E Yaga Vakacava ena iTikotiko na iVakavuvuli vaKarisito?

E VAKAMACALATAKI ena vica na ulutaga sa oti na vuna era sega kina ni vakaitavi na lotu vaKarisito dina ena veika vakapolitiki. Ia era na vakaraitaka vakacava na lotu vaKarisito nira kauaitaka na veika ena vakavinakataki kina na bula ena nodra itikotiko? Dua na sala oya mera muria na ivakaro i Jisu: “O koya gona, ni lako moni vakavulici ira na lewe ni veivanua kece ga mera noqu tisaipeli, ni papitaisotaki ira ena yaca i Tamada kei na Luvena kei na yalo tabu, vakavulici ira mera muria na ka kece au vakarota vei kemuni.”​—Maciu 28:19, 20.

Na noda muria na ivakaro i Jisu me baleta na ‘veivakatisaipelitaki’ e sema ina noda muria na nona ivakasala meda vaka na masima kei na rarama kei vuravura. (Maciu 5:13, 14) Erau veisemati vakacava? Ena tara vakacava nodra bula e levu?

iTukutuku i Karisito—Veivakabulai Qai Veivakararamataki

Na masima e rawa ni taqomaka vakadede na ka me kua ni ca. Na itukutuku tale ga a vakaroti iratou kina nona imuri o Jisu me ratou tukuna ina veimatanitu kece, e rawa ni veivakabulai. O ira era ciqoma ra qai muria na ivakavuvuli i Jisu era taqomaki mai na itovo torosobu sa takalevu tu nikua. Ena sala cava? Era vulica mera muduka na ivalavala ena vakaleqa na nodra bula me vaka na vakatavako, ra qai bucina na itovo me vaka na loloma, vakacegu, vosota vakadede, yalololoma, kei na yalovinaka. (Kalatia 5:22, 23) Nira vakaitovotaka kece qori, era na yaga vakalevu kina ena itikotiko. Era yaga vakalevu ena vanua era vakatikotiko kina na lotu vaKarisito nira wasea na itukutuku ni veivakabulai vei ira na wekadra.

Vakacava na ivakatautauvata ni rarama? Me vaka ga ni laurai ena vula na rarama ni matanisiga, e laurai tale ga vei ira na imuri i Karisito na “rarama” ni Kalou o Jiova. Era vakaraitaka na rarama qori ena nodra vunautaka na itukutuku ni veivakararamataki kei na nodra ivakarau vinaka.​—1 Pita 2:12.

E vakabibitaka tale ga o Jisu ni tautauvata na noda vaka na rarama kei na noda dua na tisaipeli, e tukuna: “Ni waqa na cina, ena sega ni biu ena ruku ni sova, ena biu ga ena kena itutu me vakararamataki ira kece e lomanivale. Me serau vaka kina na nomuni cina.” Ni waqa na cina qai biu ena kena itutu, era na raica kece vakavinaka na tiko voleka. E dodonu me laurai levu tale ga ena vanua era tiko kina na lotu vaKarisito dina na nodra cakacaka vakavunau kei na nodra ivakarau vinaka. Na vuna? E tukuna o Jisu ni o ira era raica na veika vinaka e caka, era na vakalagilagia na Kalou, ia era na sega ni vakalagilagi ira na lotu vaKarisito.—Maciu 5:14-16.

iTavi Vakailawalawa

A vosa tiko o Jisu vei ira kece na nona tisaipeli ni cavuta na matavosa “oni rarama kei vuravura” kei na matavosa “me serau vaka kina na nomuni cina.” Era na sega ni cakava rawa na ilesilesi i Jisu e le vica ga e duidui na nodra lotu. Ia era “rarama” o ira kece na vakabauta. Era vakabauta na vitu na milioni na iVakadinadina i Jiova ena sivia na 235 na vanua, ni nodra itavi vakailawalawa mera vunautaka vei ira na wekadra na itukutuku e vinakata o Karisito mera kacivaka na nona imuri.

Na cava na usutu ni itukutuku era kacivaka na iVakadinadina i Jiova? Ni lesia o Jisu vei ira na nona imuri mera vunau, a sega ni tukuna mera vunautaka na veiveisau ena bula raraba kei na politiki, nodrau duavata na matanitu kei na lotu, se dua tale na vakasama vakatamata. Ia e parofisaitaka: “Ena vunautaki mada na itukutuku vinaka ni matanitu ni Kalou ena veiyasa i vuravura me ivakadinadina ina veimatanitu kece.” (Maciu 24:14) Nira talairawarawa gona na lotu vaKarisito dina nikua ina ivakasala i Jisu, era vunautaka tiko ga kina vei ira na wekadra na Matanitu ni Kalou. Qori na matanitu duadua ga ena vakarusa na ituvaki ca i Setani qai sosomitaka ena vuravura vou ni yalododonu.

Nida wilika na ivolatukutuku ena Kosipeli, e rua na ka bibi me baleta na cakacaka vakaitalatala i Jisu e veiuqeti ena nodra cakacaka na lotu vaKarisito dina nikua. Qori ena vakamacalataki ena ulutaga tarava.

[Tikina bibi ena tabana e 8]

E vakatauvatani vakacava ina masima na itukutuku era kacivaka na lotu vaKarisito?

[Tikina bibi ena tabana e 9]

E vakatauvatani vakacava ina rarama ena vanua buto na itukutuku i Karisito?