula, vakabibi nona vosa vei tamana ena vuku i Tevita. E mani kaya o Jonacani vei Tevita: “Ia ko na nodra Tui na Isireli, ia ko i au, kau na kemu i karua.” (1 Sam. 20:30-34; 23:16, 17) Sa rauta me vakayatuyatutaka na nona lolosi kei na lomabibi ena sere o Tevita ni mate oti o Jonacani.​—2 Sam. 1:17, 26.

⁹ E kila vinaka tu o Jonacani o cei me yalodina kina. E dau vakarorogo tu ga o Jonacani vei Jiova ni iLiuliu Cecere Duadua qai dau tokoni Tevita na nona lumuti. Ke da sega gona ni lesi ena dua na itavi bibi ena ivavakoso, meda vakaraitaka tiko ga nida tokoni ira era lesi mera liutaki keda.​—1 Ces. 5:12, 13; Iper. 13:17, 24.

10, 11. (a) Cava e yalodina kina o Pita qai sega ni biuti Jisu? (b) Rawa vakacava nida vakatotomuri Pita, ia na cava eda uqeti meda cakava?

¹⁰ Dua tale na ivakaraitaki vinaka meda vulica oya na i yapositolo o Pita, ni yalataka sara ga ni na yalodina vei Jisu. A vakayagataka o Jisu e dua na vosa vakatautauvata me ratou kila kina nona tisaipeli ni bibi me ratou vakabauta na cabori ni yagona kei na nona dra me isoro. E levu era sega ni taura rawa na kena ibalebale ra qai biubiu. (Joni 6:53-60, 66) Mani tarogi ratou na 12 nona i yapositolo o Jisu: “Dou via lako tale ga?” E qai kaya o Pita: “Turaga me keitou qai lako tale vei cei? Na nomuni vosa ga e vosa ni bula tawamudu; keitou kila, keitou vakabauta tale ga ni o kemuni na Yalosavasava ni Kalou.” (Joni 6:67-69) E sa kila tu beka o Pita na ibalebale ni nona kaya o Jisu ni na vakacabori na yagona me isoro? A rairai sega kila, ia e yalodina tu ga vua na Lumuti ni Kalou.

¹¹ A sega ni bau votu ena vakasama i Pita ni cala na ka e kaya o Jisu, se nanuma ni na veisau na rai i Jisu ena dua na gauna e muri. Ena yalomalumalumu e vakadeitaka ga ni tiko vei Jisu “na vosa ni bula tawamudu.” Na cava gona eda na cakava ke da vulica e dua na ka vou ena noda ivola e vakarautaka “na dauniyau e yalodina” qai dredre meda kila se duidui kei na ka eda nanuma? Meda saga vagumatua meda kila. Meda kua ni vakawelewele qai nanuma ni na yaco na veisau me salavata kei na noda nanuma.​—Wilika Luke 12:42.

YALODINA TIKO GA VUA NA WATIMU

12, 13. Na cava e rawa ni vakavuna me liumuri e dua vei rau na veiwatini? Na cava me kua ni nanumi kina ni tiko ga na yabaki ni bula e rawa ni yacovi ira na leqa qo?

¹² E itovo ca na liumuri, me kua gona ni mai vakaleqa na veiyaloni kei na duavata ni vuvale kei na ivavakoso. Meda raica mada se rawa vakacava vua e dua me yalodina tiko ga vei watina kei na Kalou.

¹³ E dua na mataqali liumuri mosimosi duadua na veibutakoci. O koya e veibutakoci vei rau na veiwatini e tagutuva nona yalodina vei kena isa qai vagolea na lomana vua e dua tale. Ia o koya e liumuritaki ena bikai koya na galili qai veisau vakadua na ivakarau ni nona bula. E mai yaco vakacava qo vei rau na veiwatini e sa dede nodrau veilomani voli mai? Dau tekivu qo ni sa seavu yani vakamalua na veitaleitaki vakaveiwatini. E tukuna o Gabriella Turnaturi, e dua na Parofesa e dau dikeva na itovo ni tamata, ni veiliumuritaki e rawa ni yacovi rau na veiwatini ke rau sa sega ni vakavinakataka na kedrau ivau vakaveiwatini. Qo e rawa ni yacovi ira sara mada ga e sa dede tu mai nodra veiwatini. Kena ivakaraitaki, a sereki watina e dua na turaga yabaki 50 ni oti e 25 na yabaki na nodrau vakawati me rau vakamau kei na dua tale na marama e domona. So era kaya ni na yaco ga qori ina noda bula. Meda kua ni taura vakamamada na ivakamacala oya, e se liumuri tiko ga qori.c

14. (a) Na cava na rai i Jiova me baleti ira na sega ni yalodina vei kedra isa? (b) Na cava e kaya o Jisu me baleta na tawayalodina ena bula vakawati?

¹⁴ Na cava na rai i Jiova me baleti ira era biuti kedra isa ena yavu e sega ni vakaivolatabu? E cata matua o Jiova “na veibiu” qai dau vunauci ira vakaukaua era dau vakalolomataki watidra se biuti ira. (Wilika Malakai 2:13-16.) Me vaka ga na rai i Tamana, e vakavulica o Jisu ni sega ni dua e rawa ni biuta na watina me qai vakalecalecava me vaka ga ni sega ni yaco e dua na ka.​—Wilika Maciu 19:3-6, 9.

15. Na cava mera cakava na veiwatini mera yalodina tiko ga vei kedra isa?

¹⁵ Na cava mera cakava na veiwatini mera yalodina tiko ga vei kedra isa? E kaya na Vosa ni Kalou: “Ia mo marautaki koya sa watimu ni ko sa cauravou” qai “reki vata tiko kei na watimu ko koya ko sa lomana.” (Vkai. 5:18; Dauv. 9:9) Ni toso na gauna me rau saga na veiwatini me dei tiko ga na kedrau ivau kei na ivakarau ni lomadrau. Okati kina nodrau veirogoci, veikauaitaki kei na nodrau veivolekati. Me rau taqomaka tiko ga nodrau bula vakawati kei na nodrau veiwekani kei Jiova. Qori ena nodrau dau vulica vata na iVolatabu, vakaitavi vata ena cakacaka vakavunau, rau qai masuta na veivakalougatataki i Jiova.

YALODINA TIKO GA VEI JIOVA

16, 17. (a) E rawa vakacava ni vakatovolei noda yalodina vua na Kalou ena vuvale kei na ivavakoso? (b) Na ivakaraitaki cava e dusia ni rawa ni tini vinaka noda muria na ivakaro i Jiova ena noda kua ni veimaliwai kei ira na wekada era sivo?

¹⁶ Eso na lewe ni ivavakoso era cala bibi era mani vunauci “vakavinaka me rawa ni dei tale nodra vakabauta.” (Taito 1:13) Ia eso tale, ena vuku ni nodra ivalavala e sa veiganiti ga mera vakasivoi. Era “vakavulici kina” me rawa ni vinaka tale na nodra bula vakayalo. (Iper. 12:11) Vakacava ke mani vakasivoi e dua na wekamu se nomu itokani dredre? Qori sara ga na gauna me laurai kina na nomu yalodina vua na Kalou, sega ni nomu yalodina vua e vakasivoi. E wanonovi keda tu o Jiova e vinakata meda muria na nona ivakaro meda kua ni veivosaki kei na dua e vakasivoi.—Wilika 1 Korinica 5:11-13.

¹⁷ Dikeva mada qo na veika vinaka a yaco ena nodratou yalodina e dua na vuvale ni ratou muria na lawa i Jiova me kua ni ratou veimaliwai kei na wekadratou a vakasivoi. E tini vakacaca na yabaki nona vakasivoi tu e dua na gonetagane, ratou qai sega ni “veitokani” kei koya o tamana, tinana kei ratou na va na tacina. So na gauna e dau via veimaliwai kei ratou, ia ratou yalodina tiko ga qai sega ni vosa vua. Ni vakalesui tale mai na cauravou qo, e kaya ni dau lai vakananuma na nona veimaliwai kei ratou e vale ena gauna e dau tu taudua kina ena bogi. A kaya ke ratou vosa mada ga vakalailai vua, sa na dua na vakacegu levu qori. Ia na nodratou sega ni vosa vua kei na nona vinakata me volekati ratou, e uqeti koya me vakavinakataka tale nona veiwekani kei Jiova. Koya gona ke o temaki mo beca na lawa i Jiova qai via veimaliwai kei koya e vakasivoi, yalovinaka vakasamataka na ivakaraitaki qo.

18. Eda sa veivosakitaka mai na vinaka ni yalodina kei na ca ni tawayalodina, ia na cava o na cakava?

¹⁸ Eda bula ena dua na vuravura e sinai ena tawayalodina kei na veiliumuritaki. Ia ena loma ni ivavakoso vaKarisito era maliwai keda e levu era yalodina qai rawa nida vakatotomuri ira. E tukuni ira ga na nodra ivakarau ni bula: “Oni vakadinadinataka, e vakadinadinataka tale ga na Kalou na neitou yalodina, yalododonu, kei na neitou sega ni beitaki rawa ena dua na ka vei kemuni na vakabauta.” (1 Ces. 2:10) Me dei tiko mada ga na noda yalodina vua na Kalou kei ira eso tale.

[iVakamacala e ra]

[iYaloyalo ena tabana e 10]

Era cati Jisu e levu, ia e yalodina tu ga o Pita vua na Luve ni Kalou