2 Veivuke ena Wali ni Leqa

LOMAOCAOCA

E kaya e dua na goneyalewa o Rosie: “Au dau lomaleqa niu vakasamataka eso na ka ena rairai sega sara ga ni yaco.” Dua na tikinivolatabu e vukei au na Maciu 6:34: “Kua vakadua ni lomaocaocataka na siga nimataka, ni siga nimataka e tu vata kei na kena lomaocaoca. Na siga kece sa dui tu ga na kena ca.” E kaya o Rosie ni vukei koya na vosa qori i Jisu me kua ni lomaocaocataka na veika ena rairai yaco nimataka. E kaya tale o Rosie: “Na noqu leqataka na veika e se sega ni yaco se na rairai sega sara ga ni yaco, e ikuri tale ni leqa vei au.”

E vakila e dua tale na goneyalewa o Yasmine ni sa sega ni valuta rawa na lomaocaoca. E kaya: “Vica na siga e lomanimacawa noqu tagi voli, au sega ni moce tale ga ena so na bogi. E vaka me sa kani au tu na rai cala.” E kaya o Yasmine ni vukei koya na 1 Pita 5:7: “Biuta vua [na Kalou] na nomuni lomaocaoca kece, ni kauaitaki kemuni o koya.” E kaya tale o Yasmine: “Au masu tiko ga vei Jiova, qai sauma o koya noqu masu. Au vakila ni vaka ga e taluva mai tabaqu e dua na icolacola levu. E dau cala noqu rai ena so na gauna, ia au sa kila na ka meu cakava.”

LOKUYARA

E kaya e dua na goneyalewa o Isabella: “Au kila e mate ni kawa na lokuyara baleta e laurai tale ga vei noqu ta. Au dau lokuyarataka noqu cakava eso na ka e dodonu me vakatotolotaki, au sa qai mokusiga tu ga se sara tivi. E sega ni vinaka na lokuyara ni vakavuna vakalevu na lomaocaoca qai sega ni caka vinaka kina na cakacaka.” E vukei Isabella na ivakavuvuli ena 2 Timoci 2:15, e tukuni kina: “Gumatua sara mo vakaraitaka ena mata ni Kalou ni ganiti iko na nona veivakadonui, na tamata cakacaka e sega ni dua na ka e maduataka.” E kaya tale o Isabella: “Au sega ni vinakata me madualaki au o Jiova niu lokuyarataka noqu cakacaka.” Dua na veisau levu sa laurai vei Isabella.

E kaya e dua tale na goneyalewa o Kelsey: “Au sega ni dau cakava na ka ena kena gauna, au dau qai veiciciyaki kina e muri. Qori e dau vakavuna meu tagi, sega ni moce vinaka, qai lomaleqa. E sega ni vinaka na ka au vakila kina.” E vukei Kelsey na Vosa Vakaibalebale 13:16: “Na tamata yalomatua e lewa vinaka na nona ivalavala, ia o koya e lialia e vakaraitaka na nona lialia.” E vukei Kelsey nona vakasamataka vakatitobu na tikinivolatabu qori. E kaya: “E vinaka na yalomatua kei na lalawa. Sa toka ena noqu desi ena gauna qo e dua na ivola sa tuvani tu kina na noqu cakacaka. E vukei au qori meu tuvanaka vinaka noqu cakacaka, meu kua kina ni veiciciyaki e muri.”

GALILI

E kaya e dua na yalewa o Kirsten: “Ratou se lalai na va na luvei keirau ni biuti keitou o watiqu.” E qai vukei koya na ivakavuvuli vakaivolatabu ena Vosa Vakaibalebale 17:17, e tukuni kina: “Na itokani dina e loloma ena veigauna, e tacida ena gauna ni rarawa.” Ni kere veivuke o Kirsten vei ira na nona itokani era qaravi Jiova tale ga, e kaya: “Levu na ka era vukei au kina noqu itokani! Eso era dau volivoli mai se ra soli senikau vei keitou. Era veivuke vakatolu eso ena neitou toki mai na dua na vale ina dua tale. Dua e vukei au ena vaqara cakacaka. E sega ni cegu nodra tokoni au na noqu itokani.”

E dau galili tale ga o Delphine sa cavuti oti mai. Ni nanuma lesu na ka e sotava, e kaya ni tarai koya vakalevu nona raica nira marautaka tu na nodra bula eso tale, ia e rarawa qai galili o koya. E vukei koya na Same 68:6: “Na Kalou e solia vei ira na tu taudua na vale me nodra itikotiko.” E kaya o Delphine: “Au dau nanuma tu ni tukuna tiko ga na tikinivolatabu ya ni na dua noqu vale ena gauna qo. Au qai kila ni toso na gauna ni vakarautaka tale ga vei keda na Kalou e dua na vuvale vakayalo. Eda na taqomaki vinaka e kea, eda na veivolekati tale ga kei ira na itokani dina era lomani Jiova. Ia au kila ni bibi meu vakavolekati au e liu vei Jiova, au na qai rawa ni veitokani voleka kei ira eso tale. Qori na ka e veivakadeitaki kina na Same 37:4: ‘Mo rekitaki Jiova, ena qai solia vei iko na veika e gadreva na lomamu.’”

E tomana o Delphine: “Au raica ni bibi meu kabiti Jiova tiko ga. O koya ga na itokani vinaka duadua. Au vakavola eso na ka au rawa ni cakava vata kei ira eso tale, meu rawa ni veitokani kina kei ira era lomani Jiova. Au saga meu raica ga na ka era vinaka kina eso tale, meu kua ni kauaitaka nodra malumalumu.”

Era se ivalavala ca tiko ga o ira era qarava na Kalou. Era sotava tiko na leqa na iVakadinadina i Jiova me vakataki ira na kena vo. Ia e veiuqeti na iVolatabu meda dau veivuke ena gauna veiganiti kece. E ka vakayalomatua meda veitokani kei ira era dau veivukei. Eso na leqa me vaka na tauvimate kei na lolosi ena sega ni rawa ni wali ena gauna qo. Vakacava e rawa ni veivuke tale ga ena ituvaki va qori na ivakavuvuli vakaivolatabu?