Marautaka na Veivakadreti i Jiova

‘Au sa taura na nomuni veivakadreti me noqu ivotavota tawamudu.’​—SAME 119:111.

O NA SAUMA VAKACAVA?

Na cava eda marautaka kina na veivakadreti i Jiova?

Eda na nuitaki Jiova tiko ga vakacava?

Na cava e bibi kina meda ogaoga tiko ga ena veika e baleta na Matanitu ni Kalou?

1. (a) Eda dau ciqoma vakacava na veivakadreti, cava na vuna? (b) Ke tiko vei keda na viavialevu, ena vakaleqa vakacava na noda ciqoma na ivakasala?

E DUIDUI na sala eda dau ciqoma kina na ivakasala. Ke veivakadreti e dua e tu vua na lewa, ena rawa ni ciqomi ena yalovinaka. Ia ni veivakasalataki e dua eda tabavata se tamata wale eda na rairai sega ni ciqoma. E duidui tale ga na ka eda dau vakila ni vakasalataki keda e dua. Eda na rairai lomabibi, rarawa, madua se da uqeti meda cakava kina e dua na ka, da qai saga sara meda veisau. Na cava e duidui kina na noda dau ciqoma na veivakadreti? Dua oya na viavialevu. Na yaloviavialevu e rawa ni vakaleqa na nona vakatulewa e dua, vakavuna me sega ni ciqoma na ivakasala, ena sega tale ga ni vakila na kena yaga.​—Vkai. 16:18.

2. Na cava era marautaka kina na lotu vaKarisito dina na ivakasala mai na Vosa ni Kalou?

² Ena yasana adua, era marautaka na lotu vaKarisito dina na ivakasala yaga, vakabibi ke yavutaki ena Vosa ni Kalou. E vakavukui keda na veivakadreti i Jiova, e veivakavulici qai vukei keda meda qarauna eso na dai me vaka na domodomoiyau, veiyacovi tawadodonu, vakayagataki ni wainimategaga kei na gunu vakasivia. (Vkai. 20:1; 2 Kor. 7:1; 1 Ces. 4:​3-5; 1 Tim. 6:​6-11) Eda marautaka tale ga na ‘vinaka ni lomada’ e vu mai ena noda muria na veivakadreti ni Kalou.​—Aisea 65:14.

3. Na cava eda rawa ni vakatotomuria vua na daunisame?

³ Me rawa nida taqomaka na noda veiwekani talei kei na Tamada vakalomalagi, ena vinakati meda muria tiko ga na ivakasala yaga i Jiova ena noda bula. Sa na bau totoka dina ke da vakatotomuri koya na daunisame, a vola: ‘Au sa taura na nomuni veivakadreti me noqu ivotavota tawamudu: Nira ka ni marau e lomaqu.’ (Same 119:111) Vakacava eda dau marautaka tale ga na ivunau i Jiova, se da dau raica ena so gauna me icolacola bibi? Ke da sega ni taleitaka ena so na gauna na ivakasala e tau vei keda, me kua ni vakayalolailaitaki keda qori. E rawa nida bucina meda nuitaka vakaoti na vuku uasivi i Jiova! Meda dikeva mada qo e tolu na sala.

ME VAKANUIDEITAKI IKO NOMU MASU

4. Na cava e sega vakadua ni veisau ena bula i Tevita?

⁴ E levu na ka marautaki a sotava o Tui Tevita, levu tale ga na ituvaki dredre a sotava, ia e nuitaka tiko ga vakatabakidua na Dauveibuli. E kaya: “Kivei kemuni, Jiova, ka’u sa vagolea cake na yaloqu. Noqu Kalou, ka’u sa vakararavi vei kemuni.” (Same 25:​1, 2) A rawa vakacava vei Tevita me nuitaka va qori na Tamana vakalomalagi?

5, 6. Na cava e tukuni ena Vosa ni Kalou me baleta nodrau veiwekani o Tevita kei Jiova?

⁵ Levu era masuta na Kalou ena gauna ga era sotava kina na leqa. Vakacava ke dua nomu itokani se wekamu e dau vosa ga vei iko ena gauna e vinakata kina na ilavo se gauna e vinakata kina na veivuke? Ni toso na gauna, de dua o na vaqaqa na inaki ni nona dau vosa vei iko. Ia e sega ni va qori o Tevita. Na nona veiwekani kei Jiova e laurai sara ga ena nona vakabauta kei na nona lomana na Kalou ena nona bula kece​—gauna vinaka se gauna ca.​—Same 40:8.

⁶ Raica mada na vosa ni veivakacaucautaki kei na vakavinavinaka e tauca o Tevita vei Jiova: “I Jiova na neimami Turaga, a ka talei vakaidina nai rogo ni yacamuni e vuravura taucoko! O ni sa vakaraitaka na nomuni lagilagi mai lomalagi ecake.” (Same 8:1) Vakacava o raica rawa e keri na nodrau veivolekati o Tevita kei na Tamana vakalomalagi? Na levu ni nona doka o Tevita na lagilagi kei na cecere i Jiova, e uqeti koya sara ga me vakacaucautaki koya “e na veisiga kece ka bogi.”​—Same 35:28.

7. E yaga vakacava na noda toro voleka vua na Kalou ena masu?

⁷ Me vakataki Tevita ga, e dodonu meda veivosaki wasoma kei Jiova me rawa nida nuitaki koya kina vakalevu. E tukuna na iVolatabu: “Toro voleka yani vua na Kalou ena qai toro voleka mai vei kemuni.” (Jeme. 4:8) Na noda dau toro voleka vua na Kalou ena masu e dua tale ga na sala eda na rawata kina na yalo tabu.​—Wilika 1 Joni 3:22.

8. Na cava meda qarauna kina me kua ni dau dua tu ga na ivakarau ni noda masu?

⁸ Ni o masu, vakacava e dau dua tu ga na qaqanimasu o cavuta? Ke va qori, ena vinaka mo vakasamataka mada na ka o na via cavuta ni bera ni o masu. Kaya mada ke o veivosaki kei na dua nomu itokani se wekamu, vakacava ena marautaka ke dua tu ga na matavosa o vakayagataka? De dua sa na sega ni via rogoci iko. Eda kila ni o Jiova ena rogoca tu ga na nodra masu na nona tamata yalodina. Ia meda qarauna me kua ni dua tu ga na ivakarau ni noda dau veivosaki kei koya.

9, 10. (a) Na cava meda masulaka? (b) Na cava ena vukei keda meda cabora na masu e vu mai lomada?

⁹ Ke da via toro voleka vua na Kalou ena sega ni caka tu ga me rawa na noda masu. Na levu ga ni noda talaucaka na lomada vei Jiova, eda na volekati koya kina, eda na nuitaki koya tale ga vakalevu. Ia na cava meda masulaka? E sauma na Vosa ni Kalou: “Na ka kece me vakaraitaki vua na Kalou ena masu kei na kerekere salavata kei na vakavinavinaka.” (Fpai. 4:6) Kena ibalebale, meda masulaka na ka kece e vauca na noda bula se na noda veiwekani kei na Kalou.

¹⁰ Ena yaga vakalevu noda dikeva na nodra qaqanimasu na tagane kei na yalewa yalodina e volatukutukutaki ena iVolatabu. (1 Sam. 1:​10, 11; Caka. 4:​24-31) E volatukutukutaki ena Same e levu na masu e cavuti ena yalomalumalumu, e tiko tale ga kina na sere ni vakacaucau vei Jiova. E vakavotui ena masu kei na sere qori na ivakarau ni yalo ni tamata, me vaka na rarawa kei na marau. Na noda dikeva na nodra qaqanimasu na dausokalou yalodina e rawa ni vukei keda me vakaibalebale na noda masu vei Jiova.

VAKASAMATAKA VAKATITOBU NA VEIVAKADRETI NI KALOU

11. Na cava meda vakasamataka kina vakatitobu na ivakasala ni Kalou?

¹¹ E tukuna o Tevita: “Sa dina nai tukutuku [“veivakadreti,” NW] i Jiova, ka sa vakavukui ira era sa sega ni vuku.” (Same 19:7) Io, ke lailai mada ga na ka eda kila, e rawa nida vuku nida talairawarawa ina ivakaro ni Kalou. Eso na ivakasala vakaivolatabu ena vinakati meda vakasamataka vakatitobu me rawa ni yaga vei keda. Vakabibi ena ka e vauca na vakatovolei ni noda yalodina e koronivuli se vanua ni cakacaka, noda tokona na ivakatagedegede ni Kalou me baleta na dra, noda sega ni veitovaki, kei na noda muria na ivakasala vakaivolatabu me baleta na isulusulu kei na sasauni. Nida vakasamataka vakatitobu na rai ni Kalou, ena vakarautaki keda ena ituvaki va qori. Sa na qai rawa meda vakatulewataka na ka meda cakava ni basika eso na ituvaki. Na noda vakarautaki keda va qori ena vukei keda meda kua ni cakava na ka eda na rarawa kina.​—Vkai. 15:28.

12. Na cava meda dau vakasamataka me rawa nida muria na veivakadreti ni Kalou?

¹² Nida waraka tiko na vakayacori ni vosa ni yalayala ni Kalou, vakacava e laurai ena noda bula nida yadra tiko vakayalo? Kena ivakaraitaki, eda vakabauta dina ni sa na vakarau vakarusai o Papiloni na Ka Levu? Vakacava na veivakalougatataki e se bera mai, me vaka na bula tawamudu ena vuravura parataisi, e sa qai kaukaua ga noda vakabauta qori ni vakatauvatani kei na imatai ni gauna eda se qai vulica kina? Eda se gumatua tiko ga ena cakacaka vakaitalatala, se da vakaliuca ena noda bula na veika ga me baleti keda? Vakacava na inuinui ni veivakaturi, na vakalagilagi ni yaca i Jiova, kei na vakacerecerei ni nona veiliutaki? E se bibi tiko ga qori ena noda bula? Noda vakasamataka vakatitobu na taro qori ena vukei keda meda vakatotomuria na daunisame ena nona kaya, muria na ‘veivakadreti ni Kalou me nomu ivotavota tawamudu.’​—Same 119:111.

13. Na cava e sega kina ni matata vei ira na lotu vaKarisito taumada eso na ka e tukuna na iVolatabu? Tukuna e dua na kena ivakaraitaki.

¹³ Eso na ka e volai ena iVolatabu ena rairai sega ni matata vei keda baleta ni se sega ni kena gauna me vakamatatataka kina o Jiova. Kena ivakaraitaki, e tukuna vakavica o Jisu vei ratou na nona yapositolo ni na vakararawataki qai vakamatei. (Wilika Maciu 12:40; 16:21.) Ia e sega ni matata vei ratou na kena ibalebale. Sa qai matata ga qori ena gauna sa mate kina qai vakaturi, ena nona rairai vei ira na nona tisaipeli qai “vakararamataka na lomadra mera kila na ibalebale ni iVolatabu.” (Luke 24:​44-46; Caka.1:3) Ena gauna e sobuti ira kina na imuri i Karisito na yalo tabu ena Penitiko 33 S.K., sa qai matata vei ira ni na veiliutaki e lomalagi na Matanitu ni Kalou.​—Caka.1:​6-8.

14. Ena itekitekivu ni ika20 ni senitiuri, era ivakaraitaki vinaka vakacava e levu na tacida?

¹⁴ E va tale ga qori ena itekitekivu ni ika20 ni senitiuri, a sega ni yaco e levu na ka era namaka voli na lotu vaKarisito dina me baleta na “iotioti ni veisiga.” (2 Tim. 3:1) Kena ivakaraitaki, ena 1914 eso era nanuma ni sa voleka mera gole i lomalagi. Ni sega ni yaco na ka era namaka voli, era yalomalumalumu ni dikeva tale na iVolatabu e levu na lotu vaKarisito, sa qai matata kina ni tiko e dua na cakacaka vakaitamera me vakayacori, oya me vunautaki na itukutuku vinaka. (Mari. 13:10) A liutaka o J. F. Rutherford ena 1922 na cakacaka vakavunau, a tukuna gona vei ira na tiko ena soqo ni tikina mai Cedar Point, Ohio, Merika: “Sa veiliutaki na Tui! Oni na tukuni koya yani e veivanua. Koya gona kacivaka, kacivaka, kacivaka, na Tui kei na nona matanitu.” Me tekivu mai na gauna qori, na kena kacivaki na “itukutuku vinaka ni matanitu ni Kalou” e kedra ivakatakilakila na dauveiqaravi ni Kalou nikua.​—Maciu 4:23; 24:14.

15. Ena yaga vakacava vei keda noda vakasamataka vakatitobu na ka e dau cakava o Jiova vei ira na nona tamata?

¹⁵ Nida vakasamataka vakatitobu na veika totoka e cakava o Jiova vei ira na nona tamata ena gauna sa oti kei na gauna qo, eda na nuitaki koya kina vakalevu ni na rawa ni vakayacora na lomana kei na nona inaki ena veigauna e se bera mai. Ena gauna vata qori, e vukei keda na veivakadreti i Jiova me dei tiko ena noda vakasama kei na lomada na nona parofisai se bera ni vakayacori. Eda nuidei ni noda cakava qori eda na nuitaka tiko ga kina na nona yalayala.

ME VAKANUIDEITAKI IKO NA NOMU SOKALOU

16. Nida ogaoga tiko ga ena cakacaka vakaitalatala, eda na vakalougatataki vakacava?

¹⁶ E Kalou kaukaua o Jiova, e dau cakacaka tale ga. E taroga na daunisame: “O cei sa kaukauwa me vakataki kemuni, Jiova.” E tomana: “Sa kaukauwa na ligamuni, sa cecere na ligamuni matau.” (Same 89:​8, 13) O Jiova tale ga e marautaka qai vakalougatataka na sasaga eda cakava meda tokona kina na Matanitu ni Kalou. E vinakata mera kua ni mokusiga na nona dauveiqaravi, mera kua ni kania na “kakana ni vucesa” se ra tagane se yalewa, gone se qase. (Vkai. 31:27) Nida ogaoga ena cakacaka vakalou, eda sa vakatotomuria tiko na Dauveibuli. Ena vakamarautaki keda na noda qaravi Jiova mai vu ni lomada, ena marautaka tale ga na Kalou me vakalougatataka na noda cakacaka vakaitalatala.​—Wilika Same 62:12.

17, 18. Nida muria na veidusimaki i Jiova, ena vaqaqacotaka vakacava na noda nuitaki koya? Tukuna e dua na kena ivakaraitaki.

¹⁷ Ena vukei keda vakacava na noda dau yalodina meda nuitaki Jiova kina vakalevu? Vakasamataka mada na kedra italanoa na Isireli nira curuma na Vanua Yalataki. O Jiova a vakaroti ira na bete era colata tiko na kato ni veiyalayalati mera takosova na uciwai na Joritani. Ia nira volekata na uciwai na Isireli, era raica ni waluvu qai kui sara tu ga na wai ni se qai tau oti ga na uca ni vulaitubutubu. Na cava era na cakava? Vakacava era na birika na nodra valelaca ena yasa ni uciwai mera wawa toka me vica na macawa se sivia me qai suka na wai? Sega, era nuitaki Jiova vakatabakidua ra qai muria na nona veidusimaki. Na cava e qai yaco? E tukuna na iVolatabu: “Ni tara ga na yavadra na bete na wai, e sega tale ni qai drodro na uciwai, . . . sa ra qai duri tu na bete ena lomadonu ni uciwai mamaca volekati Jeriko, me rawa nira takoso na kena vo.” (Josua 3:​12-17, Contemporary English Version) Raitayaloyalotaka mada na nodra qoroya na Isireli na kena sa tu vakadua vakasauri na uciwai kaukaua ya! Io, nira nuitaka na Isireli na veidusimaki i Jiova e vaqaqacotaka dina na nodra vakabauti koya.

¹⁸ Nikua, sa sega ni cakava o Jiova na cakamana va qori vei ira nona tamata, ia e vakalougatataka na nodra vakabauta. Na yalo tabu ni Kalou e vakaukauataki ira mera vakayacora na nodra ilesilesi mera vunautaka na itukutuku vinaka ni Matanitu e vuravura raraba. A vakadeitaka tale ga vei ira na nona tisaipeli o Jisu Karisito na iVakadinadina uasivi duadua i Jiova, ni na tokoni ira ena cakacaka bibi qori: “O koya gona, ni lako moni vakavulici ira na lewe ni veivanua kece . . . au na tiko vata kei kemuni me yacova na ivakataotioti ni veika vakavuravura.” (Maciu 28:​19, 20) Levu na iVakadinadina era dau mamadua se rerere, ia era vakadinadinataka ni vakadoudoutaki ira na yalo tabu ni Kalou mera vosa vei ira era se qai sotava vakadua ena cakacaka vakavunau.​—Wilika Same 119:46; 2 Korinica 4:7.

19. Ke mani vakaiyalayala na ka eda rawata, na cava eda nuidei kina?

¹⁹ Eso na mataveitacini e vakaiyalayala ga na ka era rawata ena vuku ni tauvimate se bula vaqase. Ia era nuidei ni kila vinaka tu na kedra ituvaki yadua na lotu vaKarisito “na Tama ni yalololoma, na Kalou e dau vakacegui keda ena ka kece ga.” (2 Kor. 1:3) E marautaka na ka kece eda cakava meda tokona kina na veika e vauca na Matanitu ni Kalou. Meda nanuma tiko ni noda vakabulai e vakatau vakalevu ena noda vakabauta na isoro i Karisito, nida cakava tiko na ka kece eda rawata me vakatau ena keda ituvaki.​—Iper. 10:39.

20, 21. Na cava eso na sala eda rawa ni vakaraitaka kina na noda nuitaki Jiova?

²⁰ Na noda sokalou e okati kina noda vakayagataka noda gauna, igu, kei na noda iyau ena kena levu e rawa. Io, eda vinakata meda ‘cakava na itavi vakaitalatala’ mai vu ni lomada. (2 Tim. 4:5) Eda marautaka meda cakava qori baleta ni na rawa kina vei ira na so tale mera mai “kila tale ga na ka dina.” (1 Tim. 2:4) Macala gona, ni noda doka kei na noda vakalagilagi Jiova ena vakavutuniyautaki keda vakayalo. (Vkai. 10:22) Ena vukei keda tale ga meda nuitaka vakatabakidua na Dauveibuli.​—Roma 8:​35-39.

²¹ Eda sa veivosakitaka mai ni sega nida tu tu ga meda nuitaka na veidusimaki vakasakiti i Jiova, ena vinakati kina na sasaga. Koya gona, mo nuitaki Jiova ena nomu dau masu. Vakasamataka vakatitobu na sala a cakava kina na nona inaki ena veigauna sa oti kei na ka ena cakava ena veigauna e se bera mai. Mo nuitaki koya tiko ga vakalevu ena veika e vauca nomu sokalou. Io, na veivakadreti i Jiova ena sega ni mudu rawa. Ke o muria gona na veivakadreti qori, o na rawa ni bula tawamudu!

[iYaloyalo ena tabana e 12]

[iYaloyalo ena tabana e 15]

Vakacava, o na nuidei tale ga me vakataki ira na tamata ni Kalou ena gauna i Josua? (Raica na parakaravu 17, 18)