O se Nanuma Tiko?

O bau wilika vinaka na itabataba ni Vale ni Vakatawa era se qai tabaki oti ga? Raica mada ke o rawa ni sauma e vica na taro qo:

Na cava eda vulica vei Solomoni?

A vakalougatataki Tui Solomoni na Kalou qai vakayagataki koya sara ga. Ia e sega ni muria na veidusimaki vakalou ena gauna ni nona veiliutaki. A vakamautaka na luvei Fero yalewa e lotu butobuto, e levu na watina qai vakalaivi ira mera vakamuai koya ina sokalou lasu. Meda qarauna gona me kua ni buroro e lomada na rai cala kei na gagadre ca. (Vkru. 7:1-4; 17:17; 1 Tui 11:4-8)​—15/12, tabana e 10-12.

Na cava eda kaya kina ni yalewa dau qaravi Kalou qai radinivale vinaka o Sera?

Ni vakaroti Eparama na Kalou me biuti Uri, ena biuti ratou na wekana, nona ilala kei na kena ivakarau ni bula me gole ina dua na vanua e sega ni kila. Ia a tokoni watina ga o Sera qai nuitaka ni na vakalougatataki koya na Kalou. E dau dokai Eparama qai vakaraitaka na itovo vinaka.​—1/1, tabana e 8.

Na cava a kerei Eparama kina o Jiova me cabora na luvena?

E bibi meda nanuma tiko ni a sega ni vakalaiva na Kalou me vakacabori Aisake o Eparama. Na ka e yaco ya e dusia na rarawa kei na mosi ena vakila na Kalou ni sa na vakacabori Jisu.​—1/1, tabana e 23.

Na cava eda tukuna kina ni tekivu mai na imatai ni senitiuri, era na tiko e vuravura eso na lotu vaKarisito lumuti?

Ena vosa vakatautauvata i Jisu me baleta “na witi” kei na “co ca,” na “itei vinaka” oya o ira “na luve ni matanitu.” (Maciu 13:24-30, 38) Erau na tubu vata ga na co ca kei na witi me yacova na gauna ni tatamusuki. Eda sega ni kila se o cei dina na ilawalawa era vaka na witi ia eda vakadeitaka nira tiko dina eso nikua.​—15/1, tabana e 7.

Na cava ena yaco veitaravi ni bera na Amaketoni?

Era na kacivaka na veimatanitu na “vakacegu kei na sautu!” (1 Ces. 5:3) Era na saqati lotu lasu na veimatanitu. (Vkta 17:15-18) Era na vakacacani na dausokalou dina. Sa na qai yaco na icavacava.​—1/2, tabana e 9.

Eda na valuta vakacava na vuvu?

Qo eso na ka eda rawa ni cakava: Meda lomani ira na tacida vakayalo, maliwai ira ga era qarava na Kalou, meda dau caka vinaka, meda “marau vata kei ira era marau.” (Roma 12:15)​—15/2, tabana e 16-17.

O cei era vosa vakaNahuatl? Na cava sa vakayacori tiko nikua vei ira era vosataka na vosa qori?

Qo na nodra vosa na Aztec makawa, ia era se vosataka tiko ga e rauta ni dua veimama na milioni na lewenivanua e Mexico. Sa ra vunau tiko vei ira era vosa vakaNahuatl na iVakadinadina qai tabaki tale ga eso na noda ivola ena nodra vosa.​—1/3, tabana e 13-14.

Na ivakavuvuli cava meda vakasamataka tiko nida veivakasalataki?

Kila mada na itukutuku dina. Kua ni totolo ni veivakasalataki. Yalomalumalumu ni muria na Vosa ni Kalou. Vakayagataka na ivola ni isoqosoqo. Meda kua ni vakatulewa ena vukudra eso tale.​—15/3, tabana e 7-9.

Na cava e vakaibalebaletaka o Jisu ni tukuna vei ira na vakarorogo mera lako me rua na kilomita? (Maciu 5:41)

Nira veiliutaki tiko na kai Roma e Isireli, e rawa nira vakasaurarataka e dua me cakacaka. Ni tukuna gona o Jisu vei ira na vakarorogo mera lako me rua na kilomita, e kena ibalebale mera kua ni cakava vakavoraki na ka era lavaka na veiliutaki ke donu vakalawa.​—1/4, tabana e 9.