Kemuni na Qase​—Oni na Vakacegui Ira Era “sa Oca”?

Dua na ka na nona lomaleqa o Angelaa e dua na tacida yalewa dawai yabaki 30 vakacaca. E waraki ratou toka na qase ni ivavakoso. Na cava eratou na tukuna vua? A sega ni tiko ena vica na soqoni, ni sa oca sara ga ena nona qaravi ira na itabaqase. Sa tu mada na lomaocaocataki ni bula ni veisiga, sa qai leqataka tale vakalevu na tauvimate i tinana.

Ke o sikova e dua e “oca” tu me vakataki Angela, o na vakayaloqaqataki koya vakacava? (Jere. 31:25) Ni bera qori, o na vakavakarau vinaka vakacava me rawa ni veivakacegui na nomu veivakatawani?

VAKASAMATAKA NA KEDRA ITUVAKI NA TACIMU

Eda dau oca kece ena noda cakacaka se nida qarava na itavi vakalou. Kena ivakaraitaki, e ‘oca’ na parofita o Taniela ena gauna a raivotu kina qai sega ni kila na kena ibalebale. (Tani. 8:27) A qai rairai vua na agilosi o Keperieli me vukei koya. A vakatakila na italai ni Kalou na ibalebale ni raivotu vei Taniela, a vakadeitaka vua ni sa rogoca o Jiova na nona masu, a tukuna tale ga ni se “tamata daulomani” tiko ga. (Tani. 9:​21-23) Ni oca na parofita qo ena dua tale na gauna, a tauca vua e dua tale na agilosi na vosa rogo vinaka me vakayaloqaqataki koya kina.​—Tani. 10:19.

Ni bera tale ga ni o sikova e dua na tacimu vakayalo e oca tu se yalolailai, vakasamataka vinaka mada na kena ituvaki. Na leqa cava e sotava tiko? E vakaocai koya tiko vakacava qori? Na itovo vinaka cava e dau vakaraitaka? E tukuna o Richard, sa sivia na 20 na yabaki na nona veiqaravi vaqase: “Au dau kauaitaka ga na ka era vinaka kina na taciqu.” E tomana: “Au na vakasamataka rawa na kedra ituvaki ni bera niu veisiko, au rawa ni kila na sala veiganiti meu vakayaloqaqataki ira kina.” Ke o gole vata kei na dua tale na qase, vakacava mo drau veivosakitaka na kena ituvaki na tacimudrau?

MO TOROVI RAWARAWA

O na vakadinata ni ka vakamadua meda dau talaucaka na lomada. Kena ivakaraitaki: Ena rairai dredre vua na tacimu me talaucaka na lomana vei ira na qase era sikovi koya. Ia na cava o rawa ni cakava? Ena yaga vakalevu ke o matadredredre qai cavuta eso na vosa ni veivakadeitaki. O Michael sa sivia na 40 na yabaki na nona veiqaravi vaqase, e dau tekivutaka na nona veisiko ena nona cavuta: “Kila, dua na ka e vinaka kina na itavi vaqase oya nida sikovi ira sara ga na tacida ena nodra dui vale, me keimami kilai ira vinaka tale ga. Oya na vuna au vakanamata kina ena veisiko qo.”

O na rairai nanuma me dua na masu ena itekitekivu ni veisiko. Ena nona masu na yapositolo o Paula, a veiganiti na nona cavuta na nodra vakabauta na tacina vakayalo, nodra loloma kei na nodra vosota. (1 Ces. 1:​2, 3) Ni o cavuta na itovo vinaka i tacimu, o sa vakarautaka sara tiko ga na lomana kei na lomamu ena veivosaki e yaga. Ena rawa ni veivakacegui tale ga na nomu vosa. E tukuna o Ryan e dua na qase matua: “Ena so na gauna eda sega ni dau vakasamataka na veika vinaka eda sa cakava tiko. Ni tukuna vei keda qori e dua, e dau veivakacegui sara ga.”

VOTA NA ISOLISOLI VAKAYALO

Me vakataki Paula, o rawa ni vota na “isolisoli vakayalo” ena nomu tukuna e dua na vakasama vakaivolatabu, mai na dua mada ga na tikinivolatabu. (Roma 1:11) Kena ivakaraitaki, ena rairai nanuma e dua na tacida e lomabibi ni tawayaga, me vaka ga na nona vakatauvatani koya na daunisame ina dua na ‘tavaya kulinimanumanu e saqoqo ena kubou.’ (Same 119:​83, 176) Ni o vakamacalataka vakalekaleka na matavosa qori, o rawa ni tukuna ena nuidei ni “sega ni guilecava” o tacimu na ivakaro ni Kalou.

Na vosa vakatautauvata tale ga me baleta na ilavo siliva a yali ena rawa ni uqeti koya na tacida yalewa e sa ciri tani mai na ivavakoso se sa malumu vakayalo. (Luke 15:​8-10) Na ilavo e yali qori a rairai dua vei ira na ilavo siliva era tui vata me dua na itaube talei. Ni o vakamacalataka na vosa vakatautauvata qori, ena liaca na tacida yalewa ni ka talei ena ivavakoso vaKarisito. Ni o vakamacalataka oti qori, o rawa ni vakabibitaka na levu ni nona kauaitaki koya o Jiova me vaka ga e dua na nona sipi lailai.

Era dau marautaka na tacida mera vakamacalataka na iVolatabu. Kua gona ni vosa tu ga! Ni o wilika oti e dua na tikinivolatabu e ganita na kedra ituvaki, o rawa ni kauta cake mai e dua na vosa bibi se matavosa qai kerea mera vakamacala kina. Kena ivakaraitaki, ni wiliki oti na 2 Korinica 4:​16, e rawa ni taroga e dua na qase: “Bau so na sala o vakadinata kina na nona vakavoui iko o Jiova?” Ni caka qori e rawa ni “veivakayaloqaqataki” dina na veivosaki.​—Roma 1:12.

O rawa ni vakaceguya e dua na tacimu vakayalo ena nomu vakamacalataka e dua na italanoa vakaivolatabu e kila vinaka. Ke dua e yalolailai, e rawa ni vakamacalataki vua na italanoa kei Ana se Epafirotaito, erau lomabibi ena so na gauna ia erau ka talei tu ga vua na Kalou. (1 Sam. 1:​9-11, 20; Fpai. 2:​25-30) Ke rawa, vakacava mo vakamacalataka eso na ivakaraitaki vinaka ena iVolatabu?

VAKADEITAKA MO VEIVOSAKI TALE KEI IRA

O rawa ni vakaraitaka na nomu kauaitaki ira dina na tacimu vakayalo ena nomu veivosaki tale kei ira ni oti na veisiko. (Caka. 15:36) Ni vakarau cava na nomu veisiko, ena vinaka mo tuvanaka mo drau cakacaka vakavunau vata. Ni sotavi ira tale na mataveitacini a sikova o Bernard e dua na qase matua, ena rairai taroga vakamaqosa: “Vakacava e bau yaga na ivakasala ya?” Ni o kauaitaki ira va qori, o na kila kina ke gadrevi tale na veivuke.

Sa qai bibi ga vakalevu mera karoni, kauaitaki qai lomani na tacida. (1 Ces. 5:11) Ni bera gona ni o veivakatawani, vakasamataka vinaka na kena ituvaki o tacimu qai masulaka. Digia na tikinivolatabu e veiganiti. O na qai kila na vosa matau mo vakacegui koya kina e “oca”!