Cava mo Kauaitaka Kina na Matanitu ni Kalou?

Era nuitaka tu e milioni na tamata e veiyasa i vuravura na Matanitu ni Kalou. Era vakatotomuri Jisu ni uqeti ira na nona imuri mera masulaka: “Me yaco mai na nomuni matanitu. Me caka na lomamuni e vuravura.”—Maciu 6:10.

Levu era kauaitaka dina na Matanitu ni Kalou, ia kena veibasai o lotu ni kauai sara vakalailai. E kaya kina na daunitukutuku makawa o H. G. Wells ni vakasakiti dina nona “kauaitaka vakabibi” o Jisu “na kena tukuni na Matanitu Vakalomalagi,” e tomana ni “sega sara ga ni kilai qori ena nodra ivakavuvuli e levu na lotu vaKarisito.”

Era sega ni va qori na iVakadinadina i Jiova nira dau vakabibitaka sara ga na Matanitu ni Kalou. Vakasamataka mada: Na ivola oni wilika tiko qo e tabaki ena rauta ni 220 na vosa. Voleka ni 46 na milioni na kena itabataba era tabaki qai levu duadua na kena veisoliyaki e veiyasa i vuravura. Na itukutuku bibi cava e tiko ena ivola qo? Dikeva mada na kena ulutaga: Na Vale ni Vakatawa Kacivaka na Matanitu i Jiova.a

Cava era gumatua kina na iVakadinadina i Jiova mera kacivaka se tukuna na Matanitu ni Kalou? Dua ya ni keimami vakabauta ni Matanitu ni Kalou e usutu bibi sara ga ni iVolatabu. Kena ikuri, keimami kila ni Matanitu ni Kalou e iwali duadua ni leqa e tarai keda tu nikua.

Era saga na iVakadinadina i Jiova mera vakatotomuri Jisu nira kauaitaka na Matanitu ni Kalou. E vakaliuca sara ga o Jisu na Matanitu ni Kalou ena nona bula kei na cakacaka vakaitalatala ni bula voli e vuravura. (Luke 4:43) Cava e bibi kina vei Jisu na Matanitu qori? Cava me bibi kina vei iko? Oni sureti moni dikeva na kena isau vakaivolatabu ena vica na ulutaga tarava.