“Vakaraica na Lagilagi i Jiova”

E rawa ni tarai keda sara ga vakaca na ituvaki leqataki eda sotava. Eda na lai vakasamataka vakalevu, vakamalumalumutaki keda, e rawa tale ga ni veisautaka noda rai me baleta na bula. E levu na ituvaki dredre a sotava o Tui Tevita, e tarai koya sara ga vakaca. Ia e valuta vakacava? E sauma ena nona lagata e dua na same vakaciriloloma: “Au a tagi vei Jiova e na domoqu; ia e na domoqu ka’u a vakamamasu vei Jiova. Au a sova e matana na noqu tagi; au a vakatakila e matana na noqu rarawa. Ni sa luvu e lomaqu na yaloqu, ko ni a kila na noqui lakolako.” Io, e masu ena yalomalumalumu o Tevita me kerea na veivuke ni Kalou.​—Same 142:​1-3.

E lagata o Tevita ena dua tale na same: “E dua na ka ka’u sa gadreva vei Jiova, oqori ga ka’u na segata tiko; Me’u tiko e na vale i Jiova e na veisiga kecega ni noqu bula, Me’u vakaraica na lagilagi i Jiova, ka [vakavinavinaka] tiko e na nona vale ni soro.” (Same 27:4) O Tevita e sega ni Livai, ia raitayaloyalotaka mada ni sa duri tu ena taudaku ni itikotiko tabu volekata na valeniveitavaki, qori na vanua sara ga e dau caka kina na sokalou dina. Ena levu ni nona vakavinavinaka o Tevita, e vinakata sara ga me tu ga e kea e veisiga me “vakaraica na lagilagi i Jiova.”

Na vosa “lagilagi” e sema tiko ena dua na ituvaki se ivakarau ni yalo e “taleitaki se vinaka ina vakasama, na lomada kei na ka eda vakila.” E dau vakavinavinakataka o Tevita na ituvatuva ni Kalou me baleta na sokalou. Eda na rairai taroga, ‘E tiko tale ga vei au na rai i Tevita?’

‘VAKAVINAVINAKATAKA’ NA ITUVATUVA NI KALOU

Nikua, na ituvatuva e vakarautaka o Jiova meda torovi koya kina e sega ni vakatautaki ena vale e tara na tamata. Ia e rawati qori ena valenisoro levu vakayalo​—na ituvatuva tabu ni sokalou dina.a Ke da ‘vakavinavinakataka tiko’ na ituvatuva qo, eda rawa tale ga ni “vakaraica na lagilagi i Jiova.”

Vakasamataka mada na icabocabonisoro kama e tu ena mata ni katuba ni valeniveitavaki. (Lako 38:​1, 2; 40:6) Na icabocabonisoro ya e vakatayaloyalotaka na nona tu vakarau na Kalou me ciqoma na bula vakatamata i Jisu me isoro. (Iper. 10:​5-10) Vakasamataka mada se vakaibalebale vakacava ya vei keda! E vola na yapositolo o Paula: “Eda a veimecaki tu kei na Kalou, ia eda sa mai veiyaloni kei koya ena mate i Luvena. Ia qo nida sa veiyaloni kei na Kalou, eda sa rawa ni nuidei nida na vakabulai, baleta ni sa bula tiko o koya.” (Roma 5:10) Nida cakacakataka noda vakabauta na dra vakadavei i Jisu, eda na rawa ni marautaka na veivakadonui ni Kalou kei na nona veinuitaki nida nona itokani. Ni yaco ya, eda na ‘veitokani voleka kei Jiova.’​—Same 25:14.

Ena gauna sa “bokoci kina [noda] ivalavala ca,” eda sa mai vakila “na gauna ni veivakabulabulataki” i Jiova. (Caka. 3:19) E tautauvata na keda ituvaki kei na dua na kaivesu e totogi mate. E rarawataka dina na nona ivalavala e liu qai cakava na veiveisau ena nona bula. Ni raica na veisau qo e dua na turaganilewa yalololoma e tarai koya sara ga, mani vakatulewataka me bokoca nona cala na kaivesu qai sereki koya mai na nona itotogi mate. E lutu sara ga nona icegu na kaivesu qai dua na ka nona marau! Me vaka na turaganilewa ya, o Jiova e vakadonui ira era veivutuni qai bokoca na kedra itotogi mate.

MARAUTAKA NA SOKALOU DINA

A raica o Tevita na ka e dau caka ena vale i Jiova, qori nodra soqoni yani vakalewe levu na nona itokani Isireli, na wiliki kei na vakamacalataki ni Lawa e matanalevu, vakamai ni ka boi vinaka kei na nodra veiqaravi tabu na bete kei na Livai. (Lako 30:​34-38; Tiko 3:​5-8; Vkru. 31:​9-12) Na ivakatakilakila ni sokalou dina va qo e laurai tale ga ena gauna qo.

Nikua, me vaka ena gauna sa oti, e laurai “na kena yaga kei na kena matavinaka, ni ra sa tiko vakayalovata na veiwekani!” (Same 133:1) E laurai ni tubu e veiyasa i vuravura na iwiliwili ni “mataveitacini.” (1 Pita 2:17) E wiliki qai vakamacalataki e matanalevu na Vosa ni Kalou ena noda soqoni. E vakarautaka o Jiova ena nona isoqosoqo na porokaramu totoka ni veivakavulici. E tabaki tale ga vakalevu ena ivola na kakana vakayalo meda vakayagataka ena noda vuli vakataki keda kei na noda vuli vakavuvale. E vakadinadinataka e dua e lewe ni iLawalawa Dauvakatulewa: “Niu vakasamataka vakatitobu na Vosa i Jiova, vakananuma na kena ibalebale, vakasaqara na vuku kei na kilaka, e levu sara ga kina na iyau vakayalo kei na lomavakacegu au vakila.” Io, ‘e rawa ni kamikamica ina yaloda na daukila ka.’​—Vkai. 2:10.

E veisiga e rogoca o Jiova na masu ni yalododonu. Na masu va qori e vaka na ka boi vinaka vei Jiova. (Same 141:2) E ka marautaki meda kila ni taleitaka o Jiova me rogoci keda nida masuti koya ena yalomalumalumu!

A masuta o Mosese: “Me cilavi keimami na serau i Jiova na neimami Kalou: Ia mo ni vakataudeitaka vei keimami na cakacaka ni liga i keimami.” (Same 90:17) E vakalougatataka o Jiova na noda cakacaka nida gumatuataka na noda cakacaka vakaitalatala. (Vkai. 10:22) Eda na rairai vukea eso mera mai vulica na ka dina. De dua sa vica vata na yabaki noda vosota voli mai nodra sega ni kauai e levu ena noda cakacaka vakaitalatala, noda tautauvimate, vusolo ni lomada se da tusaqati. (1 Ces. 2:2) Ia eda se raica tiko ga na “lagilagi i Jiova” da qai vakadinata ni marautaka vakalevu na noda sasaga na Tamada vakalomalagi.

E lagata o Tevita, “A noqui votavota, kei na noqu bilo talega ko Jiova: Oi kemuni sa vakataudeitaka na ka ka’u sa taukena. Sa lutu nai yalayala ni noqu vanua e na yasana vinaka, Io, sa votai vei au na vanua sa rairai vinaka.” (Same 16:​5, 6) E vakavinavinakataka o Tevita na nona “ivotavota,” ya nona veiwekani vinaka kei Jiova kei na itavi dokai me qaravi koya. Me vakataki Tevita, eda na rairai sotava eso na ka dredre, ia eda vakila tale ga e levu na veivakalougatataki vakayalo! Meda tomana tiko ga noda marautaka na sokalou dina qai ‘vakavinavinakataka’ ena valenisoro vakayalo i Jiova.