Yalo ni Veivakaduiduitaki—Sa Roboti Vuravura

A SUCU i Merika o Jonathan qai dau vakaduiduitaki ni se gone baleta ni kai Korea. Ni tubucake, a vinakata me gole ina dua na vanua ena sega ni vakaduiduitaki kina. A lai veiqaravi vakavuniwai ina dua na taoni ena vualiku kei Alaska, e Merika. A nanuma ni na sega ni vakaduiduitaki ena vanua qori ni tautauvata na kedra irairai.

Ia a sega ni yaco na ka e nanuma ena gauna a vakayacora kina e dua na veisele vua e dua na yalewa yabaki 25. Ni vakilai koya tale na marama qo, a vosa ca ni raici Jonathan, e vakaraitaka ni sega ni dau taleitaki ira na kai Korea. Na ituvaki rarawataki qori, e vakasamataka kina o Jonathan ni maumau wale na nona sasaga me drotaka na veivakaduiduitaki.

Na ka e sotava o Jonathan e vakaraitaka na ka sara ga e yaco tiko e vuravura, e laurai ni vanua ga era tiko kina na tamata e yaco kina na veivakaduiduitaki.

E levu era tukuna nira cata na veivakaduiduitaki, ia sa qai takalevu ga na itovo qori. E rawa vakacava ni takalevu e dua na ka e sega ni taleitaki? Baleta ni levu vei ira era cata na itovo qori, era sega ni kila nira vakayacora tiko. Vakacava o dau cakava tale ga qori?

KADRE E LOMADA

E dredre meda kidava ni sa kadre tiko e lomada na yalo ni veivakaduiduitaki. E tukuna na iVolatabu na vuna e yaco kina qori: “Sa ka dauveivakaisini duaduaga na yalo ni tamata.” (Jeremaia 17:9) Eda na rairai vakaisini keda tiko ga nida nanuma nida lomani ira na tamata kece, se da na rairai tukuna ni tiko na vuna vinaka eda dau raici ira vakatani kina eso na matatamata.

Raica mada qo e dua na vakatautauvata meda kila kina ni dau dredre meda kidava ni sa kadre tiko e lomada na yalo ni veivakaduiduitaki: O taubale duadua tiko e gaunisala ni sa buto. Rau torovi iko e rua na cauravou o sega ni kilai rau. O raica ni rau momoqaqa, dua vei rau e taura tiko e dua na ka.

Vakacava e dodonu mo lai nanuma sara ni rau na cakava vei iko e dua na ka? De dua o na qaqarauni ena gauna qo ni o a sotava e dua na ituvaki rerevaki ena gauna sa oti, ia e sega ni kena ibalebale qori ni rau tamata ca. Na taro bibi mo vakasamataka: Na matatamata cava o nanuma ni rau cavutu mai kina? Na nomu isaunitaro e rawa ni vakaraitaka ni sa kadre tiko e lomamu na yalo ni veivakaduiduitaki.

Ena so na gauna ena laurai vei keda na yalo ni veivakaduiduitaki. E vakamacalataki mada ga ena iVolatabu e dua na mataqali veivakaduiduitaki e takalevu: “Na tamata e yavutaka na nona vakatulewa ena kedra irairai eso tale.” (1 Samuela 16:​7, Contemporary English Version) Sa dau noda ivakarau tu ga qori, ia e dau tini ga ena leqa. E rawa vakacava meda valuta na yalo ni veivakaduiduitaki? Vakacava ena oti ena dua na gauna na veivakaduiduitaki?