E Veisautaka na Bula na iVolatabu
NA CAVA a uqeta e dua na goneyalewa me lesuva na lotu a susugi kina? Wilika mada na ka e tukuna.
“Sa Qai Vakainaki na Noqu Bula.”—LISA ANDRÉ
SUCU: 1986
VANUA: LUXEMBOURG
KA E KILAI KINA: GONE CIDROI
NOQU BULA E LIU: Au susu e Bertrange, na tauni savasava volekata na siti o Luxembourg, e sega kina na basulawa qai vutuniyau. Au gone duadua vei keitou na lima na veitacini. Erau iVakadinadina i Jiova na noqu itubutubu, rau gumatua tale ga ni vakavulici keitou ena ivakavuvuli vaKarisito.
Au tekivu vakatitiqataka na veika era vakavuvulitaka na iVakadinadina i Jiova niu sa itabagone. Au sega ni kauai vakalevu kina e liu, ia e malumu tiko ga na noqu vakabauta ni toso na gauna. Erau saga vagumatua na noqu itubutubu me rau dusimaki au ena sala dodonu, ia au sega ni via ciqoma na nodrau veidusimaki. Erau sega ni kila na noqu itubutubu niu dau vakailala kei ira na gone era sega soti ni doka na veiliutaki. Au vinakata meu lewai au ga me vakataki ira na noqu ilala. Keimami dau pati, veiyacovi vakaveitalia, vakayagataka vakasivia na wainimate gaga kei na alakaolo. Ni se qai tekivu, au taleitaka meu tiko kei ira e vaka mera marautaka tu na bula.
Ia meu tukuna vakadodonu, au sega ni marau. Au vakila ni sega ni vakainaki na bula niu tu vata kei ira na noqu ilala, era sega ni bau vakasamataka vakabibi e dua na ka. Ia au kauai vakalevu ena veika ca e takalevu tu e vuravura. Ni toso na gauna, au sa qai lomabibi ga.
VEISAUTAKI AU NA IVOLATABU: Niu yabaki 17, e raica o tinaqu ena dua na siga na noqu lomabibi kei na noqu rarawa, mani tukuna meu vulica tale na iVolatabu. E uqeti au meu vulica na kena ivakavuvuli, meu qai vakatulewataka ga meu muria se sega. Neirau veivosaki vakadodonu qori e veisautaki au sara ga. Au mani vakadonuya me rau vakavulici au ena iVolatabu o Caroline na tuakaqu kei Akif na watina. A iVakadinadina i Jiova o Akif ni sa uabula, a sega ni tuberi kina ni se gone. E yaga na noqu kila na ivakarau ni bula i Akif e liu, niu rawa ni veivosaki kina vakadodonu kei koya.
Au kila ni noqu ivakarau ni bula e veicalati kei na nodra ivakarau ni bula na iVakadinadina, ia au dau nanuma tu ni veika au cakava ena sega ni tarai ira eso tale. Niu vulica na iVolatabu, au qai kila ni na vakamarautaki Jiova se vakararawataki koya na ka au cakava. (Same 78:40, 41; Vosa Vakaibalebale 27:11) E rawa ni tarai ira tale ga era tu wavoliti au.
Niu vulica tiko ga na iVolatabu, sa qai matata vei au na vuna meu vakabauta kina ni Vosa ni Kalou. Me kena ivakaraitaki, au vulica eso na parofisai vakaivolatabu era sa vakayacori—qai vakasakiti na kena donu vinaka. Na veika au kila qori e seavu kina na vakatitiqa a tu vei au e liu.
Ni oti e dua na yabaki noqu vuli iVolatabu, keitou gade kei rau na noqu itubutubu ina valenivolavola ni tabana ni iVakadinadina i Jiova mai Jamani e veiqaravi tiko kina o ganequ. E uqeti au sara ga noqu raica na nona mamarau. Oya sara ga na marau au vaqara voli! Au qoroi ira tale ga na iVakadinadina era veiqaravi tiko kina. Era duatani sara vei ira na noqu ilala era dau lawaki ra qai qara ga na lasa. Oti ga vakalailai, au masu vei Jiova mai vu ni lomaqu au qai yalataka niu na qaravi koya ena vo ni noqu bula. Au papitaiso niu yabaki 19 me ivakaraitaki ni noqu yalayala vei Jiova.
KENA YAGA: Sa qai vakainaki na noqu bula ena gauna qo. E vakavu marau noqu vakavulici ira tale eso ena iVolatabu, mera kila tale ga na veika me baleti Jiova kei na nona yalayala me baleta na veigauna se bera mai. E yaga tale ga qo vei ratou na noqu vuvale—eratou sa sega ni leqataki au me vaka e liu.
Au kila vinaka tu na noqu cala ena veigauna sa oti, ia au saga meu kua ni vakasamataka tiko ga. Meu dau vakasamataka ga na veivosoti i Jiova kei na nona lomani au. Au duavata ena ka e tukuni ena Vosa Vakaibalebale 10:22: “Na veivakalougatataki maivei Jiova sa ia na veivakavutuniyautaki, ka sa sega ni kuria ko koya e na ka rarawa.”
[Tikina bibi ena tabana e 12]
“Keimami dau pati, veiyacovi vakaveitalia, vakayagataka vakasivia na wainimate gaga kei na alakaolo”
[Tikina bibi ena tabana e 13]
“Au kila vinaka tu na noqu cala ena veigauna sa oti, ia au saga meu kua ni vakasamataka tiko ga”