Vakabauta ena 100 na Yabaki sa Oti

ENA yabaki qo sa na yabaki 100 kina na “Photo-Drama of Creation.” Qo e dua na iyaloyalo yavala e vakasakiti na kena caka, e kena inaki me vakabauti ni Vosa ni Kalou na iVolatabu. E vakaluluqataka sara ga nodra vakabauta e levu na kena takalevu ena gauna ya na vakabauti ni bula vakaidewadewa, vakalewai na iVolatabu, kei na vakatitiqa, ia na “Photo-Drama” e sakitaka ni o Jiova ga na Dauveibuli.

A liutaki ira tiko na Gonevuli ni iVolatabu o Charles T. Russell. E sega ni cegu me qara na iwalewale totolo qai veilauti duadua me vakatetei kina na ka dina mai na iVolatabu. Era sa vakayagataka tiko vakalevu na Gonevuli ni iVolatabu na ivola e tabaki ena sivia na 30 na yabaki. Ia e dreta sara ga na matadra e dua tale na iwalewale​—na iyaloyalo yavala.

VAKATETEI NA KOSIPELI ENA IYALOYALO YAVALA

Sa dau vakaraitaki voli na iyaloyalo yavala ena veiyabaki ni 1890, ia e sega ga ni rogoci rawa. Ena itekitekivu ni 1903, a vakaraitaki e dua na iyaloyalo ni lotu ena dua na valenilotu ena siti o Niu Yoka. Kena ibalebale, ena gauna a tekivu vakarautaka kina o Russell na “Photo-Drama” ena 1912, e se ka vou sara tu ga ena gauna qori na iyaloyalo yavala. A kila o Russell ni qo ga na sala e rawa ni vakamacalataki vinaka sara ga kina na ka dina ni iVolatabu ni vakatauvatani kei na ivola e dau tabaki.

E walu na aua na balavu ni iyaloyalo na “Photo-Drama.” E dau va na kena iwasewase, e tiko kina e 96 na ivunau vakaivolatabu leleka, e vakamacala kina e dua na dauvunau kilai levu ena gauna ya. E dau vakayagataki tale ga kina na ivakatagi malumu. Era vakayagataka na qaramavoni na kenadau me vakatagitaki na rorogo ni domo kei na sere me lakolako vata kei na itaba, vaka kina na italanoa vakaivolatabu e dramataki.

E levu na iyaloyalo kei na iyaloyalo veicavuyaki e tabaki ena iloilo (glass slide) era kau mai ena vanua e dau caka kina na iyaloyalo. Era droinitaka o ira na kenadau mai Philadelphia, Niu Yoka, Parisi, kei Lodoni na itaba ena iloilo kei na vica vata na filimu e vakayagataki ena iyaloyalo. Era droini tale ga na timi era lewena na Bethel’s Art Room, vakalevu ga mera vakaisosomitaka na iloilo e vakacacani. Me ikuri ni filimu era vakarautaka na kenadau, era tabaki tale ga na lewe ni vuvale e Peceli mera laurai ena “Photo-Drama” nira matanataka na ka e cakava o Eparama, Aisake kei na agilosi a tarovi Eparama me vakacabori luvena.​​—Vkte. 22:​9-​12.

E tukuna e dua na itokani i Brother Russell vei ira na dauvolaitukutuku, ni iwalewale qo e rawa ni vakavuna mera “kauaitaka na iVolatabu e vica vata na udolu na lewenivanua, qai sega ni dua na sasaga vakalotu e caka ena veigauna sa oti me sivia na kena qo.” Vakacava era na marautaka na iliuliu ni lotu na sasaga va qori, oya mera vakani na lewe vuqa era walokai tu vakayalo? Kena veibasai ga, era vakalewa na italatala ni Lotu ni Veivanua Vakarisito na “Photo-Drama,” eso mada ga era vakayagataka na iwalewale vuni se laurai e matanalevu nodra saga me kua nira sarava na lewenivanua na iyaloyalo. Ena dua na vanua a caka kina na “Photo-Drama” era bokoca na livaliva eso na italatala.

Ia era osota yani na vanua ni sarasara na lewenivanua mera raica na “Photo-Drama,” e sega ni saumi. E veisiga, ena vakaraitaki na “Photo-Drama” ena 80 na siti e Merika. Era qoroya e levu na sarasara ni qori e imatai ni ‘iyaloyalo e rogo sara ga kina na veivosaki.’ Ni vakayagataki na itaba e porokaramutaki me rawa ni tabaka e dua na ka ena dua na gauna balavu, e rawa kina ni saravi na nona saulaki tiko e dua na luve ni toa kei na totoka ni kena se mai e dua na senikau me yacova ni sa lai seraka mai na kena totoka. Na itukutuku vakasaenisi e tabaki ena gauna ya, e vakaraitaka na vakatubuqoroqoro ni vuku i Jiova. Me vaka ga e vakaraitaki ena itekitekivu ni ulutaga qo, ni se qai tekivu saravi na “Photo-Drama,” e tukuna e dua me baleta nona vosa tiko ena iyaloyalo o Brother Russell: “E vaka ga e duri dina tu e matada o Brother Russell!”

NA CAVUIKALAWA LEVU ENA VEIVAKAVULICI VAKAIVOLATABU

E kaya me baleta na “Photo-Drama” o Tim Dirks e dua na dauvolaivola, e dauvolaitukutuku makawa tale ga ni iyaloyalo: “[E] imatai ni iyaloyalo me lakovata kei na rorogo, e yavala, qai tiko na itaba ena iloilo e dau veicavuyaki, e rokataki vinaka tale tu ga.” O ira na iyaloyalo era vakaraitaki ni bera na “Photo-Drama” era vakayagataka eso ga na iwalewale qori ena gauna e vakaraitaki kina e dua taucoko na iyaloyalo, vakabibi ke vakaraitaki kina na usutu vakaivolatabu. E rauta ni ciwa na milioni na lewenivanua era sarava na “Photo-Drama” ena imatai ni yabaki, qori mai Noca Amerika, Urope, Ositerelia, kei Niu Siladi!

A vakaraitaki ena imatai ni gauna na “Photo-Drama” ena ika11 ni Janueri 1914, ena siti o Niu Yoka. Ni oti ga e vitu na vula a cabolo sara na iMatai ni iValu Levu. Ia era gole tiko ga vakalewe levu na lewenivanua mera lai raica na “Photo-Drama,” e vakacegui ira na nodra sarava na veivakalougatataki ena kauta mai na Matanitu ni Kalou. Se mani cava e tukuni me baleta na 1914, eda kila ga ni a vakasakiti dina ena gauna ya na “Photo-Drama.”