Taqomaki Keda o Jiova Meda Rawa ni Bula

“Nomuni . . . taqomaki ena kaukaua ni Kalou ena nomuni vakabauta na veivakabulai e sa vakarau vakatakilai ena iotioti ni itabagauna.”​—1 PITA 1:4, 5.

O NA SAUMA VAKACAVA?

E vagolei keda vakacava ena sokalou dina o Jiova?

Na cava meda cakava me yaga kina vei keda na veidusimaki i Jiova?

E dau vakayaloqaqataki keda vakacava o Jiova?

1, 2. (a) Eda vakadeitaka vakacava ni na vukei keda o Jiova meda yalodina tiko ga? (b) E kilai keda vinaka vakacava o Jiova?

“O KOYA e vosota me yacova na icavacava ena vakabulai.” (Maciu 24:13) E laurai ena vosa qori i Jisu ni bibi meda yalodina tiko ga me yacova na icavacava ke da via bula ena gauna e vakarusa kina na Kalou na vuravura ca qo i Setani. E sega ni kena ibalebale qori ni vinakata o Jiova meda vosota ena noda nuitaka ga na noda kaukaua se na noda vuku. E yalataka na iVolatabu: “E dau dina na Kalou . . . , oya ni na sega ni vakalaiva moni sotava na ka ni veivakatovolei oni na sega ni taqea rawa. Ni oni vakatovolei, ena vakarautaka tale ga na sala moni vosota rawa kina.” (1 Kor. 10:13) Na cava eda vulica e keri?

² O Jiova ena sega ni vakalaiva meda sotava na veivakatovolei eda na sega ni taqea rawa. E rawa ga ni cakava qori ni kilai keda vinaka, e kila na leqa eda sotava, na ivakarau ni lomada kei na ka eda rawa ni vosota. Vakacava e kilai keda vinaka na Kalou? Io. E vakamacalataka na iVolatabu ni kila o Jiova na ka kece e baleti keda, na ka eda cakava e veisiga kei na noda ivalavala. E kila mada ga na ka eda vakasamataka kei na lomada.​—Wilika Same 139:1-6.

3, 4. (a) Eda kila vakacava ena veika e sotava o Tevita ni kauaitaki keda yadua o Jiova? (b) Na cakacaka vakasakiti cava sa vakayacora tiko nikua o Jiova?

³ Vakacava, e kauaitaki keda dina na Kalou Cecere Duadua? E vakasamataka na taro qori na daunisame o Tevita qai kaya vei Jiova: “Ni’u sa vakananuma na nomuni lomalagi, na cakacaka ni qaqalo ni ligamuni, na vula kei na kalokalo ko ni sa lesia; a cava na tamata mo ni nanumi koya kina?” (Same 8:3, 4) De dua a taroga qori o Tevita ni raica na nona kauaitaki koya o Jiova. Ni gone duadua vei ratou na luvei Jese, e raici koya o Jiova me ‘dua e donu e lomana’ qai digitaki koya me nodra iliuliu na Isireli. (1 Sam. 13:14; 2 Sam. 7:8) Vakacava mada na nona kila o Tevita ni kauaitaki koya na Dauveibuli ni lomalagi kei vuravura, dina ni dua wale ga na ivakatawanisipi!

⁴ E vakasakiti tale ga na nona kauaitaki keda nikua o Jiova. E kumuni ira tiko na “ka sa domoni e na veimatanitu kecega” ina sokalou dina qai vukei ira na nona tamata mera yalodina tiko ga. (Akeai 2:7) Me rawa nida kila vinaka na nona vukei keda o Jiova meda yalodina tiko ga, eda na raica mada na sala e vagolea kina e dua ina sokalou dina.

VAGOLEI KEDA MAI NA KALOU

5. Na cava e cakava o Jiova me vagolei ira kina na nona tamata vei Luvena? Vakatauvatana.

⁵ A kaya o Jisu: “Ena sega ni lako mai vei au e dua ke sega ni vagolei koya mai o Tamaqu e talai au mai.” (Joni 6:44) E tukuna tiko ni vinakati na veivuke ni Kalou me rawa ni tisaipeli i Jisu e dua. Na cava e cakava o Jiova me vagolei ira kina na vaka na sipi vei Luvena? E cakava qori ena kena vunautaki na itukutuku vinaka kei na veidusimaki ni yalona tabu. Kena ivakaraitaki, ni ratou tiko e Filipai na yapositolo o Paula kei ratou na nona itokani daukaulotu, ratou sotava e dua na marama na yacana o Litia ratou qai vunautaka vua na itukutuku vinaka. E tukuna na iVolatabu ni “dolava na lomana o Jiova me rogoca na veika e tukuna tiko o Paula.” Io, e dusimaki Litia na yalo tabu i Jiova me kila qai ciqoma na itukutuku vinaka, ratou mani papitaiso kina vakavuvale.​—Caka. 16:13-15.

6. Sala cava e vagolei keda kina ina sokalou dina na Kalou?

⁶ A yaco ga qori vei Litia? Sega. Ke o lotu vaKarisito papitaiso, a vagolei iko tale ga mai na Kalou ina sokalou dina. A raica na Tamada vakalomalagi e dua na ka talei e lomai Litia, vei iko tale ga. Ni o se qai rogoca na itukutuku vinaka a dusimaki iko o Jiova ena nona vakayagataka na yalona tabu mo kila kina qai ciqoma na itukutuku qori. (1 Kor. 2:11, 12) Ni o saga mo bulataka na ka o vulica, a vakalougatataka o Jiova na nomu sasaga mo vakayacora na lomana. E marau ni o yalataka na nomu bula vua. Io, ni o se qai tekivu muria na sala e basika ina bula, a tokoni iko voli mai o Jiova.

7. Eda kila vakacava ni na vukei keda na Kalou meda yalodina tiko ga?

⁷ Ni vukei keda o Jiova meda qaravi koya, eda rawa gona ni vakadeitaka ni na vukei keda meda yalodina tiko ga vua. E kila nida sega ni lako mai vakataki keda ena dina, eda na sega ni tiko tale ga ena dina ena noda kaukaua ga. A volavola vei ira na lotu vaKarisito lumuti o Paula qai kaya: “Nomuni . . . taqomaki ena kaukaua ni Kalou ena nomuni vakabauta na veivakabulai e sa vakarau vakatakilai ena iotioti ni itabagauna.” (1 Pita 1:4, 5) Na ivakavuvuli ni tikinivolatabu qori e baleti ira na lotu vaKarisito kece, e dodonu gona meda kauaitaka vakabibi nikua. Na vuna? Nida vinakata kece na veivuke ni Kalou meda yalodina tiko ga vua.

VUKEI KEDA MEDA KUA NI BUTUCALA

8. Na cava e rawa ni vakavuna meda vakayacora e dua na cala bibi?

⁸ Na drakidrakita ni bula e veisiga kei na noda malumalumu e rawa ni vakavuna me sega ni tiko vei keda na rai i Jiova. E leqataki qori ni rawa nida vakayacora kina e dua na cala bibi da qai sega mada ga ni liaca. (Wilika Kalitia 6:1.) E laurai qori ena dua na ituvaki a sotava o Tevita.

9, 10. A tarovi Tevita vakacava o Jiova mai na dua na cala bibi? Na cava e cakava vei keda nikua o Jiova?

⁹ Ni vakasasataki Tevita voli o Tui Saula, a lewai koya vinaka o Tevita qai sega ni sauma na ka e cakava na tui vuvu oya. (1 Sam. 24:2-7) Ia ena dua na gauna e muri a sega ni lewai koya vinaka o Tevita. A vinakata me vakani ira na nona tamata qai kere veivuke vei Nepali e dua na nona itokani e Isireli. A vosa beci Tevita o Nepali qai sega ni via vukei koya. Dua na ka na nona katakata o Tevita qai via sauma lesu na veivakacacani qori me vakamatei ira kece na vuvale i Nepali. A sega ni bau vakasamataka o Tevita ni na vakadavedra ena mata i Jiova. Kalougata ni yaco totolo yani na wati Nepali o Apikali me tarovi Tevita mai na cala bibi oya. A kila o Tevita ni vakayagataki Apikali o Jiova, mani tukuna vua: “Me vakavinavinakataki ko Jiova na nodra Kalou na Isireli, o koya ka talai iko mai edaidai mo tavaki au; ia me vakavinavinakataki na nomu vuku, ia mo kalougata ko iko ka tarovi au edaidai me’u kakua ni ia na veivakamatei, ka sauma na ca sa caka vei au.”​—1 Sam. 25:9-13, 21, 22, 32, 33.

¹⁰ Na cava eda vulica ena italanoa qori? A vakayagataki Apikali o Jiova me tarovi Tevita mai na dua na cala bibi. E cakava tale ga qori vei keda nikua. E macala ga ni na sega ni tala mai e dua me tarovi keda ke da vakarau vakayacora e dua na cala. Eda sega tale ga ni kila na cava ena cakava na Kalou ena dua na ituvaki, se na vuna e vakalaiva kina e dua na ituvaki me yaco kina na nona inaki. (Dauv. 11:5) Ia eda rawa ni vakadeitaka ni kila vinaka o Jiova na keda ituvaki, ena vukei keda meda yalodina tiko ga vua. E vakadeitaka: “Au na vakavulici iko ka vakatakila vei iko na sala mo lako kina: ka’u na rai tiko vei iko ka tuberi iko.” (Same 32:8) E vakasalataki keda vakacava o Jiova nikua? Ena yaga vakacava vei keda? Eda na vakadeitaka vakacava ni liutaki ira tiko na nona tamata nikua o Jiova? Raica mada se sauma vakacava na Vakatakila na taro qori.

ITATAQOMAKI NA IVAKASALA

11. E kila vakacava o Jiova na veika e yaco tiko ena nona ivavakoso nikua?

¹¹ Na raivotu e volaitukutukutaki ena Vakatakila wase 2 kei na 3, a dikeva kina o Jisu Karisito sa vakalagilagi oti e vitu na ivavakoso e Esia Lailai. E laurai ena raivotu ni a sega ni vakamacala raraba tu ga o Jisu, e vakamacalataka sara ga eso na ka e yaco tiko, e cavu yaca, qai tauca na vosa ni veivakacaucautaki kei na veivakasalataki e ganita na ivavakoso yadua. Na cava e vakaraitaka na raivotu qori? Na vitu na ivavakoso e vakatayaloyalotaki ira na lotu vaKarisito lumuti era bula ni oti na 1914. E macala ni a vakasalataki ira tiko ga na lumuti na Karisito ia e yaga tale ga na ivakasala qori ena ivavakoso ni Kalou nikua. Eda rawa ni vakadeitaka e keri ni vakayagataki Luvena tiko o Jiova me dusimaki ira na nona tamata. Na cava meda cakava me yaga kina vei keda na veidusimaki i Jiova?

12. Sala cava eda vakalaivi Jiova kina me dusimaki keda?

¹² Dua na sala e yaga kina vei keda na veidusimaki yalololoma i Jiova na noda vuli vakataki keda. E vakarautaka o Jiova e levu na ivakasala vakaivolatabu ena ivola e tabaka na dauveiqaravi yalodina e vuku. (Maciu 24:45) Me yaga vei keda na ivakasala qori, me tiko na gauna meda vulica kina da qai bulataka na veika eda vulica. Na vuli vakataki keda e dua na itataqomaki e vakarautaka o Jiova meda ‘kua kina ni tarabe.’ (Juta 24) O bau vulica e dua na ka ena noda ivola o nanuma ni volai sara ga me baleti iko? Mo ciqoma na ivakasala qori me vaka sara ga e vakasalataki iko tiko o Jiova. Me vaka ga na nona vakatavitavi keda e dua na noda itokani ni via vakaraitaka e dua na ka, e rawa tale ga ni vakayagataka na yalona tabu o Jiova me vakaraitaka vei keda na noda itovo se ivakarau meda vakavinakataka. Nida muria na veidusimaki ni yalo tabu i Jiova, eda sa vakalaivi Jiova tiko me dusimaki keda. (Wilika Same 139:23, 24.) Meda raica mada qo na levu ni gauna kei na sasaga e vinakati meda vuli kina vakataki keda.

13. Na cava meda dikeva tale kina na ivakarau ni noda vuli?

¹³ Ke da vakayagataka e levu na gauna ena ka ni veivakamarautaki ena sega na gauna meda vuli kina vakataki keda. E tukuna e dua na tacida tagane: “E rawarawa sara meda kua ni vuli vakataki keda. Sa levu sara tu nikua na ka ni veivakamarautaki ni vakatauvatani kei na veigauna sa oti, e sau rawarawa tale ga. Sa tu ena tivi, kompiuta, kei na talevoni. Sa sega ni caka rawa.” Ke da sega ni qaqarauni sa na rawa ni kania na gauna ni noda vuli na ka ni veivakamarautaki, lakolako sa na sega na gauna meda vuli kina. (Efeso 5:15-17) Ena vinaka meda taroga: ‘E vakacava na levu ni gauna au dau dikeva kina vakatitobu na Vosa ni Kalou? Au dau cakava ga qori ni dua na noqu itavi se vakavakarau ena soqoni?’ Ke vaka kina de dua eda rawa ni vakayagataka vinaka na yakavi ni noda sokalou vakavuvale se noda vuli vakataki keda meda vakasaqara kina na vuku i Jiova ena iVolatabu, me vaka ga na noda vaqara iyau vuni. Na vuku qori ena taqomaki keda qai vukei keda meda yalodina tiko ga me yacova na icavacava.​—Vkai. 2:1-5.

EDA NA VOSOTA NIDA VAKAYALOQAQATAKI

14. E vakaraitaka vakacava na iVolatabu ni kauaitaka keda o Jiova?

¹⁴ E levu na ka mosimosi a sotava o Tevita ena nona bula. (1 Sam. 30:3-6) Na vosa uqeti vakalou a vola e vakaraitaka ni kilai koya vinaka o Jiova. (Wilika Same 34:18; 56:8.) E kila vinaka tale ga na lomada na Kalou. E veivakacegui nida vakasamataka ni kila vinaka o Jiova na gauna e ‘ramusu kina na yaloda’ se ‘dasila na lomada.’ A vakacegui Tevita qori mani lagata kina: “Au na reki ka marau e na nomuni yalololoma; kemuni sa vakananuma na noqu rarawa; kemuni a kila na kena veivakararawataki ni yaloqu.” (Same 31:7) E sega wale ga ni kila na noda leqa o Jiova. E vukei keda meda vosota ena nona dauveivakacegui kei na nona veivakayaloqaqataki. Dua na sala e cakava kina qori na soqoni vaKarisito.

15. Na cava eda rawa ni vulica ena ivakaraitaki i Esafa?

¹⁵ E laurai ena ivakaraitaki ni daunisame o Esafa na yaga ni noda dau tiko ena soqoni. A vakayalolailaitaki Esafa na nona raica nira vakalolomataki na tamata vinaka ra qai rawaka tiko ga na tamata ca. A kaya: “Sa rarawa na yaloqu, ka sa vakararawataki na lomaqu.” E voleka sara ni tagutuva nona qaravi Jiova. Na cava e vukei Esafa me donu tale na nona rai? E kaya: “Ka’u a qai lako ki na vale tabu ni Kalou.” A donu tale na nona rai ni veimaliwai kei ira na nona itokani era sokaloutaki Jiova. A raica o Esafa ni lekaleka ga na nodra rawaka na tamata ca, ena vakadodonutaka tale ga o Jiova na ka kece. (Same 73:2, 13-22) E tautauvata tale ga qori kei keda nikua. Na veivakalolomataki ena vuravura e lewa tu qo o Setani e rawa ni veivakararawataki qai veivakayalolailaitaki. Ia nida veimaliwai wasoma kei ira na tacida eda na vakabulabulataki qai vukei keda meda qaravi Jiova tiko ga ena marau.

16. E yaga vakacava vei keda na ivakaraitaki i Ana?

¹⁶ Vakacava ke dua na ituvaki eda sotava ena ivavakoso e vakavuna meda sega ni via tiko ena soqoni? De dua o maduataka na nomu cegu mai na dua na itavi o qarava ena ivavakoso, se o veileqaleqati kei na dua ena ivavakoso. Ke yacovi iko qori, ena rawa ni vukei iko na ivakaraitaki i Ana. (Wilika 1 Samuela 1:4-8.) E dau vakararawataki koya o Penina, na ikarua ni wati Elikana. Sa qai dau rarawa ga vakalevu o Ana ni ratou dau lako vakavuvale e veiyabaki me ratou lai vakacaboisoro vei Jiova e Sailo. Na levu ni nona rarawa e dau ‘tagi qai sega ni via kana.’ Ia a sega ni vakalaiva qori me tarova na nona lai qaravi Jiova. A raica o Jiova na nona yalodina qai vakalougatataki koya.​—1 Sam. 1:11, 20.

17, 18. (a) Eda dau vakayaloqaqataki vakacava ena soqoni? (b) E tarai iko vakacava na veikaroni i Jiova?

¹⁷ E dodonu meda vakatotomuria nikua na nona ivakaraitaki o Ana ena noda tiko wasoma ena soqoni. Eda kila ni dau veivakayaloqaqataki na soqoni. (Iper. 10:24, 25) Eda na vakacegui nida veimaliwai kei ira na tacida. Ena rairai uqeti keda na nona saumitaro e dua se na ivunau eda rogoca. Nida veivosaki kei na dua na tacida ni bera ni tekivu na soqoni se na gauna e oti kina, ena rairai vakarogoci keda qai tukuna e dua na vosa e veivakayaloqaqataki. (Vkai. 15:23; 17:17) Nida lagasere ena soqoni eda marau da qai lomavakacegu. Eda vinakata dina na veivakayaloqaqataki e vakarautaki ena soqoni nida sotava eso na ituvaki eda lomaleqataka. Qori na gauna ena vukei keda kina ‘na veivakacegui’ i Jiova meda vosota da qai yalodina tiko ga.—Same 94:18, 19.

¹⁸ Eda nuidei ena veikaroni i Jiova me vakataki koya na daunisame o Esafa ena nona lagata vei Jiova: “O ni sa taura tiko na ligaqu i matau. O ni na tuberi au e na nomuni lewa.”(Same 73:23, 24) Eda marau dina ni taqomaki keda o Jiova meda rawa ni bula!

[iYaloyalo ena tabana e 28]

A vagolei iko tale ga mai o Jiova

[iYaloyalo ena tabana e 30]

Eda taqomaki nida bulataka na ivakasala ni Kalou

[iYaloyalo ena tabana e 31]

Eda na vosota tiko ga nida vakayaloqaqataki