Kua Vakadua ni Soro

Eso na irogo mai Igiladi ena vukei iko mo raica na vuna mo kua ni soro kina. O na kila tale ga na ka o rawa ni cakava ‘mo kaburaka kina e delaniwai na kemu madrai,’ se me rawa ni mana na nomu sasaga mo vukei ira era se sega ni ciqoma na ka dina.—Dauv. 11:1.

BIBI MO KUA NI SORO

E bibi dina mo kua ni soro, mo dei ena dina o qai qaravi Jiova tiko ga. (Vkru. 10:20) Qori sara ga na ka e cakava o Georgina. A katakata o Kyriacos na watina ena gauna e tekivu vulica kina na iVolatabu kei ira na iVakadinadina i Jiova o Georgina ena 1970. A saga o Kyriacos me tarova na vuli nei watina, a sega ni vakadonuya mera gole yani i vale na iVakadinadina qai kauta laivi na ivola kece ni iVakadinadina i Jiova e raica.

Sa qai katakata ga o Kyriacos ni sa tekivu lakova o Georgina na soqoni. A gole ena dua na siga ena Vale ni Soqoni me lai vaqara veiba. Ni raica rawa e dua na tacida yalewa ni vinaka cake na nona vosa vaKirisi o Kyriacos mai na nona vosa vakavalagi, a qirita kina e dua na tacida tagane ni Kirisi ena dua tale na ivavakoso me mai veivuke. A tarai Kyriacos sara ga na nona yalomalua na tacida tagane ya, rau mani vuli iVolatabu sara me vica na vula. Ia e muduka o Kyriacos na nona vuli.

A sega ni cegu na nona tusaqati o Georgina ena tolu na yabaki e tarava. A tukuna o Kyriacos ni na biuti koya ke papitaiso. Ena siga me papitaiso kina o Georgina, a masu vagumatua vei Jiova me kua ni biuti koya o Kyriacos. Nira gole yani na iVakadinadina mera lai kauti Georgina ina soqo cokovata, a tukuna vei ira o Kyriacos: “Ni liu yani. Keirau na muri yani ena neirau motoka.” A tiko ena porokaramu ena mataka, a raica tale ga na nona papitaiso o watina!

Ni toso na gauna, a malumu na nona veitusaqati o Kyriacos qai veisau vakalalai na nona ivakarau. Me tekivu mai na imatai ni gauna a sotavi ira kina na iVakadinadina, voleka ni oti e 40 na yabaki sa qai papitaiso na wati Georgina! Na cava e uqeti Kyriacos? E kaya: “Au marau sara ga ni sega ni bau soro o Georgina.” E tukuna o Georgina: “A dau tusaqati au o watiqu, ia au na qarava tiko ga na noqu Kalou. Au sega ni cegu na masu ena gauna qori, au sega tale ga ni soro.”

TALEI NA ITOVO VAKARISITO

Dua tale na ka ena vukei watimu, oya na nomu bucina na itovo vaKarisito. E vakasalataki ira na yalewa vakawati lotu vaKarisito na yapositolo o Pita: “Moni vakamalumalumu vei ira na dui watimuni, baleta ke ra sega ni talairawarawa ina vosa ni Kalou, ena rawa ni veisautaki ira na nomuni itovo, ke oni sega mada ga ni tukuna e dua na ka.” (1 Pita 3:1) A muria na ivakasala qori o Christine, dina ga ni qai veisau o watina ni oti e vica vata na yabaki. Ena gauna a mai iVakadinadina kina ena sivia na 20 na yabaki sa oti o Christine, a sega ni vakabauta o John na watina ni bula tiko na Kalou. A sega ni vinakata o John me lewena e dua na lotu, ia a raica rawa ni vakamareqeta dina o Christine na nona lotu vou. E kaya o John: “Au raica ni vakamarautaki koya, e vukei koya me kua ni dau soro totolo qai dei na yalona, qori e vukei au sara ga ena levu na ituvaki dredre.”

A sega vakadua ni togoraka o Christine na nona lotu vei watina. E tukuna o John: “Sa kila ga o Christine ena imatai ni gauna ni vinaka me kua ni tukuna vei au e dua na ka me baleta na nona lotu, qai dau vosovoso ena nona vakalaiva me qai vakatau ga vei au na gauna kei na sala meu qai vuli kina.” Ni dau raica o Christine ena Vale ni Vakatawa se Yadra! na ulutaga e kila ni na taleitaka o John, me vaka na saenisi se na veika bula, e dau vakaraitaka vua qai kaya, “Au kila ni o na taleitaka mo wilika qo.”

A cegu mai na nona cakacaka o John ni toso na gauna qai tekivu teitei. Ni sa levu na gauna me vakasamataka kina eso na taro bibi me baleta na bula, sa qai veinanuyaka o John, ‘A basika vakacalaka na tamata se tiko na inaki eda buli kina?’ A tarogi John ena dua na siga na tacida tagane erau veitalanoa tiko: “Vakacava mo vuli?” E tukuna o John: “Au ciqoma na nona veisureti niu sa qai vakabauta ni bula tiko na Kalou.”

A yaga dina na nona sega ni soro o Christine! A qai papitaiso o John ni oti e 20 na yabaki na nona masulaka tiko o Christine me ciqoma na ka dina. Erau sa gugumatua tiko qo ena qaravi Jiova. E tukuna o John: “E rua na ka e veisautaki au sara ga—na nodra yalovinaka kei na nodra dau veikauaitaki na iVakadinadina. Ni o vakawatitaka tale ga e dua na iVakadinadina i Jiova, ena yalodina, nuitaki, qai dau veinanumi o kemu isa.” Io, a muria sara ga o Christine na vosa e cavuti ena 1 Pita 3:1, qai tauca na kena yaga!

VUAVUAIVINAKA NA SORENITEI NI OTI E VICA NA YABAKI

Vakacava o ira na vuli iVolatabu e sa rairai seavu na nodra tataleitaki ena vuku ni ituvaki era sotava? A vola o Tui Solomomi: “E na mataka mo kaburaka na nomu sila, ia e na yakavi me kakua ni cegu na ligamu: ni ko sa sega ni kila se cava vei rau ena yaco, se na ka oqo se na ka ko ya, se na vinaka vakatautauvata ruarua.” (Dauv. 11:6) Ena so na gauna, ena taura toka e vica vata na yabaki me qai kadre na sore ni ka dina. Ke dina mada ga qori, ni toso na gauna ena rairai liaca e dua ni bibi me toro voleka vua na Kalou. (Jeme. 4:8) Io, dua na siga o na rairai kurabuitaka qai marautaka qori.

Vakasamataki Alice mada, a biubiu mai Idia qai toki i Igiladi. A tekivu vulica na iVolatabu ena 1974. E vosa vakaIdia, ia e via vakavinakataka na nona vosa vakavalagi. A toso tiko na vuli me vica na yabaki, sa bau tiko tale ga o Alice ena vica na soqoni ena ivavakoso vakavalagi. A kila ni dina na ka e vulica tiko, ia a sega ni raica sara vakabibi. A dau vinakata vakalevu na ilavo, qai dau taleitaka na lako ina pati. Ni toso na gauna, a muduka o Alice na nona vuli.

Sa voleka ni oti e 30 na yabaki, sa qai taura na ivola nei Alice o Stella erau dau vuli iVolatabu tu e liu. E volai tu kina: “Au kila ni o na marau ni sa papitaiso ena soqo ni tikina se qai oti ga qo na nomu vuli iVolatabu mai na 1974. Dua na ka talei o cakava ena noqu bula. O tea e lomaqu na sore ni ka dina, e sega ni yali mai na noqu vakasama kei na lomaqu na sore ni ka dina qori, dina ga ni se sega ni lomaqu ena gauna ya meu yalataki au vua na Kalou.”

Na cava mada a yaco? A tukuna o Alice ni lomabibi sara ga ena gauna e mate kina o watina ena 1997. A masu vua na Kalou. Ena loma ga ni tini na miniti, erau sikovi koya yani e rua na iVakadinadina erau vosa vakaPunjabi qai solia vua na tikidua Na Cava e Nodra iNuinui na Wekada Lomani Era sa Mate? A kila o Alice ni sa saumi na nona masu qai vakadeitaka me veitaratara kei ira na iVakadinadina i Jiova. Ia ena kunei ira e vei? A raica sara e dua na dairi makawa e volai tu kina na vanua a tukuna o Stella ni tiko kina na ivavakoso vakaPunjabi. A gole sara o Alice ina Vale ni Soqoni ra qai marautaki koya na mataveitacini era vosa vakaPunjabi. E tukuna o Alice: “Ena gauna mada ga au biubiu kina, au se vakila tu ga na loloma e vakaraitaki vei au qai vakacegui au qori ena noqu lomabibi.”

A wasoma sara na nona tiko ena soqoni, a vulica tale na iVolatabu, vulica na vosa vakaPunjabi, me taladrodro tale ga na nona wilika. A papitaiso ena 2003. Qo na itinitini ni nona ivola vei Stella: “Vinaka sara vakalevu na nomu tea na sorenitei ya ena 29 na yabaki sa oti, kei na ivakaraitaki vinaka o biuta toka meu vakatotomuria.”

“Vinaka sara vakalevu na nomu tea na sorenitei ya ena 29 na yabaki sa oti kei na ivakaraitaki vinaka o biuta toka meu vakatotomuria.”—Alice

Na cava o rawa ni vulica ena irogo kece qori? De dua ena sega ni totolo sara me vaka o namaka voli, ia ke via kila na Kalou e dua, e vu dina qori mai lomana qai yalomalumalumu, ena vakatubura e lomana o Jiova na ka dina. Vakasamataka na ka e tukuna o Jisu ena nona vosa vakatautauvata: “E sa kadre na itei qai tubu me levu, e sega ni kila [na dauteitei] se yaco vakacava. E vakavuna ga na qele me vua na itei. E tubu e liu na drauna, tarava na sena, qai muri sara na vuana.” (Mari. 4:27, 28) Na tubu qori ena taura toka na gauna, qai ‘vua ga vakataki koya.’ Na ivakavuvuli e tiko e keri, oya nida sega ni kila kece na daukacivaka na Matanitu ni Kalou na ka e rawa ni yaco. Koya gona, meda kakaburaki tiko ga vakalevu. De dua eda na qai tatamusuki vakalevu.

Kua ni guilecava na bibi ni masu. A sega ni cegu na nodrau masu vei Jiova o Georgina kei Christine. Ke o “gumatua ena masu” qai sega ni soro, ‘oti e vica na siga,’ o na rawa ni kunea tale na ‘madrai’ o kaburaka ena delaniwai.—Roma 12:12; Dauv. 11:1.