E Dodonu Mera Vakaitavi ena Politiki na Lotu vaKarisito Nikua?
O IRA na lotu vaKarisito dina nikua era sega ni vakaitavi ena veika vakapolitiki. Na cava na vuna? Baleta nira muria na ivakaraitaki i Jisu. E tukuna o Jisu me baleti koya: ‘Au sega ni vakavuravura.’ E tukuna tale ga me baleti ira na nona imuri: “Dou sega ni vakavuravura.” (Joni 15:19; 17:14) Dikeva mada na vuna e sega kina ni dodonu mera vakaitavi na lotu vaKarisito ena politiki.
1. Vakaiyalayala na ka e cakava na tamata. E tukuna na iVolatabu ni sega ni dodonu me lewai koya ga na tamata, e vakaiyalayala tale ga na ka e rawata. E vola na parofita o Jeremaia: “Sa sega ni vu mai vua na tamata sa lako tu me lewa na nonai lakolako.”—Jeremaia 10:23.
Me vaka ga noda sega ni buli meda vakayagataka na tabada meda vuka kina, eda sega tale ga ni buli meda liutaki keda vakavinaka. Ni yalani na ka e cakava na matanitu, e vakamacalataka kina o David Fromkin e dua na daunitukutuku makawa: “Era tamata ga o ira era veiliutaki ena matanitu; koya gona e dau guce na nodra sasaga qai sega ni dei na ka era nuitaka. E tiko vei ira na lewa ni veiliutaki, ia e vakaiyalayala ga.” (The Question of Government) Sa rauta me tukuna na iVolatabu meda kua ni vakararavi vei ira na tamata!—Same 146:3.
2. Veivakamuai tiko o ira na yalo ca tawarairai. Ni dulaka o Setani vei Jisu me lewa na vuravura, a kila o Jisu ni tu vua na Tevoro na lewa me solia vua na matanitu kece e vuravura. Ena dua na gauna e muri, e vakatokai Setani o Jisu me “turaga ni vuravura qo.” Ni oti e vica tale na yabaki a vakatokai Setani o Paula me “kalou ni veika vakavuravura qo.” (Joni 14:30; 2 Korinica 4:4) E vola o Paula vei ira na tacina vaKarisito: “Eda veivala kei ira na veimatanitu, o ira na iliuliu, o ira na lewa tu na vuravura butobuto qo kei ira na yalo ca tawarairai ena veiyasana vakalomalagi.” (Efeso 6:12) E levu gona era sega tu ni kila nira lewa tiko na vuravura na yalo ca tawarairai. Ena veisautaka vakacava na noda rai me baleta na politiki na ka dina qori?
Vakasamataka mada na ivakatautauvata qo: Me vaka ga na kena tosoi ira na waqa na kaukaua ni kui ni wai, o ira tale ga na yalo ca tawarairai qai kaukaua era vakamuai ira tu na veimatanitu vakapolitiki nikua. Era sega ni cakava rawa na dausoko e dua na ka mera veisautaka kina na kaukaua ni kui ni wai, era sega tale ga ni cakava rawa e dua na ka na daunipolitiki mera veisautaka kina na nodra veivakamuai na kabula vakayalo qai kaukaua. E nodra inaki na yalo ca tawarairai qori mera vakaleqai keda vakadua, me ‘vakilai tale ga e vuravura na rarawa.’ (Vakatakila 12:12) Na Kalou duadua ga o Jiova ena rawa ni vakayacora na veisau baleta e kaukaua sara vei Setani kei ira na timoni.—Same 83:18; Jeremaia 10:7, 10.
3. Era tokona duadua ga na Matanitu ni Kalou na lotu vaKarisito dina. A kila o Jisu kei iratou na nona tisaipeli ni na tauyavutaka mai lomalagi na Kalou ena nona gauna lokuci e dua na matanitu me lewa mai na vuravura. Me vaka e tukuni ena iVolatabu, qori na Matanitu ni Kalou, sa lesi tale ga o Jisu Karisito me kena Tui. (Vakatakila 11:15) Ni na yaga vei keda kece na Matanitu qori, a usutu sara ga ni nona veivakavulici o Jisu “na itukutuku vinaka ni matanitu ni Kalou.” (Luke 4:43) E vakavulici ratou tale ga na nona tisaipeli me ratou masuta: “Me yaco mai na nomuni matanitu.” Na vuna? Baleta na matanitu ga qori ena vakayacora na loma ni Kalou mai lomalagi kei vuravura.—Maciu 6:9, 10.
Na cava ena yaco ina veimatanitu vakatamata? E tukuna na iVolatabu ni na vakarusai na matanitu “kece kei vuravura.” (Vakatakila 16:14; 19:19-21) Ke vakabauta dina e dua ni sa vakarau vakarusa kece na veika vakapolitiki na Matanitu ni Kalou, ena sega sara ga ni tokona na veika vakapolitiki. Ke tokona tale ga na matanitu vakatamata e sa vakarau vakarusai, e sa saqata sara tiko ga na Kalou.
Era sega ni vakaitavi ena veika vakapolitiki na lotu vaKarisito dina, ia e kena ibalebale ya nira na sega ni kauaitaka na veika ena vakavinakataki kina na bula ena nodra itikotiko? Ena veivosakitaki na kena isau ena ulutaga e tarava.
[Tikina bibi ena tabana e 7]
Era ogaoga na iVakadinadina i Jiova ena veika e tokoni kina na Matanitu ni Kalou, sega ni veiveisau vakapolitiki