“Qo ga na ka au kila ni na vakamarautaki au dina”

NOQU BULA E LIU: Au a sucu e Moundsville, dua na taoni vakanomodi ena yasa ni uciwai o Ohio ena vuaira kei Virginia e Merika. Au ikarua vei keitou na le va na veitacini, e tolu na tagane qai sega ni vakavucesa na tiko i vale. Erau dau cakacaka vakaukaua na noqu itubutubu, rau daudina qai dau veivukei. E sega sara ni levu na ka keitou taukena, ia ena tiko ga na ka keitou gadreva. Ni rau iVakadinadina i Jiova na noqu itubutubu erau solia nodrau vinaka kece me rau vakavulici keitou ena ivakavuvuli vakaivolatabu ni keitou se gone.

Ia niu sa itabagone, sa tekivu meu sega ni muria na veika au vakavulici kina. Au lomatarotarotaka se na vakainaki qai marautaki na bula ke muri na ivakavuvuli vakaivolatabu. Au nanuma niu na vakila na marau dina keu cakava ga na ka au vinakata. Sega ni dede au sa sega ni dau lako ena soqoni vaKarisito. Erau muria tale ga e rua na taciqu na sala ca au sa digia. Erau saga vakaukaua na neitou itubutubu me rau vukei keitou, ia keitou sega ni vinakata na nodrau veivuke.

Au sega ni liaca ni marau au vakasaqara voli, ena vakavuna meu lai bobula tu ena so na ivakarau ca. Dua na siga niu lesu mai koronivuli meu gole tiko i vale, a solia vei au e dua na noqu itokani e dua na itibi tavako. Au taura sara. Tekivu mai na gauna ya, au sa vakayacora e levu tale na ivakarau ca. Toso na gauna, au sa vakayagataka vakasivia na wainimategaga, alakaolo, qai vakasisila tale ga na ivakarau ni noqu bula. Ni oti e vica na yabaki, au sa tekivu vakayagataka na wainimategaga vakarerevaki qai veivakaleqai, au lai bobula sara kina. Qori e vakavuna meu lai volitaki wainimategaga meu rawata kina na ka au vinakata.

Au saga vakaukaua meu kinoca na ca ni noqu lewaeloma, e tukuna tiko ga vei au ni ca na ivakarau ni bula au muria tiko. Ia au vakila ni sa na sega tu ga ni rawa meu veisautaka na ivakarau ni bula au sa digia. Au dau galili qai lomabibi, dina niu maliwai ira tu na tamata ena pati kei na koniseti. Ena so na gauna au dau vakasamataka na nodrau dau veikauaitaki kei na nodrau itovo vinaka na noqu itubutubu kei na vanua au sa yacova tu qo.

VEISAUTAKI AU NA IVOLATABU:

Au nanuma ni sa sega na kequ yaga, ia e sega ni va qori na nodra raici au eso tale. Ena yabaki 2000, erau sureti au na noqu itubutubu meu tiko ena nodra soqo ni tikina na iVakadinadina i Jiova. Au mani vakamumuri wale tu ga. Au kidacala niu raici rau ekea na taciqu erau a muria tale ga na sala ca au digia.

Niu tiko ena soqo ni tikina, au vakasamataka ni vanua vata ga ya a caka kina e dua na koniseti ni ivakatagi karakaravisa ena yabaki yani e liu. E tarai au sara ga na duidui au raica. Ena koniseti, e biu ga vakaveitalia na benu, qai levu wale ga na iboi ni tavako. E levu era tiko ekea era sega ni veinanumi, qai vakavu lomabibi na qaqanisere. Ia ena soqo ni tikina, au maliwai ira na tamata mamarau​—era kidavaki au, dina ni keimami sega ni sota tu ena dua na gauna balavu. E savasava na vanua ni soqo, na ivunau tale ga e rogoci e solia vei au na inuinui. Niu raica na yaga ni kena muri na ka dina ena iVolatabu, au liaca se cava na vuna au sega ni muria kina ena imatai ni gauna!​—Aisea 48:​17, 18.

Ni oti ga na soqo ni tikina, au vakatulewataka meu sa na lesu tale ena ivavakoso vaKarisito. E tarai rau tale ga na taciqu na veika erau raica ena soqo ni tikina, rau mani vakatulewataka tale ga me rau lesu ina ivavakoso. Keitou vakadonuya kece me keitou vulica na iVolatabu.

Na tikinivolatabu e uqeti au vakalevu na Jemesa 4:​8, e kaya: “Toro voleka yani vua na Kalou ena qai toro voleka mai vei kemuni.” Au vakasamataka ni na vinakati me savasava na ivakarau ni noqu bula keu via toro voleka vua na Kalou. Meu na muduka tale ga na vakatavako, vakayagataki ni wainimategaga kei na alakaolo.​—2 Korinica 7:1.

Au biuta ira na noqu ilala makawa, au qai digitaki ira na sokaloutaki Jiova mera noqu itokani vou. A vukei au vakalevu na qase ni ivavakoso vaKarisito e vakavulici au ena iVolatabu. E dau qiriti au qai mai raici au me kila se vakacava tiko na noqu bula. Me yacova mai qo, sa dua vei ira noqu itokani voleka.

Ena vulaitubutubu ni 2001, au vakaraitaka noqu yalayala vua na Kalou ena noqu papitaiso ena wai, vaka tale ga kina o rau na taciqu. Dua na ka na nodrau marau na noqu itubutubu kei na taciqu gone e yalodina voli ga ni keitou sa mai duavata vakavuvale ena neitou sokaloutaki Jiova.

KENA YAGA:

Au dau nanuma tu ni sa rui kaukaua tale na ivakavuvuli vakaivolatabu, ia au raica ena gauna qo nira itataqomaki yaga duadua. E uqeti au na iVolatabu meu muduka na noqu vakayagataka kei na noqu volitaka na wainimategaga, meu tamata yaga tale ga ena neitou itikotiko.

Dua dina na ka dokai na noqu mai maliwai ira na mataveitacini e vuravura raraba era qaravi Jiova. Era veilomani dina, ra qai duavata ena nodra qarava na Kalou. (Joni 13:​34, 35) Qori ga na vanua au kunea kina e dua na ka talei dina​—na watiqu o Adrianne, au dau lomana qai vakamareqeta vakalevu. Dua na ka na neirau marau ni keirau qarava vata na Dauveibuli.

Au sa sega tale ni muria na gagadre ca ni lomaqu, ena gauna qo au sa cakacaka vakaitalatala vakatabakidua, ena noqu vakavulici ira na tamata ena sala me yaga tale ga kina vei ira na Vosa ni Kalou. E vakamarautaki au vakalevu na cakacaka qo. Au rawa ni tukuna ena nuidei ni a veisautaka na noqu bula na iVolatabu. Qo ga na ka au kila ni na vakamarautaki au dina.